Иманынызы әмәлдә ҝөстәрин
«Иман... јахшы әмәлләри јох исә, өзү-өзлүјүндә өлүдүр» (ЈАГУБ 2:17).
1. Еркән мәсиһчиләр нә үчүн һәм иманы, һәм дә әмәлләри ваҹиб сајырдылар?
ЕРКӘН мәсиһчиләр иманларыны һәјат тәрзләрилә ҝөстәрирдиләр. Шаҝирд Јагуб бүтүн мәсиһчиләри тәшвиг едирди: ‘Аллаһ кәламыны јалныз ешитмәклә кифајәтләнмәјин, бу кәламын иҹрачысы да олун’. О, һәмчинин әлавә етмишди: «Бәдән руһ олмадыгда өлү олдуғу кими, иман да әмәлләр олмадыгда өлүдүр» (Јагуб 1:22; 2:26). Бу сөзләрин јазылмасындан 35 ил сонра да бир чох мәсиһчиләр иманларыны лајигли әмәлләрлә тәсдигләјирдиләр. Әфсуслар олсун ки, буну һамы етмирди. Иса Измир шәһәриндәки мәсиһчиләри тә’рифләди, Сардисдәкиләрә исә деди: «Сәнин әмәлләриндән хәбәрдарам. Адын вардыр, ҝуја сағсан, амма әслиндә өлүсән» (Вәһј 2:8-11; 3:1).
2. Мәсиһчиләр иманларына даир өзләринә һансы суаллары вермәлидирләр?
2 Иса Сардисдәки мәсиһчиләри, үмумијјәтлә онун сөзләрини охујан һәр кәси мәсиһчи һәгигәтинә илк мәһәббәтләрини әмәлдә ҝөстәрмәјә вә руһани ҹәһәтдән ојаг олмаға чағырырды (Вәһј 3:2, 3). Һәр кәс өзүндән соруша биләр: «Бәс мәним әмәлләрим һаггында нә демәк олар? Тәблиғ иши вә јығынҹаг ҝөрүшләри илә бирбаша бағлы олмајан ишләрдә белә өз иманымы әмәлләримлә һәмишә тәсдиг етмәјә чалышдығым ајдын ҝөрүнүрмү?» (Лука 16:10). Чох саһәләрә тохунмаг олар, анҹаг ҝәлин јалныз достлуг ҝөрүшләрини вә мәсиһчи тојларыны нәзәрдән кечирәк.
Балаҹа достлуг ҝөрүшләри
3. Мүгәддәс Китабын аиләви вә достлуг ҝөрүшләринә мүнасибәти неҹәдир?
3 Мәсиһчиләр бизи гонаг чағыранда чохумуза хош олур. Јеһова Өз хидмәтчиләринин хошбәхтлијини истәјән «хошбәхт Аллаһ»дыр (1 Тимотејә 1:11, ЈД). О, Сүлејманы һәјатын бу саһәси һагда јазмаға илһамландырды: «Мән кеф чәкмәји үстүн сајдым, чүнки сәма алтында инсан үчүн јејиб-ичмәкдән вә кеф чәкмәкдән јахшы шеј јохдур. Чүнки сәма алтында Аллаһын инсана өмрү боју чәкдирдији зәһмәтдән она анҹаг бу галыр» (Ваиз 3:1, 4, 13; 8:15). Бура аиләви вә ја Јеһованын хидмәтчиләринин балаҹа достлуг ҝөрүшләриндә кечирилән вахты да аид етмәк олар (Әјјуб 1:4, 5, 18; Лука 10:38-42; 14:12-14).
4. Достлуг ҝөрүшү тәшкил едән адам нәјә диггәт јетирмәлидир?
4 Әҝәр биз белә бир тәдбир планлашдырыр вә онун кечирилмәсинә ҹавабдеһиксә, һәр шеји јахшыҹа өлчүб-бичмәлијик. Һәтта бир нечә нәфәри үнсијјәт үчүн гонаг дә’вәт едәндә дә бу ҹүр етмәк лазымдыр (Ромалылара 12:13). ‘Һәр шејин әдәблә’ «јухарыдан назил олан һикмәт»ин рәһбәрлији алтында кечмәси ваҹибдир (1 Коринфлиләрә 14:40; Јагуб 3:17). Һәвари Павел јазырды: «Јејирсинизсә, ичирсинизсә, нә едирсинизсә, һәр шеји Аллаһын иззәти үчүн един». О, һәмчинин башгаларыны бүдрәтмәмәји дә хатырлатмышды (1 Коринфлиләрә 10:31, 32). Бәс нәјә хүсусилә диггәт јетирмәк лазымдыр? Бә’зи мәгамлары әввәлҹәдән нәзәрә алсаг, һәм биз, һәм дә гонаглар иманымызы әмәлдә ҝөстәрә биләҹәјик (Ромалылара 12:2).
Достлуг ҝөрүшү неҹә кечәҹәк?
5. Нәјә ҝөрә ҝөрүшүн тәшкилатчысы мәҹлисдә спиртли ичкиләрин вә мусигинин олуб-олмајаҹағыны ҹидди тәрздә өлчүб-бичмәлидир?
5 Гонаглыг тәшкил едәнләрин бир чохлары мәҹлисә спиртли ичкиләр вериб-вермәмәк сечими етмәли олмушлар. Үрәкачан үнсијјәт үчүн сүфрәдә ичкинин олмасы һеч дә ваҹиб дејил. Јанына ҝәлән бөјүк издиһамы једиртмәк үчүн, Исанын чөрәк вә балығы чохалтдығы һадисәни јадымыза салаг. Мүждәләрдә онун мө’ҹүзә илә шәраб дүзәлтдији дејилмир, һәрчәнд, билдијимиз кими, о буну едә биләрди (Матта 14:14-21). Әҝәр сүфрәјә спиртли ички вермәк гәрарына ҝәлсән, чалыш ки, гәдәриндән артыг олмасын. Сүфрәдә јахшы спиртсиз ичкиләрин олмасынын да гајғысына гал (1 Тимотејә 3:2, 3, 8; 5:23; 1 Петер 4:3). Һеч кими, ‘илан кими санҹа’ билән спиртли ички ичмәјә мәҹбур етмә (Сүлејманын мәсәлләри 23:29-32). Бәс мусиги вә маһнылар һаггында нә демәк олар? Әҝәр мәҹлисдә мусиги олаҹагса, онда маһныларын ритминә вә сөзләринә диггәт јетир (Колослулара 3:8; Јагуб 1:21). Бир чох мәсиһчиләр фикир вермишләр ки, «Падшаһлыг мелодијалары» сәсләнәндә вә ја мәсиһчи маһнылары охунанда мәҹлисдә ҝөзәл әһвал-руһијјә јараныр (Ефеслиләрә 5:19, 20). Үнсијјәтә вә гоншулара мане олмасын дејә, мусигинин сәсини вахташыры тәнзимлә (Матта 7:12).
6. Ҝөрүшүн тәшкилатчысы үнсијјәт вә башга мәсәләләрдә иманынын ҹанлы олдуғуну неҹә ҝөстәрә биләр?
6 Достлуг ҝөрүшләриндә мәсиһчиләр мүхтәлиф мөвзулар һаггында сөһбәт едир, мараглы мәгаләләр охујур вә ја һадисәләр данышырлар. Әҝәр сөһбәт әдәб-әркан гајдаларындан кәнара чыхырса, мәҹлиси тәшкил едән адам мөвзуну нәзакәтлә дәјишәҹәк. О чалышмалыдыр ки, сөһбәти тәкҹә бир нәфәр әлә алмасын. Белә вәзијјәт јаранарса, о мүдахилә едиб башгаларыны, мәсәлән, ушаглары сөһбәтә ҹәлб едә биләр, јахуд да һамынын гошула биләҹәји мөвзудан сөз ача биләр. Белә үнсијјәт һәм ушагларын, һәм дә бөјүкләрин хошуна ҝәләҹәк. Әҝәр сән мәҹлиси узагҝөрәнликлә вә нәзакәтлә идарә етсән, гонаглар сәнин мүдриклијини ҝөрәҹәкләр (Филипилиләрә 4:5). Онлар сәнин иманын ҹанлы олдуғуна вә һәјатынын бүтүн саһәләринә тә’сир етдијинә әмин олаҹаглар.
Никаһ вә тој мәрасимләри
7. Никаһ вә тој мәрасимләринин тәшкилинә нә үчүн диггәтлә јанашмаг лазымдыр?
7 Мәсиһчи тоју чох севиндириҹи һадисәдир. Аллаһын гәдимдәки хидмәтчиләринә, о ҹүмләдән Иса вә онун шаҝирдләринә тој мәҹлисләриндә иштирак етмәк хош иди (Јарадылыш 29:21, 22; Јәһја 2:1, 2). Тој һәјатда ади һалдыр. Анҹаг тәҹрүбәдән ҝөрүндүјү кими, ону јахшы тәшкил етмәк үчүн хүсуси гүввә тәләб олунур. Бу, мәсиһчијә иманыны тәзаһүр етдирмәјә, мүдриклик вә таразлыг ҝөстәрмәјә имкан јарадыр.
8, 9. Бир чох тојларда баш верәнләр 1 Јәһја 2:16, 17 ајәләринин доғрулуғуну неҹә тәсдиг едир?
8 Тој, Аллаһын принсипләрини билмәјән вә онлара әһәмијјәт вермәјән бир чох адамлар үчүн, һәр шејдә һәдди ашмаға вә буна бәраәт газандырмаға бир бәһанәдир. Авропада дәрҹ едилән журналда тәзә бир ҝәлин тәмтәраглы тојундан данышыр: «Бәрбәзәкли дөрд атлы фајтонда ҝедирдик, бизи даһа 12 фајтон вә оркестр мүшајиәт едирди. Сонра тәнтәнәли зијафәт олду вә ҝөзәл мусиги сәсләнди. Һәр шеј ә’ла кечди! Лап истәдијим кими олду. О ҝүн мән кралича идим».
9 Һәр јерин өз адәти олса да, бу һадисә һәвари Јәһјанын сөзләринин доғрулуғуну тәсдиг едир: «Дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр». Руһән јеткин мәсиһчиләрин бу ҹүр тәмтәраглы тој зијафәти гурдугларыны тәсәввүр едә биләрсинизми? Бу кими мәсәләләрдә дә јадда сахламаг лазымдыр ки, «Аллаһын ирадәсини јеринә јетирән әбәди јашајыр» (1 Јәһја 2:16, 17).
10. а) Тоја һазырлыг ҝөрәркән нәјә ҝөрә һәр шеји әввәлҹәдән өлчүб-бичмәк лазымдыр? б) Гонаглары дә’вәт едәркән нә нәзәрә алынмалыдыр?
10 Мәсиһчиләр һәр шејдә реалист вә мүдрик олмаға чалышырлар, Мүгәддәс Китаб бу ишдә онлара көмәк едир. Тој ҝүнү ваҹиб һадисә олса да, онлар баша дүшүрләр ки, бу, әбәди һәјата үмид бәсләјән ики мәсиһчинин аилә һәјатынын садәҹә башланғыҹыдыр. Тој мәҹлисинин чох бөјүк олмасы ваҹиб дејил. Әҝәр бәј вә ҝәлин зијафәт гурмаг гәрарына ҝәләрләрсә, онлар мәсрәфләри һесабламалы вә һәр шеји өлчүб-бичмәлидирләр (Лука 14:28). Мүгәддәс Китаба әсасән, онларын аиләсинин башчысы әр олаҹаг (1 Коринфлиләрә 11:3; Ефеслиләрә 5:22, 23). Буна ҝөрә дә тојун тәшкил едилмәсиндә әсас мәс’улијјәт бәјин үзәринә дүшүр. Әлбәттә, о, тоја кимләри дә’вәт етмәк истәдикләрини вә нә гәдәр адам чағыра биләҹәкләрини өз ҝәләҹәк һәјат јолдашы илә мәһәббәтлә мәсләһәтләшәҹәк. Бүтүн гоһум-әграбаны вә дост-танышы дә’вәт етмәк гејри-мүмкүндүр. Буна ҝөрә дә, бә’зи мәсәләләрдә гәрар гәбул едәркән таразлығы горумаг тәләб олунур. Бәј вә ҝәлин һамыны дә’вәт едә билмәјәҹәкләри үчүн, башга мәсиһчиләрин онлары баша дүшмәјәҹәкләринә вә инҹијәҹәкләринә ҝөрә нараһат олмамалыдырлар (Ваиз 7:9).
«Зијафәтә башчылыг едән»
11. Тојун кечирилмәсиндә «зијафәт башчысы» һансы ролу ојнајыр?
11 Әҝәр бәј вә ҝәлин никаһ мәрасими мүнасибәтилә зијафәт вермәк истәјирләрсә, һәр шејин ләјагәтлә кечмәси үчүн нә етмәлидирләр? Артыг чох илләрдир ки, бу мәсәләдә Јеһованын Шаһидләри үчүн Исанын Ганада иштирак етдији тој мәҹлиси нүмунәдир. Тојда «зијафәтә башчылыг едән» бир нәфәр вар иди, еһтимал ки, о, Аллаһын мәс’ул хидмәтчиси иди (Јәһја 2:9, 10). Мүдрик бәј дә бу тәдбири јола вермәк үчүн руһән јеткин мәсиһчини сечәҹәк. Зијафәт башчысы бәјин арзу вә истәкләрини нәзәрә алараг габагҹадан һәр шејин гајғысына галаҹаг вә тојун ҝедишинә нәзарәт едәҹәк.
12. Спиртли ичкиләрлә бағлы бәј нәји нәзәрә алмалыдыр?
12 Бешинҹи абзасда дејиләнләрә гајытсаг, гејд етмәк лазымдыр ки, бә’зи мәсиһчиләр тојда сүфрәјә спиртли ичкиләр гојмурлар. Онлар киминсә ичкидән суи-истифадә едәрәк шәнлијә галмагал салмасыны истәмирләр (Ромалылара 13:13; 1 Коринфлиләрә 5:11). Ички верилән тојларда исә, бәј онун сүфрәјә гәдәриндән артыг верилмәјәҹәјинә әмин олмалыдыр. Исанын Ганада иштирак етдији тојда да шәраб вар иди, һәтта о өзү тојда јүксәк кејфијјәтли шәраб дүзәлтмишди. Зијафәт башчысы тәәҹҹүблә деди: «Һәр бир адам јахшы шәрабы әввәл, адисини исә шәраб чох ичилдикдән сонра верир, сән исә јахшы шәрабы индијә сахламысан» (Јәһја 2:10). Әлбәттә, Иса һеч кими сәрхошлуға тәшвиг етмәк нијјәтиндә дејилди, әксинә, о белә һәрәкәти мүһакимә едирди (Лука 12:45, 46). Зијафәт башчысынын сөзләриндән ҝөрүнүр ки, гонаглардан киминсә сәрхош олдуғу һаллар да олурду (Һәвариләрин ишләри 2:15; 1 Салониклиләрә 5:7). Буна ҝөрә дә, бәј вә зијафәтә башчылыг едән мәсиһчи диггәт јетирмәлидирләр ки, тојда иштирак едәнләрин һәр бири Мүгәддәс Китабын ајдын ҝөстәришинә риајәт едир: «Шәрабла сәрхош олмајын, сәфаһәтә сәбәб одур» (Ефеслиләрә 5:18; Сүлејманын мәсәлләри 20:1; Һушә 4:11).
13. Әҝәр тојларында мусиги олаҹагса, бәјлә ҝәлин нәји нәзәрә алмалыдырлар вә нә үчүн?
13 Әҝәр тојда вә ја достлуг ҝөрүшләриндә мусиги олаҹагса, онун сәси үнсијјәтә мане олмамалыдыр. Бир ағсаггал диггәт јетирмишдир ки, «ахшама јахын сөһбәт гызышанда вә ја рәгс башлајанда, бә’зән мусигинин сәси галхыр. Беләликлә, сакит мусиги ҝет-ҝедә һај-күјә чеврилиб үнсијјәтә мане ола биләр. Тој хош үнсијјәт үчүн ҝөзәл имкандыр. Һәддиндән артыг һүндүрдән сәсләнән мусигинин шәнлији корламасы неҹә дә кәдәрлидир!» Бәј вә зијафәт башчысы бу мәсәләјә ҹидди јанашмалыдырлар: маһныларын мәзмунуну вә сәсинин тәнзимини мусигичиләрин кимлијиндән асылы олмајараг, онларын өһдәсинә бурахмамалыдырлар. Һәвари Павел јазырды: «Сөздә вә әмәлдә нә етсәниз, һәр шеји Рәбб Исанын наминә един» (Колослулара 3:17). Гонаглар дағылашандан сонра тојда сәсләнән мусиги онларын хатириндә неҹә галаҹаг? Бу мусиги јени евләнәнләрин һәр шеји Исанын наминә етдикләрини ҝөстәрәҹәкми? Бу чох ваҹибдир.
14. Мәсиһчи тоју нә илә јадда галмалыдыр?
14 Бәли, јахшы тоју хатырламаг һәмишә хошдур. Артыг 30 илдир ки, евли олан Адам вә Едита бир тој һаггында белә демишләр: «Тојда әсл мәсиһчи әһвал-руһијјәси дујулурду. Биз Јеһоваја һәмд нәғмәләри охујурдуг, ејни заманда башга әјләнҹәләр дә вар иди. Мусиги вә рәгс икинҹи дәрәҹәли рол ојнајырды. Һәр шеј Мүгәддәс Китаб принсипләринә ујғун вә шән кечди». Сөзсүз ки, бәјлә ҝәлин тоја һазырлашаркән өз иманларыны әмәлдә ҝөстәрмәк үчүн чох шеј едә биләрләр.
Тој һәдијјәләри
15. Тој һәдијјәләри илә бағлы һансы Мүгәддәс Китаб мәсләһәтинә риајәт етмәк олар?
15 Бир чох өлкәләрдә гоһумлар вә достлар бәјлә ҝәлинә һәдијјә бағышлајырлар. Әҝәр сиздә дә белә адәт варса, һәвари Јәһјанын «һәјатын тәкәббүрү» һагдакы сөзләрини јаддан чыхарма. О, бу ҹүр тәкәббүрлүјү иманларыны әмәлдә ҝөстәрән мәсиһчиләрлә јох, ‘кечиб ҝедән’ дүнја илә әлагәләндирди (1 Јәһја 2:16, 17). Јәһјанын Аллаһдан илһам алмыш сөзләрини нәзәрә алсаг, тојда кимин нә һәдијјә етдијини е’лан етмәк лазымдырмы? Македонијадан вә Ахајадан олан мәсиһчиләр Јерусәлимдәки гардашлара мадди көмәк ҝөстәрдиләр, лакин Мүгәддәс Китабда онларын адлары чәкилмир (Ромалылара 15:26). Тојда һәдијјә верән мәсиһчиләрин чоху өзләринә ҝәрәксиз диггәт ҹәлб етмәмәк үчүн адларынын чәкилмәсини истәмирләр. Бунунла бағлы Исанын Матта 6:1-4 ајәләриндәки мәсләһәтини нәзәрдән кечирин.
16. Јени евләнәнләр башгаларынын хәтринә дәјмәмәк үчүн тој һәдијјәләри илә әлагәдар нәји нәзәрә алмалыдырлар?
16 Һәдијјә верәнләрин адларыны чәкәрәк кимин һәдијјәсинин даһа јахшы вә ја баһалы олдуғуну нүмајиш етдирмәклә ‘бир-биримизи рәгабәтә тәһрик едә’ биләрик. Бу сәбәбдән, тој едән мүдрик мәсиһчиләр һәдијјә верәнләрин адларыны ачыгламырлар. Әкс тәгдирдә, һәдијјә вермәјә имканы олмајанлар сыхыла биләрләр (Галатијалылара 5:26, ЈД; 6:10). Әлбәттә, јени евләнәнләрин һәдијјәни кимин вердијини билмәләриндә пис бир шеј јохдур. Мәсәлән, онлар буну һәдијјәнин ичинә гојулмуш ачыгҹадан өјрәнә биләрләр, анҹаг ону башгаларына охумајаҹаглар. Һәдијјә сечмәк, бағышламаг вә ја гәбул етмәк кими шәхси мәсәләләрдә белә һәр биримизин өз иманыны әмәлдә ҝөстәрмәк имканы вар.
17. Мәсиһчиләр иман вә әмәлләрлә бағлы һансы мәгсәдә ҹан атмалыдырлар?
17 Әлбәттә, иманымызын тәзаһүрү јүксәк мә’нәвијјатлы һәјат сүрмәклә, мәсиһчи ҝөрүшләринә ҝәлмәклә вә тәблиғ ишиндә иштирак етмәклә кифајәтләнмир. Гој, һәр биримиз һәјатымызын бүтүн саһәләриндә әкс олунан ҹанлы имана саһиб олсун. Бәли, биз иманымызы, јухарыда нәзәрдән кечирдијимиз мәсәләләр дә дахил олмагла, ‘Аллаһ гаршысында камил олан’ әмәлләрлә тәсдиг едә биләрик (Вәһј 3:2).
18. Јәһја 13:17 ајәси мәсиһчи тојларына вә достлуг ҝөрүшләринә неҹә аиддир?
18 Иса садиг һәвариләринә ҝөзәл нүмунә гојараг тәвазөкарлыгла онларын ајагларыны јудугдан сонра деди: «Әҝәр бу шејләри билирсиниз вә онлара әмәл едирсинизсә, бәхтијарсыныз» (Јәһја 13:4-17). Ола билсин, јашадығымыз јердә башгаларынын, мәсәлән, гонагларын ајагларыны јумаг лазым ҝәлмир, һеч белә бир адәт дә јохдур. Анҹаг бу мәгаләдән ҝөрдүјүмүз кими, һәјатын елә саһәләри вар ки, мәһәббәт вә диггәтлә давранараг иманымызы әмәлдә ҝөстәрә биләрик. Достлуг ҝөрүшләри вә тој зијафәтләри дә истисна дејил. Истәр өзүмүзүн, истәрсә дә башгаларынын тојунда, һамымыз белә давранмалыјыг.
Неҹә ҹаваб верәрдиниз?
• Достлуг ҝөрүшләри тәшкил едәркән иманымызы неҹә ҝөстәрә биләрик?
• Никаһ вә тој мәрасими заманы иманымызы неҹә ҝөстәрә биләрик?
• Тој һәдијјәси верәркән вә гәбул едәркән иманымызы неҹә ҝөстәрә биләрик?
[18-ҹи сәһифәдәки шәкил]
Бир нечә нәфәри гонаг дә’вәт етсәк дә, «јухарыдан назил олан һикмәт»и рәһбәр тутмаг ваҹибдир.