Һамынын ләјагәтинә һөрмәт мүмкүндүр
«Биз инсанын ләјагәтинә һөрмәт едилән јени дүнја, даһа јахшы дүнја гурмалыјыг». Б. Ш. ПРЕЗЫДЕНТИ ҺАРРИ ТРУМЕН, А. Б. Ш., КАЛИФОРНИЈА, САН ФРАНСИСКО, 25 АПРЕЛ, 1945.
ИКИНҸИ Дүнја мүһарибәсиндән сонракы илләрдә бир чохлары кими президент Һарри Трумен дә инанырды ки, инсан өз кечмишиндән дәрс ала вә һамынын ләјагәтинә һөрмәт едилән «јени дүнја» гура биләр. Тәәссүф ки, мүасир тарих тамамилә башга бир һәгигәти сүбут едир. Инсанларын «ләјагәти» тапдаланмагдадыр, чүнки проблемин көкү инсан јох, онун ән бөјүк дүшмәни олан бир шәхсијјәтдир.
Проблемин көкү
Мүгәддәс Китаб һәмин дүшмәнин, бәшәр тарихинин башланғыҹындан Аллаһын һөкмранлыг һүгугуну шүбһә алтына алан пис руһани варлыг, Шејтан Иблис олдуғуну ачыглајыр. Еден бағында Һәвва илә сөһбәт едән вахтдан Шејтанын мәгсәди инсанлары Јарадана хидмәт етмәкдән узаглашдырмагдыр (Јарадылыш 3:1-5). Адәмлә Һәвванын Шејтана ујаркән үзләшдикләри фәлакәтләр үзәриндә бир дүшүнүн! Аллаһын мејвәдән јемәји гадаған едән әмрини позмаларынын билаваситә нәтиҹәси о олду ки, һәр икиси «Аллаһын һүзурундан гачыб... ҝизләндиләр». Нә үчүн? Адәм е’тираф етди: «Чылпаг олдуғум үчүн горхдум, она ҝөрә дә ҝизләнмишәм» (Јарадылыш 3:8-10). Адәмин сәмави Атасы илә мүнасибәти вә өзүнә бахышы дәјишди. О утаныр вә Јеһованын һүзурунда артыг өзүнү нараһат һисс едирди.
Шејтан нәјә ҝөрә Адәмин ләјагәтинин алчалмасыны истәјирди? Чүнки инсан Аллаһын сурәтиндә јарадылмышдыр вә өз давранышы илә Аллаһын иззәтини лајигинҹә әкс етдирмәдикдә, Шејтан һәзз алыр (Јарадылыш 1:27; Ромалылара 3:23). Бу, бәшәр тарихиндә алчалдыҹы һәрәкәтләрин нә үчүн көк салдығыны баша дүшмәјә көмәк едир. «Бу әсрин танрысы» олан Шејтан ‘бир нәфәрин башга адама ағалыг етмәсинин башына бәла олдуғу’ бир дөврдә бу руһу ҝениш јајыр (2 Коринфлиләрә 4:4; Ваиз 8:9; 1 Јәһја 5:19). Бәс онда елә гәнаәтә ҝәлмәк олармы ки, инсан ләјагәтинә һәгиги һөрмәт һәмишәлик итирилиб?
Јеһова Өз јаратдыгларынын ләјагәтинә һөрмәт едир
Адәмлә Һәвва ҝүнаһ ишләтмәздән әввәл Ҹәннәт бағында һөкм сүрән вәзијјәти бир даһа јадыныза салын. Онларын бол гидасы, зөвг верән иши вар иди, һәм өзләри, һәм дә ҝәләҹәк нәсилләри сағлам, сонсуз һәјат сүрә биләрдиләр (Јарадылыш 1:28). Онларын мөвҹудлуғунун һәр саһәси Аллаһын бәшәријјәт үчүн олан мәһәббәтли, әзәмәтли нијјәтини вурғулајырды.
Адәмлә Һәвва камиллији итирдикдән сонра Јеһованын инсан ләјагәтинә олан бахышы дәјишдими? Хејр. Аллаһ онларын чылпаг олдугларына ҝөрә утандыгларыны нәзәрә алды. Әнҹир јарпагларыны бир-биринә тикәрәк өзләринә дүзәлтдикләри фитәнин әвәзинә, Аллаһ мәһәббәтлә онлара «дәридән палтар дүзәлтди» (Јарадылыш 3:7, 21). Аллаһ онлары хәҹаләт ичиндә гојмады, әксинә онларын ләјагәтинә һөрмәтлә јанашды.
Сонралар Исраил халгы илә рәфтарындан ҝөрүнүр ки, Јеһова јетимләрә, дуллара вә гәрибләрә — ҹәмијјәтин тәһгирләрә ән чох мә’руз галан үзвләринә — шәфгәтлә јанашырды (Мәзмур 72:13). Мәсәлән, исраиллиләр зәмиләриндән тахыл бичәндән, бағларындан зејтун вә үзүм јығандан сонра мәһсулун галыгларыны да топламаг үчүн ҝери гајытмалы дејилдиләр. Аллаһин әмринә ҝөрә, һәмин мәһсул ‘гәрибин, јетимин вә дул гадынын олмалы’ иди (Ганунун тәкрары 24:19-21). Бу ганунлара әмәл етдикдә артыг һеч кимин диләнмәсинә еһтијаҹ галмыр вә һәтта ән касыб адамларын белә лајигли иш илә мәшғул олмаг имканы јаранырды.
Иса инсанларын ләјагәтинә һөрмәт едирди
Јердә јашајаркән Аллаһын Оғлу Иса Мәсиһ башгаларынын ләјагәтинә һөрмәт етдијини ҝөстәрди. Мәсәлән, Галилејада оланда узун мүддәт ҹүзам хәстәлијиндән әзијјәт чәкән бир адам она јахынлашды. Мусанын ганунуна ҝөрә, башгаларыны јолухдурмамаг үчүн ҹүзамлы «мурдарам, мурдарам!» дејә гышгырмалы иди (Левилиләр 13:45). Лакин бу адам Исаја јахынлашдыгда хәбәрдарлыг етмәди. Бунун әвәзинә үзү үстә дүшүб, Исаја јалвармаға башлады: «Ја Рәбб, әҝәр истәсән, мәни саф едә биләрсән» (Лука 5:12). Иса нә етди? Гануну поздуғу үчүн Иса ону нә тәнбеһ етди, нә дә е’тинасызлыг ҝөстәрәрәк ондан гачды. Әксинә о, ҹүзамлыја тохунду, «истәјирәм, саф ол» дејәрәк онунла һөрмәтлә давранды (Лука 5:13).
Диҝәр һалларда исә, Иса инсанлары тохунмадан, бә’зән һәтта узаг мәсафәдән сағалдырды. Лакин бу дәфә о, һәмин адама тохунду (Матта 15:21-28; Марк 10:51, 52; Лука 7:1-10). Онун «бүтүн бәдәни ҹүзамлы» олдуғундан, шүбһәсиз, артыг узун илләр иди ки, һеч кимлә физики тәмасда олмамышды. Јенидән киминсә она тохунмасы онун үчүн неҹә дә тәсәлливериҹи иди! Бу адамын арзусу јалныз ҹүзамдан сағалмаг иди. Лакин Исанын шәфа вермә үсулу, шүбһәсиз, даһа бир шеји — онун ләјагәт һиссини гајтармаға көмәк етди. Бәс бу ҝүн башгаларынын ләјагәтинә гајғы ҝөстәрилирми? Ҝөстәрилирсә, неҹә?
Инсан ләјагәтинә һөрмәт етмәји өјрәдән ганун
Бир чохларынын фикринҹә, Иса, индијәдәк инсан мүнасибәтләринә даир верилән ән мәшһур нәсиһәти сөјләмишдир: «Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Матта 7:12). Чох вахт «гызыл ганун» адланан бу ганун инсаны, мүгабилиндә ејни шеји ҝөзләјәрәк, өз јолдашына һөрмәт етмәјә тәшвиг едир.
Тарих шаһидлик едир ки, инсанларда анаданҝәлмә бу гануна әмәл етмәк истәји олмур, онлар чох вахт бунун әксинә давранырлар. Ҝәлин, Һаролд адландыраҹағымыз бир нәфәрин сөзләринә диггәт јетирәк: «Мән башгаларыны алчалтмагдан һәзз алырдым. Бир нечә сөзлә онлары өзүндән чыхарыр, пәрт едир, һәтта бә’зән ағладырдым». Лакин бир шеј Һаролду дәјишмәјә мәҹбур етди. «Јеһованын Шаһидләри мәнә баш чәкмәјә башлады. Дедијим сөзләри вә онларла бә’зән неҹә даврандығымы хатырлајанда, хәҹаләт чәкирәм. Лакин онлар мәндән әлләрини үзмәдиләр, тәдриҹән Мүгәддәс Китаб һәгигәтләри үрәјимдә көк салды вә мәни дәјишмәјә тәшвиг етди». Һазырда Һаролд мәсиһчи јығынҹағында ағсаггал кими хидмәт едир.
Һаролд, ‘Аллаһын кәламынын ҹанлы вә тә’сирли, һәр ҹүр икиағызлы гылынҹдан ити, ҹанла руһу, ојнагларла илији бир-бириндән ајыраҹаг гәдәр дәлиб кечән вә үрәјин дүшүнҹә вә нијјәтләрини ајырд едән’ олдуғуна ҹанлы сүбутдур (Ибраниләрә 4:12). Аллаһын Кәламы инсанын үрәјинә тә’сир етмәјә, онун дүшүнҹә тәрзини вә давранышыны дәјишмәјә гадирдир. Бу, башгаларына һөрмәтлә јанашмаг, јә’ни инҹитмәк әвәзинә көмәк етмәк, алчалтмаг әвәзинә илтифат ҝөстәрмәк арзусу үчүн ән мүһүм өзүлдүр (Һәвариләрин ишләри 20:35; Ромалылара 12:10).
Инсан ләјагәтинә әсл һөрмәт
Мәһз бу арзудан ирәли ҝәләрәк Јеһованын Шаһидләри Мүгәддәс Китабын вердији ҝөзәл үмиди инсанларла бөлүшүрләр (Һәвариләрин ишләри 5:42). Инсанын ләјагәтинә һөрмәт етмәк үчүн, онунла «јахшылыг мүждәсини» бөлүшмәкдән јахшы үсул јохдур (Јешаја 52:7, КМ). «Јахшылыг» башгаларыны алчалтмаг кими ‘пис еһтирасы’ өлдүрән «јени мәнлији» ҝејинмәји өзүнә дахил едир (Колослулара 3:5-10). Бураја, Јеһованын тезликлә инсанын ләјагәтини алчалдан шәраитләри вә мүнасибәтләри, о ҹүмләдән, бунун сәбәбкары олан Шејтан Иблиси кәнар етмәк нијјәти дә аиддир (Даниел 2:44; Матта 6:9, 10; Вәһј 20:1, 2, 10). Јалныз о заман, «дүнја... Рәббин билији илә долу» оланда һамынын ләјагәтинә һөрмәт едиләҹәкдир (Јешаја 11:9).
Биз сизи дә бу ҝөзәл үмид һаггында өјрәнмәјә дә’вәт едирик. Јеһованын Шаһидләри илә үнсијјәт етмәклә ҝөрәҹәксиниз ки, Мүгәддәс Китабын принсипләринә риајәт етмәк инсанларын бир-биринин ләјагәтинә һөрмәтлә јанашмасына көмәк едир. Сиз, о ҹүмләдән, Аллаһын Падшаһлығынын тезликлә ‘јени, даһа јахшы дүнја’ — инсанын ләјагәтинә һөрмәт едиләҹәји, даһа һеч вахт тапдаланмајаҹағы дүнја јарадаҹағыны өјрәнәҹәксиниз.
[3-ҹү сәһифәдәки шәкил]
Иса шәфа вердији инсанларын ләјагәтинә һөрмәт едирди.