Фәсил 75

Хошбәхтлијин мәнбәји

ИСА МӘСИҺ Галилејадакы хидмәти заманы мөҹүзәләр ҝөстәрмишди. Инди Јәһудејада да бунлара бәнзәр мөҹүзәләр ҝөстәрир. Мисал үчүн, о, бурада бир адамдан инсаны лал едән ҹини говур. Ҹамаат һејрәтә ҝәлир, бәзиләри исә, Галилејада олдуғу кими, ејни бәһанәни тәкрар едирләр: «Бу адам ҹинләрин һөкмдары Беелзебубун әли илә ҹинләри говур». Башгалары исә онун Мәсиһ олдуғуну сүбут едән дәлилләр истәјир вә ону сынамаг үчүн ҝөјдән бир әламәт ҝөстәрмәсини тәкид едирләр.

Иса онларын фикирләрини билир вә бурадакы әлејһдарларына да Галилејада олдуғу кими ҹаваб верир. О гејд едир ки, дахилдән парчаланмыш падшаһлыг дағылаҹаг. Иса сорушур: «Әҝәр Шејтан да ичәридән парчаланыбса, онун падшаһлығы неҹә давам ҝәтирәҹәк?» Сонра онлара тәһлүкә гаршысында олдугларыны ҝөстәрир: «Әҝәр мән ҹинләри Аллаһын ҝүҹү [бармағы] илә говурамса, демәли, Аллаһын падшаһлығы ҝәлиб, сизин исә хәбәриниз јохдур».

Исанын мөҹүзәләрини ҝөрәнләр гәдимдә Муса пејғәмбәрин ҝөстәрдији мөҹүзәнин шаһиди олмуш адамлар кими һәрәкәт етмәли идиләр. О вахт онлар: «Бу Аллаһын бармағыдыр!» (ЈД) — дејә нида етмишдиләр. Даш лөвһәләр үзәриндә Аллаһ «Өз бармағы» илә «Он әмр»и јазмышды. Мәһз Аллаһын бу «бармағы», јәни Онун фәал гүввәси олан мүгәддәс руһ, ҹинләри говмаг вә хәстәләри сағалтмаг үчүн Исаја ҝүҹ верир. Беләҹә, Аллаһын Падшаһлығы онун тәјин едилмиш падшаһы Иса Мәсиһ симасында ҝәлиб, амма онлар буну дәрк етмирләр.

Сонра Иса өз евини горујан јараглы-јасаглы бир адам һаггында мәсәл чәкир. Лакин даһа ҝүҹлү бир адам ҝәлир вә ону мәғлуб едир. Бу мәсәл васитәсилә Иса Шејтан үзәриндә һакимијјәтә малик олдуғуну вә буна ҝөрә ҹинләри гова билдијини ҝөстәрир. Иса бунун ардынҹа Галилејада данышдығы «мурдар руһ» мәсәлини тәкрар едир. Мурдар руһ адамдан чыхыр, амма адам онун јерини јахшы шејлә долдурмаса, бу руһ башга једди руһла ҝери гајыдыр. Онда бу адамын вәзијјәти әввәлкиндән бешбетәр олур.

Бу тәлимләри динләјән издиһамын ичиндән бир гадын уҹадан дејир: «Сәни бәтниндә дашыјан вә дөшләри илә әмиздирән гадын нә хошбәхтдир!» Пејғәмбәрин анасы олмаг һәр бир јәһудејалы гадынын арзусудур, о ки галды Мәсиһин анасы олмаг! Бәли, бу гадынын һиссләрини баша дүшмәк олар. Јәгин, о дүшүнүр ки, Мәрјәм Исанын анасы олдуғу үчүн бәхтәвәрдир.

Амма Иса һәгиги хошбәхтлијин мәнбәјини ҝөстәрәрәк гадынын дүшүнҹәсини дүзҝүн сәмтә јөнәлдир: «Аллаһын сөзүнү ешидиб она әмәл едәнләр хошбәхтдирләр!» Иса һеч вахт ејһам белә вурмамышды ки, онун анасы Мәрјәмә хүсуси шәрәф ҝөстәрилмәлидир. Әксинә, Иса ҝөстәрир ки, әсил хошбәхтлик гоһумлуг телләриндән вә ја диҝәр шејләрдән јох, Аллаһа сәдагәтлә хидмәт етмәкдән асылыдыр.

Иса, Галилејада олдуғу кими, бурада да ҝөјдән әламәт тәләб едәнләри данлајыр вә онлара Јунус пејғәмбәрин әламәтиндән савајы башга бир әламәт верилмәјәҹәјини дејир. Јунус пејғәмбәр үч ҝүн балығын гарнында галмасы вә ниневалылары төвбәјә ҝәтирмиш ҹәсарәтли тәблиғи илә бир әламәт олмушду. Иса изаһ едир: «Һәрчәнд бурада Јунусдан даһа бөјүк пејғәмбәр дуруб». Һәмчинин Сәба мәликәси Сүлејманын һикмәтинә һејран галмышды. Иса бәјан едир: «Һәрчәнд Сүлејмандан даһа һикмәтлиси бурада дуруб».

Сонра Иса изаһ едир ки, чырағы јандыранда зирзәмијә вә ја сәбәт алтына јох, ачыг јерә гојурлар ки, отаға ҝирән ишығы ҝөрсүн. Ола билсин, о демәк истәјир ки, бу тәрс адамлара тәлим вермәк вә онларын ҝөзү габағында мөҹүзәләр ҝөстәрмәк јанан чырағы ҝизләтмәк кими бир шејдир. Онларын ҝөзләри тох дејил, јәни һәдәфә тушланмајыб. Буна ҝөрә дә Исанын мөҹүзәләринин мәғзи онлар үчүн бағлы галыр.

Иса елә индиҹә ҹини говуб лал адамын дилини ачмышды. Ҝөзү тох вә һәдәфә тушланмыш адамлар бу иши лајигинҹә гијмәтләндирәр вә хош хәбәри бәјан етмәјә тәшвиг олунардылар. Әфсус ки, Исанын рәгибләри буну етмирләр. Иса сөзүнү белә јекунлашдырыр: «Буна ҝөрә дә ајыг ол. Ола билсин, ичиндәки ишыг зүлмәтдир. Әҝәр бәдәнин бүсбүтүн нур ичиндәдирсә вә онун һеч бир һиссәсиндә зүлмәтдән әсәр-әламәт јохдурса, чыраг сәни ишыгландырдығы кими, бәдәнин дә тамамилә нура гәрг олаҹаг». Лука 11:14—36; Чыхыш 8:18, 19; 31:18; Матта 12:22, 28.

▪ Иса лал адамы сағалданда ҹамаат нә дејир?

▪ «Аллаһын бармағы» нәдир? Аллаһын Падшаһлығы һансы мәнада ҝәлмишди?

▪ Әсил хошбәхтлик нәдәдир?

▪ Ҝөзүн тох олмасы нә демәкдир?