Јүксәк Анд дағларында хош хәбәри тәблиғ едирик

БИЗ, 18 нәфәр торпағын үстүндә узанмышдыг. Јатаг торбасынын ичиндә титрәјә-титрәјә, сел кими јаған јағышын башымызын үстүндәки дәмир дамы дөјәҹләдијинә гулаг асырдыг. Бу кичик дахманын вәзиј­јәтинә бахыб, фикирләширдик ки, ҝөрәсән, бурада биздән әввәл јашајан олуб.

Бура ҝәлмәјимизин сәбәби нә иди? Исанын «дүнјанын ән узаг јерләринә гәдәр» хош хәбәри тәблиғ етмәк әмрини јеринә јетирмәк арзумуз (Һәв. иш. 1:8; Мат. 24:14). Биз Боливијанын Анд дағларынын уҹгар јерләриндә тәблиғ етмәк үчүн ҝәлмишдик.

Јолдакы чәтинликләр

Илк чәтинлијимиз елә ора ҝедиб чатмаг иди. Мәлум олду ки, белә узаг јерләрә нәглијјат дәгиг график үзрә ишләмир. Автобусумуз ҝөзләдијимиздән балаҹа иди, буна ҝөрә бәзиләримиз ајаг үстә ҝетмәли олдуг. Бүтүн бунлара бахмајараг, һәмин јерә ҝәлиб чатдыг.

Мәгсәдимиз Боливијанын јүксәк Анд дағларындакы кәндләрдә тәблиғ етмәк иди. Автобусдан дүшәндән сонра һәр кәс өз јүкүнү ҝөтүрүб дик ҹығырла бир-биринин ардынҹа еһтијатла галхырды.

Кәндләр балаҹа ҝөрүнсәләр дә, евләр бир-бириндән чох аралы иди, буна ҝөрә дә бир кәнддә тәблиғ етмәк үчүн чох вахт сәрф етмәли олурдуг. Нә гәдәр чох ҝедирдиксә-ҝедәк, узагда јенә дә ев ҝөрүнүрдү. Чох вахт тарлалардан кечән доланбаҹ јолларда чашыб галырдыг.

«Индијә кими һарада идиниз?»

Белә узагдан ҝәлмәјимиз бир гадына елә ҝүҹлү тәсир бағышлады ки, о өз мәтбәхиндә јемәк биширмәјимизә иҹазә верди, бунун үчүн бизә һәтта одун да верди. Мүгәддәс Китабын өлүләр һаггында өјрәтдикләрини биләндә бир киши сорушду: «Индијә кими һарада идиниз?» О, елә мараг ҝөстәрди ки, биз кәнддән чыханда, о да бизимлә ҝәлди вә јолбоју чохлу суаллар верди. Јеһованын Шаһидләри һаггында һеч вахт ешитмәјән башга бир киши әдәбијјатымыза бөјүк мараг ҝөстәрди. Ҝәлдијимизә ҝөрә бизә чох бөјүк миннәтдарлыг етди вә дамын ачарыны бизә верди ки, орада ҝеҹәләјәк.

Бир ҝеҹә елә гаранлыг иди ки, билмәдән чадырымызы бөјүк гара гарышгаларын јувасынын үстүндә гурдуг. Гарышгалар үстүмүзә дарашыб, бизи дишләмәјә башладылар. О гәдәр јорғун идик ки, башга јерә ҝетмәјә һалымыз олмады, хошбәхтликдән онлар да чох кечмәмиш биздән әл чәкдиләр.

Торпағын үстүндә јатдығымыз үчүн, әввәлҹә күрәјимиз, габырғаларымыз ағрыјырды, анҹаг ҝеҹәјарысы артыг буна алышдыг. Сәһәр ојананда инсан әли дәјмәмиш вадиләри, онларын үстүндә јаваш-јаваш сүзән булудлары, башыгарлы әзәмәтли дағлары узагдан ҝөрәндә, бүтүн ағрыларымыз јаддан чыхды. Сакитлији тәкҹә суларын шырылтысы вә гушларын нәғмәси позурду.

Чајда јујундугдан сонра, ҝүндәлик ајәни арашдырдыг, сәһәр јемәјини једик вә јаваш-јаваш башга узаг кәндләрә үз тутдуг. Бу кәндләрә галхмаға дәјәрди. Јолда гоҹа бир гадына раст ҝәлдик, Аллаһын адынын Јеһова олдуғуну Мүгәддәс Китабдан она ҝөстәрәндә, һиссләрини ҹиловлаја билмәјиб ағлады. Инди о, дуаларында Аллаһа ады илә мүраҹиәт едә биләр!

Јашлы бир киши Аллаһын ону јада салдығыны дејиб, бирдән маһны охумаға башлады. Маһныда дејилирди ки, бизи онун јанына мәләкләр ҝөндәриб. Ағыр хәстәлик уҹбатындан евдән чыха билмәјән башга бир киши кәнддән һеч кимин она баш чәкмәдијини деди. Бизим исә Ла-Пасдан бу гәдәр јолу ҝәлдијимизә һејрәтләнди. Башга бир нәфәрә, Јеһованын Шаһидләринин инсанлара өз евләриндә баш чәкмәси дәрин тәсир бағышлады, чүнки башга динләр инсанлары ибадәтә садәҹә килсә зәнҝи илә чағырыр.

Һәмин әразидә евләрин һеч бириндә електрик олмадығындан адамлар һава гараланда јатмаға ҝедир, ҝүн чыханда исә дурурлар. Буна ҝөрә дә онлары евдә тапмаг үчүн сәһәр саат алтыдан тәблиғ етмәјә башламалы олурдуг, јохса сонра чохлары тарлада ишләмәјә ҝедирди. Артыг ишләмәјә башлајанлардан бәзиләри исә әлини ишдән сахлајыб Аллаһын Кәламындан чатдырдығымыз хәбәрә һәвәслә гулаг асырды, бу арада өкүзләри дә истираһәт едирди. Евдә тапдығымыз адамларын чоху бизә үстүндә отурмаға гојун дәриси верир вә аиләнин бүтүн үзвләрини гулаг асмаға чағырырдылар. Бәзи әкинчиләр вердијимиз Мүгәддәс Китаб әдәбијјатына ҝөрә миннәтдарлыгдан ирәли ҝәләрәк бизә бөјүк зәнбилләрлә гарғыдалы верирдиләр.

«Мәни јаддан чыхармадыныз»

Әлбәттә, инсанларын Мүгәддәс Китабы јахшы баша дүшмәләри үчүн онларын јанына бир дәфә ҝәлмәк кифајәт етмир. Чохлары хаһиш едирдиләр ки, јенидән гајыдаг вә Мүгәддәс Китабы онлара өјрәдәк. Буна ҝөрә дә Боливијанын бу әразисинә бир нечә дәфә ҝәлдик.

Гоҹа бир гадын гајытмағымыза севиниб деди: «Сиз мәним баламсыныз. Мәни јаддан чыхармадыныз». Бир киши ҝөрдүјүмүз ишә ҝөрә миннәтдарлығыны билдирди вә тәклиф етди ки, ҝәлән дәфә ҝәләндә онун евиндә галаг. Чәкдијимиз әмәјин ән бөјүк мүкафаты әввәлки ҝәлишимиздә баш чәкдијимиз бир гадынын шәһәрә көчдүјүнү вә инди орада хош хәбәри тәблиғ етдијини ешитмәк иди.

Илк сәјаһәтимизин ахырынҹы ҝүнүндә пилтәмизин нефти гуртармыш, өзүмүзлә ҝәтирдијимиз әрзаг еһтијаты исә лап аз галмышды. Оҹаг галамаг үчүн чыр-чырпы јығыб, ахырынҹы јемәјимизи биширдик вә ҝеријә јола дүшдүк. Автобуса минәҹәјимиз шәһәрдән чох узагда идик. Нәһајәт, гаранлыгда ҝәлиб ора чатдыг.

Евә гајыдырыг

Евә гајытмаг да асан олмады, јолда автобусумуз хараб олду. Бир гәдәр сонра адамларла долу јүк машынына минә билдик. Бу бизә нә үчүн бурада олмағымызла марагланан јол јолдашларымыза тәблиғ етмәк имканы јаратды. Тәбиәтҹә утанҹаг олмаларына бахмајараг, ­әслиндә бу адамлар сәмими вә меһрибандырлар.

Доггуз саат јүк машынынын архасында јол ҝедәндән сонра исланмыш вә сүмүкләримизә гәдәр донмуш вәзијјәтдә евә чатдыг. Анҹаг сәјаһәтимиз бошуна олмады. Јолда, шәһәрдә јашајан бир гадын Мүгәддәс Китабы өјрәнмәјә разылыг верди.

Белә уҹгар јерләрдә јашајан адамлара хош хәбәри чатдырмаг, доғрудан да, чох ҝөзәл имкандыр. Биз дөрд бөјүк, еләҹә дә чохлу балаҹа кәндләрдә тәблиғ етдик. Истәр-истәмәз бу сөзләр јадымыза дүшүрдү: «Сүлһ хәбәри ҝәтирән, дағлары ашыб-ҝәлән мүждәчинин ајаглары неҹә дә ҝөзәлдир! О, хош мүждә ҝәтирир, гуртулуш хәбәри верир» (Јешаја 52:7; Ром. 10:15).

[17-ҹи сәһифәдәки шәкил]

Хош хәбәри бөлүшмәјә һазырыг