Јеһованын һакимијјәтини гәбул ет
«Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 ЈӘҺ. 5:3).
1, 2. а) Нә үчүн бу ҝүн табе олмаг фикри чохларына хошаҝәлмәз ҝөрүнүр? б) Һеч бир һакимијјәти гәбул етмәјән инсанлар доғруданмы сәрбәстдирләр? Изаһ един.
«ҺАКИМИЈЈӘТ» сөзү бу ҝүн чох да дәбдә дејил. Кимәсә табе олмаг фикри чохларында хошаҝәлмәз һиссләр јарадыр. «Һеч ким мәнә нә едәҹәјими дејә билмәз» фикри һеч бир һакимијјәти гәбул етмәк истәмәјән адамларын әһвал-руһијјәсини әкс етдирир. Бәс бу адамлар доғруданмы сәрбәстдирләр? Гәтијјән! Әксәријјәт садәҹә олараг, ‘бу зәманәјә ујғунлашан’ күтләнин ардынҹа ҝедир (Ром. 12:2). Сәрбәстликдән чох узаг олан бу адамлар, һәвари Петерин сөзләри илә десәк, «позғунлуғун көләсидирләр» (2 Пет. 2:19). Онлар «бу дүнјанын ҝедишинә, һавадакы һакимијјәтин... һөкмранына», Шејтан Иблисә ујурлар (Ефес. 2:2).
2 Бир мүәллиф өјүнүрдү: «Мән јол вермәрәм ки, нә валидејнләрим, нә каһин, нә һансыса дин адамы... нә дә Мүгәддәс Китаб мәним үчүн нәјин дүз олуб-олмадығына гәрар версин». Дүздүр, бәзиләри өз сәлаһијјәтләриндән суи-истифадә едә вә бизим онлара табе олмағымыза лајиг олмаја биләрләр. Анҹаг рәһбәрлијә еһтијаҹымыз олдуғуну гәти сурәтдә инкар етмәк чыхыш јолудурму? Гәзетләрин башлыгларына өтәри нәзәр салсаг, аҹы һәгигәти ҝөрәҹәјик. Чох аҹынаҹаглыдыр ки, инсанларын рәһбәрлијә сон дәрәҹә еһтијаҹы олдуғу бир дөврдә әксәријјәт рәһбәрлији гәбул етмәјә һәмишәкиндән даһа аз мејллидир.
Һакимијјәтә мүнасибәтимиз
3. Биринҹи әсрдә јашајан мәсиһчиләр инсан һакимијјәтинә кор-коранә табе олмадыгларыны неҹә ҝөстәрдиләр?
3 Бир мәсиһчи кими, тутдуғумуз мөвге бу дүнјанынкындан фәргләнир. Анҹаг бу о демәк дејил ки, биз верилән һәр ҝөстәриши кор-коранә јеринә јетиририк. Әксинә, һәрдән, һәтта сәлаһијјәтә саһиб олсалар белә, инсанлара табе олмагдан имтина етмәлијик. Биринҹи әсрдә јашајан мәсиһчиләр дә белә едирдиләр. Мәсәлән, һәвариләрә тәблиғ етмәји дајандырмағы әмр едәндә, онлар баш каһин вә Синедрионун үзвү олан диҝәр сәлаһијјәтли шәхсләр гаршысында горхуја дүшмәдиләр. Онлар инсан һакимијјәтинә табе олмаг хатиринә дүзҝүн оланы етмәкдән әл чәкмәдиләр (Һәвариләрин ишләри 5:27-29 ајәләрини оху.)
4. Ибраниҹә Мүгәддәс Јазылардан һансы нүмунәләр ҝөстәрир ки, Аллаһын хидмәтчиләри чохлуғун архасынҹа ҝетмирдиләр?
4 Аллаһын мәсиһчиликдән габаг јашајан бир чох хидмәтчиләри дә ејни гәтијјәтлә һәрәкәт етмишләр. Мәсәлән, ‘һөкмдарын гәзәбинә’ сәбәб олса да, Муса ‘Фиронун гызынын оғлу адланмағы рәдд едәрәк Аллаһын халгы илә әзаб чәкмәји тәрҹиһ етди’ (Ибр. 11:24, 25, 27). Јусиф Потифарын арвадынын тәклифләринә мүгавимәт ҝөстәрди, бахмајараг ки, о, Јусифдән гисас алараг, она пислик едә биләрди (Јар. 39:7-9). Бабилин һәрәмағалар рәисинә Даниелин мөвгејини гәбул етмәк асан олмаса да, Даниел гәрара алмышды ки, «падшаһын једији јемәкләрлә вә ичдији шәрабла өзүнү мурдар етмәсин» (Дан. 1:8-14). Бу нүмунәләр ҝөстәрир ки, тарих бојунҹа Аллаһын хидмәтчиләри, нәтиҹәсиндән асылы олмајараг, дүзҝүн шејләрә даир мөһкәм мөвге тутмушлар. Онлар кимисә разы салмаг наминә ҝүзәштә ҝетмәмишләр. Биз нијә белә етмәјәк?!
5. Һакимијјәтә мүнасибәтимиз дүнјанынкындан нә илә фәргләнир?
5 Биздә олан ҹәсарәти инадкарлыгла гарышдырмаг олмаз; биз сијаси гурулуша гаршы үсјан галдыранлардан да дејилик. Әксинә, биз Јеһованын һакимијјәтини истәнилән инсан һакимијјәтиндән үстүн тутмаға гәрарлыјыг. Инсан ганунлары Аллаһын әмрләринә зидд ҝедәндә нә едәҹәјимизә гәрар вермәк чәтин дејил. Биринҹи әсрдәки һәвариләр кими, биз дә инсандан артыг, Аллаһа итаәт едирик.
6. Јеһованын әмрләринә табе олмаг нәјә ҝөрә ән јахшы јолдур?
6 Аллаһын һакимијјәтини гәбул етмәјимизә нә көмәк етмишдир? Биз Сүлејманын мәсәлләри 3:5, 6 ајәләриндә јазылан сөзләрлә разыјыг: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр». Биз инанырыг ки, Аллаһын биздән тәләб етдији һәр шеј ахырда өзүмүзә фајда ҝәтирәҹәк. (Ганунун тәкрары 10:12, 13 ајәләрини оху.) Һәгигәтән дә, Јеһова Өзүнү исраиллиләрә онларын ‘хејринә онлары өјрәдән, ҝетдикләри лазым олан јолла онлары апаран’ Аллаһ кими тәсвир етмишди. Сонра исә әлавә етмишди: «Аһ, каш ки сән Мәним әмрләримә диггәт јетирәјдин! Онда әмин-аманлығын һеч вахт гурумајан чај кими ахарды, салеһлијин дәниз далғалары кими оларды» (Јешаја 48:17, 18). Биз бу сөзләрә етибар едирик. Әминик ки, Аллаһын әмрләринә табе олмаг бизә һәмишә фајда ҝәтирир.
7. Аллаһын Кәламындакы һансыса әмри там анламасаг да, нә етмәлијик?
7 Аллаһын Кәламындакы бәзи тәләбләрин сәбәбини там анламадығымыз һалда белә, Јеһованын һакимијјәтини гәбул едир вә Она табе олуруг. Бу садәлөвһлүк дејил, етибардыр. Итаәткарлығымыз, Јеһованын бизим үчүн нәјин јахшы олдуғуну билдијинә үрәкдән инандығымызы ҝөстәрир. Бу, һәм дә мәһәббәтимизин тәзаһүрүдүр, чүнки һәвари Јәһја јазмышдыр: «Аллаһы севмәк, Аллаһын әмрләринә риајәт етмәк демәкдир» (1 Јәһ. 5:3). Лакин итаәткарлығымызын ҹидди јанашмағы тәләб едән диҝәр бир ҹәһәти дә вар.
Һиссләримизи тәрбијә едәк
8. ‘Һиссләримизи тәрбијә етмәјимиз’ Јеһованын һакимијјәтини гәбул етмәклә неҹә бағлыдыр?
8 Мүгәддәс Китаб билдирир ки, биз ‘һиссләримизи хејирлә шәри ајырд етмәк үчүн тәрбијә етмәлијик’ (Ибр. 5:14). Беләликлә, бизим амалымыз Аллаһын ганунларына механики олараг табе олмаг дејил. Әксинә, биз Јеһованын нормалары әсасында ‘хејирлә шәри ајырд едә билмәк’ истәјирик. Биз Јеһованын јолларындакы мүдриклији ҝөрмәк истәјирик ки, мәзмурчу кими, «ганунун гәлбимдәдир» дејә биләк (Мәз. 40:8).
9. Виҹданымызы Јеһованын нормалары илә неҹә ујғунлашдыра биләрик вә бу нә үчүн ваҹибдир?
9 Мәзмурчу кими Аллаһын ганунларыны гијмәтләндирмәк үчүн Мүгәддәс Китабдан охудугларымызын үзәриндә дүшүнмәк ҝәрәкдир. Мәсәлән, биз Јеһованын һәр һансы тәләби һаггында өјрәнәндә өзүмүздән соруша биләрик: «Бу әмр вә ја принсип нә үчүн дүзҝүндүр? Табе олмағым нә үчүн мәним хејримәдир? Бу мәсәләдә Аллаһын мәсләһәтини рәдд едәнләр һансы аҹы агибәтлә үзләшибләр?» Беләликлә, виҹданымыз Јеһованын тәләбләри илә узлашанда, чох еһтимал ки, онун ирадәсинә ујғун гәрарлар гәбул едәҹәјик. Биз ‘Рәббин ирадәси нәдирсә, ону гавраја’ биләҹәк вә итаәткарлыг јолуну изләјәҹәјик (Ефес. 5:17). Бу исә һәмишә асан олмур.
Шејтан Аллаһы нүфуздан салмаға чалышыр
10. Шејтанын Аллаһы нүфуздан салмаға чалышдығы саһәләрдән бири һансыдыр?
10 Шејтан чохдандыр ки, Аллаһы нүфуздан салмаға чалышыр. Ондакы мүстәгиллик руһу өзүнү мүхтәлиф јолларла бүрузә верир. Мәсәлән, ҝөтүрәк Аллаһын гурулушу олан аиләјә һөрмәтсиз мүнасибәти. Бәзиләри никаһсыз јашамағы тәрҹиһ етдикләри һалда, диҝәрләри өз һәјат јолдашларындан јаха гуртармағын јолларыны ахтарырлар. Һәр ики груп инсанлар бир мәшһур актрисанын нөвбәти сөзләри илә јәгин ки, разылашаҹаглар: «Һәм киши, һәм дә гадын үчүн тәкникалылыг мүмкүн олмајан бир шејдир». О давам едир: «Мән һәлә өз һәјат јолдашына садиг галан вә ја галмаг истәјән адама раст ҝәлмәмишәм». Өзүнүн уғурсуз әлагәләри һагда дүшүнәрәк бир мәшһур актјор да буна бәнзәр сөзләр демишдир: «Мән әмин дејиләм ки, өмрүнүн ахырына кими бир нәфәрлә јашамаг инсан тәбиәтинә хас олсун». Јахшы олар ки, өзүмүздән сорушаг: «Мән никаһ мәсәләсиндә Јеһованын һакимијјәтини гәбул едирәмми, јохса дүнјадакы әһвал-руһијјә дүшүнҹә тәрзимә тәсир едиб?»
11, 12. а) Нәјә ҝөрә ҝәнҹләрә Јеһованын һакимијјәтини гәбул етмәк чәтин ола биләр? б) Јеһованын ганун вә принсипләринә бармагарасы бахмағын ағылсызлыг олдуғуну ҝөстәрән нүмунә чәкин.
11 Әҝәр сән Јеһованын тәшкилатында олан ҝәнҹләрдән бирисәнсә, онда Шејтан хүсусән сәнин ҝөзүндә Аллаһы нүфуздан салмаға чалышаҹаг. ‘Ҝәнҹлик еһтираслары’, ејни заманда һәмјашыдларынын тәсири уҹбатындан сәндә елә фикир јарана биләр ки, Аллаһын ганунлары ағыр јүкдүр (2 Тим. 2:22). Өзүндә белә бир фикрин јаранмасына јол вермә. Аллаһын нормаларындакы мүдриклији ҝөрмәјә чалыш. Мәсәлән, Мүгәддәс Китаб дејир ки, «ҹинси әхлагсызлыгдан чәкинин» (1 Кор. 6:18). Јенә дә өзүнә белә суаллар вер: «Бу нә үчүн мүдрик әмрдир? Бу мәсәләдә итаәткарлыг мәнә һансы фајданы ҝәтирәҹәк?» Јәгин сән елә адамлар таныјырсан ки, Аллаһын мәсләһәтинә мәһәл гојмадығы үчүн бәлаја дүшүбләр. Онлар инди һәгигәтәнми хошбәхтдирләр? Индики һәјатлары Јеһованын тәшкилатында оларкән сүрдүкләри һәјатдан јахшыдырмы? Онлар һәгигәтәнми елә хошбәхтлик сирри тапыблар ки, Аллаһын хидмәтчиләри ону тапа билмирләр? (Јешаја 65:14 ајәсини оху.)
12 Шарон адлы мәсиһчинин бир гәдәр әввәл дедији сөзләрә диггәт јетир: «Јеһованын ганунуну гулагардына вурдуғум үчүн, өлүмҹүл ГИЧС хәстәлијинә тутулдум. Инди тез-тез Јеһоваја хидмәт етдијим о хошбәхт илләри јадыма салырам». Шарон анлады ки, Јеһованын ганунуну позмагла ағылсызлыг едиб, ҝәрәк вахтында онлары гијмәтләндирәјди. Јеһованын ганунлары бизи горујур. Шарон јухарыдакы сөзләри јазандан ҹәми једди һәфтә сонра өлдү. Онун башына ҝәлән фаҹиә ҝөстәрир ки, Шејтанын бу пис системин бир һиссәси оланлара вермәјә јахшы һеч нәји јохдур. ‘Јаланын атасы’ олдуғу үчүн, о, чохлу вәдләр версә дә, Һәвваја вердији вәд кими, онлары да јеринә јетирмир (Јәһ. 8:44). Доғрудан да, Јеһованын һакимијјәтини гәбул етмәк һәмишә фајдалыдыр.
Мүстәгиллик руһундан өзүнү гору
13. Өзүмүзү мүстәгиллик руһундан горумалы олдуғумуз саһәләрдән бири һансыдыр?
13 Јеһованын һакимијјәтини гәбул етмәк үчүн биз өзүмүзү мүстәгиллик руһундан горумалыјыг. Гүрур һисси биздә һеч кимин рәһбәрлијинә еһтијаҹымыз олмадығы фикрини јарада биләр. Мәсәлән, ола биләр, биз Аллаһын халгына рәһбәрлик едән шәхсләрин мәсләһәтини гәбул етмәјәк. Аллаһ садиг вә ағыллы гул синфи васитәсилә вахтлы-вахтында јемәк вермәк үчүн бир гурулуш тәсис едиб (Мат. 24:45-47). Јеһованын бу ҝүн Өз халгынын гајғысына бу үсулла галдығыны тәвазөкарлыгла гәбул етмәлијик. Садиг һәвариләр кими ол. Бәзи шаҝирдләр Исаны тәрк едәндә, о, һәвариләриндән сорушду: «Јохса сиз дә ҝетмәк истәјирсиниз?» Петер ҹаваб верди: «Ја Рәбб, биз кимин јанына ҝедә биләрик? Әбәди һәјатын сөзләри Сәндәдир» (Јәһ. 6:66-68).
14, 15. Нә үчүн Мүгәддәс Китабын мәсләһәтинә тәвазөкарлыгла гулаг асмалыјыг?
14 Јеһованын һакимијјәтини гәбул етмәк Онун Кәламындакы мәсләһәтә риајәт етмәји дә өзүнә дахил едир. Мәсәлән, садиг вә ағыллы гул синфи бизә хәбәрдарлыг едир ки, «ојаг дуруб ајыг олаг» (1 Салон. 5:6). Чохларынын «худбин, пулпәрәст» олдуғу бу ахыр ҝүнләрдә белә мәсләһәт лап јеринә дүшүр (2 Тим. 3:1, 2). Дүнјада һөкм сүрән бу ҹүр әһвал-руһијјә бизә тәсир едә биләрми? Бәли. Дүнјәви мәгсәдләр бизи руһани ҹәһәтдән јухуја гәрг едә вә ја диггәтимизи мадди шејләрә јөнәлдә биләр (Лука 12:16-21). Буна ҝөрә дә, Мүгәддәс Китаб мәсләһәтини гәбул етмәк вә Шејтан дүнјасында ади һал алан худбин һәјат тәрзиндән гачмаг неҹә дә мүдрикликдир (1 Јәһ. 2:16).
15 Садиг вә ағыллы гул синфи руһани гиданы јығынҹаглара тәјин олунмуш ағсаггаллар васитәсилә чатдырыр. Мүгәддәс Китаб бизә нәсиһәт едир: «Өз рәисләринизә итаәт един, онлара табе олун; чүнки һесабат верәҹәк оланлар кими, онлар һәр заман сизин ҹанларынызын гејдинә галырлар. Онлара табе олун ки, онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз» (Ибр. 13:17). Бу о демәкдирми ки, јығынҹағын ағсаггаллары гүсурсуздурлар? Әлбәттә, јох! Аллаһ онларын гејри-камиллијини һәр бир инсандан јахшы ҝөрүр, бунунла белә, биздән итаәткарлыг ҝөзләјир. Гејри-камил олсалар да, ағсаггалларла әмәкдашлыг етмәјимиз Јеһованын һакимијјәтини гәбул етмәјимизин сүбутудур.
Тәвазөкарлығын ваҹиблији
16. Исаја мәсиһчи јығынҹағынын Башы кими һөрмәт етдијимизи неҹә ҝөстәрә биләрик?
16 Биз һәмишә јадда сахламалыјыг ки, әслиндә јығынҹағын башында Мәсиһ дурур (Колос. 1:18). Тәјин олунмуш ағсаггалларын рәһбәрлијинә тәвазөкарлыгла табе олараг онлара ‘ән бөјүк еһтирамы ҝөстәрмәјимизин’ сәбәбләриндән бири дә елә будур (1 Салон. 5:12, 13). Әлбәттә, јығынҹағын ағсаггаллары да јығынҹаға өз фикирләрини дејил, Аллаһын хәбәрини чатдырмагла итаәткар олдугларыны ҝөстәрә биләрләр. Онлар өз шәхси идејаларыны чатдырмаг наминә ‘јазыланын һәддини ашмырлар’ (1 Кор. 4:6).
17. Нә үчүн шөһрәтпәрәстлик тәһлүкәлидир?
17 Јығынҹагда һамы еһтијатлы олмалыдыр ки, өзүнә иззәт ахтармасын (Сүл. мәс. 25:27). Ҝөрүнүр бу, һәвари Јәһјанын ҝөрдүјү бир шаҝирд үчүн тәлә олмушду. О јазырды: «Араларында рәислик етмәји севән Диотреф бизи гәбул етмир. Буна ҝөрә, әҝәр ҝәлсәм онун ҝөрдүјү ишләри јада салаҹағам. О, һаггымызда пис сөзләр јајыр» (3 Јәһ. 9, 10). Биз дә өзүмүзә бу сөзләрдән дәрс ҝөтүрә биләрик. Өзүмүздә зәррә гәдәр дә олсун шөһрәтпәрәстлик ҝөрсәк, ону дәрһал көкүндән силиб атмалыјыг. Мүгәддәс Китаб дејир: «Әҹәлдән әввәл тәкәббүр ҝәләр, фәлакәтдән әввәл ловғалыг руһу ҝәләр». Аллаһын һакимијјәтини гәбул едәнләр ловғалыг тәләсинә мүгавимәт ҝөстәрмәлидирләр, әкс тәгдирдә, бу, шәрәфсизлик ҝәтирәҹәк (Сүл. мәс. 11:2; 16:18).
18. Јеһованын һакимијјәтини гәбул етмәјә бизә нә көмәк едәҹәк?
18 Бәли, дүнјадакы мүстәгиллик руһуна гаршы мүгавимәт ҝөстәрмәји вә Јеһованын һакимијјәтини гәбул етмәји гаршына мәгсәд гој. Вахташыры Јеһоваја хидмәт етмәк кими ҝөзәл имканын үзәриндә миннәтдарлыгла дүшүн. Аллаһын халгы арасында олмағын сүбут едир ки, Аллаһ сәни мүгәддәс руһу илә Өзүнә ҹәлб етмишдир (Јәһ. 6:44). Аллаһла мүнасибәтләринә һеч вахт ади бир шеј кими бахма. Чалыш ки, һәјатынын һәр саһәсиндә мүстәгиллик руһуну рәдд етдијини вә Јеһованын һакимијјәтини гәбул етдијини ҝөстәрәсән.
Хатырлајырсынызмы?
• Јеһованын һакимијјәтини гәбул етмәк өзүнә нәји дахил едир?
• Һиссләримизи тәрбијә етмәк Јеһованын һакимијјәтини гәбул етмәклә неҹә бағлыдыр?
• Шејтан Аллаһы һансы саһәләрдә нүфуздан салмаға чалышыр?
• Јеһованын һакимијјәтини гәбул етмәк үчүн тәвазөкарлыг нәјә ҝөрә ваҹибдир?
[18-ҹи сәһифәдәки шәкил]
«Инсанлардан артыг, Аллаһа итаәт етмәк ҝәрәкдир»
[20-ҹи сәһифәдәки шәкил]
Аллаһын нормаларына һәмишә риајәт етмәк мүдрик давранышдыр