Нәјә ҝөрә јашлылара һөрмәт етмәлијик?
КАЛИФОРНИЈА (АБШ) саһилләриндә дүнјада ән чох шәкли чәкилән ағаҹлардан бири битир. Бу ағаҹ Тәнһа сәрв ағаҹы кими таныныр. Дејиләнләрә ҝөрә, онун 250-дән чох јашы вар. Давамлылығы илә танынан бу јарашыглы ағаҹа мүхтәлиф үсулларла гајғы ҝөстәрилир. Мәсәлән, о, тросларла бәркидилиб, бүнөврәси әтрафында исә даш һөрҝү чәкилиб.
Тәнһа сәрв ағаҹы бизә арамызда гејри-ади тәһәммүл ҝөстәрән јашлы мәсиһчиләри хатырлада биләр. Бу хүсусијјәт чох шејдә, мәсәлән, хош хәбәри тәблиғ етмәләриндә өзүнү бүрузә верир. Јоел пејғәмбәрлик етмишди ки, ‘ағсаггаллар’ Мүгәддәс Китаб хәбәрини бәјан едәҹәкләр (Јоел 2:28—32; Һәв. иш. 2:16—21). Бу баҹы-гардашларын башгаларынын «Сәмави Сәлтәнәт һаггында олан Мүждә» барәдә өјрәнмәсинә көмәк етмәк үчүн нә гәдәр вахт сәрф етдикләри барәдә бир дүшүнүн! (Мат. 24:14). Сачларына дән дүшән Падшаһлығын бу тәблиғчиләриндән бәзиләри илләрлә тәгибләрә вә диҝәр чәтинликләрә таб ҝәтирмишләр. Әҝәр өз давамлылығы илә танынан садә сәрв ағаҹы һөрҝү вә тросларла бәркидилибсә, онда арамыздакы јашлылар да бизим онлары сајыб һөрмәт вә еһтирам ҝөстәрмәјимизә даһа чох лајиг дејилләрми?!
Јеһова Аллаһ гәдимдә Өз халгына әмр етмишди: «Јашлыларын гаршысында ајаға дурун, ағсаггаллара һөрмәт еләјин» (Лев. 19:32). Јеһованын мүасир хидмәтчиләри арасында онилликләрлә ‘Аллаһын өнүндә ҝәзән’ садиг инсанларын ҝөзәл нүмунәләрини ҝөрүрүк (Мик. 6:8). Мүгәддәс Китаб принсипләрини тәтбиг етмәјә давам етдикләри үчүн, һәгигәтән дә, онларын ‘ағаран сачлары шәрәф таҹыдыр’ (Сүл. мәс. 16:31).
Һәвари Павел ҝәнҹ Тимотејә нәсиһәт вермишди: «Ағсаггалы [«сәртликлә», ЈД] мәзәммәтләмә». Әксинә, Тимотеј јашлы кишијә ‘атасына јалвардығы кими, ағбирчәкләрә [исә] анасына јалвардығы кими’ јалвармалы иди (1 Тим. 5:1, 2). Маһијјәт етибары илә, Тимотеј ағсачлынын гаршысында ‘ајаға дурмалы’ иди. Бурадан ајдын ҝөрүнүр ки, Јеһова бизим јашлы инсанларла һөрмәтлә данышмағымызы истәјир.
«Бир-биринизи һөрмәтдә габаглајын»,— дејә Ромалылара 12:10 ајәсиндә гејд едилир. Шүбһә јохдур ки, јығынҹағын нәзарәтчиләри јашлы мәсиһчиләрә һөрмәт ҝөстәрирләр. Амма һәр биримиз һөрмәт ҝөстәрмәкдә бир-биримизи габагламалыјыг.
Әлбәттә, валидејнләринин вә нәнә-бабаларынын гајғысына галмаг мәсулијјәти әсас етибары илә өвладларын үзәринә дүшүр. Инсанлар Тәнһа сәрв ағаҹыны горумағын јени үсулларыны ахтардыглары кими, биз дә јашлы валидејнләримизә вә нәнә-бабаларымыза ләјагәтләрини горујуб сахламаға көмәк етмәк үчүн мүхтәлиф јоллар ахтармалыјыг. Мәсәлән, биздә диггәтлә гулаг асмаг баҹарығы олса, онларын һиссләрини нәзәрә алмадан һансыса иши истәдијимиз кими ҝөрмәјә тәкид етмәјәҹәјик (Сүл. мәс. 23:22; 1 Тим. 5:4).
Јашлы һәмиманлыларымыз Јеһова үчүн чох әзиздир. О, онлары һеч вахт тәрк етмир (Мәз. 71:18). Сәдагәтлә хидмәт етмәләри үчүн һәгиги Аллаһ онлары мөһкәмләндирир. Ҝәлин биз дә даима јашлы баҹы-гардашларымыза дајаг олаг вә онлара һөрмәт ҝөстәрәк.
[7-ҹи сәһифәдәки шәкилләр]
Тәнһа сәрв ағаҹы дајаға еһтијаҹ дујдуғу кими, јашлылар да бизим онлара һөрмәт вә еһтирам ҝөстәрмәјимизә еһтијаҹ дујурлар
[Иҹазә илә]
American Spirit Images/age fotostock