Ҹан атмалы олдуғумуз кејфијјәтләр
«Салеһлик, Аллаһ јолуна бағлылыг, иман, мәһәббәт, тәһәммүл, һәлимлик јолуну излә» (1 ТИМ. 6:11).
1. Инсанлар һәјатларыны һансы мәгсәдләрә һәср едирләр?
БИЗИМ зәманәдә инсанлар һәјатларыны һансы мәгсәдләрә һәср едирләр? Мүгәддәс Китабын ҝөстәрдији кими, чохлары мәнасыз мәгсәдләрә ҹан атырлар. Бәзиләри вар-дөвләтин хошбәхтлик ҝәтирәҹәјинә инанараг ‘бош шејләрин ардынҹа ҝедир’ (Сүл. мәс. 28:19). Диҝәрләри исә, зөвгү вә әјләнҹәни һәјатларында биринҹи јерә гојараг ‘шәр ардынҹа гачырлар’ (Мәз. 119:150). Инсанлар бу мәгсәдләрә наил олмаг үчүн вар ҝүҹләри илә чалышсалар да, әслиндә онлар ‘күләк далынҹа гачырлар’ (Ваиз 1:14).
2. а) Аллаһ бәзи мәсиһчиләри һансы мүкафата ҹан атмаға сәсләјир? б) Јеһова бу ҝүн мәсиһчиләрин әксәријјәтинә һансы үмиди тәклиф едир?
2 Бунун әксинә олараг, һәвари Павел мәсиһчиләрин һансы дәјәрли мәгсәдә ҹан атмалы олдугларыны ҝөстәрәрәк јазмышдыр: «Аллаһын Мәсиһ Иса васитәсилә етдији јүксәк дәвәтә дахил олан мүкафат үчүн һәдәфә доғру гачырам» (Филип. 3:14). Мүгәддәс Китаб ҝөстәрир ки, Павел дә дахил олмагла, 144 000 мәсһ олунмушун һамысы сәмави һәјат мүкафатыны алыр. Онлар Иса Мәсиһин Миниллик Һөкмранлығы дөврүндә онунла бирликдә јер үзүнү идарә едәҹәкләр. Аллаһ онлары неҹә дә ҝөзәл мәгсәдә сәсләјир! Бу ҝүн һәгиги мәсиһчиләрин әксәријјәтинин исә башга үмиди, јахуд мәгсәди вар. Јеһова онлара Адәмлә Һәвванын итирдикләри шеји, јерүзү ҹәннәтдә мүкәммәл сағламлығы вә әбәди һәјаты мәһәббәтлә тәклиф едир (Вәһј 7:4, 9; 21:1-4).
3. Аллаһын лүтфүнә ҝөрә миннәтдарлығымызы неҹә ҝөстәрә биләрик?
3 Ҝүнаһлы инсанлар дүзҝүн оланы етмәк үчүн ҝаһ дүз, ҝаһ да сәһв аддымлар атмагла әбәди һәјаты газана билмәзләр (Јешаја 64:6). Әбәди һәјаты јалныз Аллаһын Иса Мәсиһ васитәсилә мәһәббәтлә тәгдим етдији хилас тәдбиринә иман ҝәтирмәклә әлдә етмәк мүмкүндүр. Аллаһын лүтфүнә ҝөрә миннәтдарлығымызы неҹә ҝөстәрә биләрик? Мәсәлән, «салеһлик, Аллаһ јолуна бағлылыг, иман, мәһәббәт, тәһәммүл, һәлимлик јолуну излә» әмринә табе олмагла (1 Тим. 6:11). Бу кејфијјәтләри арашдырмаг һәр биримизә онлара «даһа чох» ҹан атмагда гәтијјәтли олмаға көмәк едә биләр (1 Салон. 4:1).
«Салеһлик... јолуну излә»
4. ‘Салеһлик јолуну изләмәјин’ ваҹиб олдуғуна нә үчүн әмин ола биләрик вә бунун үчүн атмалы олдуғумуз илк аддымлар һансылардыр?
4 Тимотејә јаздығы һәр ики мәктубунда һәвари Павел ҹан атмалы олдуғумуз кејфијјәтләри садалајыр вә һәр ики һалда биринҹи ‘салеһлији’ вурғулајыр (1 Тим. 6:11; 2 Тим. 2:22). Бундан башга, Мүгәддәс Китаб бизи диҝәр ајәләрдә дә салеһлијин ардынҹа ҝетмәјә тәшвиг едир (Сүл. мәс. 15:9; 21:21; Јешаја 51:1). Бу, ‘ваһид һәгиги Аллаһы вә ҝөндәрдији Иса Мәсиһи танымагдан’ башлајыр (Јәһ. 17:3). Салеһлијә ҹан атмаг инсаны һәрәкәтә, јәни кечмиш ҝүнаһларындан төвбә етмәјә вә Аллаһын ирадәсини јеринә јетирмәк үчүн ‘Аллаһа гајытмаға’ тәшвиг едәҹәк (Һәв. иш. 3:19).
5. Аллаһын гаршысында салеһ ад газанмаг вә ону горумаг үчүн нә етмәк лазымдыр?
5 Сәмими гәлбдән салеһлик јолуну изләјән милјонларла инсан һәјатларыны Јеһоваја һәср етмиш вә һәсролунмаларыны суда вәфтиз олмагла ҝөстәрмишдир. Әҝәр сән вәфтиз олунмуш мәсиһчисәнсә, һеч дүшүнмүсәнми ки, һәјат тәрзинлә салеһлик јолуну изләдијини ҝөстәрмәлисән? Буну етмәјин бир үсулу, һәјатда ваҹиб гәрарлар вермәли оланда Мүгәддәс Китаб әсасында «хејирлә шәри» ајырд етмәкдир. (Ибраниләрә 5:14 ајәсини оху.) Мәсәлән, әҝәр сән аилә гурмаг јашына чатмыш субај мәсиһчисәнсә, вәфтиз олунмамыш бир адамла романтик мүнасибәтләр гурмамаға гәти гәрарлысанмы? Салеһлик јолуну изләјирсәнсә, мәһз белә дә едәҹәксән (1 Кор. 7:39).
6. Салеһлик јолуну һәгигәтән изләмәјә нә дахилдир?
6 Салеһ олмаг өзүнү салеһ һесаб етмәкдән вә ја ‘һәддән артыг салеһ олмагдан’ фәргли шејдир (Ваиз 7:16). Иса инсанлары башгаларындан фәргләнмәк үчүн өзләрини салеһ ҝөстәрмәкдән чәкиндирирди (Мат. 6:1). Салеһлик јолуну һәгигәтән изләмәк үрәклә бағлыдыр, бу, јанлыш фикирләри, әһвал-руһијјәни, нијјәтләри вә арзулары дүзәлтмәк демәкдир. Әҝәр биз буну едириксә, чәтин ки, ҹидди ҝүнаһа јол верәк. (Сүлејманын мәсәлләри 4:23 ајәсини оху; мүгајисә ет: Јагуб 1:14, 15.) Үстәлик, Јеһова бизи хејир-дуаландыраҹаг вә диҝәр ваҹиб мәсиһчи хүсусијјәтләрини тәзаһүр етдирмәјә сәј ҝөстәрәркән бизи көмәксиз гојмајаҹаг.
«Аллаһ јолуна бағлылыг»
7. «Аллаһ јолуна бағлылыг» нә демәкдир?
7 Аллаһ јолуна бағлылыг өзүнү сидг үрәкдән Аллаһа һәср етмәји вә сон дәрәҹә сәдагәтли олмағы өзүнә дахил едир. Бир Мүгәддәс Китаб лүғәтиндә дејилир ки, «Аллаһ јолуна бағлылыг» кими тәрҹүмә олунан јунан сөзү «Аллаһ горхусуну итирмәмәк үчүн вар ҝүҹү илә чалышмаг» демәкдир. Исраиллиләрин Мисирдән азад олундугдан сонра да дәфәләрлә Аллаһын итаәтиндән чыхмаларындан ҝөрүнүр ки, онлар чох вахт Аллаһ јолуна бағлы галмырдылар.
8. а) Адәмин ҝүнаһа јол вермәси илә һансы суал мејдана чыхды? б) Аллаһ бу ‘мүгәддәс сирри’ неҹә ачыглады?
8 Камил инсан Адәмин ҝүнаһ ишләтмәсиндән сонра мин илләр әрзиндә бу суал өз ҹавабыны тапмамышдыр: «Ҝөрәсән кимсә Аллаһ јолуна там бағлы гала биләрми?» Әсрләр әрзиндә һеч бир ҝүнаһлы инсан Аллаһ јолуна там бағлы гала билмәмишдир. Анҹаг вахты чатанда Јеһова бу ‘мүгәддәс сирри’ ачыглады. О, ваһид сәмави Оғлунун һәјатыны Мәрјәмин бәтнинә көчүрдү ки, камил инсан кими доғулсун. Алчалдыҹы өлүмү дә дахил олмагла, Иса јер үзүндә јашадығы бүтүн һәјаты бојунҹа, һәгиги Аллаһа сидг үрәкдән һәср олунмағын вә там садиг галмағын нә демәк олдуғуну ҝөстәрди. Онун дуаларындан мәһәббәтли сәмави Атасына гаршы еһтирам дујдуғу ҝөрүнүрдү (Мат. 11:25; Јәһ. 12:27, 28). Буна ҝөрә дә Јеһова Павелә илһам верди ки, Исанын нүмунәви һәјат тәрзини тәсвир едәркән ‘Аллаһа бағлылыгдан’ данышсын. (1 Тимотејә 3:16 ајәсини охуa.)
9. Аллаһ јолуна бағлылыға неҹә ҹан ата биләрик?
9 Биз ҝүнаһлы олдуғумуз үчүн Аллаһ јолуна там бағлы гала билмирик. Анҹаг она ҹан ата биләрик. Бунун үчүн биздән Мәсиһин нүмунәсини мүмкүн гәдәр дәгиг изләмәк тәләб олунур (1 Пет. 2:21). Белә етмәклә биз ‘Аллаһ јолунда имиш кими ҝөрүнән, амма о јолун гүдрәтини инкар едән’ икиүзлү мөминләрә охшамајаҹағыг (2 Тим. 3:5). Бу о демәк дејил ки, Аллаһ јолуна һәгигәтән бағлы галмаг өзүнү заһирән һеч ҹүр бүрузә вермир. Бу, мүтләг өзүнү бүрузә верәҹәк. Мәсәлән, тој палтары сечәндә, јахуд базарлыға ҝедәндә нә ҝејинәҹәјимизи гәрара аланда хариҹи ҝөрүнүшүмүз һәмишә ‘Аллаһа һөрмәт етдијимизи иддиа етмәјимизә’ ујғун олмалыдыр (1 Тим. 2:9, 10). Бәли, Аллаһ јолуна бағлы галмаға ҹан атырыгса, ҝүндәлик һәјатымызда Аллаһын салеһ нормаларыны нәзәрә алаҹағыг.
«Иман... јолуну излә»
10. Иманымызы мөһкәм сахламаг үчүн нә етмәлијик?
10 Ромалылара 10:17 ајәсини охуb. Иманыны мөһкәмләндирмәк вә ону горумаг үчүн мәсиһчи Аллаһын Кәламындан тапдығы дәјәрли һәгигәтләр үзәриндә даим дүшүнмәлидир. «Садиг вә ағыллы гул» чохлу ҝөзәл нәшрләр тәгдим едир. «Дүнјада јашамыш ән бөјүк инсан» (рус.), «Бөјүк Мүәллимдән өјрән» (рус.) вә «Мәним ардымҹа ҝәл» (рус.) адлы бу үч хүсуси китаб бизә Мәсиһи даһа јахшы танымаға, бунун сајәсиндә дә ону тәглид етмәјә көмәк етмәк үчүн нәзәрдә тутулуб (Мат. 24:45-47). Гул синфи һәмчинин ҝөрүшләр, конгресләр тәшкил едир ки, онларын да чоху диггәти ‘Мәсиһ һаггында кәлама’ јөнәлдир. Аллаһын тәгдим етдији шејләрә ‘даһа чох диггәтли’ олдугҹа һансы саһәләрдә даһа артыг фајда әлдә едә биләҹәјини ҝөрүрсәнми? (Ибр. 2:1).
11. Дуа вә итаәткарлыг иман јолуну изләмәкдә һансы ролу ојнајыр?
11 Иманы мөһкәмләндирән диҝәр амил дуадыр. Бир дәфә Исанын шаҝирдләри она јалвармышдылар: «Иманымызы артыр!» Биз дә Аллаһдан тәвазөкарлыгла ејни шеји јалварыб истәјә биләрик (Лука 17:5). Бунун үчүн Аллаһын мүгәддәс руһунун көмәји һагда дуа етмәлијик; «иман» (ЈД) ‘Руһун сәмәрәсинин’ тәркиб һиссәсидир (Галат. 5:22). Үстәлик, Аллаһын әмрләринә табе олмаг иманымызы мөһкәмләндирир. Мәсәлән, биз тәблиғ ишиндә даһа чох иштирак едә биләрик. Чох еһтимал ки, бу бизә бөјүк мәмнунлуг һисси ҝәтирәҹәк. ‘Әввәлҹә Аллаһын Сәлтәнәтини вә Онун салеһлијини ахтармағын’ ҝәтирдији хејир-дуалар үзәриндә дүшүндүкҹә, иманымыз артаҹаг (Мат. 6:33).
«Мәһәббәт... јолуну излә»
12, 13. а) Иса һансы јени әмри верди? б) Мәсиһин мәһәббәтинә бәнзәр мәһәббәтә һансы ваҹиб саһәләрдә ҹан атмалыјыг?
12 1 Тимотејә 5:1, 2 ајәләрини оху. Павел мәсиһчиләрин бири-биринә неҹә мәһәббәт ҝөстәрмәләринә даир мәсләһәт вермишди. Бизим Аллаһ јолуна бағлы олмағымыз Исанын вердији јени әмрә, «сизи севдијим кими сиз дә бир-биринизи севин» әмринә табе олмағы өзүнә дахил етмәлидир (Јәһ. 13:34). Һәвари Јәһја гејд етмишди: «Дүнјада фираван јашајыб, өз гардашынын еһтијаҹ ичиндә олдуғуну ҝөрән, лакин она рәһми ҝәлмәјән инсанда Аллаһын мәһәббәти неҹә јашаја биләр?» (1 Јәһ. 3:17). Нә вахтса әмәлдә мәһәббәт ҝөстәрдијин јадына ҝәлирми?
13 Мәһәббәт јолуну изләмәјин диҝәр үсулу бағышламаг, гардашларымыза гаршы кин сахламамагдыр. (1 Јәһја 4:20 ајәсини оху.) Бунун әвәзинә, биз Аллаһдан илһам алмыш мәсләһәтә әмәл етмәк истәјирик: «Бир-биринизә тәһәммүл един вә биринизин диҝәриндән шикајәти варса, бағышласын. Мәсиһ [«Јеһова», ЈД] сизи бағышладығы кими, сиз дә бир-биринизи бағышлајын» (Колос. 3:13). Јығынҹагда бу мәсләһәти мүнасибәтләринизә тәтбиг едә биләҹәјин баҹы вә ја гардаш вармы? Сән ону бағышлајаҹагсанмы?
«Тәһәммүл... јолуну излә»
14. Филаделфија јығынҹағындан нә өјрәнә биләрик?
14 Тез наил олунан мәгсәдә чатмаг үчүн сәј ҝөстәрмәклә, чәтин наил олунан вә ја ҝөзләдијимиздән узун чәкән мәгсәдә ҹан атмаг мүхтәлиф шејләрдир. Ајдындыр ки, әбәди һәјата наил олмаг тәһәммүл тәләб едир. Иса Мәсиһ Филаделфија јығынҹағына демишди: «Мадам ки, тәһәммүл етмәк һаггындакы әмримә риајәт етдин, Мән дә сәни... имтаһан саатындан горујаҹағам» (Вәһј 3:10). Һәгигәтән дә, Иса тәһәммүлүн — сынагларла вә ширникдириҹи тәсирләрлә үзләшәркән тәслим олмамаға көмәк едән кејфијјәтин ваҹиб олдуғуну өјрәдирди. Биринҹи әсрин Филаделфија јығынҹағындакы гардашлар иманлары бир чох сынаглардан кечәркән гејри-ади тәһәммүл ҝөстәрмәли олмушдулар. Буна ҝөрә дә Иса әмин етди ки, гаршыдан ҝәлән даһа бөјүк имтаһан заманы онлара көмәк едәҹәк (Лука 16:10).
15. Иса тәһәммүл һаггында нәји өјрәтди?
15 Иса билирди ки, давамчылары иманларына шәрик олмајан гоһумларынын вә үмумиликдә дүнјанын нифрәтинә туш олаҹаглар, буна ҝөрә дә ән азы ики дәфә онлары бу ҹүр руһландырды: «Ахыра гәдәр сәбр едән хилас олаҹагдыр» (Мат. 10:22; 24:13). Иса һәм дә һәмин вахт шаҝирдләринин таб ҝәтирмәк үчүн ҝүҹү неҹә әлдә едә биләҹәкләрини ҝөстәрди. Бир нүмунәдә о, дашлығы Аллаһын ‘кәламыны севинҹлә гәбул едән’, лакин иманы сынаға чәкилән заман имандан дөнән адамлара бәнзәтмишди. Өз садиг давамчыларыны исә Аллаһын кәламыны ‘сахлајыб сәбрлә сәмәрә вердикләри’ үчүн бәрәкәтли торпаға охшатмышды (Лука 8:13, 15).
16. Мәһәббәтлә тәгдим олунан һансы вәсаит милјонларла инсана таб ҝәтирмәјә көмәк етмишдир?
16 Тәһәммүлүн сирринин нәдә олдуғуна диггәт јетирдинизми? Биз Аллаһын Кәламыны үрәјимиздә вә әглимиздә јашатмагла ‘сахламалыјыг’. «Мүгәддәс Јазыларын Јени Дүнја Тәрҹүмәси»нин — Мүгәддәс Китабын дәгиг вә асан охунан тәрҹүмәсинин — ҝетдикҹә даһа чох дилләрдә олмасы сајәсиндә буну етмәк мүмкүндүр, ејни заманда да асандыр. Һәр ҝүн Аллаһын Кәламындан олан парчалар үзәриндә дүшүнмәк даима «сәбрлә» сәмәрә вермәк үчүн лазыми ҝүҹү тапмағымыза көмәк едәҹәк (Мәз. 1:1, 2).
Сүлһ вә «һәлимлик јолуну излә»
17. а) «Һәлимлик» нә үчүн бу гәдәр ваҹибдир? б) Иса һәлим олдуғуну неҹә ҝөстәрди?
17 Һеч кимин хошуна ҝәлмәз ки, ону демәдији вә ја етмәдији бир шејдә иттиһам етсинләр. Һагсыз иттиһамлары гәзәблә инкар етмәк инсанларын тәбиәтинә хасдыр. Нә гәдәр јахшы оларды ки, белә һалларда ‘һәлимлик’ ҝөстәрәк! (Сүлејманын мәсәлләри 15:1 ајәсини оху.) Һагсыз јерә иттиһам едилдикдә мүлајим олмаг бөјүк ҝүҹ тәләб едир. Иса Мәсиһ бунда бизә мүкәммәл нүмунә гојмушдур. «Сөјүләркән, ҹавабында сөјмәди; әзаб чәкәркән, тәһдид етмәди, әксинә әдаләтлә мүһакимә Едәнә Өзүнү тәслим етди» (1 Пет. 2:23). Әлбәттә, биз өзүмүздән Иса гәдәр һәлим олмағы ҝөзләјә билмәрик. Бәс даһа чох һәлимлик ҝөстәрмәк үчүн үзәримиздә ишләјә биләрикми?
18. а) Һәлимлијин сајәсиндә һансы јахшы нәтиҹәни әлдә етмәк мүмкүндүр? б) Биз даһа һансы кејфијјәтә ҹан атмаға тәшвиг олунуруг?
18 Исаны тәглид едәрәк, ҝәлин биз дә дини етигадларымызы «һәмишә мүлајимликлә вә еһтирамла» мүдафиә етмәјә һазыр олаг (1 Пет. 3:15). Бәли, һәлим олмағымыз истәр хидмәтдә гаршылашдығымыз инсанларла, истәрсә дә һәмиманлыларымызла фикир ајрылыгларынын гызғын мүбаһисәләрә чеврилмәсинин гаршысыны алаҹаг (2 Тим. 2:24, 25). Һәлимлик сүлһү горумағымыза көмәк едир. Јәгин буна ҝөрә дә Павел Тимотејә јаздығы икинҹи мәктубунда ‘сүлһү’, ҹан атмалы олдуғумуз кејфијјәтләр сырасында садаламышдыр. (2 Тим. 2:22; мүгајисә ет: 1 Тимотејә 6:11.) Бәли, «сүлһ» Мүгәддәс Китабын бизи ҹан атмаға тәшвиг етдији даһа бир кејфијјәтдир (Мәз. 34:14; Ибр. 12:14).
19. Једди мәсиһчи кејфијјәтини арашдырдыгдан сонра сән нәјә гәрарлысан вә нә үчүн?
19 Бу мәгаләдә ҹан атмалы олдуғумуз једди мәсиһчи кејфијјәтинә тохундуг: салеһлик, Аллаһ јолуна бағлылыг, иман, мәһәббәт, тәһәммүл, һәлимлик вә сүлһ. Баҹы-гардашларын бу дәјәрли кејфијјәтләри ҝөстәрмәјә вар ҝүҹләри илә чалышмасы һәр бир јығынҹаг үчүн әсл хејир-дуадыр! Бу, Јеһованы иззәтләндирәҹәк вә бизи формалашдырмасына јол верәҹәк ки, Она һәмд едә биләк.
[Һашијәләр]
a 1 Тимотејә 3:16 (ЈД): «Доғрудан да, Аллаһа бағлылығын мүгәддәс сирри шүбһәсиз ки, бөјүкдүр: “О, бәдәндә зүһур етди, руһ олараг салеһ елан едилди, мәләкләрә ҝөрүндү, халглар арасында тәблиғ олунду, дүнјада иманла гаршыланды, иззәтлә јухары галдырылды”».
b Ромалылара 10:17 (ЈД): «Беләликлә, иман ешидилән шејдән јараныр. Ешидилән шеј исә Мәсиһ һаггында кәлам васитәсиләдир».
Дүшүнмәк үчүн суаллар
• Аллаһ јолуна бағлылыг вә салеһлик јолуну изләмәк нә демәкдир?
• Иман вә тәһәммүл јолуну изләмәјә бизә нә көмәк едәҹәк?
• Мәһәббәт бир-биримизлә рәфтарымыза неҹә тәсир едәҹәк?
• Бизә һәлимлик вә сүлһ јолуну изләмәк нә үчүн лазымдыр?
[12-ҹи сәһифәдәки шәкил]
Иса инсанлары башгаларында тәәссүрат ојатмаг мәгсәдилә өзүнү салеһ ҝөстәрмәкдән чәкиндирирди
[13-ҹү сәһифәдәки шәкил]
Аллаһын Кәламынын һәгигәтләри үзәриндә дүшүнмәклә иман јолуну изләјә биләрик
[15-ҹи сәһифәдәки шәкил]
Биз мәһәббәт вә һәлимлик јолуну изләјә биләрик