Фәсил 62

Тәвазөкарлыг дәрси

ФИЛИППИ ГЕЈСӘРИЈЈӘСИ бөлҝәсиндә ҹинә тутулмуш оғланы сағалтдыгдан сонра Иса Мәсиһ шаҝирдләри илә Капернаһума гајытмаға һазырлашыр. О, јенә дә шаҝирдләринә өләҹәји һагда вә онларын үзәрләринә дүшәҹәк мәсулијјәт барәдә данышыб онлары һазырламаг фикриндәдир. Буна ҝөрә дә о истәјир ки, онлар тәк ҝетсинләр. Иса шаҝирдләрә дејир: «Инсан Оғлу әлә вериләҹәк, ону өлдүрәҹәкләр. Лакин о, үч ҝүндән сонра дириләҹәк».

Иса бундан әввәл дә онлара бу барәдә данышмышды. Үстәлик, һәвариләрдән үчү онун ҝөркәминин дәјишмәсини өз ҝөзләри илә ҝөрмүш вә һәмин вахт онун «дүнјадан ајрылаҹағы» һагдакы сөһбәти ешитмишдиләр. Амма онлар јенә дә бу мәсәләни ахыра гәдәр дәрк етмирләр. Исанын өләҹәји фикри бир гәдәр әввәл Петерин ағлына батмырды, инди исә һеч ким буну инкар етмир. Лакин бу һагда сорушмаға да чәкинирләр.

Нәһајәт, онлар Иса үчүн бүтүн хидмәти боју бир нөв дајаг мәнтәгәси олан Капернаһума ҝәлиб чатырлар. Һәмчинин бу шәһәр Петер вә бир нечә һәваринин доғма јурдудур. Бурада мәбәд верҝиси јыған кишиләр Петерә јахынлашыб сорушурлар: «Мүәллиминиз мәбәд верҝисини өдәмир?» Ола билсин ки, онлар Исаны адәти позмагда тәгсирләндирмәк истәдикләриндән бу суалы верирләр.

Петер: «Өдәјир», — дејә ҹаваб верир.

Дејәсән, бундан дәрһал сонра Иса евә ҝәлир. О, һадисәдән хәбәрдардыр. Петер һәлә ағзыны ачмамыш Иса ондан сорушур:

— Неҹә дүшүнүрсән, падшаһлар рүсуму вә ҹан верҝисини кимдән јығырлар: өз оғулларындан, јохса башгаларындан?

— Башгаларындан.

— Демәли, оғуллар верҝидән азаддыр.

Иса Мәсиһин Атасы Каинатын Падшаһыдыр вә мәбәддә мәһз онун Атасына ибадәт едилир. Бу сәбәбдән Аллаһын Оғлу ганунән мәбәд верҝисиндән азаддыр. Буна бахмајараг, Иса Петерә бујурур: «Амма галмагал јаратмамаг үчүн ҝөлә ҝет, тилову суја ат вә тилова дүшән биринҹи балығы тут, онун ағзыны ач, орада бир ҝүмүш пул тапаҹагсан. Пулу ҝөтүр, һәм мәним, һәм дә өз әвәзинә онлара вер».

Капернаһума гајытмыш шаҝирдләр, еһтимал ки, Петерин евиндә топлашдыгда бу суалы ортаја гојурлар: «Сәмави падшаһлыгда ән бөјүк ким олаҹаг?» Иса бу суалын һарадан ҝәлдијини билир. Онлар Филиппи Гејсәријјәсиндән гајытдыглары баш јолда шаҝирдләрин нә барәдә данышдыгларындан хәбәрдар иди. О сорушур: «Јолда нә һагда мүбаһисә едирдиниз?» Шаҝирдләр утандыгларындан сусурлар, ахы онлар јолда кимин ән бөјүк олаҹағы һагда мүбаһисә едирдиләр.

Тәхминән үч илдир ки, Иса шаҝирдләрини өјрәдир. Бу гәдәр вахт әрзиндә тәлим алдыгдан сонра да онларын белә мөвзуда мүбаһисә етмәләри гәрибә дејилми? Бурадан ҝөрүнүр ки, инсанын гејри-камиллији вә алдығы дини тәрбијә она ҝүҹлү тәсир ҝөстәрә биләр. Исанын шаҝирдләри јәһуди дининдә бөјүмүшдүләр. Бу диндә инсанын мәнсәбинә вә мәншәјинә һәр бир ишдә хүсуси диггәт верилирди. Ола билсин, Петер өзүнү бөјүк һесаб едирди, чүнки Иса она Падшаһлығын мүәјјән «ачарларыны» вәд етмишди. Јагубла Јәһја да, јәгин, бу фикирдә идиләр, ахы онлара Исанын ҝөркәминин дәјишмәсини ҝөрмәк нәсиб олмушду.

Неҹә олурса-олсун, Иса онларын бахышларыны дүзәлтмәк үчүн тәсиредиҹи бир әјани нүмунәдән истифадә едир. О, бир ушағы чағырыб онларын ортасына гојур вә ушағы гуҹаглајыб дејир: «Сизә дејирәм, дәјишиб ушаг кими олмасаныз, сәмави падшаһлыға әсла ҝирмәјәҹәксиниз. Өзүнү бу ушаг кими кичилдән сәмави падшаһлыгда ән бөјүк олаҹаг. Бунун кими бир ушағы мәним хатиримә гәбул едән мәни дә гәбул едир».

Иса шаҝирдләрин сәһв бахышларыны бөјүк мәһарәтлә дүзәлдир! О һирсләниб онлара јекәхана, тамаһкар, шөһрәтпәрәст демир. Бунун әвәзинә о, ушаглары нүмунә ҝәтирәрәк онлара тәрбијә верир. Ахы ушаглар тәвазөкар олурлар, онлар шөһрәтпәрәстликдән узагдырлар вә һеч вахт мәнсәб ҝүдмүрләр. Беләҹә, Иса ҝөстәрир ки, шаҝирдләри ушаглар кими тәвазөкар олмалыдырлар. Иса сөзүнә белә јекун вурур: «Аранызда ән тәвазөкар кимдирсә, бөјүк одур». Матта 17:22—27; 18:1—5; Марк 9:30—37; Лука 9:43—48.

▪ Капернаһума гајыдаркән Иса јолда һансы тәлими тәкрарлајыр вә шаҝирдләр буну неҹә гәбул едирләр?

▪ Нә үчүн Иса мәбәд верҝиси өдәмәкдән азаддыр, буна бахмајараг, нә үчүн верҝини өдәди?

▪ Шаҝирдләр арасында мүбаһисәјә сәбәб нә олур вә Иса онларын сәһв бахышларыны неҹә дүзәлдир?