Јеткинлијә доғру тәрәгги ет — «Јеһованын мөһтәшәм ҝүнү јахындыр»
«Камиллијә [«јеткинлијә», ЈД] доғру тәрәгги едәк» (ИБР. 6:2).
1, 2. Неҹә олду ки, Јерусәлимдә вә Јәһудејада јашајан мәсиһчиләрин ‘дағлара гачмаг’ имканы јаранды?
ИСА јер үзүндә оланда шаҝирдләри она јахынлашыб сорушдулар: «Сәнин ҝәлишинә [«иштиракына», ЈД] вә дөврүн сонуна әламәт нә олаҹаг?» Ҹаваб олараг Исанын сөјләдији пејғәмбәрлик илк дәфә биринҹи әсрдә јеринә јетди. Иса сонун чох јахын олдуғуна ишарә едәҹәк гејри-ади бир һадисәдән данышды. Һәмин һадисәни ҝөрдүкдә ‘Јәһудејада оланлар дағлара гачмалы’ идиләр (Мат. 24:1-3, 15-22). Бәс Исанын шаҝирдләри һәмин әламәти сезәрәк онун ҝөстәришинә ујғун һәрәкәт едәҹәкдиләрми?
2 Тәхминән 30 илдән сонра, ерамызын 61-ҹи илиндә һәвари Павел Јерусәлимдә вә онун әтрафында јашајан ибрани мәсиһчиләрә ҹидди вә ајылдыҹы мәктуб јазды. Павел вә онун һәмиманлылары ‘бөјүк мәшәггәтин’ башланғыҹына ишарә едәҹәк һадисәјә ҹәми беш ил галмасындан хәбәрсиз идиләр (Мат. 24:21). Ерамызын 66-ҹы илиндә Сестиј Галлын рәһбәрлији алтында Рома гошунлары Јерусәлими зәбт етмәк үзрә иди. Лакин ҝөзләнилмәдән онлар ҝери чәкилдиләр вә мәсиһчиләрин тәһлүкәсиз бир јерә гачмаг имканы јаранды.
3. Павел ибрани мәсиһчиләрә һансы нәсиһәти вермишди вә нәјә ҝөрә?
3 Баш верән һадисәләри сезмәк вә гачмаг үчүн һәмин мәсиһчиләр фәрасәтә вә руһани анлајыша малик олмалы идиләр. Лакин бәзиләри ‘ағыр ешидирдиләр’. Онлар «сүдә» мөһтаҹ олан руһани көрпәләрә бәнзәјирдиләр. (Ибраниләрә 5:11-13 ајәләрини оху.) Һәтта узун мүддәт һәгигәтдә јеријән бәзи мәсиһчиләрдә тәдриҹән ‘јашајан Аллаһдан узаглашдыгларыны’ ҝөстәрән әламәтләр мүшаһидә олунурду (Ибр. 3:12). О фәлакәтли ‘ҝүнүн јахынлашдығы’ мүддәтдә бәзиләриндә јығынҹаг ҝөрүшләрини бурахмаг «адәт» һалына чеврилмишди (Ибр. 10:24, 25). Павел јериндә олараг нәсиһәт верди: «Мәсиһ һаггындакы ибтидаи елми ҝеридә бурахыб, камиллијә [јәни јеткинлијә] доғру тәрәгги едәк» (Ибр. 6:2).
4. Руһән ајыг галмаг нәјә ҝөрә ваҹибдир вә бунда бизә нә көмәк едәҹәк?
4 Биз Исанын пејғәмбәрлијинин сон иҹрасы дөврүндә јашајырыг. «Јеһованын мөһтәшәм ҝүнү — Шејтанын бүтүн системинин мәһв олунаҹағы ҝүн — јахындыр» (Сеф. 1:14, ЈД). Һәмишәкиндән даһа чох руһән мөһкәм вә ајыг олмаг лазымдыр (1 Пет. 5:8). Биз һәгигәтән дә белә едирикми? Мәсиһчи јеткинлији һансы зәманәдә јашадығымызы нәзәрдән гачырмамаға көмәк едәҹәк.
Мәсиһчи јеткинлији нәдир?
5, 6. а) Руһани јеткинлик өзүнә нәји дахил едир? б) Јеткинлијә доғру тәрәгги етмәк үчүн биздән һансы ики саһәдә сәј ҝөстәрмәк тәләб олунур?
5 Павел биринҹи әсрдәки ибрани мәсиһчиләри јеткинлијә доғру тәрәгги етмәјә тәшвиг етмәклә јанашы, һәмчинин онлара руһани јеткинлијин нә олдуғуну изаһ етмишди. (Ибраниләрә 5:14 ајәсини оху.) Јеткин инсанлар јалныз ‘сүдлә’ кифајәтләнмирләр. Онлар «гүввәтли јемәк»лә гидаланырлар. Буна ҝөрә дә һәм «ибтидаи», һәм дә «дәрин» һәгигәтләри билирләр (1 Кор. 2:10). Үстәлик, онлар билдикләрини тәтбиг етмәјин сајәсиндә һиссләрини алышдырараг, хејирлә шәри ајырд етмәк үчүн тәрбијә етмишләр. Гәрар гәбул етмәк лазым ҝәләндә бу, онлара һәмин мәсәләјә даир һансы Мүгәддәс Китаб принсипләринин мүнасиб олдуғуну вә онлары неҹә тәтбиг етмәли олдугларыны ҝөрмәјә көмәк едир.
6 Павел јазмышды: «Биз ешитдикләримизә даһа чох диггәтлә гулаг асмалыјыг ки, ахын бизи онлардан ајырмасын» (Ибр. 2:1). Биз һеч өзүмүз дә билмәдән имандан ‘ајрыла’, јәни узаглаша биләрик. Лакин руһани һәгигәтләрә ‘даһа чох диггәтлә гулаг асмагла’ бундан гачынмаг мүмкүндүр. Бу сәбәбдән һәр биримиз өзүмүздән сорушмалыјыг: «Мән һәлә дә илк тәлимләрими арашдырырам? Мән буну механики вә вәрдиш үзрәми едирәм? Сөзүн әсил мәнасында руһән неҹә тәрәгги едә биләрәм?» Јеткинлијә доғру тәрәгги етмәк үчүн биздән ән азы ики саһәдә сәј ҝөстәрмәк тәләб олунур. Биз Аллаһын Кәламыны јахшы билмәли вә итаәткарлығы өјрәнмәлијик.
Аллаһын Кәламыны јахшы билмәлијик
7. Аллаһын Кәламыны јахшы билмәклә һансы фајданы әлдә едә биләрик?
7 Павел јазмышды: «Сүдлә бәсләнән һәр кәс салеһлик һаггындакы кәламда тәҹрүбәсиздир; чүнки о, көрпә ушагдыр» (Ибр. 5:13). Јеткинлијә наил олмаг үчүн биз Аллаһын кәламы, јәни бизә үнванладығы хәбәрлә јахындан таныш олмалыјыг. Бу хәбәр Онун Кәламында — Мүгәддәс Китабда олдуғу үчүн биз Мүгәддәс Јазылары вә ‘садиг вә ағыллы гулун’ нәшрләрини сәјлә арашдырмалыјыг (Мат. 24:45-47). Аллаһын дүшүнҹә тәрзинә бу шәкилдә јијәләнмәк һиссләримизи тәрбијә етмәкдә бизә көмәк едә биләр. Оркидa адлы бир мәсиһчинин нүмунәсини нәзәрдән кечирәк. Баҹы дејир: «Мүгәддәс Китабы ҝүндәлик охумаға даир хатырлатмаларын һәјатыма бөјүк тәсири олуб. Мүгәддәс Китабы әввәлдән ахыраҹан ики илә охујуб гуртардым, буна бахмајараг, санки Јараданла илк дәфә иди таныш олурдум. Мән Онун јолларыны, нәји севиб-севмәдијини, нә дәрәҹәдә гүдрәтли вә мүдрик олдуғуну өјрәндим. Мүгәддәс Китабы һәр ҝүн охумағын сајәсиндә һәјатымын ән чәтин анларына таб ҝәтирдим».
8. Аллаһын Кәламы бизә неҹә тәсир едә биләр?
8 Мүгәддәс Китабы ҝүндәлик охумагла бу хәбәрин бизә ‘тәсир’ етмәсинә имкан веририк. (Ибраниләрә 4:12 ајәсини оху.) Белә мүталиә дахили мәнлијимизи формалашдырар вә нәтиҹәдә биз Јеһованы даһа чох мәмнун едә биләрик. Шәхсән сән Мүгәддәс Китабы даһа чох охумаға вә үзәриндә дүшүнмәјә еһтијаҹ дујурсанмы?
9, 10. Аллаһын Кәламында тәҹрүбәли олмаг өзүнә нәји дахил едир? Нүмунә чәкин.
9 Мүгәддәс Китабы јахшы билмәк садәҹә орада јазыланларла таныш олмаг мәнасыны дашымыр. Павелин ҝүнләриндәки руһани көрпәләр Аллаһын Кәламындан тамамилә хәбәрсиз дејилдиләр. Лакин онлар Аллаһын Кәламындан өјрәндикләрини тәтбиг етмәдикләри үчүн һеч бир фајда әлдә етмирдиләр. Онлар һәјатларында гәрарлар гәбул едәркән Мүгәддәс Јазылардакы принсипләри әлдә рәһбәр тутмурдулар, буна ҝөрә дә тәҹрүбәсиз идиләр.
10 Аллаһын Кәламында тәҹрүбәли олмаг орада дејиләнләри билмәклә јанашы, өјрәндикләримизи әмәлдә тәтбиг етмәји дә өзүнә дахил едир. Кејл адлы баҹымызын нүмунәси буну етмәјин неҹә мүмкүн олдуғуну ҝөстәрир. Кејл илә иш јолдашы арасында мүбаһисә олмушду. Бәс проблеми һәлл етмәк үчүн о нә етди? О дејир: «Һәмин ан Ромалылара 12:18 ајәсиндәки: “Мүмкүнсә, әлиниздән ҝәлдији гәдәр бүтүн адамларла сүлһдә олун” сөзләрини хатырладым. Мән она ишдән сонра ҝөрүшүб сөһбәт етмәји тәклиф етдим». Онлар проблеми һәлл етмәјә мүвәффәг олдулар вә Кејлин бу аддымы әмәкдашына дәрин тәәссүрат бағышлады. Кејл давам едир: «Мән баша дүшдүм ки, Мүгәддәс Китаб принсипләрини тәтбиг етмәклә һеч вахт јанылмарыг».
Итаәткарлығы өјрәнмәлијик
11. Хүсусилә дә дөзүлмәз анларда итаәткар олмағын чәтин олдуғуну нә ҝөстәрир?
11 Мүгәддәс Китабдан өјрәндикләримизи тәтбиг етмәк хүсусилә дә дөзүлмәз анларда чәтин ола биләр. Мәсәлән, Јеһова Исраил оғулларыны Мисир әсарәтиндән азад едәндән гыса мүддәт сонра онлар ‘Муса илә мүнагишә етмәјә’ вә Јеһованы ‘сынамаға’ башладылар, чүнки онларын ичмәјә сулары јох иди (Чых. 17:1-4). Аллаһла әһд бағладыгдан вә: «Рәббин сөјләдији сөзләрин һамысына әмәл едәҹәјик»,— дедикдән һеч ики ај кечмәмишди ки, исраиллиләр Аллаһын бүтпәрәстлијә даир әмрини поздулар (Чых. 24:3, 12-18; 32:1, 2, 7-9). Буна сәбәб Мусанын ҝөстәриш аланадәк узун мүддәт Хорев дағындан гајытмадығыны ҝөрүб горхуја дүшмәләри идими? Ола биләр ки, онлар амалеглиләрин јенидән һүҹум едәҹәјини вә әлләрини јухары галдырмасы сајәсиндә онлара гәләбә газандыран Муса олмаса, көмәксиз галаҹагларыны дүшүнүрдүләр (Чых. 17:8-16). Сәбәб нә олурса-олсун, исраиллиләр ‘итаәт етмәк истәмәдиләр’ (Һәв. иш. 7:39-41). Павел мәсиһчиләри Вәд едилмиш дијара дахил олмаг үзрә олан исраиллиләрин ‘итаәтсизлик нүмунәсинә ујмамалары’ үчүн вар гүввәләри илә ‘чалышмаға’ тәшвиг едирди (Ибр. 4:3, 11).
12. Иса итаәткарлығы неҹә өјрәнди вә бу, һансы фајданы ҝәтирди?
12 Јеткинлијә доғру тәрәгги етмәк Јеһоваја итаәткарлыг ҝөстәрмәк үчүн әлимиздән ҝәләни етмәји тәләб едир. Иса Мәсиһин нүмунәсиндән ҝөрүндүјү кими, адәтән чәкдијимиз изтираблар бизә итаәткар олмағы өјрәдир. (Ибраниләрә 5:8, 9 ајәләрини оху.) Иса јер үзүнә ҝәлмәздән өнҹә Атасынын итаәтиндә иди. Амма јер үзүндә Онун ирадәсини јеринә јетирмәк үчүн физики вә мәнәви изтираблара гатлашмалы иди. Иса чәкдији изтирабларда ҝөстәрдији итаәткарлыг сајәсиндә ‘камала чатды’ вә бу, ону Аллаһын онун үчүн нәзәрдә тутдуғу јени мөвгејә — Падшаһ вә Баш Каһин вәзифәсинә һазырлады.
13. Итаәткарлығы өјрәниб-өјрәнмәдијимиз нәдән ҝөрүнүр?
13 Бәс бизим һаггымызда нә демәк олар? Һәтта дөзүлмәз проблемләрлә үзләшәндә белә Јеһоваја итаәт етмәјә гәти гәрарлыјыгмы? (1 Петер 1:6, 7 ајәләрини оху.) Аллаһын әхлага, дүрүстлүјә, дилимизи јүјәнләмәјә, Мүгәддәс Јазылары охујуб арашдырмаға, мәсиһчи ҝөрүшләриндә вә тәблиғ ишиндә иштирак етмәјә даир вердији ҝөстәришләр ајдындыр (Јешуа 1:8; Мат. 28:19, 20; Ефес. 4:25, 28, 29; 5:3-5; Ибр. 10:24, 25). Бәдбәхтликләрлә үзләшәндә белә, бу саһәләрдә Јеһоваја итаәткарлыг ҝөстәририкми? Итаәткар олмағымыз јеткинлијә доғру тәрәгги етмәјимизин әламәтидир.
Мәсиһчи јеткинлији нә үчүн фајдалыдыр?
14. Јеткинлијә доғру тәрәгги етмәјин мүдафиә олдуғуну ҝөстәрән нүмунә ҝәтирин.
14 ‘Һәр ҹүр һәссаслығы итирән’ дүнјада хејирлә шәри ајырд етмәк үчүн һиссләрини алышдырмаг мәсиһчи үчүн әсил мүдафиәдир (Ефес. 4:19). Мәсәлән, Мүгәддәс Јазылара әсасланан нәшрләри мүнтәзәм олараг охујан вә гијмәтләндирән Ҹејмс адлы гардашын нүмунәсинә нәзәр салаг. Онун дүзәлдији ишдә бүтүн коллектив гадынлардан ибарәт иди. О дејир: «Онларын әксәријјәтинин һеч бир әхлаг нормаларына риајәт етмәдикләри ајдын ҝөрүнүрдү, анҹаг диҝәрләриндән фәргли олараг, ишчиләрдән бири һөрмәтә лајиг давраныр вә санки Мүгәддәс Китаб һәгигәти илә марагланырды. Иш отагларынын бириндә онунла тәк галанда о, мәнә сарылды. Әввәлҹә буну бир зарафат кими гәбул етдим, анҹаг сонра ҝөрдүм ки, ону дајандырмаг олмур. О ан јадыма иш јериндә ејни вәзијјәтлә үзләшән гардашын нүмунәси дүшдү. Онун һаггында «Ҝөзәтчи Гүлләси»ндә охумушдум. Елә һәмин мәгаләдә Јусиф вә Потифарын арвадынын нүмунәси дә ҝәтирилирдиb. Мән дәрһал гызы итәләдим вә о, отагдан чыхыб гачды» (Јар. 39:7-12). Ҹејмс һеч бир пис шеј баш вермәдијинә ҝөрә чох севинирди, чүнки виҹданыны тәмиз сахлаја билмишди (1 Тим. 1:5).
15. Јеткинлијә доғру тәрәгги етмәк символик үрәјимизи неҹә мөһкәмләндирә биләр?
15 Јеткинлијин даһа бир фајдасы ондан ибарәтдир ки, о, символик үрәјимизи мөһкәмләндирир вә бизи ‘фәргли вә јад тәлимләрә гапылмагдан’ горујур. (Ибраниләрә 13:9 ајәсини оху.) Руһани тәрәггијә ҹан атанда диггәтимиз ‘ән үстүн дәјәрләрә’ ҹәмләнир (Филип. 1:9, 10). Бунунла да рифаһымыз үчүн етдији һәр шејә ҝөрә Аллаһа миннәтдарлығымыз артыр (Ром. 3:24). ‘Әглән камил олан’ мәсиһчи бу ҹүр миннәтдарлыг һисси тәзаһүр етдирмәклә јанашы, һәмчинин Јеһова илә сых мүнасибәтә маликдир (1 Кор. 14:20).
16. Бир баҹыја ‘үрәјини мөһкәмләндирмәкдә’ нә көмәк етди?
16 Луиз адлы баҹы етираф едир ки, вәфтиздән сонра бир мүддәт әрзиндә әсас мәгсәди башгаларыны разы салмаг иди. О дејир: «Дүздүр, һеч бир сәһвә јол вермирдим, амма үрәјим Јеһоваја хидмәт етмәк арзусу илә алышыб-јанмырды. Тезликлә анладым ки, Јеһоваја малик олдуғум һәр шеји вердијими һисс етмәк үчүн һансыса дәјишикликләр етмәлијәм. Јеһоваја бүтүн үрәклә хидмәт етмәк һәјатымда етмәли олдуғум ән бөјүк дәјишиклик иди». Бу ҹүр сәј ҝөстәрмәјин сајәсиндә Луизин ‘үрәји мөһкәмләнди’ вә сәһһәти илә бағлы ҹидди проблемлә үзләшәндә бунун она бөјүк көмәји олду (Јаг. 5:8). Луиз дејир: «Ҝүҹлү мүбаризә апармағыма бахмајараг, Јеһоваја јахынлашмаға мүвәффәг олдум».
‘Үрәкдән итаәт ет’
17. Итаәткарлыг биринҹи әсрдә нәјә ҝөрә хүсусилә ваҹиб иди?
17 Павелин ‘камиллијә доғру тәрәгги един’ мәсләһәти биринҹи әсрдә Јерусәлимдә вә Јәһудејада јашамыш мәсиһчиләрин һәјатыны хилас етмишди. Бу мәсләһәтә диггәт јетирәнләр Исанын вердији әламәти ҝөрмәк вә ‘дағлара гачмаг’ үчүн дәрин руһани анлајыша малик идиләр. Онлар «виранәлик ҝәтирән ијрәнҹ шејин мүгәддәс јердә тикилдијини», јәни Рома гошунларынын Јерусәлими мүһасирәјә алдығыны вә шәһәрә ҝирдикләрини ҝөрәндә баша дүшдүләр ки, гачмаг вахтыдыр (Мат. 24:15, 16). Исанын пејғәмбәрлик хәбәрдарлығына диггәт јетирән мәсиһчиләр Јерусәлим мәһв олмаздан өнҹә шәһәри тәрк етдиләр вә килсә тарихчиси Јевсевинин сөзләринә ҝөрә, Ҝилеадын дағлыг бөлҝәсиндә јерләшән Пелла шәһәриндә мәскунлашдылар. Онлар Јерусәлимин тарихиндә баш вермиш ән дәһшәтли фәлакәтдән гача билдиләр.
18, 19. а) Бизим ҝүнләрдә итаәткар олмаг нәјә ҝөрә ваҹибдир? б) Нөвбәти мәгаләдә нә мүзакирә олунаҹаг?
18 Мисли-бәрабәри олмајан ‘бөјүк мәшәггәтин олаҹағына’ даир Исанын пејғәмбәрлији дүнја мигјасында јеринә јетәндә јеткинлијә доғру тәрәгги етмәјин сајәсиндә һасил олан итаәткарлыг ејнилә бизим дә һәјатымызын хиласында ваҹиб рол ојнајаҹаг (Мат. 24:21). Биз ҝәләҹәкдә ‘садиг нөкәрбашыдан’ алаҹағымыз истәнилән һәр бир ваҹиб ҝөстәришә итаәткарлыгла риајәт едәҹәјикми? (Лука 12:42). ‘Үрәкдән итаәт етмәји’ өјрәнмәк неҹә дә зәруридир! (Ром. 6:17).
19 Јеткинлијә наил олмаг үчүн биздән һиссләримизи тәрбијә етмәк тәләб олунур. Биз Аллаһын Кәламыны вә итаәткарлығы јахшы өјрәнмәклә буна мүвәффәг ола биләрик. Јеткинлијә доғру тәрәгги етмәк ҝәнҹләр үчүн хүсуси чәтинликләр јарадыр. Нөвбәти мәгаләдә бу чәтинликләрин өһдәсиндән мәһарәтлә ҝәлмәјин неҹә мүмкүн олдуғуну нәзәрдән кечирәҹәјик.
[Һашијәләр]
a Бәзи адлар дәјишдирилиб.
b «Ҝөзәтчи Гүлләси»нин 1999-ҹу ил 1 октјабр сајындакы «Ҝүнаһа гәтијјәтлә “јох” дејәк» (рус.) адлы мәгаләјә бахын.
Сиз нә өјрәндиниз?
• Руһани јеткинлик өзүнә нәји дахил едир вә биз буна неҹә наил ола биләрик?
• Аллаһын Кәламында тәҹрүбәли олмаг јеткинлијә доғру тәрәгги етмәкдә һансы ролу ојнајыр?
• Итаәткарлығы неҹә өјрәнирик?
• Јеткинлик бизә һансы фајданы ҝәтирир?
[10-ҹу сәһифәдәки шәкил]
Мүгәддәс Китаб мәсләһәтләринә әмәл етмәк проблемләрин өһдәсиндән јеткин бир инсан кими ҝәлмәјә көмәк едир
[12-ҹи сәһифәдәки шәкил]
Исанын ҝөстәришинә әмәл едән еркән мәсиһчиләр ҹанларыны хилас етдиләр