Гачмалы олдуғумуз шејләр

«Еј ҝүрзәләр нәсли! Ҝәләҹәк гәзәбдән гачмаға сизи ким тәлгин етди?» (МАТ. 3:7).

1. Мүгәддәс Китабда гачмаға даир һансы нүмунәләр вар?

«ГАЧМАГ» сөзүнү ешидәндә ағлыныза нә ҝәлир? Бәзиләринин ағлына јарашыглы ҝәнҹ Јусифин Потифарын арвадынын әхлагсыз тәклифләриндән гачмасы ҝәлир (Јар. 39:7-12). Башгалары исә, Исанын «гошунларын Јерусәлими мүһасирә етдијини ҝөрдүјүнүз заман... Јәһудејада оланлар дағлара гачсынлар; шәһәрдә оланлар орадан чыхсынлар» хәбәрдарлығына гулаг асараг, ерамызын 66-ҹы илиндә Јерусәлимдән гачан мәсиһчиләр һаггында дүшүнә биләр (Лука 21:20, 21).

2, 3. а) Вәфтизчи Јәһјанын дин рәһбәрләрини тәнгид етмәсинин әсл мәнасы нә иди? б) Иса Јәһјанын вердији хәбәрдарлығы неҹә ҝүҹләндирди?

² Јухарыда чәкдијимиз нүмунәләрдә һәрфи мәнада гачмагдан данышылыр. Бу ҝүн, демәк олар ки, дүнјанын бүтүн өлкәләриндә јашајан мәсиһчиләр үчүн мәҹази мәнада гачмаг сон дәрәҹә ваҹибдир. Вәфтизчи Јәһја «гачмаг» сөзүнү мәһз бу мәнада ишләтмишди. Јәһјаны ҝөрмәјә ҝәләнләр арасында төвбә етмәк үчүн һеч бир сәбәбләри олмадығыны дүшүнән өзләриндән разы јәһуди дин рәһбәрләри дә вар иди. Онлар төвбә етдикләрини вәфтиз олмагла ҝөстәрән садә адамлара јухарыдан ашағы бахырдылар. Јәһја мәрдҹәсинә һәмин икиүзлү рәһбәрләри ифша едирди: «Еј ҝүрзәләр нәсли! Ҝәләҹәк гәзәбдән гачмаға сизи ким тәлгин етди? Инди, төвбәјә лајиг сәмәрә јарадын» (Мат. 3:7, 8).

³ Јәһја һәрфи мәнада гачмагдан данышмырды. О, ҝәләҹәк һөкм, гәзәб ҝүнү һаггында хәбәрдарлыг едирди вә дин хадимләринин нәзәринә чатдырырды ки, һәмин ҝүндән гуртулмаг истәјирләрсә, төвбә етдикләрини ҝөстәрән сәмәрә вермәлидирләр. Сонралар Иса горхмадан дин рәһбәрләрини ифша етди — онларын гәддарлығы әслиндә аталарынын Иблис олдуғуну ҝөстәрирди (Јәһ. 8:44). Јәһјанын әввәлҹәдән дедији хәбәрдарлығы ҝүҹләндирәрәк, Иса онлары «ҝүрзәләр нәсли» адландырыб сорушду: «Ҹәһәннәм [«Ҝеһенна», ЈД] мәһкумијјәтиндән неҹә гачаҹагсыныз?» (Мат. 23:33). Иса «Ҝеһенна» дејәндә нәји нәзәрдә тутурду?

4. Иса Ҝеһенна сөзүнү ишләтмәклә нә демәк истәјирди?

⁴ Ҝеһенна Јерусәлимин диварларындан кәнарда јерләшән вади иди. Орада зибилләри вә өлү һејванларын ҹәсәдләрини јандырырдылар. Иса Ҝеһенна сөзүнү әбәди өлүмүн символу кими ишләдирди. (27-ҹи сәһифәјә бах.) Онун Ҝеһеннадан гачмаға даир вердији суал ҝөстәрирди ки, һәмин дин рәһбәрләри бир синиф кими әбәдилик мәһв олмаға лајигдирләр (Мат. 5:22, 29).

5. Тарих Јәһјанын вә Исанын хәбәрдарлығынын јеринә јетдијини неҹә сүбут едир?

⁵ Јәһуди рәһбәрләри Исаны вә давамчыларыны тәгиб етмәклә ҝүнаһларынын үстүнә ҝүнаһ артырдылар. Јәһјанын вә Исанын хәбәрдарлыг етдији кими, бир гәдәр сонра Аллаһын гәзәб ҝүнү ҝәлди. Һәмин вахты ‘ҝәләҹәк гәзәб’ јалныз бир јерә, Јерусәлимә вә Јәһудејаја јөнәлдилдијиндән һәрфи мәнада гачмаг мүмкүн ола биләрди. Гәзәб ерамызын 70-ҹи илиндә Рома гошунларынын Јерусәлими вә орадакы мәбәди јерлә јексан етдикләри заман ҝәлди. Јерусәлимин башына һәлә о ҹүр «мәшәггәт» ҝәлмәмишди. Чохлары гәтлә јетирилди вә ја әсир апарылды. Бу, мәсиһчи олдугларыны иддиа едәнләри вә башга динләрин үзвләрини ҝөзләјән мәһвә ишарә едирди (Мат. 24:21).

Гачмалы олдуғумуз ҝәләҹәк гәзәб

6. Еркән мәсиһчи јығынҹағында нә баш галдырды?

⁶ Еркән мәсиһчиләрдән бәзиләри дөнүк чыхдылар вә бир чохларыны өз архаларынҹа апардылар (Һәв. иш. 20:29, 30). Нә гәдәр ки, Исанын һәвариләри сағ идиләр, белә дөнүклүјә ‘манечилик төрәдирдиләр’, анҹаг онлар өләндән сонра чохлу мәсиһчи тәригәтләри јаранды. Бу ҝүн Христиан дүнјасында бир-биринә зидд олан јүзләрлә дин мөвҹуддур. Мүгәддәс Китаб христиан руһаниләрини бир груп шәклиндә «ганунсуз адам» вә ‘Рәбб Исанын өлдүрәҹәји вә Өз ҝәлишинин изһары илә мәһв едәҹәји’ «һәлак олаҹаг шәхс» кими тәсвир едәрәк, онларын баш галдыраҹағына ишарә етмишди (2 Салон. 2:3, 6-8).

7. «Ганунсуз адам» ифадәси нә үчүн Христиан дүнјасынын руһаниләринә мүвафигдир?

⁷ Христиан дүнјасы о мәнада ганунсуздур ки, Мүгәддәс Китаба зидд олан тәлимләри, бајрамлары вә давраныш тәрзини јајараг, милјонларла инсаны алдатмышдыр. Исанын мүһакимә етдији дин рәһбәрләри кими, «һәлак олаҹаг шәхс»ин бир һиссәси олан мүасир руһаниләр синфи дә, дирилмәјә үмидләри олмадан мәһв едиләҹәкләр (2 Салон. 1:6-9). Бәс белә исә, Христиан дүнјасынын вә ја башга јалан динләрин рәһбәрләри тәрәфиндән алдадылан инсанлары нә ҝөзләјир? Бу суала ҹаваб вермәк үчүн ҝәлин б. е. ә. 607-ҹи илдә Јерусәлимин илк дәфә мәһв едилмәсиндән сонра баш верән һадисәләрә нәзәр салаг.

«Бабилин ичиндән гачын»

8, 9. а) Јеремјанын Бабилдә әсарәтдә олан јәһудиләр үчүн һансы пејғәмбәрлик хәбәри вар иди? б) Бабилин мидијалылар вә фарслар тәрәфиндән зәбт едилмәсиндән сонра јәһудиләр үчүн һансы мәнада гачмаг мүмкүн олду?

⁸ Јеремја пејғәмбәр Јерусәлимин б. е. ә. 607-ҹи илдә баш верән мәһвини габагҹадан хәбәр вермишди. О демишди ки, Аллаһын халгы әсир апарылаҹаг, анҹаг ‘јетмиш ил битәндә’ вәтәнә гајтарылаҹаг (Јер. 29:4, 10). Бабилдә әсарәтдә олан јәһудиләр үчүн Јеремјанын ваҹиб хәбәри вар иди: онлар Бабилдә јајылан јалан динләрлә өзләрини ләкәләмәмәли идиләр. Беләликлә онлар Јеһованын тәјин етдији вахтда Јерусәлимә дөнмәјә вә тәмиз ибадәти бәрпа етмәјә һазыр олаҹагдылар. Бу, мидијалыларын вә фарсларын б. е. ә. 539-ҹу илдә Бабили зәбт етмәсиндән аз сонра баш верди. Фарс падшаһы ЫЫ Кир јәһудиләрин вәтәнләринә дөнүб, Јерусәлимдә Јеһованын мәбәдини бәрпа етмәләри һагда фәрман верди (Езра 1:1-4).

⁹ Минләрлә јәһуди бу фүрсәтдән истифадә едиб вәтәнә гајытды (Езра 2:64-67). Белә давранмагла онлар Јеремјанын пејғәмбәрлик әмрини јеринә јетирдиләр: онларын вәзијјәтиндә гачмаг башга јерә ҝетмәк демәк иди. (Јеремја 51:6, 45, 50 ајәләрини оху.) Шәраит бүтүн јәһудиләрә Јерусәлимә вә Јәһудаја узаг сәфәрә јолланмаға имкан вермирди. Јашлы Даниел пејғәмбәр кими, Бабилдә галанлар, Јерусәлимдә мәркәзләшән тәмиз ибадәти үрәкдән дәстәкләдикләри вә Бабилин јалан динләриндән узаг дурдуглары тәгдирдә Аллаһдан хејир-дуа ала биләрдиләр.

10. «Бөјүк Бабил» һансы ‘ијрәнҹликләрә’ ҝөрә мәсулијјәт дашыјыр?

¹⁰ Һал-һазырда милјардларла инсан әсасыны гәдим Бабилдән ҝөтүрмүш јалан динин мүхтәлиф нөвләринә ҹәлб едилмишдир (Јар. 11:6-9). Һәмин динләр үмумиликдә «Бөјүк Бабил, дүнјанын фаһишәләринин вә ијрәнҹликләринин анасы» кими дамғаланыб (Вәһј 17:5). Та гәдимдән јалан дин бу дүнјанын сијаси рәһбәрләрини дәстәкләјир. Онун мәсулијјәтини дашыдығы ‘ијрәнҹликләрин’ арасында чохсајлы мүһарибәләр вардыр ки, онларын да нәтиҹәсиндә јүз милјонларла инсан ‘јер үзүндә гәтл едилмишдир’ (Вәһј 18:24). Диҝәр ‘ијрәнҹликләрә’ руһаниләр тәрәфиндән төрәдилән вә килсәнин сәлаһијјәтли шәхсләринин ҝөз јумдуғу азјашлы ушагларын зорланмасы вә ҹинси әхлагсызлығын башга формалары дахилдир. Бүтүн бунлары нәзәрә алсаг, Јеһова Аллаһын тезликлә јери јалан динләрдән тәмизләјәҹәјинә шүбһә етмәк олармы? (Вәһј 18:8).

11. Бөјүк Бабил мәһв едиләнә кими һәгиги мәсиһчиләрин үзәринә һансы мәсулијјәт дүшүр?

¹¹ Буну билән һәгиги мәсиһчиләрин үзәринә Бөјүк Бабилин үзвләрини хәбәрдар етмәк мәсулијјәти дүшүр. Буну етмәјин бир үсулу Мүгәддәс Китабы вә Исанын «вахтлы-вахтында» руһани јемәк вермәк үчүн тәјин етдији ‘садиг вә ағыллы гулун’ Мүгәддәс Китаб әсасында нәшр етдији әдәбијјатлары пајламагдыр (Мат. 24:45). Инсанлар Аллаһын Кәламындакы хәбәрә мараг ҝөстәрәндә Мүгәддәс Китаб өјрәнмәси васитәсилә онлара көмәк едилир. Үмидварыг ки, онлар нә гәдәр ки ҝеҹ дејил, ‘Бабилин ичиндән гачмағын’ ваҹиблијини баша дүшәҹәкләр (Вәһј 18:4).

Бүтпәрәстликдән гачын

12. Аллаһ сурәтләрә вә бүтләрә ситајиш едилмәсинә неҹә јанашыр?

¹² Бөјүк Бабилдә јајылан ијрәнҹ әмәлләрдән бири дә сурәтләрә вә бүтләрә ситајишдир. Аллаһ онлары ‘ијрәнҹ шејләр’ вә ‘ијрәнҹ бүтләр’ адландырыр (Ганун. т. 29:17). Аллаһы разы салмаг истәјән һәр кәс Онун: «Мән Јеһовајам, исмим одур; вә иззәтими бир башгасына вә һәмдими ојма бүтләрә вермәјәҹәјәм» сөзләринә мүвафиг олараг бүтпәрәстликдән гачмалыдыр (Јешаја 42:8, КМ ).

13. Бизә бүтпәрәстлијин һансы ҝизлин формаларындан гачмаг лазымдыр?

¹³ Аллаһын Кәламында бүтпәрәстлијин ҝизли нөвләри дә ифша едилир. Мәсәлән, орада тамаһкарлыг «бүтпәрәстлик» адландырылыр. Тамаһкарлыг гадаған олунмуш бир шеји, мәсәлән, башгасына мәхсус олан шеји арзуламаг демәкдир (Чых. 20:17). Сонралар Шејтан Иблис олан мәләк Һагг-Таала кими олмағы вә өзүнә ибадәт едилмәсини аҹҝөзлүклә арзулады (Лука 4:5-7). Бунун да нәтиҹәсиндә, Шејтан Јеһоваја гаршы үсјан галдырды вә Һәвваны Аллаһын гадаған етдији шејә тамаһ салмаға сөвг етди. Һәмчинин Адәм өз худбин еһтирасыны — арвады илә бирликдә олмағы ону севән сәмави Атасына табе олмагдан үстүн тутдуғу үчүн мүәјјән мәнада бүтпәрәстлик етди. Бунун әксинә олараг, Аллаһын гәзәб ҝүнүндән гачмаг истәјән һәр бир кәс Она сон дәрәҹә садиг галмалы вә бу ҹүр тамаһкарлыгдан өзүнү ҝөзләмәлидир.

‘Әхлагсызлыгдан гачын’

14-16. а) Нә үчүн Јусиф ҝөзәл әхлаг нүмунәсидир? б) Үрәјимиздә натәмиз ҹинси арзулар баш галдырарса, нә етмәлијик? в) Әхлагсызлыгдан неҹә гача биләрик?

¹⁴ 1 Коринфлиләрә 6:18 ајәсини охуa. Потифарын арвады Јусифи јолдан чыхармаг истәјәндә Јусиф һәрфи мәнада ондан гачды. Һәм субај, һәм дә евли мәсиһчиләр үчүн неҹә дә ҝөзәл нүмунәдир! Ајдындыр ки, Јусифин виҹданы әввәлләр Аллаһын әхлагсызлыға мүнасибәтини ҝөстәрән һадисәләр әсасында формалашмышды. ‘Әхлагсызлыгдан гачын’ әмринә табе олмаг истәјириксә, һәјат јолдашымыздан башга бир шәхсә гаршы еһтирас ојада билән шејләрдән узаг дураҹағыг. Мүгәддәс Китабда дејилир: «Дахили варлығынызын дүнјәви јөнләрини — ҹинси әхлагсызлыг, натәмизлик, шәһвәт, пис еһтирас вә бүтпәрәстлик олан тамаһкарлығы — өлдүрүн. Бунлардан өтрү Аллаһын гәзәби итаәтсиз инсанлар үзәринә ҝәлир» (Колос. 3:5, 6).

¹⁵ Диггәт јетирин ки, «Аллаһын гәзәби... ҝәлир». Бу дүнјада чохлары өзүндә дүзҝүн олмајан ҹинси арзулар инкишаф етдирир вә онларын гулуна чеврилир. Буна ҝөрә дә, натәмиз ҹинси арзулар бизә һаким кәсилмәсин дејә, дуа едиб Аллаһдан көмәк вә мүгәддәс руһ истәмәлијик. Бундан башга, Мүгәддәс Китабы өјрәнмәк, мәсиһчи ҝөрүшләринә ҝетмәк, еләҹә дә хош хәбәри инсанларла бөлүшмәк ‘руһа ҝөрә һәрәкәт етмәмизә’ көмәк едәҹәк. Беләликлә, биз ‘ҹисмани тәбиәтин арзусуну әсла иҹра етмәјәҹәјик’ (Галат. 5:16).

¹⁶ Сөзсүз ки, әҝәр порнографијаја бахырыгса, ‘руһа ҝөрә һәрәкәт етмәјәҹәјик’. Һәр бир мәсиһчи еһтирас ојадан материалы охумагдан, она бахмаг вә ја гулаг асмагдан өзүнү горумалыдыр. Буна бәнзәр тәрздә, Аллаһын ‘мүгәддәсләринә’ белә мөвзуда зарафат етмәк вә ја өз араларында онлары мүзакирә етмәк јарашмаз (Ефес. 5:3, 4). Белә етмәклә, бизи севән сәмави Атамыза ҝөстәририк ки, һәгигәтән дә онун ҝәлән гәзәбиндән гуртулмаг вә салеһлијин һөкм сүрәҹәји јени дүнјада јашамаг истәјирик.

‘Пулпәрәстликдән’ гачын

17, 18. ‘Пулпәрәстликдән’ нә үчүн гачмалыјыг?

¹⁷ Тимотејә биринҹи мәктубунда Павел мәсиһчи гулларын рәһбәр тутмалы олдуглары принсипләри вурғулајырды. Ола билсин, онларын бәзиләри мәсиһчи ағаларындан мадди мәнфәәт умурдулар, диҝәрләри исә мәсиһчи гардашлығындан худбин мәгсәдләри үчүн истифадә етмәјә чалышырдылар. Павел «Аллаһ јолунун [мадди] газанҹ мәнбәји олдуғуну» дүшүнмәјин тәһлүкәси һагда хәбәрдарлыг едирди. Проблемин көкү һәр бир кәсә, һәм варлыја, һәм дә касыба пис тәсир ҝөстәрән ‘пулпәрәстлик’ ола биләрди (1 Тим. 6:1, 2, 5, 9, 10).

¹⁸ ‘Пулпәрәстлијә’, јахуд пулла алынан әһәмијјәтсиз шејләри севдикләринә ҝөрә Аллаһла мүнасибәтләрини позан Мүгәддәс Китаб персонажларыны јадына сала биләрсәнми? (Јешуа 7:11, 21; 2 Пад. 5:20, 25-27). Павел Тимотеји тәшвиг едирди: «Сән исә, еј Аллаһ бәндәси, бунлардан узаг гач, салеһлик, Аллаһ јолуна бағлылыг, иман, мәһәббәт, тәһәммүл, һәлимлик јолуну излә» (1 Тим. 6:11). Гаршыдан ҝәлән гәзәб ҝүнүндән гуртулмаг истәјән һәр кәс үчүн бу мәсләһәтә гулаг асмаг олдугҹа ваҹибдир.

‘Ҝәнҹлик еһтирасларындан гачын’

19. Һәр бир ҝәнҹин нәјә еһтијаҹы вар?

¹⁹ Сүлејманын мәсәлләри 22:15 ајәсини оху. Ҝәнҹин үрәјиндәки сәфеһлик ону асанлыгла дүз јолдан сапдыра биләр. Бунун өһдәсиндән јалныз Мүгәддәс Китаба әсасланан тәрбијә ҝәлә биләр. Валидејнләри Јеһованын Шаһиди олмајан бир чох ҝәнҹ мәсиһчиләр Аллаһын принсипләрини Мүгәддәс Китабдан өзләри тапыб тәтбиг етмәјә чалышырлар. Диҝәрләри исә, јығынҹагдакы руһән јеткин һәмиманлылардан мүдрик мәсләһәтләр алырлар. Мүгәддәс Китаба әсасланан мәсләһәти кимин вермәсиндән асылы олмајараг, буна әмәл етмәк һәм инди, һәм дә ҝәләҹәкдә хошбәхтлик ҝәтирә биләр (Ибр. 12:8-11).

20. Ҝәнҹләр дүзҝүн олмајан арзулардан гачмаг үчүн һарадан көмәк тапа биләрләр?

²⁰ 2 Тимотејә 2:20-22 ајәләрини оху. Лазыми тәрбијәни алмадыглары үчүн сәфеһлијин, јәни рәгабәтин, тамаһын, әхлагсызлығын, пулпәрәстлијин вә зөвг далынҹа гачмағын гурбаны олан ҝәнҹләр чохдур. Бу кими шејләр Мүгәддәс Китабын бизи гачмаға тәшвиг етдији ‘ҝәнҹлик еһтирасларыны’ әкс етдирир. Гачмаг о демәкдир ки, зәрәрли тәсирләрин һарадан ҝәлмәсиндән асылы олмајараг, мәсиһчи ҝәнҹ өзүнү онлардан горујур. «Рәбби чағыранларын һамысы илә бирликдә» Аллаһа мәгбул кејфијјәтләрә ҹан атмаг мәсләһәти хүсусилә фајдалыдыр.

21. Иса Мәсиһ давамчылары һаггында һансы мөһтәшәм вәди вермишдир?

²¹ Истәр ҝәнҹ олаг, истәр јашлы бизи јолдан чыхармаг истәјән инсанлара гулаг асмамағымыз ҝөстәрәҹәк ки, биз Исанын ‘јадларын сәсиндән гачан’ давамчылары арасында олмаг истәјирик (Јәһ. 10:5). Анҹаг Аллаһын гәзәб ҝүнүндән гуртулмаг үчүн биздән тәкҹә зәрәрли шејләрдән гачмаг тәләб олунмур. Биз һәм дә јахшы кејфијјәтләрә ҹан атмалыјыг. Нөвбәти мәгаләдә онлардан једдисини арашдыраҹағыг. Онлары даһа дәриндән арашдырмаға бизим тутарлы сәбәбләримиз вар, чүнки Иса мөһтәшәм бир вәд вермишдир: «Мән онлара [гојунларыма] әбәди һәјат верирәм. Онлар әсла һәлак олмазлар; вә кимсә онлары әлимдән оғурлаја билмәз» (Јәһ. 10:28).

[Һашијә]

Неҹә ҹаваб верәрдиниз?

• Иса дин рәһбәрләринә һансы хәбәрдарлығы верди?

• Бу ҝүн милјонларла инсан һансы тәһлүкә гаршысындадыр?

• Бүтпәрәстлијин һансы ҝизли формаларындан гачмалыјыг?

[8 вә 9-ҹу сәһифәләрдәки шәкилләр]

«Гачмаг» сөзүнү ешидәндә ағлыныза нә ҝәлир?