Һинду аиләси үзәриндә Аллаһын Кәламынын гүдрәти

Нәгл етди Налини Говиндсами

МӘН 2005-ҹи ил августун 22-дә аилә үзвләримин сәһәр јемәјинә топлашдығы ҝүнү һеч вахт унутмајаҹағам. Бејнимдә бөјүк шиш олдуғу үчүн һәр ан өлә биләрдим. Һәјат јолдашым Кришна дуа етдикдән сонра доғмаларыма үз тутараг дедим:

«Мән чох рискли бир әмәлијјат үчүн хәстәханаја ҝедирәм. Буна ҝөрә дә һамыныз һәр шејә һазыр олмалысыныз. Һәр еһтимала гаршы дәфн мәрасими илә әлагәдар мүәјјән тәдбирләр ҝөрмүшәм. Јеһоваја хидмәт едән әзизләрим, хаһиш едирәм, һеч вахт бу јолдан дөнмәјин. Диҝәрләринә исә јалварырам, Мүгәддәс Китабы өјрәнмәјә башлајын вә јығынҹаглара ҝедин. Јалныз онда сиз дә, мәним кими, Аллаһын һәгиги хидмәтчиләринин Ҹәннәтә чеврилмиш Јер үзүндә мүкәммәл сағламлыға вә әбәди һәјата саһиб олаҹағына инана биләрсиниз».

Әмәлијјатын неҹә кечдији барәдә демәздән әввәл, өзүм барәдә вә һәгиги Аллаһы неҹә таныдығым һагда данышмаг истәјирәм.

Мәним һинду аиләм

Мәним аиләм Ҹәнуби Африканын саһилјаны Дурбан шәһәриндә, тәпәнин башында, тахтадан вә дәмирдән тикилмиш бөјүк бир евдә јашајырды. Әсас јолун кечдији дәрәдән евин дарвазасына гәдәр 125 пилләли пилләкәни чыхмалы идик. Бу пилләләр гырағы колларла өртүлмүш балаҹа ҹығыра чыхырды. Ҹығырын ајағында дәмир гапы вар иди. Гапынын бир тәрәфиндә нәнәмин тәкјәси дурурду. Тәкјә һинду танрыларынын тәсвирләри вә һејкәлләри илә долу иди. Нәнәм дејәрди ки, мән «мәбәд ушағы»јам (һинд дилиндә мандәр ки бәча) вә ибадәт етдијимиз танрыларын сајәсиндә дүнјаја ҝәлмишәм. Тәкјәнин гаршы тәрәфиндә евин гапысына апаран ҹилаланмыш гырмызы пилләкән варды. Евимиз бөјүк иди: онун узун дәһлизи, көмүр собасы олан ҝениш мәтбәхи, једди јатаг отағы вә биротаглы әлавә тикилиси вар иди. Бу евдә, нәнәм, бабам, атам, онун үч кичик гардашы, балаҹа баҹысы вә онларын аиләләри дә дахил олмагла, 27 нәфәр јашајырды.

Бу бојда аиләнин еһтијаҹларынын гајғысына галмаг елә дә асан иш дејилди. Анҹаг һамымызын бир дам алтында јашамасы аилә телләримизи мөһкәмләндириб вә бизә хош хатирәләр бәхш едиб. Анам Гарги Деви дә дахил олмагла, евин дөрд ҝәлини нөвбә илә јыр-јығыш, биш-дүш ишләри илә мәшғул олурду. Аиләнин башчысы бабам иди. Базарлыг ишләринә дә о бахырды. Һәр чәршәнбә ҝүнү бабамла нәнәм бирһәфтәлик әт, мејвә-тәрәвәз алмаг үчүн базара ҝедәрдиләр. Биз чај кәнарындакы шам ағаҹынын көлҝәсиндә үзү дәрәјә отуруб онларын јолуну ҝөзләјәрдик. Узагдан бабамҝилин әлләриндә ири зәнбилләрлә автобусдан дүшдүјүнү ҝөрән кими онлара көмәк етмәк үчүн 125 пилләни үзү ашағы гачардыг.

Бизим бағымызда һүндүр палма ағаҹы варды. Мајна гушлары орада јува гурардылар. Биз онларын ҹиккилдәјәрәк ора-бура неҹә учушдуғуну сејр едирдик. Нәнәм гапынын ағзындакы пилләкәндә отуруб нағыллар данышар, санки, гушларын чыхардығы сәсләрин мәнасыны ачыглајарды. Бирликдә јашадығымыз бу евлә бағлы о гәдәр хош хатирәләрим вар ки! Бизим бирликдә ҝүлүб-ојнадығымыз, ағладығымыз ҝүнләр олуб. Белә бөјүк аиләдә јашамагдан севинҹ дујурдуг. Ән әсасы исә, мәһз бу евдә Јараданымыз Јеһова Аллаһ вә Онун ҝөндәрдији Хиласкар Иса Мәсиһ һаггында өјрәнмәјә башламышыг.

Јеһова һагда өјрәнмәздән өнҹә, биз һинду дининә етигад едирдик. Ибадәтимизә чохлу ҝүндәлик ајинләр дахил иди. Һәмчинин илин мүәјјән ҝүнләриндә кечирдијимиз бөјүк бајрамлара гонаглар чағырыр, бирликдә танры вә илаһәләрә ситајиш едирдик. Бу тәдбирләрин бәзиләриндә нәнәм транс һалына дүшүр, руһларла әлагәјә ҝирирди. Руһлары разы салмаг үчүн дүз ҝеҹә саат 12-дә һејван гурбанлары ҝәтирилирди. Бабам хејријјәчи кими танынырды. О, мәктәбләрин вә Һинду мәбәдләринин тикинтиси вә фәалијјәти үчүн ианәләр едирди.

Аллаһ һагда һәгигәти тапырыг

1972-ҹи илдә бабам хәстәләнди вә өлдү. Бир нечә ајдан сонра Ҹејн кими дә танынан кичик ҝәлинимиз Индәрвати ики Јеһованын Шаһидиндән «Ҝөзәтчи гүлләси» вә «Ојанын!» журналларыны ҝөтүрдү. Анҹаг ҝәлинимиз онлары евә дәвәт етмәдијинә ҝөрә өзүнү чох гынајырды. Биз һәмишә Јеһованын Шаһидләрини говурдуг. Лакин нөвбәти дәфә ҝәләндә әмидостум онлары евә дәвәт етди вә аиләсиндәки проблемләрдән, әмимин сәрхошлуг етмәсиндән данышды. Гоһум-гоншу ҝәлинимизә әриндән бошанмағы мәсләһәт ҝөрүрдү. Шаһидләр исә Аллаһын никаһа даир нөгтеји-нәзәрини изаһ етдиләр (Матта 19:6). Әмидостум Мүгәддәс Китабын мәсләһәтләринә вә Аллаһын ҝәләҹәкдә јер үзүндә хошбәхт һәјат олаҹағына даир вердији вәдә һејран олду. О, бошанмаг фикриндән дашынды вә Шаһидләрлә бирликдә мүнтәзәм олараг Мүгәддәс Китабы өјрәнмәјә башладыa. Онлар гонаг отағында өјрәнмә кечән заман о бири ҝәлинләр өз отагларындан гулаг асырдылар.

Бир мүддәтдән сонра ҝәлинләримизин һамысы Мүгәддәс Китабы өјрәнмәјә башлады. Ҝәлинимиз Ҹејн өјрәндикләрини башгаларына да данышырды, еләҹә дә бизә «Бөјүк Мүәллими динләјин»b китабындан һекајәләр охујуб баша салырды. Әмиләрим Мүгәддәс Китабы өјрәндијимиздән хәбәр тутанда бизә гаршы чыхмаға башладылар. Онлардан бири, Мүгәддәс Китаб да дахил олмагла, бүтүн әдәбијјатларымызы јығыб јандырды. Јығынҹаглара ҝетдијимиз үчүн әмиләрим бизи дөјүб-сөјүрдүләр. Анҹаг атам јеҝанә инсан иди ки, бу ҹүр мүнасибәт ҝөстәрмирди; о, һеч вахт бизим Аллаһ һаггында өјрәнмәјимизә етираз етмәјиб. Бүтүн бунлара бахмајараг, ҝәлинләримизин һеч бири јығынҹаглардан галмырды вә ҝетдикҹә Јеһова Аллаһа олан мәһәббәтләри артырды.

1974-ҹү илдә ҝәлинимиз Ҹејн, ондан сонра исә анам вә галан ҝәлинләр өзләрини Аллаһа һәср етдикләринин рәмзи кими суда вәфтиз олдулар. Бир вахтдан сонра нәнәм һинду ајинләриндән әл чәкди. Мән илләр әрзиндә Јеһованын Шаһидләринин бүтүн јығынҹагларына еләҹә ҝедиб-ҝәлирдим. Ҝүнләрин бир ҝүнү, Јеһованын Шаһидләринин кечирдикләри конгрес заманы Шамила Рампарсад адлы бир баҹы мәнә јахынлашыб сорушду: «Сән нә вахт вәфтиз олаҹагсан?» «Мән вәфтиз ола билмәрәм, ахы мәнимлә Мүгәддәс Китабы өјрәнмәјибләр», — дејә ҹаваб вердим. О да мәнә бирликдә өјрәнмәји тәклиф етди. Нөвбәти конгресдә, 1977-ҹи ил декабрын 16-да мән вәфтиз олдум. Беләликлә, бирликдә јашадығымыз 27 нәфәрлик бөјүк аиләмин 18 үзвү вәфтиз олду. Анҹаг мән әмәлијјат олан вахт атам Сани Дева һәлә дә һинду дининә етигад едирди.

«Һеч нәјә ҝөрә нараһат олмајын»

Филипилиләрә 4:6, 7 ајәләриндәки сөзләр мәнә һәмишә, хүсусилә дә бејнимдә бөјүк шиш ашкар едилән заман үрәк-дирәк верирди. Һәмин ајәләрдә дејилир: «Һеч нәјә ҝөрә нараһат олмајын. Һәр диләјинизи дуа, јалварыш вә шүкранла Аллаһа билдирин. Аллаһын вердији гәлб раһатлығы бүтүн инсан фикирләрини үстәләјир; о, үрәјинизи вә зеһнинизи Мәсиһ Иса васитәсилә горујаҹаг». Һеч нәјә ҝөрә нараһат олмамаг елә дә асан дејил, хүсусилә дә һәр ан өлүм тәһлүкәси илә үз-үзә дурурсанса. Хәстәлијим барәдә биләндә мәни ағламаг тутду, лакин Јеһоваја дуа етдикдән сонра дахилимдә «бүтүн инсан фикирләрини үстәләј[ән]» гәлб раһатлығы дујдум.

Һәгигәтән дә, Јеһованын, санки, сағ әлимдән тутуб аддымбааддым мәнимлә ҝетдијини һисс едирдим (Јешаја 41:13). Аллаһ мәнә Мүгәддәс Китабын гандан чәкинмәк әмринә табе олмагда гәтијјәтли олдуғуму тибб һејәтинә ҹәсарәтлә изаһ етмәјә көмәк етди (Һәвариләрин ишләри 15:28, 29). Нәтиҹәдә, ҹәрраһ вә анестезиолог гансыз әмәлијјат етмәјә разылашдылар. Әмәлијјатдан сонра ҹәрраһ мәнә јахынлашыб, һәр шејин уғурлу кечдијини вә шишин тамамилә ҝөтүрүлдүјүнү деди. Һәмчинин о гејд етди ки, һәлә һеч вахт ағыр бејин әмәлијјатындан сонра белә тез сағалан хәстә ҝөрмәјиб.

Үч һәфтәдән сонра, јатагда олмағыма бахмајараг, илк Мүгәддәс Китаб өјрәнмәсини кечирдим. Једдинҹи һәфтәнин сонунда исә машын сүрмәјә, тәблиғә вә Јеһованын Шаһидләринин јығынҹағына ҝетмәјә башладым. Хош хәбәри чатдырмаг ишиндә мәнә көмәк едән баҹы-гардашларыма үрәкдән миннәтдарам. Онлар мәни тәк гојмамаға чалышыр вә евә сағ-саламат чатмағым үчүн гајғы ҝөстәрирдиләр. Әминәм ки, мәним белә тез ајаға галхмағымда Мүгәддәс Китабын аудиојазысына гулаг асмағымын вә диггәтими руһани ишләрә јөнәлтмәјимин көмәји олуб.

Әмәлијјатдан сонра атамын Јеһованын Шаһидләри илә Мүгәддәс Китабы өјрәнмәјә башладығыны биләндә чох севиндим. Атам 73 јашында вәфтиз олду вә һал-һазырда Јеһоваја сәјлә хидмәт едир. 40-дан чох гоһум-әгрәбам инди бизимлә бирҝә чијин-чијинә Аллаһа ибадәт едир. Сол ҝөзүмүн ҝөрмә саһәсинин зәдәләнмәсинә вә кәллә сүмүјүмүн металын көмәјилә сахланылмасына бахмајараг, үмидими итирмәмишәм вә Јеһова Аллаһын јерүзү Ҹәннәтдә «јени шејләр јарад[аҹағы]» вахты сәбирсизликлә ҝөзләјирәм (Вәһј 21:3—5).

Мәни севән өмүр-ҝүн јолдашым Аллаһын мәнә хејир-дуасыдыр. О, јығынҹагда нәзарәтчи кими хидмәт едир. Ҝөзәл гызым Клериста исә таммүддәтли хидмәти давам етдирмәјим үчүн мәнә бөјүк дајагдыр. Јеһова Аллаһ хидмәтими бол-бол хејир-дуаландырыб. Бу ҝүнә кими чох инсана Аллаһын Кәламынын гүдрәтини өз һәјатларында ҝөрмәјә көмәк етмишәм. Бу инсанларын 30-дан чоху өзләрини Аллаһа һәср едиб вәфтиз олублар.

Үмид долу үрәклә мән Јеһова Аллаһын бизи бу дүнјанын әзаб-әзијјәтләриндән гуртараҹағы вә јер үзүндә ҝөзәл Ҹәннәти бәрпа едәҹәји вахты бөјүк сәбирсизликлә ҝөзләјирәм.

[Һашијәләр]

[10–ҹу сәһифәдәки шәкил]

Анамын гуҹағында

[10–ҹу сәһифәдәки шәкил]

Евимиз

[10–ҹу сәһифәдәки шәкил]

125 пилләли пилләкәнин јанында

[11–ҹи сәһифәдәки шәкил]

Һәјат јолдашым (солда), гызым вә валидејнләримлә