Әламәтләри сезә билмәк ҹидди мәсәләдир!
«Әввәлҹә мән елә дүшүнүрдүм ки, оғлумуз Андреасын садәҹә башы ағрыјыр. Анҹаг о, иштаһадан кәсилди вә гыздырмасы галхды. Баш ағрысынын даһа да ҝүҹләндијини ҝөрәндә, нараһат олмаға башладым. Әрим евә ҝәләндә, ону һәкимә апардыг. Һәким Андреасы мүајинә етдикдән сонра, дәрһал ону хәстәханаја ҝөндәрди. Бу, садәҹә баш ағрысы дејилди. Андреасда менинҝит хәстәлији тапылды. Мүалиҹә олундугдан сонра Андреас тез бир заманда сағалды» Гертруд (Алманија).
ГЕРТРУДУН кечирдији һиссләр валидејнләрин чохуна танышдыр. Онлар өвладларындакы һалсызлыг әламәтини дәрһал һисс едирләр. Бә’зән хәстәлик ҹидди олмаса да, ушағынын өзүнү пис һисс етдијини ҝөрән валидејн нараһат олмаға башлајыр. Әламәтләри сезмәк вә мүвафиг тәдбирләр ҝөрмәк чох ваҹибдир. Чүнки бундан чох шеј асылыдыр.
Буну јалныз сағламлыға дејил, башга саһәләрә дә тәтбиг етмәк олар. Мисал үчүн, 2004-ҹү илин декабр ајында Һинд океаны саһилләриндә бөјүк фәлакәтә јол ачан сунамини ҝөтүрәк. Австралијанын вә Һавајын хүсуси хидмәт органлары Суматранын шималында ҝүҹлү суалты зәлзәлә гејдә алмыш вә бунун нәтиҹәсинин ҹидди ола биләҹәјини әввәлҹәдән хәбәр вермишдир. Анҹаг тәһлүкә ҝөзләнилән әразиләрдә јашајан инсанларын гаршыдакы фәлакәтдән хәбәр тутмаг вә мүәјјән тәдбирләр ҝөрмәк үчүн һеч бир имканлары олмамышды. Нәтиҹәдә 220 000-дән чох инсан һәлак олду.
Даһа ваҹиб әламәтләр
Иса Мәсиһ јер үзүндә оларкән, ону динләјәнләрә әламәтләри сезмәјин вә мүвафиг тәдбирләр ҝөрмәјин нә гәдәр ваҹиб олдуғуну өјрәтди. О, чох ваҹиб шејләр һаггында данышырды. Мүгәддәс Китабда дејилир: «Фәрисејләр илә садукејләр јахынлашыб, Исаны сынамаг үчүн хаһиш етдиләр ки, онлара ҝөјдән бир әламәт ҝөстәрсин. Иса исә ҹаваб вериб деди: “Ахшам оланда сиз дејәрсиниз: “Һава исти олаҹаг, чүнки ҝөј гырмызыдыр” вә сәһәр чағы: “Бу ҝүн фыртына гопаҹаг, чүнки ҝөј гызарыб, тутгундур”, — дејирсиниз. Икиүзлүләр! Ҝөјүн һалыны сечә билирсиниз, анҹаг дөврүн әламәтләрини сечә билмирсинизми?» (Матта 16:1-3).
Иса, «дөврүн әламәтләрини» хатырлатмагла ҝөстәрмәк истәјирди ки, ону динләјән биринҹи әсрин јәһудиләри һансы дөврдә јашадыгларындан аҝаһ олмалыдырлар. Јәһуди системини бөјүк фәлакәт ҝөзләјирди вә бу, онларын һамысына тә’сир ҝөстәрәҹәкди. Иса өлүмүндән бир нечә ҝүн әввәл шаҝирдләринә даһа бир әламәтдән, өз иштиракынын әламәтиндән данышды. Исанын о вахт дедији сөзләр бүтүн бәшәријјәт үчүн һәјати ваҹиб әһәмијјәтә маликдир.