Иманыны мүдафиә етмәјә һазырсанмы?

ҺЕЧ иманыны мүдафиә етмәјин лазым ҝәлдијини һисс етдијин вәзијјәтлә үзләшмисәнми? Парагвајда јашајан 16 јашлы баҹымыз Сузанна белә бир вәзијјәтә дүшмүшдү. Онларын етика дәрсиндә белә бир фикир сәсләнди ки, Јеһованын Шаһидләри нә «Әһди-Әтиг»и, нә Иса Мәсиһи, нә дә Мәрјәми гәбул едирләр. Һәмчинин иддиа едилди ки, Јеһованын Шаһидләри фанатикдирләр, онлар өләрләр, анҹаг тибби мүалиҹә гәбул етмәзләр. Белә вәзијјәтдә сән нә едәрдин?

Сузанна Јеһоваја дуа едиб, әлини галдырды. Дәрсин ахыры олдуғундан о, мүәллимәдән иҹазә алды ки, бир Јеһованын Шаһиди кими, өз етигады һаггында мәлумат һазырласын. Мүәллимә мәмнунијјәтлә разы олду. Нөвбәти ики һәфтә әрзиндә Сузанна «Јеһованын Шаһидләри. Онлар кимдирләр? Нәјә инанырлар?» (рус.) адлы брошүрадан истифадә едәрәк мәлумат һазырлады.

Нәһајәт, һәмин ҝүн ҝәлиб чатды. Сузанна бизим нә үчүн Јеһованын Шаһидләри адыны дашыдығымызы изаһ етди. О, һәм дә ҝәләҹәјә бәсләдијимиз үмид һагда вә ганкөчүрмәдән имтина етмәјимизин сәбәби барәдә данышды. Сонра синфи суаллар вермәјә дәвәт етди. Шаҝирдләрин әксәријјәтинин суалы вар иди. Ҝәнҹ гызын суаллара Мүгәддәс Јазылардан ҹаваб вермәси мүәллимәсинә ҝүҹлү тәсир бағышлады.

Шаҝирдләрдән бири деди: «Мән бир дәфә Падшаһлыг Залында олмушам, анҹаг орада бир дәнә дә олсун шәкил јох иди». Мүәллимә бунун сәбәбини билмәк истәди. Сузанна Мәзмур 115:4-8 вә Чыхыш 20:4 ајәләрини охуду. Мүәллимә һејрәт ичиндә деди: «Ахы неҹә олур ки, Мүгәддәс Китаб мүһакимә етдији һалда, бизим килсәләримиз сурәтләрлә долудур?»

Мүзакирә 40 дәгигә чәкди. Сузанна синифдән «Гансыз мүалиҹә. Әлдә едилән наилијјәтләр» (рус.) адлы видеофилмә бахмаг истәјиб-истәмәдикләрини сорушанда, һамы бир ағыздан истәдијини деди. Буна ҝөрә дә, мүәллимә гәрара ҝәлди ки, мүзакирәни нөвбәти ҝүн дә давам етдирсинләр. Сузанна филмдән сонра Јеһованын Шаһидләриндән бәзиләринин гәбул етдији алтернатив мүалиҹә үсуллары һагда мәлумат верди. Буна даир мүәллимә белә деди: «Һеч билмәздим ки, бу гәдәр алтернатив мүалиҹә үсуллары вар вә гансыз мүалиҹә белә фајдалыдыр. Бу мүалиҹә үсуллары анҹаг Јеһованын Шаһидләри үчүндүр?» Ешидәндә ки, бу мүалиҹә үсулларындан һамы истифадә едә биләр, мүәллимә деди: «Ҝәлән дәфә Јеһованын Шаһидләри бизә ҝәләндә, онларла мүтләг сөһбәт едәҹәјәм».

Сузаннанын һазырладығы 20 дәгигәлик мүзакирә 3 саат чәкди. Килсә үзвләри олан башга шаҝирдләр бир һәфтә сонра өз етигадлары һаггында мәлумат һазырладылар. Ахырда чохлу суаллар мејдана чыхды, анҹаг һәмин шаҝирдләр өз етигадларыны мүдафиә едә билмәдиләр. Мүәллимә онлардан сорушду: «Нә үчүн Јеһованын Шаһиди олан јолдашыныз өз иманыны мүдафиә едә билдији һалда, сиз буну баҹармадыныз?»

Шаҝирдләрин ҹавабы белә олду: «Онлар һәгигәтән дә Мүгәддәс Китабы өјрәнирләр, биз исә јох».

Мүәллимә дөнүб Сузаннаја деди: «Сән һәгигәтән дә Мүгәддәс Китабы өјрәнирсән вә орада дејиләнләри јеринә јетирмәјә чалышырсан. Афәрин сәнә».

Сузанна динмәјә биләрди. Анҹаг сусмамагла о, суријалыларын әсир апардыглары ады чәкилмәјән кичик исраилли гызын ҝөзәл нүмунәсини изләди. Һәмин гыз үзүҹү дәри хәстәлијиндән әзијјәт чәкән Суријанын орду башчысы Нааманын евиндә галырды. Исраилли гыз сусмајыб өз ханымына деди: «Каш ки ағам Самаријада пејғәмбәрин јанында олајды. О заман пејғәмбәр онун ҹүзамына шәфа верәрди». Гыз һәгиги Аллаһ һаггында шаһидлик вермәк истәјини боға билмәди. Бунун сајәсиндә, ағасы Нааман Јеһоваја ибадәт етмәјә башлады (2 Пад. 5:3, 17).

Буна бәнзәр тәрздә, Сузанна өзүнү сахлаја билмәјиб, Јеһова вә Онун халгы һаггында шаһидлик етди. Етигады шүбһә алтына алынан заман тәшәббүс ҝөстәриб иманыны мүдафиә етмәклә Сузанна Мүгәддәс Јазыларын: «Рәбб Аллаһы үрәкләриниздә тәгдис един. Малик олдуғунуз үмид барәсиндә сиздән һесабат истәјән һәр кәсә һәмишә мүлајимликлә вә еһтирамла ҹаваб вермәк үчүн һазыр олун» әмринә табе олду (1 Пет. 3:15). Сән дә иманыны мүдафиә етмәјә вә имкан јарананда тәшәббүсү өз үзәринә ҝөтүрмәјә һазырсанмы?

[17-ҹи сәһифәдәки шәкил]

Бу вәсаитләр иманыны мүдафиә етмәкдә сәнә көмәк едәҹәк