Јеһованын Кәламы ҹанлыдыр
«Икинҹи Шамуел» китабындан диггәтәлајиг фикирләр
АЛЛАҺЫН гаршысында нөгсансыз олмаг нә демәкдир? Бу, Аллаһын һөкмранлығыны гәбул едән инсанын һеч заман сәһвә јол вермәдән Она итаәт едәҹәјини нәзәрдә тутурму? Кимләри һәгиги Аллаһын «үрәјинә јатан» адамлар адландырмаг олар? (1 Шамуел 13:14). «Икинҹи Шамуел» китабындан бу суалларын һамысына кифајәтләндириҹи ҹаваблар тапмаг олар.
«Икинҹи Шамуел» китабы гәдим Исраилин падшаһы Давудла јахын мүнасибәтдә олан Гад вә Натан адлы ики пејғәмбәр тәрәфиндән јазылмышдырa. Ерамыздан әввәл тәхминән 1040-ҹы илдә, Давудун 40 иллик падшаһлығынын сонуна јахын јазылыб баша чатан бу китаб, әсас е’тибары илә Давудун вә онун Јеһова илә олан мүнасибәтләри һаггындадыр. Орада, дахили гарышыглыглар уҹбатындан парчаланмыш өлкәнин шүҹаәтли падшаһын рәһбәрлији алтында бирләшмәси ҹанлы сурәтдә тәсвир олунур. Бу мараглы һекајә о дөврүн адамларынын кечирдији һәјәҹан вә һиссләри ашкар едир.
«ДАВУД ҜЕТДИКҸӘ ЈҮКСӘЛИРДИ»
Шаулун вә Јонатанын өлүм хәбәринә ҝөстәрдији мүнасибәт, Давудун онлара вә Јеһоваја олан һиссләрини ачыглајыр. Давуд Хевронда Јәһуда гәбиләси үзәриндә падшаһ тә’јин олунур. Шаулун оғлу Иш-Бошет Исраилин галан һиссәси үзәриндә падшаһ олур. «Давуд ҝетдикҹә јүксәлир» вә једди ил алты ајдан сонра бүтүн Исраил үзәриндә падшаһлыг етмәјә башлајыр (2 Шамуел 5:10).
Давуд Јерусәлими јевуслуларын әлиндән алыр вә өз падшаһлығынын пајтахты едир. Онун Әһд сандығыны Јерусәлимә ҝәтирмәк үчүн илк ҹәһди фаҹиә илә нәтиҹәләнир. Лакин Давуд сәһвини дүзәлдир вә сандыг Јерусәлимә ҝәтириләндә севинҹиндән рәгс едир. Јеһова Давудла падшаһлыг һаггында әһд кәсир. Давуд, Аллаһ онунла олдуғу үчүн дүшмәнләрини мәғлуб едир.
Мүгәддәс Китаб суалларына ҹаваблар:
2:18 — Нәјә ҝөрә Јоав вә ики гардашы аналары Серујанын ады илә чағырылырлар? Ибраниҹә Мүгәддәс Јазыларда нәсил шәҹәрәсини давам етдирән кәс атадыр. Еһтимал ки, Серујанын әри вахтындан әввәл өлмүш, ја да ки, Мүгәддәс Јазыларда хатырланмаға мүнасиб ҝөрүлмәмишдир. Бәлкә дә Давудун доғма вә ја өҝеј баҹысы олдуғу үчүн Серуја хүсуси тәрздә гејд олунуб (1 Салнамәләр 2:15, 16). Бу үч гардашын атасы барәдә анҹаг онун Бет-Лехемдә дәфн олунмасы илә әлагәдар хатырланыр (2 Шамуел 2:32).
3:29 — «Голтуг ағаҹына сөјкәнән [«иј тутан», ЈД]» адам нә демәкдир? Тохуҹулуг адәтән гадынларын мәшғулијјәти иди. Бу сөзләр, еһтимал ки, һәрби хидмәтә јарамајан вә буна ҝөрә дә гадын иши илә мәшғул олмаг мәҹбуријјәтиндә олан кишиләрә аид иди.
5:1, 2 — Давуд Иш-Бошетин гәтлиндән нечә ил сонра Исраилдә падшаһ олду? Белә бир нәтиҹәјә ҝәлмәк мәнтигәујғундур ки, Иш-Бошетин ики ил давам едән падшаһлығы Шаулун өлүмүндән дәрһал сонра башланды. Елә һәмин вахт Давуд Хевронда падшаһлыг етмәјә башламышды. О, Јәһуда үзәриндә једди ил јарым рәһбәрлик етди. Бүтүн Исраил үзәриндә падшаһ оландан сонра, о, Јерусәлими пајтахт шәһәри етди. Беләликлә, Давуд Иш-Бошетин өлүмүндән тәхминән беш ил сонра бүтүн Исраил үзәриндә падшаһ олду (2 Шамуел 2:3, 4, 8-11; 5:4, 5).
8:2 — Исраиллиләрлә дөјүшдән сонра нә гәдәр моавлы е’дам едилди? Еһтимал ки, онлары сајмаг әвәзинә, Давудун әмри илә јерә јанбајан узадараг «өлчү ипи илә өлчдү»ләр. Ҝөрүндүјү кими, «ики ҹәрҝә», јә’ни моавлыларын үчдә икиси өлдүрүлдү, «бир ҹәрҝә» исә, јә’ни үчдә бири сағ бурахылды.
Бизим үчүн ибрәт дәрсләри:
2:1; 5:19, 23. Давуд Хеврона көчмәздән вә дүшмәнләрлә дөјүшмәздән әввәл Јеһова илә мәсләһәтләшди. Руһанилијимизә тә’сир ҝөстәрә биләҹәк гәрарлар гәбул етмәздән әввәл биз дә Јеһованын рәһбәрлијини ахтармалыјыг.
3:26-30. Гисас аҹы нәтиҹәләрә ҝәтириб чыхарыр (Ромалылара 12:17-19).
3:31-34; 4:9-12. Давудун әдавәт сахламамасы вә гисас алмамасы бизим үчүн јахшы нүмунәдир.
5:12. Һеч вахт јаддан чыхармамалыјыг ки, Јеһова бизә Өз јолларыны өјрәтмиш вә Өзү илә сәмими вә јахын мүнасибәтләр инкишаф етдирмәјә имкан јаратмышдыр.
6:1-7. Давудун нијјәтләри јахшы олса да, Әһд сандығыны арабада көчүрмәк гәрары Аллаһын ҝөстәришләринә зидд олдуғу үчүн баш тутмады (Чыхыш 25:13, 14; Сајлар 4:15, 19; 7:7-9). Уззанын Әһд сандығындан јапышмасы да ҝөстәрди ки, инсанларын јахшы нијјәтләри Аллаһын тәләбләрини дәјишә билмәз.
6:8, 9. Дүшдүјү ағыр вәзијјәтдә Давуд әввәлҹә «мә’јус олду [«гәзәбләнди», КМ]», сонра исә горхду вә еһтимал ки, баш верәнләрдә Јеһованы ҝүнаһландырды. Онун ҝөстәришләринә е’тинасыз јанашмағымызын сајәсиндә баш верән фәлакәтләрә ҝөрә Јеһованы ҝүнаһландырмагдан гачынмалыјыг.
7:18, 22, 23, 26. Давудун һәлимлији, Јеһоваја һәдсиз сәдагәти вә Онун адыны иззәтләндирмәк һазырлығы — тәглид едилмәјә лајиг кејфијјәтләрдир.
8:2. Тәхминән 400 ил әввәл дејилән пејғәмбәрлик јеринә јетди (Сајлар 24:17). Јеһованын дедикләри һәмишә баш тутур.
9:1, 6, 7. Давуд вә’дини јеринә јетирди. Биз дә өз сөзүмүзүн үстүндә дурмаг үчүн сә’ј ҝөстәрмәлијик.
ЈЕҺОВА МӘҺС ЕДИЛМИШИНӘ ‘ГАРШЫ ПИСЛИК ЧЫХАРЫР’
«Бах сәнә гаршы пислији өз нәслиндән чыхараҹағам вә сәнин ҝөзүнүн өнүндә арвадларыны ҝөтүрүб јахынына верәҹәјәм. О да ҝөз ҝөрә-ҝөрә, ҝүндүзүн ҝүнорта чағы сәнин арвадларынла јатаҹаг» (2 Шамуел 12:11). Јеһованын бу сөзләри сөјләмәсинин сәбәби Давудун Бат-Шева илә зина етмәси иди. Төвбә едән Давуд бағышланса да, ишләтдији ҝүнаһын нәтиҹәләриндән азад едилмәди.
Әввәлҹә Бат-Шеванын доғдуғу ушаг өлүр. Сонра Давудун бакирә гызы Тамар өҝеј гардашы Амнон тәрәфиндән зорланыр. Тамарын доғма гардашы Авшалом баҹысынын гисасыны алмаг арзусу илә Амнону өлдүрүр, сонра исә атасына гаршы суи-гәсд һазырлајыр вә өзүнү Хевронда падшаһ е’лан едир. Давуд Јерусәлимдән гачмаг мәҹбуријјәтиндә галыр. Авшалом атасынын евә нәзарәт етмәк үчүн гојуб ҝетдији ҹаријәләрдән ону илә ҹинси әлагәјә ҝирир. Давуд анҹаг Авшаломун гәтлә јетирилмәсиндән сонра падшаһлыға гајыдыр. Бинјаминли Шеванын гијамы онун өлүмү илә нәтиҹәләнир.
Мүгәддәс Китаб суалларына ҹаваблар:
14:7 — «Көз» нәји тәмсил едир? Көз јашајан өвладлара ишарә едир.
19:29 — Давудун Мефибошетин сөзләринә ҝөстәрдији реаксијаны неҹә изаһ етмәк олар? Мефибошетин вердији изаһаты ешитдикдә, Давуд, еһтимал ки, Сиванын сөзләринә инанмагла сәһвә јол вердијини баша дүшдү (2 Шамуел 16:1-4; 19:24-28). Чох ҝүман ки, Давуд гәзәбләнди вә бу мәсәлә барәдә артыг һеч нә ешитмәк истәмәди.
Бизим үчүн ибрәт дәрсләри:
11:2-15. Давудун сәһвләри һаггындакы дүзҝүн мә’лумат Мүгәддәс Китабын Аллаһдан илһам алдығыны сүбут едир.
11:16-27. Ҹидди ҝүнаһ ишләтдијимиз заман Давуд кими ону ҝизләтмәјә ҹәһд ҝөстәрмәмәлијик. Бунун әвәзинә ҝүнаһымызы Јеһованын гаршысында е’тираф етмәли вә јығынҹағын ағсаггалларынын көмәјини ахтармалыјыг (Сүлејманын мәсәлләри 28:13; Јагуб 5:13-16).
12:1-14. Натан јығынҹағын тә’јин олунмуш ағсаггаллары үчүн ҝөзәл нүмунәдир. Онлар ҝүнаһ ишләдәнләрә јенидән дүз јола гајытмаға көмәк етмәли вә бу иши баҹарыгла јеринә јетирмәлидирләр.
12:15-23. Давуд башына ҝәлән фәлакәтләрлә әлагәдар дүзҝүн нөгтеји-нәзәрә малик иди. Бу исә она һәмин фәлакәтләрин өһдәсиндән ҝәлмәкдә көмәк етди.
15:12; 16:15, 21, 23. Авшаломун тахта чыхаҹағы мә’лум оланда, мәғрурлуг вә шөһрәтпәрәстлик зәкалы мәсләһәтчи Ахитофели хаин чыхмаға тәһрик етди. Һәлимлик вә сәдагәт олмајан јердә әгли габилијјәт тәләјә чеврилә биләр.
19:24, 30. Давудун мәһәббәт вә хејирхаһлығына ҝөрә Мефибошет она үрәкдән миннәтдар иди. О, падшаһын Сива илә бағлы гәрарына һазырлыгла табе олду. Јеһоваја вә Онун тәшкилатына олан миннәтдарлығымыз бизи итаәткар олмаға тәшвиг едәҹәк.
20:21, 22. Бир нәфәрин һикмәтли давранышы чохларыны фәлакәтдән гуртара биләр (Ваиз 9:14, 15).
«ГОЈ РӘББИН ӘЛИНӘ ДҮШӘК»
Ҝивеонлуларын өлүмүндә ҝүнаһкар олан Шаулдан өтрү Исраилдә үч илдир ки, гураглыг вә гытлыг һөкм сүрүр (Јешуа 9:15). Ҝивеонлулар бу гырғынын әвәзини чыхмаг үчүн Шаулун једди оғлунун өлдүрүлмәсини тәләб едирләр. Давуд онлары ҝивеонлуларын әлинә тәслим едир вә гураглыг дөврү јағышла баша чатыр. Дөрд нәһәнҝ филиштли ‘Давудун вә онун адамларынын әли илә гырылыр’ (2 Шамуел 21:22).
Давуд ганунсуз олараг халгы сијаһыја алмагла ҹидди ҝүнаһ ишләдир. О төвбә едир вә «Рәббин әлинә» дүшмәји үстүн тутур (2 Шамуел 24:14). Нәтиҹәдә 70 000 адам вәбадан һәлак олур. Давуд Јеһованын әмринә табе олур вә ҹәза сона чатыр.
Мүгәддәс Китаб суалларына ҹаваблар:
21:9, 10 — Риспа ҝивеонлулар тәрәфиндән өлдүрүлмүш ики оғлунун вә Шаулун беш нәвәсинин ҹәсәдини нечә мүддәт горуду? Бу једди нәфәр «бичин вахтынын илк ҝүнләриндә» — март вә ја апрел ајында дағын үстүндә асылмышдыр. Јеһованын гураглыға сон гојмагла гәзәбинин јатдығыны ҝөстәрдији вахта гәдәр Риспа бу ҹәсәдләри ҝеҹә вә ҝүндүз горуду. Бичин вахтынын сона чатдығы октјабр ајына гәдәр јағышларын јағмасы еһтималы аздыр. Буна ҝөрә дә, Риспанын ҹәсәдләри 5-6 ај мүддәтиндә горумасы еһтимал едилир. Даһа сонра Давуд һәмин адамларын сүмүкләрини басдырды.
24:1 — Давудун халгы сијаһыја алмасы нәјә ҝөрә ҹидди ҝүнаһ сајылды? Өзү-өзлүјүндә халгын сијаһыја алынмасы Мусанын ганунуна зидд дејилди (Сајлар 1:1-3; 26:1-4). Мүгәддәс Китабда Давудун бу һәрәкәтинин сәбәби дејилмир. Лакин 1 Салнамәләр 21:1 ајәсиндә дејилир ки, Давуду исраиллиләри сијаһыја алмаға ‘тәһрик едән’ Шејтан иди. Һәр неҹә олса да, орду башчысы Јоав, халгы сајмаг гәрарынын сәһв олдуғуну билирди вә Давуду фикриндән дашындырмаға чалышырды.
Бизим үчүн ибрәт дәрсләри:
22:2-51. Давудун маһнылары Јеһованы ҝүвәнә биләҹәјимиз һәгиги Аллаһ кими чох ҝөзәл тәсвир едир.
23:15-17. Јеһованын һәјат вә ганла бағлы ганунуна Давудун һөрмәти о дәрәҹәдә ҝүҹлү иди ки, бу һадисәдә јолверилмәз кими ҝөрүнән шеји белә етмәкдән гачынды. Биз өзүмүздә Аллаһын бүтүн әмрләринә бу ҹүр мүнасибәт инкишаф етдирмәлијик.
24:10. Давудун виҹданы ону төвбә етмәјә тәшвиг етди. Бизим дә виҹданымыз бизи бу ҹүр давранмаға тәшвиг едәҹәк дәрәҹәдә һәссасдырмы?
24:14. Давуд Јеһованын инсанлардан даһа рәһмли олдуғуну билирди. Бизим дә бу ҹүр әминлијимиз вармы?
24:17. Давуд ишләтдији ҝүнаһын бүтүн халга изтираб ҝәтирдији үчүн пешманчылыг чәкирди. Төвбә едән ҝүнаһкар Аллаһын јығынҹағына рүсвајчылыг ҝәтирдији үчүн виҹдан әзабы чәкмәлидир.
Рәббин «үрәјинә јатан» адам ола биләрик
Исраилин икинҹи падшаһы Јеһованын «үрәјинә јатан бир адам» иди (1 Шамуел 13:14). Давуд Јеһованын адил нормаларыны һеч заман шүбһә алтына гојмурду вә Аллаһдан мүстәгил олмаға ҹан атмырды. Һәр дәфә сәһвә јол верәндә Давуд ҝүнаһыны бојнуна алыр, верилән ҹәзаны гәбул едир вә јолларыны дүзәлдирди. О, нөгсансыз адам иди. Хүсусилә дә ҝүнаһ ишләтдијимиз һалларда бизим дә, онун кими давранмағымыз мүдриклик олмазмы?
Давудун һәјаты ајдын тәрздә ҝөстәрир ки, Јеһованын һакимијјәтинә табе олмаг Онун пислијә вә јахшылыға даир нормаларыны гәбул етмәји вә нөгсансызлығын горујуҹулары кими онлара табе олмаг үчүн сә’ј ҝөстәрмәји нәзәрдә тутур. Биз буна наил ола биләрик. «Икинҹи Шамуел» китабындан алдығымыз ибрәт дәрсләринә ҝөрә Јеһоваја неҹә дә миннәтдарыг! Аллаһын бу китабын сәһифәләриндәки кәламы «ҹанлы вә тә’сирли»дир (Ибраниләрә 4:12).
[Һашијә]
a Шамуел бу китабын јазылмасында иштирак етмәмишдир. Лакин габагҹадан Ибраниҹә Мүгәддәс Јазыларда бу ики китаб ваһид тумар тәшкил едирди. Вә «Биринҹи Шамуел» китабынын бөјүк һиссәсини Шамуел јаздығы үчүн «Икинҹи Шамуел» китабы онун адыны дашыјыр.
[14-ҹү сәһифәдәки шәкил]
Тахтынын ким тәрәфиндән мөһкәмләндијини хатырламасы Давуда һәлим галмагда көмәк едирди.
[16-ҹы сәһифәдәки шәкилләр]
«Сәнә гаршы пислији өз нәслиндән чыхараҹағам».
Бат-Шева
Тамар
Амнон