Һазыр ол!

«Һазыр олун, чүнки инсан Оғлу ҝөзләмәдијиниз саатда ҝәләҹәк» (МАТ. 24:44).

1, 2. а) Мүгәддәс Китабда пејғәмбәрлик едилмиш һансы һадисәни пәләнҝин һүҹуму илә мүгајисә етмәк олар? б) Мәсиһ Шејтан дүнјасыны мәһв етмәјә ҝәләндә сағ галмаг үчүн биз нә етмәлијик?

БЕНГАЛ пәләнҝләринин мәшһур тәлимчиси илләрлә тамашачыларыны раһат-архајын әјләндирирди. О демишди: «Һејван сәнә етибар едәндә, елә бил, сәнә бүтүн дүнјаны бағышлајыблар». Анҹаг 2003-ҹү илин октјабр ајынын 3-дә һәмин етибар өлдү. Һејванлардан бири — 172 килограмлыг ағ пәләнҝ мәлум олмајан сәбәбдән она һүҹум чәкди. Һүҹум тамамилә ҝөзләнилмәз олдуғундан тәлимчи буна һазыр дејилди.

² Чох мараглыдыр ки, Мүгәддәс Китабда «вәһши һејван»ын һүҹуму һаггында пејғәмбәрлик едилир вә биз буна һазыр олмалыјыг. (Вәһј 17:15—18 ајәләрини оху.) Бу вәһши һејван кимә һүҹум едәҹәк? Һадисәләрин ҝедишаты ҝөзләнилмәдән дәјишәҹәк вә Шејтанын дүнјасы дахили парчаланма нәтиҹәсиндә өз-өзүнә гаршы чыхаҹаг. Ал-гырмызы рәнҝли вәһши һејван Бирләшмиш Милләтләр Тәшкилатыны, «он бујнуз» исә бүтүн сијаси гүввәләри тәмсил едир. Бунлар јалан динин дүнја империјасы олан фаһишәјәбәнзәр Бөјүк Бабилә гаршы чыхаҹаг вә ону амансызҹасына мәһв едәҹәк. Бу һадисә нә вахт баш верәҹәк? Онун ҝүнү вә сааты бизә мәлум дејил (Мат. 24:36). Јалныз ону билирик ки, бу, бизим ҝөзләмәдијимиз вахтда олаҹаг вә һәмин һүҹума гәдәр галан вахт азалыб (Мат. 24:44; 1 Кор. 7:29). Бу сәбәбдән һәмишә руһән һазыр олмаг олдугҹа ваҹибдир. Нәјә ҝөрә? Она ҝөрә ки, бу һүҹум баш верәндә вә Мәсиһ Аллаһын һөкмләрини иҹра етмәк үчүн ҝәләндә бизи хилас етсин (Лука 21:28). О ҝүнә там һазыр олмаг үчүн биз өзләрини Аллаһын ҝүнүнә һазырлајан, буна ҝөрә дә Онун вәдләринин һәјата кечмәсинин шаһиди олан садиг бәндәләриндән нүмунә ҝөтүрмәлијик. Бәс биз реал һәјатдан ҝөтүрүлмүш бу нүмунәләрә ҹидди јанашаҹағыг, јохса гулагардына вураҹағыг?

Нуһ кими һазыр ол

3. Нуһун Јеһоваја сәдагәтлә хидмәт етмәсини һансы вәзијјәт чәтинләшдирирди?

³ Јашадығы дөврдәки сон дәрәҹәдә пис вәзијјәтә бахмајараг, Аллаһын Өз вәдләрини јеринә јетирмәк вахты ҝәләндә Нуһ буна һазыр иди. Онун үзләшдији чәтинликләри бир тәсәввүр ет: үсјанкар мәләкләр инсан ҹилдинә ҝириб ҹазибәдар гадынларла бирҝә јашајырдылар. Бу гејри-тәбии әлагә нәтиҹәсиндә фөвгәлбәшәр ҝүҹә малик олан «бөјүк адамлар» төрәди. Бу нәһәнҝләр өз ҝүҹләриндән башгаларына әзаб вермәк үчүн истифадә едирдиләр (Јар. 6:4). Онлар һәр јердә гармагарышыглыг јарадырдылар. Тәсәввүр едирсән, бунун уҹбатындан јер үзүндә зоракылыг нә дәрәҹәдә јајылмышды? Беләликлә, пислик јер үзүнү өз ағушуна алды вә инсанларын дүшүнҹә вә давраныш тәрзи тамамилә позулду. Буна ҝөрә дә Али Һөкмдар Јеһова пис инсанлары мәһв едәҹәји ҝүнү тәјин етди. (Јарадылыш 6:3, 5, 11, 12 ајәләрини оху.)a

4, 5. Нуһун ҝүнләриндәки вәзијјәтлә бизим ҝүнләрдәки вәзијјәт арасында һансы охшарлыг вар?

⁴ Иса пејғәмбәрлик етмишди ки, Нуһун ҝүнләриндә вәзијјәт неҹә идисә, бизим ҝүнләрдә дә елә олаҹаг (Мат. 24:37). Мисал үчүн, биз дә пис руһларын инсанларын һәјатына мүдахилә етмәсинин шаһидијик (Вәһј 12:7—9, 12). Бу ҹин мәләкләр Нуһун ҝүнләриндә инсан ҹилдинә ҝирирдиләр. Бу ҝүн онлар буну едә билмәсәләр дә, һәм ҝәнҹләри, һәм дә јашлылары идарә етмәјә чалышырлар. Пәрдә архасында фәалијјәт ҝөстәрән бу позғун ҹин мәләкләр јолдан чыхартдыглары инсанларын пис, мурдар һәрәкәтләриндән зөвг алырлар (Ефес. 6:11, 12).

⁵ Аллаһын Кәламында Иблис ‘гатил’ вә ‘өлүм силаһларынын саһиби’ адланыр (Јәһ. 8:44; Ибр. 2:14). Амма онун инсанлары физики ҹәһәтдән өлдүрмәк гүввәси мәһдуддур. Буна бахмајараг, бу аҹыглы руһ инсанлары онларын әзаб чәкмәсинә вә өлүмүнә сәбәб олан ишләри ҝөрмәјә тәһрик едир. О, адамларын зеһниндә вә үрәјиндә нифрәт вә гатиллијә мејил јарадыр. Мисал үчүн, Бирләшмиш Штатларда дүнјаја ҝәлән 142 ушагдан 1-и гатиллијин гурбаны олур. Неҹә дүшүнүрсән, мәҝәр зоракылығын баш алыб ҝетдијини ҝөрән Јеһова, Нуһун ҝүнләриндәки кими, инди дә бир тәдбир ҝөрмәјәҹәк? Мәҝәр бунун үчүн өлчү ҝөтүрмәјәҹәк?

6, 7. Нуһ вә аиләси мөһкәм имана вә Аллаһ горхусуна саһиб олдугларыны неҹә ҝөстәрдиләр?

⁶ Вахты чатанда Јеһова Нуһа јери Дашгын суларына гәрг етмәк вә бүтүн ҹанлылары мәһв етмәк нијјәти барәдә хәбәр верди (Јар. 6:13, 17). Һәмчинин она нәһәнҝ гутуја бәнзәјән ҝәми тикмәји тапшырды. Нуһ аиләси илә бирликдә ишә башлады. Ҝөрәсән, Аллаһа итаәткарлыг ҝөстәрмәјә вә Онун һөкм ҝүнүнә һазыр олмаға онлара нә көмәк етди?

⁷ Мәһз мөһкәм иман вә Аллаһ горхусу сајәсиндә Нуһ вә аиләси һәр шеји Аллаһын дедији кими етдиләр (Јар. 6:22; Ибр. 11:7). Нуһ, бир аилә башчысы кими, һеч вахт руһани сајыглығыны итирмирди вә гәдим дүнјанын позғун әмәлләринә баш гошмурду (Јар. 6:9). О дәрк едирди ки, онун аилә үзвләри әтрафдакы инсанларын гәддар, әдәбсиз вә дикбаш һәрәкәтләрини мәнимсәмәли дејилләр. Һәмчинин онларын башы ҝүндәлик ишләрә гарышмамалы иди. Аллаһ истәјирди ки, бүтүн аиләнин диггәти Онун тапшырдығы ишдә олсун. (Јарадылыш 6:14, 18 ајәләрини оху.)

Нуһ вә аиләси һазыр идиләр

8. Нәјин әсасында Нуһун доғмаларынын Аллаһа садиг олдугларыны дејә биләрик?

⁸ Мүгәддәс Китабда диггәт, әсас етибарилә, аилә башчысына — Нуһа јөнәлдилсә дә, онун арвады, оғуллары вә ҝәлинләри дә Јеһоваја хидмәт едирдиләр. Језекел пејғәмбәр буну тәсдигләмишди. О демишди ки, әҝәр Нуһ онун дөврүндә јашасајды, өвладлары аталарынын салеһлији сајәсиндә ҹанларыны хилас едә билмәздиләр. Јеһоваја табе олуб-олмамаг гәрарыны вермәк үчүн онлар јеткин јашда идиләр. Бундан белә гәнаәтә ҝәлирик ки, өвладлары Аллаһа вә Онун јолларына олан мәһәббәтләрини шәхсән өзләри сүбут етмишдиләр (Јез. 14:19, 20). Аилә үзвләри Нуһун вердији ҝөстәришләрә әмәл едир, иманда ону дәстәкләјир вә јол вермирдиләр ки, Аллаһын тапшырдығы иши јеринә јетирмәјә кимсә онлара мане олсун.

9. Бизим ҝүнләрдә Нуһун иманыны кимләр тәглид едирләр?

⁹ Мүасир зәманәдә арамыздакы аилә башчыларынын Нуһун нүмунәсини изләмәјә чалышдыгларыны ҝөрмәк неҹә дә фәрәһләндириҹидир! Онлар баша дүшүрләр ки, аиләләрини гида, ҝејим вә евлә тәмин етмәк, өвладларына тәһсил вермәк кифајәт дејил. Чүнки аиләләринин руһани тәләбатларынын да гајғысына галмалыдырлар. Бунунла аилә башчылары өзләрини тезликлә ҝәләҹәк Јеһованын ҝүнүнә һазырламыш олурлар.

10, 11. а) Нуһ вә аиләси ҝәминин ичиндә һансы һиссләри кечирирдиләр? б) Өзүмүзә һансы суалы вермәлијик?

¹⁰ Нуһ, арвады, оғуллары вә ҝәлинләри ҝәмини тәхминән 50 илә тикиб гуртардылар. Бу мүддәт әрзиндә онлар ҝәмијә мин дәфә ҝириб-чыхмышдылар. Она сукечирмәјән маддә вурмуш, ичәрисинә азугә топламыш вә һејванлары јығмышдылар. Өзүнү бир анлыға орада тәсәввүр етмәјә чалыш. Бизим ерадан әввәл 2370-ҹи илин икинҹи ајынын 17-ҹи ҝүнүдүр. Нәһајәт ки, чохдан ҝөзләнилән ан јетишди. Нуһ аиләси илә бирликдә ҝәмијә ҝирир. Јеһова гапыны бағлајыр вә јағыш јағмаға башлајыр. Бу ади јағыш дејил. Ҝөјләрин пәнҹәрәләри ачылыр вә шиддәтли лејсан сәси ҝәминин ичәрисиндә ешидилир (Јар. 7:11, 16). Ҝәмидәкиләр хилас олур, чөлдә галанлар исә өлүрләр. Бу заман Нуһ вә аиләси һансы һиссләри кечирирдиләр? Шүбһәсиз, онлар Јеһоваја үрәкдән миннәтдар идиләр вә: «Нә јахшы ки, биз Аллаһла јеримишик вә өзүмүзү Онун ҝүнүнә һазырламышыг!» — дејәрәк севинирдиләр (Јар. 6:9). Туталым, Һар-Маҝедон ҝеридә галыб вә сән артыг јени дүнјадасан. Үрәјинин миннәтдарлыг һисси илә неҹә ашыб-дашдығыны тәсәввүр едә биләрсән?

¹¹ Һеч ким вә һеч нә Күлли-Ихтијар Аллаһ олан Јеһоваја Шејтанын бу системинә сон гојмаг вәдини һәјата кечирмәјә мане ола билмәз. Өзүнә суал вер: «Аллаһын һеч бир вәдинин боша чыхмајаҹағына вә һамысынын хырдалығына гәдәр өз вахтында јеринә јетәҹәјинә там әминәмми?» Әҝәр бу суала ҹавабын мүсбәтдирсә, онда «Јеһованын ҝүнүнү»н сүрәтлә јахынлашдығыны јадда сахлајараг о ҝүнә һазыр ол! (2 Пет. 3:12).

Муса ајыг-сајыг иди

12. Мусаны һәгиги ибадәтдән нәләр јајындыра биләрди?

¹² Башга бир нүмунәјә нәзәр салаг. Инсан нөгтеји-нәзәри илә бахсаг, Муса Мисирдә чох әлверишли мөвге тутурду. Шүбһә јохдур ки, фиронун гызы тәрәфиндән өвладлыға ҝөтүрүлмүш Муса бу өлкәдә бөјүк һөрмәт саһиби иди. Һәмчинин о ән ләзиз тәамлардан дадыр, ән ҝөзәл палтарлар ҝејинир вә ҹаһ-ҹалал ичиндә јашајырды. Муса јахшы тәһсил алмышды. (Һәвариләрин ишләри 7:20—22 ајәләрини оху.) Чох ҝүман ки, о, бөјүк вар-дөвләтин вариси олаҹагды.

13. Нәјә ҝөрә һеч бир шеј Мусанын диггәтини Аллаһын вәдләриндән јајындыра билмәди?

¹³ Валидејнләри Мусаны көрпәликдән өјрәтдикләри үчүн о, мисирлиләрин бүтләрә ибадәт етмәләринин ағылсызлыг олдуғуну дәрк етмишди (Чых. 32:8). Нә Мисирин тәһсил системи, нә дә ки фирон сарајынын ҹаһ-ҹалалы ону һәгиги ибадәтдән дөндәрә билмәди. Ҝөрүнүр, о, Аллаһын әҹдадларына вердији вәдләр үзәриндә дәриндән дүшүнүр вә Онун ирадәсини јеринә јетирмәјә һазыр олмағы үрәкдән арзулајырды. Ахы Муса Исраил халгына демишди: «Ибраһимин Аллаһы, Исһагын Аллаһы вә Јагубун Аллаһы Рәбб [Јеһова] мәни сизин јаныныза ҝөндәрди». (Чыхыш 3:15—17 ајәләрини оху.)

14. Мусанын иманы вә ҹәсарәти неҹә сынаға чәкилмишди?

¹⁴ Мисирин ҹансыз аллаһларыны тәмсил едән бүтләрдән фәргли олараг, һәгиги Аллаһ олан Јеһова Муса үчүн реал иди. О, «Ҝөзәҝөрүнмәз Аллаһы ҝөрүрмүш кими» јашајырды. Муса Аллаһын халгынын азад едиләҹәјинә инанса да, бунун нә заман баш верәҹәјиндән хәбәри јох иди (Ибр. 11:24, 25, 27). Бир мисирли исраилли гулу дөјәндә Муса ону мүдафиә етди. Бундан ҝөрүнүр ки, о, сојдашларынын азад олунаҹаглары ҝүнүн һәсрәтиндә иди (Чых. 2:11, 12). Лакин Јеһованын Өз нијјәтини һәјата кечирәҹәји ҝүн һәлә ҝәлиб чатмамышды, буна ҝөрә дә о гачыб узаг бир дијарда јашамалы олду. Шүбһә јохдур ки, Мисир сарајындакы раһатлығы атыб сәһрада јашамаг онун үчүн һеч дә асан дејилди. Бунунла белә, Јеһова һәр дәфә она ҝөстәриш верәндә о, дәрһал буна һај верирди вә белә етмәклә һәмишә һазыр олдуғуну ҝөстәрирди. Буна ҝөрә дә Муса Мидјанда 40 ил јашадыгдан сонра Аллаһ исраиллиләри азад етмәк үчүн ондан истифадә едә билмишди. Муса Аллаһын ҝөстәриши илә Мисирә гајытды. Нәһајәт, Аллаһын тапшырығыны јеринә јетирмәк вә буну Онун истәдији кими етмәк вахты ҝәлиб чатды (Чых. 3:2, 7, 8, 10). Јер үзүндә јашајан «бүтүн адамлардан даһа итаәткар бир инсан» олан Мусадан фиронун һүзуруна чыхмаг үчүн иман вә ҹәсарәт тәләб олунурду (Сај. 12:3). О, буну бир дәфә јох, дәфәләрлә етмишди вә һәр дәфә фиронун һүзуруна ҝәләркән даһа нечә ҹәза һаггында она хәбәр верәҹәјини билмирди.

15. Уғурсузлуглара бахмајараг, Мусаны сәмави Атасыны иззәтләндирмәјә нә тәшвиг едирди?

¹⁵ Нөвбәти 40 ил әрзиндә, јәни б. е. ә. 1513-ҹү илдән б. е. ә. 1473-ҹү илә гәдәр Муса дәфәләрлә мәјуслуға гапылырды. Буна бахмајараг, о, Јеһованы иззәтләндирмәк вә гардашларыны руһландырмаг үчүн фүрсәт ахтарырды (Ганун. т. 31:1—8). Нәјә ҝөрә? Чүнки о, өз адындан даһа чох Јеһованын адыны вә Онун һөкмранлығыны севирди (Чых. 32:10—13; Сај. 14:11—16). Мәјуслуға вә уғурсузлуглара бахмајараг, биз дә һәмишә Аллаһын һакимијјәтини дәстәкләмәли вә зәррә гәдәр дә шүбһә етмәмәлијик ки, Онун јоллары башгаларынкындан даһа мүдрик, даһа салеһ вә даһа јахшыдыр (Јешаја 55:8—11; Јер. 10:23). Сән бу фикирлә разысан?

Ојаг гал!

16, 17. Нәјә ҝөрә Марк 13:35—37 ајәләриндә јазылан сөзләр сәнин үчүн бөјүк әһәмијјәт кәсб едир?

¹⁶ «Диггәтли олун, ојаг галын, чүнки тәјин едилмиш вахтын һачан ҝәләҹәјини билмирсиниз» (Марк 13:33). Иса бу хәбәрдарлығы пис системин сонунун әламәтләри барәдә пејғәмбәрлик сөјләјәркән вермишди. Маркын китабында Исанын мүһүм пејғәмбәрлијинә неҹә јекун вурулдуғуна диггәт јетирәк: «Ојаг галын, чүнки ев саһибинин нә вахт ҝәләҹәјини: ахшам, ҝеҹә јарысында, хоруз банында, јахуд сәһәр тездән ҝәләҹәјини билмирсиниз. Елә олмасын ки, о, гәфил ҝәләндә сизи јатмыш тапсын. Сизә дедијими һамыја дејирәм: ојаг галын!» (Марк 13:35—37).

¹⁷ Исанын бу сөзләри, доғрудан да, инсаны дүшүнмәјә вадар едир. Бурада Иса дөрд ҝеҹә нөвбәсиндән данышыр. Дөрдүнҹү нөвбә заманы ојаг галмаг чох чәтин иди. Чүнки бу нөвбә тәхминән ҝеҹә саат үчдән ҝүнәш чыханаҹан давам едирди. Һәрбчиләрин фикринҹә, дүшмәнә һүҹум чәкмәк вә ону јухулу вәзијјәтдә јахаламаг үчүн бу ән әлверишли вахт иди. Бу ҝүн дә, бүтүн дүнјанын дәрин руһани јухуја ҝетдији бир вахтда ојаг галмаг үчүн биз вар ҝүҹүмүзлә мүбаризә апармалыјыг. Сонун вә хиласымызын јахынлашдығы бир заманда ‘ојаг галмағын’ вә ‘диггәтли олмағымызын’ ваҹиблијинә шүбһәмиз вармы?

18. Јеһованын Шаһидләри олан бизләр һансы шәрәфә лајиг ҝөрүлмүшүк?

¹⁸ Мәгаләнин әввәлиндә хатырланан сирк устасы бенгал пәләнҝинин һүҹумундан сонра, хошбәхтликдән, сағ галды. Лакин Мүгәддәс Китаб пејғәмбәрлији ачыг-ајдын ҝөстәрир ки, нә јалан дин, нә дә бу пис системин галан һиссәси өз агибәтиндән — јахынлашмагда олан мәһвдән гача билмәјәҹәк (Вәһј 18:4—8). Јашындан асылы олмајараг, гој Јеһованын һәр бир хидмәтчиси, Нуһ вә аиләси кими, Јеһованын ҝүнүнә һазыр олмаг үчүн әлиндән ҝәләни етмәјин ваҹиблијини һеч вахт унутмасын. Јашадығымыз дүнјада јалан динин мүәллимләри, еләҹә дә агностикләр вә атеистләр Јарадана ришхәнд едәрәк Ону рүсвај едирләр. Онларын бизә тәсир етмәсинә јол верәрәк һәјатымызы тәһлүкәјә ата билмәрик. Ҝәлин арашдырдығымыз нүмунәләрә ҹидди јанашаг вә һәр фүрсәтдән истифадә едәрәк Јеһованы «аллаһларын Аллаһы» вә «бөјүк, гүдрәтли, зәһмли» Аллаһ кими мүдафиә едәк вә Ону иззәтләндирәк (Ганун. т. 10:17).

[Һашијә]

Јадыныздадырмы?

• Нәјә ҝөрә Нуһ, илк нөвбәдә, аиләсинин руһани еһтијаҹларынын гајғысына галмалы иди?

• Бизим ҝүнләрлә Нуһун ҝүнләри арасында һансы мүһүм охшарлыглар вар?

• Нәјә ҝөрә Муса, мәјуслуға бахмајараг, диггәтини Јеһованын вәдләринә ҹәмләмишди?

• Һансы Мүгәддәс Китаб пејғәмбәрликләри сәни руһән ојаг галмаға тәшвиг едир?

[25-ҹи сәһифәдәки шәкил]

Нуһ вә аиләси бүтүн диггәтләрини Јеһованын тапшырдығы ишә ҹәмләмишдиләр

[26-ҹы сәһифәдәки шәкил]

Мәһз Јеһованын етибарлы вәдләри сајәсиндә Муса ојаг галырды