Сечим етмәјин вахты

«Аллаһ инсаны Өз сурәтиндә јаратды, Аллаһын сурәтиндә јаратды, онлары киши вә гадын олараг јаратды» (Јарадылыш 1:27).

МҮГӘДДӘС КИТАБЫН илк сәһифәләриндән бизә таныш олан бу сөзләр Аллаһын ‘өз вахтында ҝөзәл јаратдығы’ мөһтәшәм шејләрдән бирини — камил инсан ҹүтүнү, Адәмлә Һәвваны јаратмасыны тәсвир едир (Ваиз 3:11). Бир Јарадан кими, Јеһова Аллаһ онлара бујурду: «Төрәјиб чохалын вә јер үзүнү бүрүјүб она саһиб олун: дәниздәки һејванлар, ҝөјдәки гушлар, јердә сүрүнән бүтүн ҹанлылар үзәриндә һөкмранлыг един» (Јарадылыш 1:28).

Илк инсан ҹүтүнә сөјләдији бу сөзләрлә Аллаһ Өз нијјәтини онлара билдирди. Онлар төрәјиб чохалмалы вә јерин гајғысына галараг, ону өзләри вә нәсилләри үчүн ҹәннәтә чевирмәли идиләр. Онларын нә гәдәр јашајыб өләҹәкләри габагҹадан мүәјјән едилмәмишди. Әксинә, Аллаһ онларын гаршысында ҝөзәл имкан ачмышды. Дүзҝүн сечим етмәклә вә Аллаһын ирадәсинә ујғун давранмагла илк инсан ҹүтү әбәдијјән там әмин-аманлыг вә хошбәхтлик ичиндә јашаја биләрди.

Онлар јанлыш сечим етдиләр вә нәтиҹәдә бүтүн инсанларын пајына дүшән гоҹалыг вә өлүм олду. Гәдимдә јашајан Әјјуб да буну етираф етмишди: «Гадындан доғулан инсанын өмрү аздыр, һәјаты сыхынты илә долудур» (Әјјуб 14:1). Ахы нә баш верди?

Мүгәддәс Китабда изаһ едилир: «Неҹә ки, ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир» (Ромалылара 5:12). Сөзсүз ки, һәмин «бир адам» Аллаһын садә, ејни заманда ајдын әмрини биләрәкдән позан Адәм иди (Јарадылыш 2:17). Сечими илә Адәм өзүнү јерүзү ҹәннәтдә әбәди јашамаг имканындан мәһрум етди. Онун уҹбатындан өвладлары да гијмәтли мирасдан мәһрум олуб, ҝүнаһа вә өлүмә мәһкум олдулар. Санки һәр шеј итирилди. Бәс әслиндә беләдирми?

Бәрпа етмәјин вахты

Минилликләр сонра мәзмурчу Аллаһдан илһам алараг јазмышды: «Салеһләр јери мирас алар вә онда әбәдијјән јашајарлар» (Мәзмур 37:29, КМ). Ҹәннәт бағында верилән вәдин јеринә јетәҹәјинә бизи әмин етмәк үчүн Мүгәддәс Китабда Аллаһын тезликлә нә едәҹәји тәсирли сөзләрлә тәсвир олунур: «Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди». Сонра Аллаһ Өзү дејир: «Будур, Мән һәр шеји јениләшдирирәм» (Вәһј 21:4, 5).

Һәр шејин өз вахты олдуғундан мәнтигәујғун олараг белә бир суал јараныр: «Аллаһын мөһтәшәм вәдләринин һәјата кечәҹәји бәрпа вахты нә заман олаҹаг?» Бу журналы нәшр едәнләр, Јеһованын Шаһидләри, Мүгәддәс Китабда ‘ахыр ҝүнләр’ адландырылан дөврдә јашадығымызы вә Аллаһын ‘һәр шеји јениләшдирмәк’ үчүн һәрәкәтә кечәҹәји вахтын јахын олдуғуну инсанлара бәјан едирләр (2 Тимотејә 3:1). Биз сизи Мүгәддәс Китабы арашдырмаға вә гаршынызда ачылан мөһтәшәм имканлар һаггында өјрәнмәјә тәшвиг едирик. Һәмчинин сизи нөвбәти дәвәти гәбул етмәјә сәсләјирик: «Тапмаг фүрсәти оларкән Рәбби ахтарын, О јахын икән Она јалварын» (Јешаја 55:6). Һәјатынызы вә әбәди ҝәләҹәјинизи тале идарә етмир. Бу сизин өз әлиниздәдир!

[8-ҹи сәһифәдәки јазы]

«Будур, Мән һәр шеји јениләшдирирәм»