Фәсил 55
Хејли шаҝирд Исадан ајрылыр
ГАЛИЛЕЈА ҝөлүнүн шәрг саһилиндә мөҹүзә илә чөрәк вә балыг јејиб дојмуш адамлар сонрадан ҝәлиб Иса Мәсиһи тапырлар вә о, онларла ҝөјдән ҝәлән һәгиги чөрәк һаггында данышыр. Бу сөһбәт давам едир вә Иса Капернаһум синагогунда изаһ едир ки, ҝөјдән ҝәлмиш һәгиги чөрәк одур.
Иса сөзүнә белә давам едир: «Һәмин чөрәк бәшәријјәтин һәјаты уғрунда фәда едәҹәјим бәдәнимдир». Ҹәми ики ил бундан габаг, 30-ҹу илин баһарында Иса Никодим адлы бир јәһуди илә сөһбәтиндә демишди: «Аллаһ дүнјаны о гәдәр севир ки, јеҝанә Оғлуну онун уғрунда гурбан верди». Инди дә Иса ҝөстәрир ки, онун бир аздан верәҹәји гурбана иман едән, јәни мәҹази мәнада онун бәдәнини јејән һәр кәс әбәди һәјат ала биләр.
Бу сөзләр динләјиҹиләри чаш-баш гојур: «Нә? Бу адам бизә өз бәдәнини верәҹәк, биз дә ону јејәҹәјик?!» Иса онун бәдәнини мәҹази мәнада јемәк лазым олдуғуну нәзәрдә тутурду. Исанын өз фикрини вурғуламаг үчүн дедији сонракы сөзләр, һәрфән гәбул едиләндә, тамам ағласығмаз ҝөрүнүр:
«Әҝәр инсан Оғлунун бәдәнини јемәсәниз вә ганыны ичмәсәниз, һәјата говушмајаҹагсыныз. Мәним бәдәнимдән јејиб ганымдан ичәнин әбәди һәјаты вар вә мән ону ахырынҹы ҝүндә дирилдәҹәјәм. Ахы мәним бәдәним һәгиги гидадыр вә ганым һәгиги ичкидир. Бәдәнимдән јејән вә ганымдан ичән мәнимлә вәһдәтдәдир вә мән дә онунла вәһдәтдәјәм».
Иса һеч кәси каннибализмә чағырмыр, белә олсајды, онун бу тәлими, һәгигәтән дә, тәһгирамиз сәсләнәрди! Хејр, онун сөзләри мәҹази мәна дашыјыр. Иса садәҹә вурғулајыр ки, әбәди һәјата говушмаг үчүн онун камил инсан бәдәни вә ганы баһасына вериләҹәк гурбана иман ҝәтирмәк лазымдыр. Әфсус ки, һәтта онун шаҝирдләринин чоху бу тәлими анламаға ҹәһд етмирләр. Онлар Исаја гаршы чыхырлар: «Бу нә данышыр?! Бу сөзләрә гулаг асмаг мүмкүн дејил!»
Иса шаҝирдләринин чохунун дејиндијини биләрәк онлара дејир: «Бу сөзләрим сизи тәһгир едир? Бәс инсан Оғлунун әввәлләр олдуғу јерә гајытдығыны ҝөрсәниз, онда неҹә?.. Сизә дедијим сөзләр мүгәддәс руһдандыр, онлар һәјат верир. Амма аранызда еләләри вар ки, инанмыр».
Иса сөзүнә давам едир: «Буна ҝөрә сизә: “Атам рүсхәт вермәсә, кимсә јаныма ҝәлә билмәз”, — дедим». Беләҹә, шаҝирдләрин чоху Исадан ајрылыр вә онун ардынҹа ҝетмир. Онда Иса он ики һәваридән сорушур: «Бәлкә, сиз дә ҝетмәк истәјирсиниз?»
Петер ҹаваб верир: «Аға, кимин јанына ҝедәк? Әбәди һәјатын сөзләри сәндәдир. Биз инандыг вә билирик ки, Аллаһын мүгәддәс гулу сәнсән». Ола билсин ки, Петер вә диҝәр һәвариләр дә Исанын бу сөзләринин мәнасыны там баша дүшмәдиләр, амма ҝөрүн, онлар неҹә вәфалыдырлар!
Иса Петерин ҹавабындан мәмнун галыр вә гејд едир: «Сиз он ики нәфәри мән сечмәмишәм? Анҹаг сиздән бири бөһтанчыдыр». О, Јәһуда Искариоту нәзәрдә тутур. Чох ҝүман, Иса һисс едир ки, Јәһуда мәһз бу вахт әјри јола дүшмәјә башлајыр.
Иса ону падшаһ етмәк истәјәнләри пешман етмишди. Инди онлар, јәгин ки, белә дүшүнүрләр: әҝәр бу адам Мәсиһә лајиг олан бир сәлаһијјәтдән имтина едирсә, бәс о, неҹә Мәсиһ ола биләр? Бу суал һеч ҹүр онларын ағлына батмыр. Јәһја 6:51—71; 3:16.
▪ Иса Мәсиһ өз бәдәнини кимләрин уғрунда верир вә «онун бәдәнини јемәк» нә демәкдир?
▪ Онун һансы сөзләри адамлары даһа да чаш-баш салыр вә о, әслиндә нәји нәзәрдә тутур?
▪ Чохлары Исадан ајрыланда Петер нә дејир?