Мәһсул болдур!

ИСА МӘСИҺ демишди ки, дөврүн сонунда мәһсул бол олаҹаг (Мәт. 9:37; 24:14). Бу пејғәмбәрлик Украјнанын Закарпатје вилајәтиндә гејри-ади шәкилдә јеринә јетир. Һәмин вилајәтин ҹәми үч гоншу шәһәриндәa 50 јығынҹаг вә 5400-дән чох тәблиғчи вар. Бу о демәкдир ки, бу шәһәрләрдә һәр 4 нәфәрдән 1-и Јеһованын Шаһидидир.

Бу әразиләрдә инсанлар хош хәбәрә неҹә һај верир? Васили адлы бир гардаш дејир: «Бурада инсанлар Мүгәддәс Китаба һөрмәтлә јанашыр, әдаләти севир, мөһкәм аилә бағларына саһибдирләр вә баҹардыглары гәдәр бир-биринә әл тутурлар... Бизим етигадымызла һәмишә разылашмасалар да, Мүгәддәс Китабдан ајә охујанда диггәтлә динләјирләр».

Тәблиғчиләрин сајы әһалијә нисбәтдә даһа чох олдуғу әразиләрдә тәблиғ едән баҹы-гардашларымыз мүәјјән чәтинликләрлә үзләширләр. Мисал үчүн, 134 тәблиғчиси олан бир јығынҹағын әразисиндә тәблиғ едиләси ҹәми 50 ев вар. Бәс тәблиғчиләр бу вәзијјәтә неҹә ујғунлашыр?

Бир чох баҹы-гардашымыз фәдакарлыг ҝөстәрәрәк мүждәчиләрә тәләбат олан әразиләрә ҝедиб тәблиғ едирләр. Јонаш адлы 90 јашлы бир гардаш дејир: «Бизим јығынҹағын әразисиндә бир тәблиғчијә ҹәми 2 ев дүшүр. Инди јашадығым кәнддә тәблиғ едирәм, амма сағламлығым писләшмәмишдән әввәл 160 километр јол ҝедиб тәјин олунмамыш әразидә маҹар дилиндә тәблиғ едирдим». Доғрудан да, башга әразиләрдә тәблиғ етмәк мүәјјән фәдакарлыг тәләб едир. Гардаш сөзүнә давам едир: «Сүбһ тездән саат 4-дә дурурдум ки, гатара чатым. Саат 6-ја гәдәр тәблиғ едиб ахшам гатары илә евә гајыдырдым. Ора һәфтәдә ики-үч дәфә ҝедирдим». Бәс ҝөрәсән бу әзијјәти чәкмәјә дәјәрди? Гардаш дејир: «Хидмәтин бу нөвүндә иштирак етмәк мәнә бөјүк севинҹ бәхш едирди. Хошбәхтәм ки, уҹгар әразидә јашајан бир аиләјә һәгигәти өјрәнмәјә көмәк етмишәм».

Тәбии ки, бу әразидәки јығынҹагларын һәр бир үзвүнүн узаг әразиләрдә тәблиғ етмәк имканы олмур. Амма онларын һамысы, һәтта јашлы баҹы-гардашлар да өз јығынҹагларынын аид олдуғу әразидә ҹанла-башла тәблиғ едирләр. Белә ки, 2017-ҹи илдә бу үч шәһәрдә кечирилмиш анма мәрасиминдә иштирак едәнләрин сајы тәблиғчиләрин сајындан ики дәфә чох иди, бу исә о демәкдир ки, әһалинин јарысы анма мәрасиминдә иштирак етмишди. Сөзсүз ки, һарада хидмәт етмәјимиздән асылы олмајараг, һәлә дә Рәббин јолунда ҝөрүләси чох иш вар (1 Кор. 15:58).