‘Дүзҝүн мүнасибәти оланлар’ һај верирләр
«Әбәди һәјата тәјин олунанларын [«дүзҝүн мүнасибәти оланларын», ЈД] һамысы иман етдиләр». ҺӘВ. ИШ. 13:48
1, 2. Еркән мәсиһчиләр Исанын Падшаһлыг һаггында хош хәбәрин бүтүн дүнјада тәблиғ олунаҹағы пејғәмбәрлијинә неҹә һај вермишдиләр?
«ҺӘВАРИЛӘРИН ИШЛӘРИ» китабында, Исанын Падшаһлыг һаггында хош хәбәрин бүтүн дүнјада тәблиғ олунаҹағы пејғәмбәрлијинә еркән мәсиһчиләрин неҹә һај вердикләри барәдә мараглы мәлуматлар вар (Мат. 24:14). Бу сәјли тәблиғчиләр онлардан сонра ҝәлән бүтүн тәблиғчиләрә нүмунә гојдулар. Исанын Јерусәлимдәки шаҝирдләринин сәјлә етдикләри тәблиғ нәтиҹәсиндә, «каһинләрдән бир чоху да» дахил олмагла, минләрлә инсан биринҹи әсрин јығынҹағына гошулду (Һәв. иш. 2:41; 4:4; 6:7).
2 Еркән миссионерләр чохларына мәсиһчи олмаға көмәк етмишдиләр. Мәсәлән, Филип Самаријада тәблиғ едәндә халг она диггәтлә гулаг асырды (Һәв. иш. 8:5-8). Павел мүхтәлиф әмәкдашлары илә хош хәбәри Кипрдә, Кичик Асијанын бәзи јерләриндә, Македонијада, Јунаныстанда вә Италијада тәблиғ етмишди. Павелин хидмәт етдији шәһәрләрдә бир чох јәһудиләр вә јунанлар мәсиһчи олурдулар (Һәв. иш. 14:1; 16:5; 17:4). Титус Критдә тәблиғ едирди (Тит. 1:5). Петер исә Бабилдә хидмәт едирди вә тәхминән ерамызын 62-64-ҹү илләриндә биринҹи мәктубуну јазанда мәсиһчиләрин фәалијјәти артыг Понтус, Галатија, Кападокија, Асија әјаләти вә Битинијада јахшы танынырды (1 Пет. 1:1; 5:13). Һәмин илләр неҹә дә ҝөзәл иди! Биринҹи әсрдәки мәсиһчиләр елә сәјлә тәблиғ едирдиләр ки, дүшмәнләри онларын «дүнјаны алт-үст» етдикләрини иддиа едирдиләр (Һәв. иш. 17:6; 28:22).
3. Бу ҝүн Падшаһлығын тәблиғиндә һансы наилијјәтләр әлдә едилиб вә бу сәндә һансы һиссләри ојадыр?
3 Бизим ҝүнләрдә дә мәсиһчи јығынҹағы ҝөрүнмәмиш мигјасда артмагла хејир-дуаланыб. Мәҝәр Јеһованын Шаһидләринин үмумдүнја һесабатыны охујанда вә бүтүн дүнјада әлдә олунан наилијјәтләри ҝөрәндә руһланмырсанмы? Падшаһлығын тәблиғчиләринин 2007-ҹи хидмәт или әрзиндә алты милјондан артыг Мүгәддәс Китаб өјрәнмәси кечирдикләрини билмәк сәни севиндирмирми? Бундан әлавә, кечән ил Иса Мәсиһин өлүмүнүн Хатирә Ҝеҹәсинә ҝәләнләрдән тәхминән он милјону Јеһованын Шаһиди олмајан инсанлар иди, онлар хош хәбәрә кифајәт гәдәр мараг ҝөстәриб бу мәрасимдә иштирак етмәји ваҹиб сајмышлар. Бу исә, һәлә ҝөрүләси ишләрин чох олдуғуну ҝөстәрир.
4. Падшаһлыг һаггында хош хәбәрә кимләр һај верир?
4 Биринҹи әсрдә олдуғу кими, бу ҝүн дә ‘әбәди һәјата дүзҝүн мүнасибәти оланларын һамысы’ һәгигәт хәбәринә һај верир (Һәв. иш. 13:48, ЈД). Јеһова белә инсанлары Өз тәшкилатына ҝәтирир. (Һаггај 2:7 ајәсини оху.) Бу бичин ишиндә там иштирак етмәк үчүн мәсиһчи хидмәтинә һансы мүнасибәти горујуб сахламалыјыг?
Ајры-сечкилик етмәдән тәблиғ ет
5. Јеһова һансы инсанлара лүтф ҝөстәрир?
5 Биринҹи әсрдәки мәсиһчиләр дәрк едирдиләр ки, «Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур» (Һәв. иш. 10:34, 35). Инсанын Јеһова илә јахшы мүнасибәтдә олуб-олмамасы онун Исанын фидијә гурбанлығына иман етмәсиндән асылыдыр (Јәһ. 3:16, 36). Јеһованын ирадәси одур ки, «бүтүн инсанлар хилас олуб, һәгигәти дәрк етсинләр» (1 Тим. 2:3, 4).
6. Падшаһлығын тәблиғчиләри нәјә јол вермәмәлидирләр вә нә үчүн?
6 Хош хәбәрин тәблиғчиләринин инсанын иргинә, сосиал вәзијјәтинә, ҝөркәминә, дининә вә ја башга шејләрә ҝөрә ајры-сечкилик етмәси һеч дә дүзҝүн олмазды. Бир анлыға дүшүн: сәнинлә биринҹи дәфә Мүгәддәс Китаб һәгигәтләри һаггында данышан инсанын сәнә мүнасибәтиндә ајры-сечкилик етмәдијинә ҝөрә миннәтдар дејилсәнми? Белә исә, нәјә ҝөрә сән дә хилас ҝәтирән хәбәри она гулаг асмаг истәјән һәр бир инсана чатдырмајасан? (Матта 7:12 ајәсини оху.)
7. Нәјә ҝөрә тәблиғ етдијимиз инсанлары мүһакимә етмәмәлијик?
7 Јеһова Исаны Һаким тәјин едиб вә буна ҝөрә дә бизим һеч кими мүһакимә етмәјә ихтијарымыз чатмыр. Бурада гәрибә бир шеј јохдур, чүнки биз, фикирләри вә үрәјин дүшүнҹәләрини ҝөрән Исадан фәргли олараг, јалныз ‘ҝөзләримизин ҝөрдүјүнә’ вә ја ‘гулағымызын ешитдијинә ҝөрә’ гәрар чыхара билирик (Јешаја 11:1-5; 2 Тим. 4:1).
8, 9. а) Шаул мәсиһчи олмаздан әввәл неҹә инсан иди? б) Һәвари Павелин нүмунәсиндән нә өјрәнә биләрик?
8 Јеһованын хидмәтчиләри мүхтәлиф мәншәли инсанлардыр. Сонралар Павел кими танынан тарсуслу Шаул буна ән бариз нүмунәләрдән биридир. Вахтилә фәрисеј олан Шаул, мәсиһчиләри гәддарҹасына тәгиб едирди. О өзлүјүндә әмин иди ки, мәсиһчиләр Јеһованын һәгиги хидмәтчиләри дејил вә буна ҝөрә дә онларын јығынҹағыны тәгиб едирди (Галат. 1:13). Инсан нөгтеји-нәзәринә ҝөрә, Шаул кими бир инсан Исанын давамчысы ола билмәзди. Амма Иса онун үрәјиндә нә исә јахшы бир шеј ҝөрүб, ону хүсуси бир тапшырыг үчүн сечди. Нәтиҹәдә, Шаул биринҹи әсрин ән фәал вә сәјли мәсиһчиләриндән бири олду.
9 Һәвари Павелин нүмунәсиндән нә өјрәнә биләрик? Ола билсин, әразимиздә јашајан бәзи инсанлар хош хәбәрә әдавәтлә јанашырлар. Биз белә инсанлардан киминсә мәсиһчи олаҹағына шүбһә етсәк дә, онларла Мүгәддәс Китаб әсасында сөһбәтимизи давам етдирмәјә чалышмалыјыг. Һәрдән һәгигәти мәһз белә инсанлар гәбул едир. Буна ҝөрә дә биз һамыја тәблиғ етмәкдән ‘ваз кечмәмәлијик’. (Һәвариләрин ишләри 5:42 ајәсини оху.)
Тәблиғ етмәкдән ‘ваз кечмәјәнләр’ үчүн хејир-дуалар
10. Хариҹи ҝөрүнүшүндән тәһлүкәли ҝөрүнән инсанлара тәблиғ етмәкдән нәјә ҝөрә чәкинмәмәлијик? Нүмунә чәкин.
10 Хариҹи ҝөрүнүш алдадыҹы ола биләр. Мисал үчүн, Игнасјоa Ҹәнуби Америка өлкәләриндән бириндә һәбсханада оларкән Јеһованын Шаһидләриндән бири она Мүгәддәс Китаб һәгигәтләрини өјрәтмәјә башлады. Игнасјо өзүндән тез чыхан вә далашган олдуғу үчүн һамы ондан горхурду. Онунла ејни һәбсханада оланларын бәзиләри әшјалар дүзәлдиб сатырдылар вә борҹларыны ҝеҹ гајтаран мүштәриләрә һәдә-горху ҝәлмәк үчүн Игнасјодан истифадә едирдиләр. Амма о, Мүгәддәс Китаб һәгигәтләрини өјрәндикҹә вә өјрәндикләрини тәтбиг етдикҹә гәддар инсандан мүлајим инсана чеврилди. Инди һеч ким борҹларыны алмаг үчүн ондан истифадә етмирди. Игнасјо чох шаддыр ки, Мүгәддәс Китаб һәгигәтләри вә Аллаһын руһу она хасијјәтини дәјишмәјә көмәк етди. О, онунла өјрәнмә кечирән тәблиғчиләрин ајры-сечкилик етмәдикләринә ҝөрә дә миннәтдардыр.
11. Биз нәјә ҝөрә инсанларын јанына дөнә-дөнә ҝәлирик?
11 Хош хәбәри чатдырдығымыз инсанларын јанына дөнә-дөнә ҝәлмәјимизин сәбәбләриндән бири одур ки, вахт кечдикҹә онларын шәраити вә әһвал-руһијјәси дәјишә биләр вә дәјишир дә. Бәзиләри ҹидди хәстәлијә тутула, ишини итирә вә ја онларын әзизләриндән бири өлә биләр. (Ваиз 9:11 ајәсини оху.) Дүнјада баш верән һадисәләр адамлары өз ҝәләҹәкләри һагда ҹидди дүшүнмәјә вадар едә биләр. Чох вахт бу дәјишикликләр, әввәлләр хош хәбәрә лагејд, һәтта әдавәтлә јанашанларын бу хәбәрә һај вермәсинә сәбәб олур. Буна ҝөрә дә, һәр бир фүрсәтдән истифадә едәрәк инсанларла хош хәбәри бөлүшмәлијик.
12. Тәблиғ етдијимиз инсанлара неҹә јанашмалыјыг вә нә үчүн?
12 Инсана инсанлары груплара ајырмаг, һәмчинин ҝөрдүкләри вә ешитдикләри әсасында башгалары барәдә рәј сөјләмәк хасдыр. Јеһова исә һәр инсана фәрди јанашыр. О, һәр бир адамын дахилиндә олан јахшы хүсусијјәтләри ҝөрүр. (1 Шамуел 16:7 ајәсини оху.) Биз дә хидмәтимиздә белә давранмаға чалышмалыјыг. Тәблиғ етдијимиз инсанлара мүсбәт јанашмағымызын јахшы нәтиҹәләр ҝәтирдијини ҝөстәрән бир чох нүмунәләр вар.
13, 14. а) Бир пионер хидмәтдә раст ҝәлдији гадын һаггында нәјә ҝөрә јанлыш нәтиҹәјә ҝәлмишди? б) Бу һадисәдән нә өјрәнә биләрик?
13 Пионер кими хидмәт едән Сандра Кариб адаларындан бириндә евдән-евә тәблиғ едәркән Рут адлы бир гадына раст ҝәлмишди. Рут карнавал шәнликләриндә иштирак етмәји чох хошлајырды вә һәтта ики дәфә карнавалын шаһзадәси сечилмишди. О, Сандранын дедикләринә гејри-ади марагла гулаг асды вә Мүгәддәс Китабы өјрәнмәјә разы олду. Сандра хатырлајыр: «Онун евинә ҝирәндә диварда карнавал либасында чәкдирдији бөјүк шәклини вә газандығы мүкафатлары ҝөрдүм. Мән фикирләшдим ки, бу гәдәр мәшһур вә өзүнү карнавала һәср етмиш бир инсан һәгигәтә ҹидди мараг ҝөстәрмәз. Буна ҝөрә дә даһа онун јанына ҝетмәдим».
14 Бир гәдәр сонра Рут Падшаһлыг Залына ҝәлди вә ҝөрүшүн сонунда Сандраја јахынлашыб сорушду: «Нәјә ҝөрә мәнимлә өјрәнмә кечирмәјә ҝәлмирсиниз?» Сандра үзрхаһлыг едиб, онунла өјрәнмәни давам етдирәҹәјинә сөз верди. Рут гыса вахт әрзиндә руһән инкишаф етди, евиндәки карнавал шәкилләрини јығышдырды, јығынҹаг ҝөрүшләриндә вә тәблиғ хидмәтиндә иштирак етмәјә башлады вә һәјатыны Јеһоваја һәср етди. Тәбии ки, Сандра илк тәәссүратынын јанлыш олдуғуну анлады.
15, 16. а) Бир мәсиһчинин гоһумуна тәблиғ етмәси нә илә нәтиҹәләнди? б) Нәјә ҝөрә һансыса гоһума сүрдүјү һәјат тәрзинә ҝөрә тәблиғ етмәкдән чәкинмәмәлијик?
15 Санки һеч бир нәтиҹәси олмајаҹаг кими ҝөрүнән вәзијјәтләрдә белә, бәзи мәсиһчиләр иманларына шәрик олмајан гоһумларына тәблиғ едәрәк јахшы наилијјәтләр әлдә етмишләр. Буна Бирләшмиш Штатларда јашајан Ҹојс адлы баҹымызын нүмунәсини мисал чәкмәк олар. Онун баҹысынын әри јенијетмә јашларындан бир нечә дәфә һәбсдә олмушду. Ҹојс хатырлајыр: «Инсанлар дејирдиләр ки, онун һәјаты пуч олуб, чүнки о, наркотик сатыр, оғурлуг едир вә бир чох писликләр төрәдирди. Бүтүн бу чәтинликләрә бахмајараг, мән 37 ил әрзиндә һәгигәти онунла бөлүшмүшәм». Ҹојсун өз гоһумуна көмәк етмәк үчүн ҝөстәрдији сәји вә сәбри бол-бол мүкафатландырылды: онун језнәси Јеһованын Шаһидләри илә Мүгәддәс Китабы өјрәнмәјә башлады вә һәјатында көклү дәјишикликләр етди. Бу јахынларда исә, 50 јашында олан бу гоһуму Калифорнијада (АБШ) кечирилән вилајәт конгресиндә вәфтиз олунду. Ҹојс дејир: «Севинҹимдән ағладым. Мән чох шадам ки, һеч вахт ондан үмидими үзмәдим!»
16 Ола билсин, һансыса гоһумуна сүрдүјү һәјат тәрзинә ҝөрә Мүгәддәс Китаб һәгигәтләрини данышмаға тәрәддүд едирсән. Амма Ҹојс језнәсинә тәблиғ етмәкдән чәкинмәди. Мәҝәр биз инсанын үрәјиндә оланлары ҝөрә билирикми? Бәлкә дә кимсә сәмими-гәлбдән һәгигәти ахтарыр. Буна ҝөрә, ҝәлин ону һәгигәти тапмаг имканындан мәһрум етмәјәк. (Сүлејманын мәсәлләри 3:27 ајәсини оху.)
Мүгәддәс Китабы өјрәнмәк үчүн ҝөзәл вәсаит
17, 18. а) «Мүгәддәс Китаб әслиндә нә өјрәдир?» вәсаитинин дәјәри һаггында дүнјанын мүхтәлиф ҝушәсиндән ҝәлән мәлуматларда нә дејилир? б) Бу китабдан истифадә едәркән баш верән мараглы һадисә данышын.
17 Дүнјанын мүхтәлиф ҝушәсиндән ҝәлән мәлуматлара ҝөрә, «Мүгәддәс Китаб әслиндә нә өјрәдир?» китабы бир чох сәмими инсанларын хошуна ҝәлир. Бирләшмиш Штатларда јашајан Пени адлы пионер баҹымыз бу китаб васитәсилә бир нечә Мүгәддәс Китаб өјрәнмәси башламышдыр. Онлардан икиси мәнсуб олдуглары килсәнин мөмин үзвләри олмуш јашлы адамлар иди. Пени «Мүгәддәс Китаб өјрәдир» вәсаитиндәки һәгигәтләрә онларын неҹә мүнасибәт ҝөстәрәҹәкләрини билмирди. О јазыр: «Бу китабдакы мәлумат о гәдәр ајдын, мәнтиги вә јығҹам шәкилдә јазылыб ки, онлар өјрәндикләри һәгигәтләри мүбаһисә етмәдән вә һеч бир сарсынты кечирмәдән асанлыгла гәбул етдиләр».
18 Британијада хидмәт едән Пат адлы баҹымыз Асија өлкәләринин бириндән олан бир гачгын гадынла Мүгәддәс Китаб өјрәнмәси башлады. Бу гадын, үсјанчы әсҝәрләр әрини вә оғулларыны апардыгдан сонра өз өлкәсиндән гачмаг мәҹбуријјәтиндә галмыш вә бир даһа аилә үзвләрини ҝөрмәмишди. Онун һәјаты тәһлүкә алтында иди, ев-ешији јандырылмыш, өзү исә бир груп киши тәрәфиндән зорланмышды. Башына ҝәлән фәлакәтләр ону һәјатынын мәнасыз олдуғуну дүшүнмәјә вадар етмиш вә о, бир нечә дәфә интиһар етмәјә чалышмышды. Лакин Мүгәддәс Китаб өјрәнмәси она үмид верди. Пат јазыр: «“Мүгәддәс Китаб өјрәдир” вәсаитиндә фикирләрин садә изаһаты вә ҝөзәл әјани нүмунәләр она ҝүҹлү тәсир бағышлады». Һәмин гадын гыса вахт әрзиндә руһән инкишаф етди, лазыми дәјишикликләр едиб вәфтиз олунмамыш тәблиғчи олду вә инди о, јахын вахтларда олаҹаг конгресдә вәфтиз олунмаға һазырлашыр. Бу ҹүр сәмими инсанлара Мүгәддәс Китабын вердији үмид һаггында өјрәнмәјә вә ону гијмәтләндирмәјә көмәк етмәк һәгигәтән дә севиндириҹидир!
«Јахшылыг едәркән руһдан дүшмәјәк»
19. Нәјә ҝөрә тәблиғ иши бу гәдәр тәхирәсалынмаздыр?
19 Тәблиғ етмәк вә шаҝирд һазырламаг тапшырығы ҝүндән-ҝүнә даһа тәхирәсалынмаз олур. Һәр ил, Аллаһ һаггында өјрәнмәк истәјән минләрлә инсан хош хәбәрә һај верир. Јеһованын «мөһтәшәм ҝүнү јахынлашыр», бу исә о демәкдир ки, руһани зүлмәтдән чыхмајанлар «гырғын тәһлүкәси алтында»дырлар (Сеф. 1:14; Сүл. мәс. 24:11).
20. Һәр биримиз нә етмәјә гәти гәрарлы олмалыјыг?
20 Биз бу ҹүр инсанлара һәлә дә көмәк едә биләрик. Амма буну етмәк үчүн, ‘Исанын Мәсиһ олдуғуну мүждәләмәкдән ваз кечмәјән’ еркән мәсиһчиләри тәглид етмәлијик (Һәв. иш. 5:42). Ҝәлин, мүгавимәтләрә таб ҝәтирәрәк, ‘өјрәтмәк баҹарығымыза’ диггәт јетирәрәк вә ајры-сечкилик етмәдән тәблиғ едәрәк онларын нүмунәсини тәглид едәк! «Јахшылыг едәркән руһдан дүшмәјәк», чүнки сонадәк таб ҝәтирсәк, бол хејир-дуалар алаҹаг вә Аллаһын лүтфүнү ҝөрәҹәјик. (2 Тим. 4:2; Галатијалылара 6:9 ајәсини оху.)
[Һашијә]
a Бәзи адлар дәјишдирилиб.
Неҹә ҹаваб верәрдиниз?
• Хош хәбәрә кимләр һај верир?
• Нә үчүн тәблиғ едәркән ајры-сечкилик етмәмәлијик?
• «Мүгәддәс Китаб әслиндә нә өјрәдир?» нәшри сајәсиндә һансы наилијјәтләр әлдә едилиб?
[13-ҹү сәһифәдәки шәкилләр]
Минләрлә сәмими инсанлар хош хәбәрә һај верирләр
[15-ҹи сәһифәдәки шәкил]
Һәвари Павелин һадисәси бизә нә өјрәдир?
[16-ҹы сәһифәдәки шәкил]
Хош хәбәрин тәблиғчиләри ајры-сечкилик етмир