Фәсил 115

Мүбаһисә галхыр

БИР АЗ әввәл Иса һәвариләринин ајагларыны јумагла онлара ҝөзәл тәвазөкарлыг дәрси вериб. Бунун ардынҹа о, јахынлашан өлүмүнүн Хатирә Ҝеҹәсини тәсис едир. Инди, бүтүн бунларын мүгабилиндә, чох гәрибә бир һадисә баш верир. Һәвариләр арасында кимин ән бөјүк олдуғу барәдә гызғын мүбаһисә дүшүр. Ҝөрүнүр, бу чохданкы мүбаһисәнин давамыдыр.

Хатырлајаг ки, дағда Исанын ҝөркәминин дәјишмәси һадисәсиндән сонра да һәвариләр кимин бөјүк олдуғу барәдә мүбаһисә галдырмышдылар. Бундан әлавә, Јагубла Јәһја Исадан сәмави Падшаһлыгда онлара шәрәфли јер вермәји истәмишдиләр вә бу, һәвариләрин арасында бөјүк мүбаһисәјә сәбәб олмушду. Тәсәввүр едирсиниз, инди һәвариләрлә кечирдији бу сон ҝеҹәдә онларын бир-бири илә дидишмәсини ҝөрмәк Иса үчүн нә гәдәр ағырдыр? Бәс о нә едир?

Бу һәрәкәтләринә ҝөрә һәвариләри данламаг әвәзинә, Иса јенә дә сәбирлә онлары баша салыр: «Халгларын һөкмдарлары онлара ағалыг едир, онларын үзәриндә һакимијјәт сүрәнләри Һами кими ҝөјләрә уҹалдырлар. Сиз исә белә олмамалысыныз... Ким даһа бөјүкдүр: сүфрәдә отуран, јохса гуллуг едән? Мәҝәр бөјүк, сүфрәдә отуран дејил?» Онлара вердији нүмунәни хатырладараг дејир: «Мән исә аранызда гуллуг едирәм».

Һәвариләр гејри-камил олмаларына бахмајараг, Исанын гаршылашдығы сынагларда она садиг галмышлар. Буна ҝөрә дә Иса дејир: «Атам мәнимлә падшаһлыға аид әһд бағладығы кими, мән дә сизинлә падшаһлыға аид әһд бағлајырам». Исанын бу садиг давамчылары илә бағладығы әһд сајәсиндә онлар Аллаһын Падшаһлығында онунла бирҝә һакимијјәт сүрәҹәкләр. Бу падшаһлыг әһдинә нәһајәтдә 144 000 адам гәбул едиләҹәк.

Һәвариләрә Падшаһлыгда Мәсиһлә бирҝә һакимијјәт сүрмәк әнамы бәхш едиләҹәји һалда, инди онлар руһани ҹәһәтдән зәифдирләр. Иса дејир: «Бу ҝеҹә башыма ҝәләҹәк һадисәләрә ҝөрә һамыныз мәндән үз дөндәрәҹәксиниз». Бунун ардынҹа Петерә онун үчүн дуа етдијини билдирир вә она тапшырыр: «Сән дә гајыданда гардашларына үрәк-дирәк вер».

Сонра Иса һәвариләрә дејир: «Балаларым, артыг јанынызда чох галмајаҹағам, сиз мәни ахтараҹагсыныз. Јәһудиләрә дедијим сөзү инди сизә дејирәм: сиз ҝетдијим јерә ҝәлә билмәзсиниз. Сизә јени бир әмр верирәм: бир-биринизи севин. Мән сизи севдијим кими, сиз дә бир-биринизи севин. Аранызда мәһәббәт олса, һамы биләҹәк ки, сиз мәним шаҝирдимсиниз».

— Аға, сән һара ҝедирсән? — Петер сорушур.

— Ҝетдијим јерә сән инди ҝәлә билмәзсән, амма сонра ҝәләҹәксән.

— Аға, мән нијә инди сәнин ардынҹа ҝәлә билмәрәм? Сәнин јолунда ҹанымы да верәрәм.

— Мәним јолумда ҹаныны верәрсән? Буну бил ки, бу ҝүн, елә бу ҝеҹә хоруз ики дәфә банламамыш сән мәни дүз үч дәфә данаҹагсан.

Петер дәрһал ҹаваб верир: «Мәнә сәнинлә бирҝә өлмәк лазым ҝәлсә белә, сәни әсла данмарам». Диҝәр һәвариләр дә белә дејирләр, Петер исә ловғаланыр: «Һамы сәндән үз дөндәрсә дә, мән әсла сәндән үз дөндәрмәрәм!»

Иса һәвариләрини Галилејаја тәблиғә ҝөндәрәндә онлара кисә вә һејбә ҝөтүрмәмәји тапшырдығыны јадларына салараг сорушур:

— Бир шејдә корлуг чәкдиниз?

— Хејр! — онлар ҹаваб верирләр.

— Инди исә пул кисәси олан кисәсини, һәмчинин һејбәсини дә ҝөтүрсүн. Гылынҹы олмајан әбасыны сатыб гылынҹ алсын. Буну билин ки, мәним һаггымда јазылмыш: «Ҹинајәткарлара тај тутулду», — сөзләри јеринә јетмәлидир. Чүнки һаггымда јазыланлар артыг һәјата кечир.

Иса ҹинајәткарларла бирҝә дирәјә мыхланаҹағы вахтдан данышыр. О һәмчинин билдирир ки, бунун ардынҹа онун давамчылары ҹидди тәгибләрә мәруз галаҹаглар. Онлар дејирләр: «Аға, бурада ики гылынҹ вар».

Иса дејир: «Кифајәтдир». Габагда ҝөрәҹәјик ки, јанларында гылынҹ олмасындан истифадә едәрәк Иса онлара даһа бир мүһүм ибрәт дәрси верир. Матта 26:31—35; Марк 14:27—31; Лука 22:24—38; Јәһја 13:31—38; Вәһј 14:1—3.

▪ Һәвариләрин мүбаһисәси нәјә ҝөрә гәрибәдир?

▪ Иса бу мүбаһисәни неҹә јолуна гојур?

▪ Исанын шаҝирдләри илә бағладығы әһд сајәсиндә нә мүмкүн олур?

▪ Иса һансы јени әмри верир вә бу әмр нә дәрәҹәдә ваҹибдир?

▪ Петер өзүнә архајын олдуғуну неҹә ҝөстәрир вә Иса она нә дејир?

▪ Нәјә ҝөрә Иса һәвариләринә инди кисә вә һејбә ҝөтүрмәји тапшырыр?