Ваҹиб ҝөрүш

МӘНИМ ваҹиб бир ҝөрүшүм вар. Иҹазә верин, мәни, ҝәнҹ испанијалы бир ананы бу ҝөрүшү тәјин етмәјә нәјин вадар етдији һаггында данышым.

Валидејнләримин евиндә сүлһ вә әмин-аманлыг јох иди. Дөрд јашы оланда кичик гардашымын фаҹиә нәтиҹәсиндә һәлак олмасы аиләмизи дәрин кәдәрә бүрүмүшдү. Бундан башга, атамын хошаҝәлмәз вәрдишләри уҹбатындан анам аилә һәјатындан севинҹ дуја билмирди. Анҹаг бу чәтинлик анамын мәнә вә бөјүк гардашыма мәнәви дәјәрләр ашыламасына мане олмады.

Сонралар гардашым да, мән дә аилә гурдуг. Чох кечмәмиш анамда хәрчәнҝ хәстәлији ашкар едилди вә о бу хәстәликдән вәфат етди. Лакин өлүмүндән габаг о бизә бир хәзинә вәсијјәт етди.

Танышларындан бири она Мүгәддәс Јазылардакы дирилмә үмиди һаггында данышмыш вә анам Мүгәддәс Китабы өјрәнмәк тәклифини гәбул етмишди. Һәјатынын сон ҝүнләриндә Мүгәддәс Китабын үмидвериҹи хәбәри онун һәјатына мәна гатды вә она хошбәхтлији тапмаға көмәк етди.

Мүгәддәс Китаб хәбәринин анама мүсбәт тәсир етдијини ҝөрәрәк гардашымла мән Аллаһын Кәламыны өјрәнмәјә башладыг. Икинҹи өвладымын, ҝөзәл гызым Лусијанын дүнјаја ҝәлмәсиндән бир ај әввәл мән Јеһованын Шаһиди кими вәфтиз олундум.

Вәфтиз олундуғум ҝүн мәним үчүн чох әһәмијјәтли ҝүн иди. Сәбәбләрдән бири о иди ки, мән Јеһоваја әбәди хидмәт етмәк үчүн өзүмү Она һәср етмишдим вә артыг Она мәхсус идим. Башга сәбәб исә о иди ки, иманымы севимли оғлум вә гызымла бөлүшә биләрдим.

Анҹаг хошбәхтлијимин икинҹи сәбәби чох чәкмәди. Лусија дөрд јашына чатанда, гарнында шиддәтли ағрылар башлады. Бир нечә анализ вердикдән сонра рентҝенолог онун гара ҹијәринә битишик портағал бојда шишин олдуғуну деди. Һәким изаһ етди ки, бу, нејробластома, јәни сүрәтлә инкишаф едән бәдхассәли шишдир. Бунунла да, Лусијанын хәрчәнҝлә једдииллик мүбаризәси башлады. О тез-тез узун мүддәт әрзиндә хәстәханада јатырды.

Фәдакарлыг руһу

Бу чәтин илләр әрзиндә Лусија мәни тез-тез гуҹаглајыб, өпәрәк руһландырырды. Онун хәстәлијә неҹә таб ҝәтирмәси хәстәхана ишчиләрини һејрәтә ҝәтирмишди. О һәр заман тибб баҹылары илә һәвәслә әмәкдашлыг едир, гоншу палаталардакы ушаглара јогурт, мејвә ширәси вә башга шејләр апармаға көмәк едирди. Тибб баҹылары һәтта Лусијаја, онун «тибб баҹысы көмәкчиси» олдуғуну ҝөстәрән ағ халат вә нишан вермишдиләр.

«Лусија үрәјимә јаман јатмышды», — дејә бир хәстәхана ишчиси хатырлајыр. «О, фәал, јарадыҹы ушаг иди, шәкил чәкмәји хошлајырды. О, дирибаш вә чох ағыллы гыз иди».

Лусија Аллаһын Кәламындан ҝүҹ вә раһатлыг тапырды (Ибр. 4:12). О әмин иди ки, Аллаһын Кәламында вәд едилдији кими, јени дүнјада «өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» (Вәһј 21:4). Лусија башга инсанлара мараг ҝөстәрир вә фүрсәт дүшән кими Мүгәддәс Китаб хәбәрини бөлүшүрдү. Лусијанын дирилмәјә олан мөһкәм инамы, сағалмасына үмид ҹүзи олса белә, она өзүнү әлә алмаға вә шән галмаға көмәк едирди (Јешаја 25:8). Хәрчәнҝ һәјатыны әлиндән алана гәдәр о бу әһвал-руһијјәни горуду.

Мән ваҹиб ҝөрүшү елә һәмин ҝүн тәјин етдим. Лусија ҝөзләрини ҝүҹлә ачырды. Атасы онун бир әлиндән, мән исә о бири әлиндән тутмушдум. «Нараһат олма, мән сәни тәрк етмәјәҹәјәм», — дејә пычылдадым. «Садәҹә јаваш нәфәс ал. Ајыланда өзүнү јахшы һисс едәҹәксән. Даһа һеч бир јерин ағрымајаҹаг, мән сәнин јанында олаҹағам».

Мән о ҝөрүшә мүтләг ҝетмәлијәм. Билирәм ки, ҝөзләмәк асан олмајаҹаг. Анҹаг баша дүшүрәм ки, сәбирли олуб Јеһоваја етибар етсәм вә Онун гаршысында нөгсансызлығымы горусам, Лусија дириләндә онун јанында олаҹағам.

Лусијадан галан мирас

Лусијанын ҹәсарәти, еләҹә дә јығынҹағын чәтин анда бизә дајаг олмасы иманыма шәрик олмајан јолдашыма дәрин тәсир бағышлады. Лусија өлән ҝүнү јолдашым мәнә деди ки, ҝәрәк һәр шеји јенидән өлчүб-бичсин. Бир нечә һәфтәдән сонра јығынҹағын ағсаггалындан онунла Мүгәддәс Китабы өјрәнмәји хаһиш етди. Тезликлә јолдашым бүтүн јығынҹаг ҝөрүшләринә ҝәлмәјә башлады. Јеһованын көмәјилә әввәлләр баҹармадығы бир шеји етди — сигарет чәкмәји тәрҝитди.

Лусијанын хиффәтини һәлә дә чәкирәм, анҹаг ондан галан мираса ҝөрә Јеһоваја чох миннәтдарам. Јолдашымла мән ҝөзәл дирилмә үмиди илә бир-биримизә тәсәлли верир, һәтта Лусијаны, онун ҝүлүмсәјәркән һәјат ешгилә јанан јумру ҝөзләрини вә батан јанагларыны јенидән ҝөрәҹәјимизи хәјалымызда ҹанландырырыг.

Гызымын фаҹиәсинин гоншулугда јашајан бир нәфәрә хүсуси тәсири олду. Бир јағышлы шәнбә сәһәри оғлу Лусија илә бир мәктәбдә охујан гадын бизә ҝәлди. О, 11 јашлы башга бир оғлуну ејни хәстәликдән итирмишди. Гадын Лусија илә нә баш вердијини ешидәндә јашадығымыз јери тапыб, бизә баш чәкди. О, мәним Лусијанын өлүмүнә неҹә таб ҝәтирдијими билмәк истәјирди вә охшар вәзијјәтдә олан башга аналара көмәк етмәк үчүн гаршылыглы јардым групу тәшкил етмәји тәклиф етди.

Изаһ етдим ки, шәхсән мән әсл тәсәллини, инсанларын верә биләҹәјиндән гат-гат үстүн тәсәллини Мүгәддәс Китаб вәдләриндән бириндә тапмышам. Јәһја 5:28, 29 ајәләриндәки Исанын сөзләрини она охудугда, ҝөзләриндә үмид гығылҹымы ҝөрүндү. О, Мүгәддәс Китабы өјрәнмәк тәклифини гәбул етди вә тезликлә ‘Аллаһын һәр ҹүр ағылдан үстүн олан сүлһүнү’ һисс етмәјә башлады (Филип. 4:7). Мүгәддәс Китабы бир јердә өјрәнәндә тез-тез дајаныб, өзүмүзү јени дүнјада, дирилән севимли өвладларымызы гаршылајан тәсәввүр едирик.

Бәли, Лусијанын гыса һәјатындан бизә әбәди мирас галды. Онун иманы аиләмизин Аллаһа хидмәтдә бирләшмәсинә көмәк етди вә мәним иманда мөһкәм галмаг гәтијјәтими даһа да артырды. Шүбһәсиз, дирилмәјә үмиди олан әзизләрини итирән бизләрин һамысынын ваҹиб ҝөрүшү вар.

[20-ҹи сәһифәдәки шәкил]

Лусијанын чәкдији Ҹәннәт шәкли