Аллаһ јашлыларын гејдинә галыр

ЈАШЛЫЛАРЛА пис рәфтар бу ҝүн бүтүн дүнјада ҝениш јајылыб вә артыг һеч кәсдә тәәҹҹүб доғурмур. Мүгәддәс Китабда чохдан пејғәмбәрлик едилмишдир ки, бу аллаһсыз системин ‘ахыр ҝүнләриндә инсанлар худбин, шәфгәтсиз’ олаҹаглар (2 Тимотејә 3:1-3). Дилимизә «шәфгәт» кими тәрҹүмә олунан јунан сөзү аилә үзвләринин бир-биринә бәсләдији мәһәббәт мә’насыны верир. Бу ҝүн Мүгәддәс Китаб пејғәмбәрлијинин һәгигәтән дә јеринә јетдијини ҝөрмәк олар, белә ки, аиләләрдә бу ҹүр мәһәббәт, демәк олар, јох дәрәҹәсиндәдир.

Јашлыларла пис рәфтар едәнләрдән фәргли олараг, Јеһова Аллаһ јашлыларын гајғысына галыр вә онлары јүксәк гијмәтләндирир. Ҝәлин Мүгәддәс Китабда буна аид нүмунәләрә бахаг.

‘Дул гадынларын мүдафиәчиси’

Јеһова Аллаһын јашлыларын гејдинә галмасыны Ибраниҹә Мүгәддәс Јазылардан ҝөрмәк олар. Мәсәлән, Мәзмур 68:5 ајәсиндә Давуд Јеһова Аллаһы адәтән ағбирчәк олан, ‘дул гадынларын мүдафиәчиси’ адландырырa. Бәли, Јеһова дул гадынларын гејдинә галыр. Мүгәддәс Китабда һәтта дејилир ки, дул гадынларла пис рәфтар Аллаһда гәзәб доғурур (Чыхыш 22:22-24). Аллаһ вә Онун хидмәтчиләри дул гадынларла јанашы бүтүн садиг јашлылары јүксәк гијмәтләндирирләр. Сүлејманын мәсәлләри 16:31 ајәсиндә Јеһованын вә Онун халгынын јашлылара олан мүнасибәти белә тәсвир едилир: «Ағаран сачлар шәрәф таҹыдыр, салеһлик јолунун газанҹыдыр».

Јашлылара һөрмәт Исраилә верилмиш Ганунун ајрылмаз бир һиссәси иди. Онлара әмр едилмишди: «Јашлыларын гаршысында ајаға дурун, ағсаггаллара һөрмәт еләјин. Аллаһыныздан горхун. Рәбб Мәнәм» (Левилиләр 19:32). Ҝөрдүјүмүз кими, исраиллиләрин јашлыларла рәфтары Јеһова Аллаһла мүнасибәтләри илә сых бағлы иди. Аллаһы севирәм дејиб, јашлыја һөрмәтсизлик ҝөстәрән адам Аллаһын гаршысында јалан сөјләмиш олурду.

Мәсиһчиләр Мусанын ганунуна табе дејилләр. Онлар давраныш тәрзләрини истигамәтләндирән, онларда валидејнләрә вә јашлылара мәһәббәт вә гајғы кими кејфијјәтләр формалашдыран ‘Мәсиһин Ганунуна’ табедирләр (Галатијалылара 6:2; Ефеслиләрә 6:1-3; 1 Тимотејә 5:1-3). Мәсиһчиләри мәһәббәт тәзаһүр етдирмәјә киминсә әмри јох, үрәкләри тәшвиг едир. Һәвари Петер јазырды: «Бир-биринизи вар гүввә илә сәмими гәлбдән севин» (1 Петер 1:22).

Шаҝирд Јагуб да бизи јашлыларын гејдинә галмаға тәшвиг едир: «Ата Аллаһын јанында тәмиз вә ләкәсиз диндарлыг будур: јетимләри вә дуллары онларын мәшәггәтли анларында зијарәт етмәк вә өзүнү дүнјадан ләкәсиз сахламаг» (Јагуб 1:27). Јагуб белә адамларын Јеһова Аллаһ үчүн нә гәдәр әзиз олдугларыны ҝөзәл вурғулајыр.

Демәли, јашлыларла пис давранмамаг ишин јарысыдыр. Јашлылара сәмими мараг ҝөстәрмәк, онлара әмәлдә көмәк етмәк лазымдыр. (4-ҹү вә 5-ҹи сәһифәләрдәки «Әмәллә тәзаһүр етдирилән мәһәббәт» чәрчивәсинә бахын.) Јагуб јазырды: «Иман ... әмәлләр олмадыгда өлүдүр» (Јагуб 2:26).

«Мәшәггәтли анларында» тәсәлли

Јагуб 1:27 ајәсинә бир дә диггәт јетирәк. Фикир вердинизсә, о, мәсиһчиләри дулларын гејдинә онларын «мәшәггәтли анларында» галмаға чағырырды. «Мәшәггәт» сөзүнүн јунан дилиндә дәрд, хәстәлик, әзаб-әзијјәт кими мә’налары вар. Јашлыларын чохунун һәјатында бу ҹүр шејләр даими гонагдыр. Бә’зиләри тәнһалыгдан әзијјәт чәкир. Диҝәрләри ҝәнҹлик јашларындакы кими ҝүмраһ олмадыглары үчүн кәдәрләнирләр. Һәтта тәблиғ хидмәтиндә фәал иштирак едәнләр дә арабир руһдан дүшүрләр. Мәсәлән, 80 јашлы Ҹонунb нүмунәсини нәзәрдән кечирәк. Бу садиг гардаш 40 илдән артыгдыр ки, Аллаһын Падшаһлығыны е’лан едир. Сон отуз или исә хүсуси таммүддәтли хидмәтдә кечирмишдир. О, һәрдән руһдан дүшдүјүнү е’тираф едир: «Ҝери дөнүб һәјатыма баханда бурахдығым сәһвләри хатырлајырам. Сәһвләрим чох олуб. Елә һеј фикирләширәм ки, бу сәһвләри етмәјә дә биләрдим».

Бу ҹүр һиссләр кечирән баҹы-гардашларымыз гој унутмасынлар ки, Јеһова камил олса да, һеч кәсдән камиллик ҝөзләмир. Дүздүр, О бизим ҝүнаһларымызы билир. Амма ҝөрүн Мүгәддәс Китаб Онун һаггында башга нә дејир: «Ја Рәбб, бизим тәгсирләримизи сијаһыја алсајдын, еј Худавәнд, ким бунун гаршысында дајана биләр?» (Мәзмур 130:3). Бәли, Јеһова Аллаһ сәһвләримизә бахмыр, О, үрәјимиздә олана бахыр. Буну һарадан билирик?

Давуд падшаһ сәһвләрә јол верирди. О да бизим кими гејри-камил инсан иди. Буна бахмајараг, Аллаһ ону Мәзмур 139:1-3 ајәләриндәки сөзләри јазмаға илһамландырмышды: «Ја Рәбб, мәни јохлајараг таныдын, отурушуму-дурушуму Өзүн билирсән, фикирләрими узагдан дујурсан. Ҝетмәјимә, јатмағыма нәзарәт едирсән, нә јоллардан кечдијими билирсән». Ајәдәки «нәзарәт етмәк» ифадәсинин ибраниҹә һәрфи мә’насы «әләмәк»дир. Әкинчи тахылы јелләмәклә, дәни самандан ајырдығы кими, Јеһова да ишләримизи бир-бириндән ајырыр, јаддашында јахшы ишләримизи горујуб сахлајыр.

Нә гәдәр ки, биз мәрһәмәтли сәмави Атамыза садиг галырыг, О јахшы ишләримизи јаддашында горујуб сахлајаҹаг. Мүгәддәс Китабда дејилир ки, бизим ишимизи, Аллаһын ады наминә ҝөстәрдијимиз мәһәббәти унутмаг Онун үчүн һагсызлыг оларды (Ибраниләрә 6:10).

«Әввәлки шејләр кечиб ҝетди»

Мүгәддәс Китаб ҝөстәрир ки, әзәлдән Аллаһ инсанларын гоҹалмасыны истәмирди. Улу валидејнләримиз олан илк киши вә гадын Јараданымыза гаршы үсјан етдикдән сонра, гоҹалығын ҝәтирдији чәтинликләр һәр бир инсанын пајына дүшүр (Јарадылыш 3:17-19; Ромалылара 5:12). Лакин бу вәзијјәт әбәди давам етмәјәҹәк.

Јухарыда дејилдији кими, бу ҝүн гаршылашдығымыз чәтинликләрин чоху, о ҹүмләдән гоҹаларла пис рәфтар, бу системин ‘ахыр ҝүнләриндә’ јашадығымызы ҝөстәрир (2 Тимотејә 3:1). Аллаһын нијјәти гоҹалығын ҝәтирдији проблемләри, өлүмү, үмумијјәтлә ҝүнаһын нәтиҹәләрини арадан галдырмагдыр. Мүгәддәс Китабда дејилир: «Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 21:4).

Аллаһын јаратдығы јени дүнјада гоҹалығын ағрылары да, гоҹаларла пис рәфтар да кечмишдә галаҹаг (Микеја 4:4). Һәтта өлүб, амма Аллаһын јаддашында галанлар белә һәјата гајыдаҹаглар. Онларын да Ҹәннәтә чеврилмиш јер үзүндә әбәди јашамаг имканы олаҹаг (Јәһја 5:28, 29). О заман, Јеһова Аллаһын нәинки јашлыларын, Она садиг галан һәр бир инсанын гејдинә галдығы һамыја бәлли олаҹаг.

[Һашијәләр]

[4 вә 5-ҹи сәһифәләрдәки чәрчивә/шәкилләр]

Әмәллә тәзаһүр етдирилән мәһәббәт

Јеһованын Шаһидләринин јығынҹагларында јашлыларын гејдинә галмагда ағсаггаллар тәшәббүс ҝөстәрирләр. Онлар һәвари Петерин сөзләринә ҹидди јанашырлар: «Аллаһын сизә һәвалә олунан сүрүсүнү отарын» (1 Петер 5:2). Јашлылара әмәлдә көмәк етмәк Аллаһын сүрүсүнү отармаг тапшырығынын бир һиссәсидир. Белә көмәјә нә дахил ола биләр?

Инсанын нәјә еһтијаҹ дујдуғуну мүәјјән етмәк үчүн сәбир лазымдыр. Һәмин адама дәфәләрлә баш чәкмәк, онунла сөһбәт етмәк тәләб олуна биләр. Ола билсин, јашлы баҹы вә ја гардашымыза базарлыг етмәкдә, ев ишләриндә, јығынҹаға ҝәлмәкдә, Мүгәддәс Китабы вә журналлары охумагда вә башга ишләрдә көмәк лазымдыр. Имкан даирәсиндә е’тибарлы бир шәхсин јашлыја баш чәкмәси вә практики көмәк ҝөстәрмәси тәшкил едилмәлидирc.

Бәс јашлы һәмиманлымыз чыхылмаз бир вәзијјәтдәдирсә, мәсәлән мадди көмәјә еһтијаҹ дујурса, онда неҹә? Биринҹи нөвбәдә, јахшы оларды ки, көмәк едә биләҹәк ушаглары вә јахуд диҝәр гоһумларынын олуб-олмадығы мүәјјән едилсин. Бу, 1 Тимотејә 5:4 ајәсиндәки принсипә мүвафигдир: «Әҝәр бир дул гадынын ушаглары вә ја нәвәләри варса, гој онлар габагҹа өз шәхси аиләләринә бахараг, Аллаһа һөрмәт етмәји, бөјүкләринә дә һаггыны вермәји өјрәнсинләр; чүнки бу, Аллаһа мәгбулдур».

Ола биләр, јашлы баҹы вә ја гардаша дөвләт тәрәфиндән тәгдим олунан јардымын дүшүб-дүшмәдијини мүәјјән етмәк лазым ҝәлсин. Јығынҹагдан кимсә она көмәк едә биләрми? Дөвләтдән һеч бир јардым ала билмәдији тәгдирдә, ағсаггаллар бу јашлы адамын јығынҹагдан көмәк ала билмәси үчүн 1 Тимотејә 5:9, 10 ајәләриндәки тәләбләрә нә дәрәҹәдә мүвафиг олдуғуну мүәјјән етмәлидирләр. Һәвари Павел әмәкдашы Тимотејә јазырды: «Ән азы алтмыш јашына чатмыш, бир кишинин арвады олмуш, јахшы ишләр ҝөрдүјү барәдә шәһадәти олан дул гадын, ушаглар бөјүдүбсә, гонаг гәбул едибсә, мүгәддәсләрин ајагларыны јујубса, сыхынты чәкәнләрә јардым ҝөстәрибсә, өзүнү һәр ҹүр хејирли ишә һәср едибсә, гејдә алынсын». Ҝөрдүјүмүз кими, биринҹи әсрдә дә јығынҹагларын бә’зиләриндә белә һаллар истисна дејилди.

[Һашијә]

[6-ҹы сәһифәдәки шәкил]

Табита еһтијаҹ ичиндә олан дул гадынларын гејдинә галырды (Һәвариләрин ишләри 9:36-39).