‘Руһ вә ҝәлин дејир: «Ҝәл!»’
«Руһ вә ҝәлин дә дејирләр: “Ҝәл!”... Сусајан гој ҝәлсин, арзу едән гој һәјат сујуну мүфтә ҝөтүрсүн» (ВӘҺЈ 22:17).
1, 2. Падшаһлығын мараглары һәјатымызда һансы јери тутмалыдыр вә нә үчүн?
ПАДШАҺЛЫҒЫН мараглары һәјатымызда һансы јери тутмалыдыр? Иса давамчыларыны илк нөвбәдә ‘Аллаһын Сәлтәнәтини ахтармаға’ тәшвиг едәрәк онлары әмин етди ки, әҝәр белә етсәләр, Аллаһ онларын бүтүн еһтијаҹларыны тәмин едәҹәк (Мат. 6:25—33). Иса Аллаһын Падшаһлығыны чох гијмәтли мирваријә бәнзәтмишди; ону тапан таҹир «бүтүн варыны сатыб, ону сатын алды» (Мат. 13:45, 46). Падшаһлығын тәблиғи вә шаҝирд һазырламаг иши һәјатымызда ән ваҹиб јери тутмалы дејилми?
2 Өтән ики мәгаләдән ҝөрдүјүмүз кими, ҹәсарәтлә данышмағымыз вә хидмәтдә Аллаһын Кәламындан мәһарәтлә истифадә етмәјимиз Аллаһын руһунун бизи идарә етдијини ҝөстәрир. Бу руһ һәм дә Падшаһлығын тәблиғи ишиндә мүнтәзәм иштирак етмәјимиздә ваҹиб рол ојнајыр. Ҝәлин ҝөрәк, неҹә.
Дәвәт
3. Бүтүн инсанлар һансы судан ичмәјә дәвәт олунурлар?
3 Инсанлар мүгәддәс руһ васитәсилә дәвәт алырлар. (Вәһј 22:17 ајәсини оху.) Онлар ‘ҝәлиб’ хүсуси су илә сусузлугларыны јатырмаға дәвәт олунурлар. Һаггында данышдығымыз су ики һидроҝен вә бир оксиҝен атомундан ибарәт олан ади су дејил. Су јер үзүндә һәјатын мөвҹудлуғу үчүн ваҹиб олса да, Иса гују башында самаријалы гадынла данышаркән башга сују нәзәрдә тутурду: «Мәним верәҹәјим судан исә ким ичәрсә, әсла сусамаз, она верәҹәјим су онда әбәди һәјата говушдуран су мәнбәји олаҹагдыр» (Јәһ. 4:14). Инсанларын ичмәјә дәвәт олундуглары бу гејри-ади су әбәди һәјат верир.
4. Һәјат сујуна еһтијаҹ нәјә ҝөрә јаранды вә бу су нәји тәмсил едир?
4 Бу суја еһтијаҹ илк инсан Адәм Јараданлары Јеһова Аллаһа гаршы итаәтсизликдә арвады Һәвваја гошулдуғу заман јаранды (Јар. 2:16, 17; 3:1—6). Илк әр-арвад ҹәннәт бағындан говулду ки, Адәм «әлини узадараг һәјат ағаҹынын мејвәсиндән дәриб јемәсин вә әбәди јашамасын» (Јар. 3:22). Сонра бәшәријјәтин улу бабасы Адәм өлүмү бүтүн инсанлара өтүрдү (Ром. 5:12). Һәјат сују Аллаһын итаәткар инсанлары ҝүнаһ вә өлүмдән азад етмәк вә онлара јерүзү Ҹәннәтдә сонсуз камил һәјат бәхш етмәк үчүн ҝөрдүјү бүтүн тәдбирләри тәмсил едир. Бүтүн бу тәдбирләр Иса Мәсиһин фидјә гурбанлығы сајәсиндә мүмкүндүр (Мат. 20:28; Јәһ. 3:16; 1 Јәһ. 4:9, 10).
5. ‘Ҝәл, һәјат сујуну мүфтә ҝөтүр’ дәвәти кимдәндир? Изаһ един.
5 ‘Ҝәл, һәјат сујуну мүфтә ҝөтүр’ дәвәти кимдәндир? Мәсиһин Миниллик Һөкмранлығы заманы Иса васитәсилә ҝөрүлән бүтүн тәдбирләр бәшәријјәт үчүн тамамилә әлчатан оланда онлар ‘бүллур кими парлаг, тәмиз һәјат сују ахан чаја’ чевриләҹәк. Ҝөрүнтүдә тәсвир олундуғу кими, бу чај ‘Аллаһын вә Гузунун тахтындан чыхыр’ (Вәһј 22:1). Беләликлә, Һәјатверәнимиз Јеһова һәјатвериҹи елементләрдән ибарәт олан сујун Мәнбәјидир (Мәз. 36:9). Бу сују ‘Гузу’ — Иса Мәсиһ васитәсилә верән јеҝанә Шәхс Одур (Јәһ. 1:29). Бу символик чај Адәмин итаәтсизлији нәтиҹәсиндә бәшәријјәтә вурулан бүтүн зәрәри арадан галдырмаг үчүн Јеһованын ҝөрдүјү тәдбирләри тәмсил едир. Бәли, «ҝәл» дејә дәвәт едән Јеһова Аллаһдыр.
6. ‘Һәјат сују ахан чај’ нә вахт ахмаға башлајыб?
6 Дүздүр, ‘һәјат сују ахан чај’ Мәсиһин Миниллик Һөкмранлығы заманы ҝур ахаҹаг, анҹаг бу чај артыг 1914-ҹү илдән — ‘Гузу’ ҝөјдә тахта отурдуғу андан башлајан «Рәббин ҝүнүндә» ахмаға башлајыб (Вәһј 1:10). Демәли, јашамаг үчүн ҝөрүлән тәдбирләрин бәзиләри о вахтдан бәри әлчатандыр. Бураја Аллаһын Кәламы олан Мүгәддәс Китаб дахилдир, чүнки орада јазылан хәбәр «су» адландырылыр (Ефес. 5:26). ‘Һәјат сујуну ҝөтүрмәк’ дәвәти һамыја үнванланыб; ону ҝөтүрмәк үчүн Падшаһлыг һаггында хош хәбәри ешитмәк вә ону гәбул етмәк лазымдыр. Бәс Рәббин ҝүнүндә бу дәвәти инсанлара кимләр чатдырыр?
Ҝәлин дејир: «Ҝәл!»
7. «Рәббин ҝүнүндә» «ҝәл» дејә илк дәвәт едән кимләр олмалыдыр вә онларын бу дәвәти кимләрә үнванланыб?
7 «Ҝәл» дејә илк дәвәт едән ҝәлин синфинин үзвләри — руһла мәсһ олунмуш мәсиһчиләр олмалыдыр. Бәс онлар кимләри дәвәт етмәлидирләр? Тәбии ки, өзләрини јох. Ҝәлин синфинин сөзләри «Аллаһын бөјүк ҝүнүндә баш верәҹәк... Һар-Меҝидон» мүһарибәсиндән сонра јер үзүндә јашамаг үмидинә малик олан инсанлара үнванланыб. (Вәһј 16:14, 16 ајәләрини оху.)
8. Мәсһ едилмиш мәсиһчиләрин артыг 1918-ҹи илдән Јеһованын дәвәтини чатдырдығыны нә ҝөстәрир?
8 Мәсиһин мәсһ олунмуш давамчылары артыг 1918-ҹи илдән дәвәт етмәјә башлајыблар. Һәмин ил «Һал-һазырда јашајан милјонларла инсанын һеч вахт өлмәмәк имканы вар» адлы ачыг мәрузәдә Һар-Меҝидон мүһарибәсиндән сонра чохларынын јер үзүндә әбәди јашајаҹаглары ачыгланды. Мүгәддәс Китаб Тәдгигатчыларынын 1922-ҹи илдә Сидар-Поинтдә (Оһајо, АБШ) кечирилән конгресиндә сәсләнән мәрузәдә динләјиҹиләр ‘Падшаһы вә онун Падшаһлығыны бәјан етмәјә’ тәшвиг олундулар. Бу чағырыш ҝәлин синфинин галығыны бу дәвәти даһа чох инсанлара чатдырмаға тәшвиг етди. «Ҝөзәтчи Гүлләси»нин 1929-ҹу ил 15 март сајында (инҝ.) Вәһј 22:17 ајәсинә әсасланан «Сәмими дәвәт» адлы мәгалә чап олунмушду. Орада дејилирди: «Садиг галыг синфи [Һагг-Тааланын] сәмими дәвәт[ин]ә гошулараг “ҝәл” дејир. Бу хәбәр салеһлији вә һәгигәти арзулајан инсанлара чатдырылмалыдыр. Буну инди етмәк лазымдыр». Ҝәлин синфи бу дәвәти бизим ҝүнләрәдәк инсанлара чатдырмаға давам едир.
«Гој ешидән... десин: “Ҝәл!”»
9, 10. «Ҝәл» дәвәтини ешидәнләр «ҝәл» демәјә неҹә дәвәт олунурдулар?
9 Бәс «ҝәл» дәвәтини ешидәнләр неҹә? Онлар да «ҝәл» демәјә дәвәт олунурлар. Мәсәлән, «Ҝөзәтчи Гүлләси» журналынын 1932-ҹи ил 1 август сајынын (инҝ.) 232-ҹи сәһифәсиндә дејилирди: «Гој мәсһ олунмушлар падшаһлыг һаггында хош хәбәрин тәблиғиндә иштирак етмәк истәјән һәр кәси руһландырсын. Рәббин хәбәрини бәјан етмәк үчүн онларын Рәбб тәрәфиндән мәсһ едилмәләри шәрт дејил. Бу һәјат сујуну Һар-Меҝидондан сағ кечириләҹәк вә әбәди һәјат бәхш едиләҹәк чохсајлы инсанлара чатдырмаға иҹазә верилдијини билмәк Јеһованын шаһидләри үчүн чох руһландырыҹыдыр».
10 Бу дәвәти ешидәнләрин дә «ҝәл» демәк мәсулијјәти дашыдығына ишарә едәрәк «Ҝөзәтчи Гүлләси»нин 1934-ҹү ил 15 август сајынын (инҝ.) 249-ҹу сәһифәсиндә дејилирди: «Јеһонадав синфинә мәнсуб оланлар Јеһунун тәмсил етдији мәсһ олунмушлар синфи илә ҝетмәли вә Јеһованын мәсһ олунмуш шаһидләри олмасалар да, падшаһлығын хәбәрини бәјан етмәлидирләр». 1935-ҹи илдә Вәһј 7:9—17 ајәләриндә һаггында данышылан ‘бөјүк издиһамын’ ким олдуғу бәлли олду. Бу, Аллаһын дәвәтинин инсанлара чатдырылмасы ишинә бөјүк тәкан верди. О вахтдан бәри сајы ҝет-ҝедә артан вә һал-һазырда једди милјондан чох олан Аллаһын һәгиги хидмәтчиләри бу дәвәти гәбул етмишләр. Онлар бу хәбәри миннәтдарлыгла динләдикдән сонра өзләрини Аллаһа һәср едиб, вәфтиз олундулар вә ҝәлин синфинә гошулараг ‘ҝәл, һәјат сујуну мүфтә ҝөтүр’ дәвәтини башгаларына фәал сурәтдә чатдырмаға башладылар.
Руһ дејир: «Ҝәл!»
11. Ерамызын биринҹи әсриндә мүгәддәс руһ тәблиғ ишиндә һансы ролу ојнајырды?
11 Иса Назаретдә синагогда тәблиғ едәркән Јешаја пејғәмбәрин тумарыны ачыб бу сөзләри охуду: «Рәббин Руһу үзәримдәдир, чүнки јохсуллара Мүждәни билдирмәк үчүн О Мәни мәсһ етди вә ҝөндәрди ки, гәлби сыныг оланлара шәфа верим, әсирләрә һүрр олаҹагларыны, корлара ҝөзләринин ачылаҹағыны тәблиғ едим, әзиләнләри азад едим, Рәббин лүтф илини елан едим». Сонра: «Ешитдијиниз бу јазы бу ҝүн иҹра едилди»,— дејәрәк охудугларыны өзүнә тәтбиг етди (Лука 4:17—21). Ҝөјә галхмаздан әввәл Иса шаҝирдләринә деди: «Мүгәддәс Руһ үзәринизә ендикдән сонра... гүдрәт алаҹагсыныз. Вә... дүнјанын ән узаг јерләринә гәдәр Мәнә шаһид олаҹагсыныз» (Һәв. иш. 1:8). Биринҹи әсрдә мүгәддәс руһ тәблиғ ишиндә чох мүһүм рол ојнајырды.
12. Бизим ҝүнләрдә дәвәт чатдырмаг ишиндә Аллаһын руһу һансы ролу ојнајыр?
12 Аллаһын мүгәддәс руһу бизим ҝүнләрдә дәвәтин инсанлара чатдырылмасында һансы ролу ојнајыр? Јеһова мүгәддәс руһун Мәнбәјидир. О, руһундан истифадә едәрәк ҝәлин синфинин үрәјини вә зеһнини ачыр ки, онун үзвләри Аллаһын Кәламы олан Мүгәддәс Китабы баша дүшсүнләр. Руһ онлары бу дәвәти инсанлара чатдырмаға вә јерүзү Ҹәннәтдә әбәди јашамаг үмидинә малик оланлара Мүгәддәс Китаб һәгигәтләрини изаһ етмәјә тәшвиг едир. Бәс бу дәвәти гәбул едән, Иса Мәсиһин шаҝирди олан вә ону башга инсанлара чатдыранлар һаггында нә демәк олар? Онлара да мүгәддәс руһ көмәк едир. Онлар ‘Мүгәддәс Руһ исмилә вәфтиз едиләрәк’ (И—93) онун рәһбәрлијинә ујғун һәрәкәт едир вә көмәјинә бел бағлајырлар (Мат. 28:19). Мәсһ олунмушларын вә сајы ҝет-ҝедә артан ‘бөјүк издиһамын’ тәблиғ етдији хәбәр барәдә дә дүшүнүн. Бу хәбәр Мүгәддәс Китаба — бирбаша Аллаһын руһунун тәсири алтында јазылан китаба әсасланыб. Демәли, һаггында данышылан дәвәт мүгәддәс руһ васитәсилә чатдырылыр. Маһијјәт етибарилә, бизи мүгәддәс руһ јөнәлдир. Бу, бизим дәвәт чатдырмаг ишиндә нә гәдәр иштирак етмәјимизә неҹә тәсир етмәлидир?
Онлар дејирләр: «Ҝәл!»
13. Вәһј 22:17 ајәсиндәки «Руһ вә ҝәлин... дејирләр: “Ҝәл!”» ифадәси нәјә ишарә едир?
13 «Руһ вә ҝәлин» садәҹә бир дәфә «ҝәл» демирләр. Бурада истифадә олунан фел давамедиҹи формададыр. Бу, Аллаһын дәвәтинин мүнтәзәм сәсләндијинә ишарә едир. Бу дәвәти ешидиб гәбул едәнләр һагда нә демәк олар? Онлар да «ҝәл» дејирләр. Аллаһын һәгиги хидмәтчиләриндән ибарәт бөјүк издиһам һагда дејилир ки, онлар Јеһованын «мәбәдиндә ҝеҹә-ҝүндүз Она хидмәт едирләр» (Вәһј 7:9, 15). «Ҝеҹә-ҝүндүз» дедикдә нә нәзәрдә тутулур? (Лука 2:36, 37; Һәвариләрин ишләри 20:31; 2 Салоникилиләрә 3:8 ајәләрини оху.) Јаша долмуш Анна пејғәмбәрин вә һәвари Павелин нүмунәләри ҝөстәрир ки, «ҝеҹә-ҝүндүз» хидмәт етмәк мүнтәзәм вә сәјлә хидмәт етмәк мәнасыны дашыјыр.
14, 15. Даниелин нүмунәсиндән мүнтәзәм ибадәт етмәјин ваҹиблији неҹә ҝөрүнүр?
14 Даниел пејғәмбәрин нүмунәсиндән дә ибадәтдә мүнтәзәм олмағын ваҹиблији ҝөрүнүр. (Даниел 6:4—10, 16 ајәләрини оху.) О, ширләр гујусуна атылмаг тәһлүкәсинә бахмајараг, һеч бир ајлыг да олса, ибадәтиндә дәјишиклик етмәди — «әввәлләр етдији кими ҝүндә үч дәфә» Јеһоваја дуа етмәк вәрдишиндән әл чәкмәди. Даниел бу давранышы илә ону ҝүдәнләрә Јеһоваја мүнтәзәм ибадәт етмәкдән башга һеч нәјин ваҹиб олмадығыны неҹә дә ајдын ҝөстәрди! (Мат. 5:16).
15 Даниел бүтүн ҝеҹәни ширләр гујусунда кечирдикдән сонра сәһәри ҝүн падшаһ ораја ҝәлиб уҹадан деди: «Еј Даниел, вар олан Аллаһын гулу! Даим гуллуг етдијин Аллаһын сәни ширләрдән гуртара билдими?» Даниел дәрһал ҹаваб верди: «Гој падшаһ һәмишә сағ олсун! Аллаһым өз мәләјини ҝөндәриб ширләрин ағзыны бағлады вә онлар мәнә тохунмады, чүнки мәним Аллаһын өнүндә тәгсирсиз олдуғум билинди. Еј падшаһ, сәнә гаршы да һеч бир ҹинајәт етмәмишәм». Даниел Јеһоваја «даим» хидмәт етдијинә ҝөрә хејир-дуаландырылды (Дан. 6:19—22).
16. Даниелин нүмунәси хидмәтдә иштирак етмәклә әлагәдар өзүмүзә һансы суаллары вермәјә тәшвиг етмәлидир?
16 Даниел ибадәтиндән — руһани ишләриндән галмамаг үчүн өлүмә белә ҝетмәјә һазыр иди. Бәс бизим һаггымызда нә демәк олар? Аллаһын Падшаһлығы һаггында хош хәбәри мүнтәзәм тәблиғ етмәк үчүн биз һансы гурбанлары веририк, јахуд вермәјә һазырыг? Биз Јеһова һагда данышмаға бир ај белә ара вермәмәлијик! Мәҝәр биз имкан дахилиндә һәр һәфтә хидмәтдә иштирак етмәјә чалышмалы дејиликми? Әҝәр физики мәһдудијјәтләримиз уҹбатындан ајда ҹәми 15 дәгигә тәблиғ етсәк белә, һесабаты мүтләг вермәк лазымдыр. Нәјә ҝөрә? Чүнки руһ вә ҝәлинлә бәрабәр, биз дә даима «ҝәл» демәк истәјирик. Бәли, Падшаһлығын даими тәблиғчиси олмаг үчүн биз әлимиздән ҝәләни етмәк әзминдәјик.
17. Јеһованын дәвәтини инсанлара чатдырмаг үчүн биз һансы имканлары әлдән вермәмәлијик?
17 Биз Јеһованын дәвәтини инсанлара јалныз хидмәтә ајырдығымыз вахтларда јох, һәр фүрсәт дүшәндә чатдырмаға чалышмалыјыг. Мәсәлән, алыш-вериш едәркән, ишдә вә ја мәктәбдә, сәјаһәтдә вә ја мәзунијјәтдә оларкән һәгигәтә сусајанлары ‘ҝәлиб, һәјат сујуну мүфтә ҝөтүрмәјә’ дәвәт етмәк бизим үчүн шәрәфдир. Һәтта һакимијјәт тәрәфиндән тәблиғ ишимизә мәһдудијјәт гојулса да, биз еһтијатла ишимизи давам етдиририк, ола билсин, саһәмиздә бүтүн гапылары дөјмүрүк вә ја даһа чох гејри-формал шәкилдә тәблиғ едирик.
«Ҝәл» демәјә давам един
18, 19. Аллаһын әмәкдашы олмаг шәрәфини гијмәтләндирдијини неҹә ҝөстәрирсән?
18 Дохсан илдән чохдур ки, руһ вә ҝәлин һәјат сујуна сусајанлары «ҝәл» дејә дәвәт едир. Сән онларын бу севиндириҹи дәвәтини ешитмисәнми? Онда бу дәвәти сән дә башгаларына чатдырмалысан.
19 Биз билмирик, Јеһованын бу мәһәббәт долу дәвәти һәлә нә гәдәр сәсләнәҹәк, амма әҝәр биз дә «ҝәл» дејә дәвәт едириксә, онда биз Аллаһын әмәкдашларыјыг (1 Кор. 3:6, 9). Бу неҹә дә бөјүк шәрәфдир! Ҝәлин ону гијмәтләндирдијимизи ҝөстәрәк вә мүнтәзәм тәблиғ етмәклә ‘һәмишә Аллаһа һәмд гурбаны тәгдим едәк’ (Ибр. 13:15). Гој јерүзү үмидинә малик оланлар ҝәлин синфи илә бирҝә даим «ҝәл» десинләр. Вә гој даһа чох инсан «һәјат сујуну мүфтә ҝөтүрсүн»!
Сиз нә өјрәндиниз?
• «Ҝәл» дејә дәвәт олунанлар кимләрдир?
• Нәјә ҝөрә демәк олар ки, «ҝәл» дәвәти Јеһовадандыр?
• Мүгәддәс руһ «ҝәл» дәвәтинин чатдырылмасында һансы ролу ојнајыр?
• Нәјә ҝөрә хидмәтдә мүнтәзәм олмаға чалышмалыјыг?
[16-ҹы сәһифәдәки шәкил/һесабат]
(Мәтнә нәшрдә бахын)
«Ҝәл!» дејә дәвәт едирләр
1914
5 100 тәблиғчи
1918
Чохлары јерүзү Ҹәннәтдә јашајаҹаг
1922
«Падшаһы вә онун падшаһлығыны бәјан един, бәјан един, бәјан един»
1929
Садиг галыг дејир: «Ҝәл!»
1932
Мәсһ олунмајанлар да «ҝәл» демәјә дәвәт олунурлар
1934
Јеһонадав синфи тәблиғ етмәјә дәвәт олунур
1935
‘Бөјүк издиһамын’ кимлији бәлли олур
2009
7 313 173 тәблиғчи