Бүтүн бунлар нә демәкдир?

ИСА МӘСИҺ демишдир ки, “дөврүн [“системин”, ЈД] сону” мүһарибәләр, гида чатышмазлығы, епидемијалар вә зәлзәләләрлә әламәтдар олаҹагдыр (Матта 24:1-8; Лука 21:10, 11).

1914-ҹү илдән е’тибарән халглар вә ја етник груплар арасында апарылан мүһарибәләрдә инсанлар һәлак олур. Чох вахт бу ҹүр мүһарибәләр сијасәтә гарышан дин рәһбәрләри тәрәфиндән гызышдырылыр. Үстәлик, инсанларын өлүмүнә сон вахтлар ҝениш јајылмыш терроризм дә сәбәб олур.

Елми наилијјәтләрин әлдә едилмәсинә бахмајараг, бүтүн дүнјада јүз милјонларла инсанлар гида чатышмазлығындан әзијјәт чәкир. Һәр ил милјонларла инсанлар аҹындан өлүр.

Исанын тәсвир етдији әламәтә һәр јердә ҝениш јајылмыш епидемијалар да дахилдир. Биринҹи Дүнја мүһарибәсиндән сонра башланан грип епидемијасы 21 000 000-дан чох инсанын өлүмүнә баис олмушдур. Кечмиш әсрләрдә јолухуҹу хәстәликләр нисбәтән аз әразиләрә јајылса да, бу епидемија бүтүн халглары әһатә етмиш, һәтта узаг адалары белә јан кечмәмишдир. Һал-һазырда бүтүн дүнјада ГИЧС хәстәлији јајылыб, инкишаф едән өлкәләрдә исә инсанлар вәрәм, Шагас хәстәлији вә малјарија кими хәстәликләрдән әзијјәт чәкмәјә давам едирләр.

Верилән мә’луматлара ҝөрә һәр ил мүхтәлиф ҝүҹә малик олан он минләрлә зәлзәләләр баш верир. Мүасир аваданлыгларын олмасына вә прогнозлашдырма үсулларынын тәкмилләшдирилмәсинә бахмајараг, чох вахт хәбәрләрдә зәлзәләнин һансыса бөјүк јашајыш мәнтәгәсинә ҝүҹлү зәрәр вурдуғу һагда хәбәр верилир.

Бундан әлавә, Мүгәддәс Китабда габагҹадан хәбәр верилмишдир: “Буну бил ки, ахыр ҝүнләрдә чәтин анлар ҝәләҹәкдир. Чүнки инсанлар худбин, пулпәрәст, ловға, тәкәббүрлү, күфр данышан, валидејнләринә итаәт етмәјән, нанкор, гүдсијјәтдән мәһрум, шәфгәтсиз, барышмаз, бөһтанчы, нәфсини сахламајан, азғын, рәһмсиз, јахшылығын дүшмәни, хаин, еһтијатсыз, мәғрур олаҹаг, зөвгү Аллаһдан чох севәҹәк. Аллаһ јолунда имиш кими ҝөрүнәҹәк, амма о јолун гүдрәтини инкар едәҹәкләр. Бу ҹүр адамлардан үз дөндәр” (2 Тимотејә 3:1-5).

Мәҝәр сән олдугҹа “чәтин анлар”да јашадығымызла разы дејилсәнми?

Диггәт јетирмисәнми ки, адамлар бу ҝүн хүсусилә худбин, пулпәрәст вә ловға олмушлар?

Бу ҝүн һәр јанда башгаларына гаршы тәләбкар, лакин нанкор, барышмаз вә хаин адамлара тәсадүф олундуғуну ким инкар едәр?

Валидејнләрә итаәтсизликлә јанашы, мисли ҝөрүнмәмиш шәфгәтсизлијин тәкҹә бә’зи јерләрдә дејил, бүтүн јер үзүндә јајылдығы ашкар дејилми?

Шүбһәсиз ки, сән зөвг алмаға ҹан атан вә хејирхаһлығы севмәјән бир дүнјада јашадығымызы ајдын шәкилдә ҝөрүрсән. Мүгәддәс Китаб “ахыр ҝүнләрдә” үстүнлүк тәшкил едәҹәк әһвал-руһијјәни бу ҹүр тәсвир едир.

Һансы зәманәдә јашадығымызы баша дүшмәјә көмәк едән әлавә сүбутлара еһтијаҹ вармы? Иса һәмчинин габагҹадан демишдир ки, бу бәдбәхтликләрин баш верәҹәји мүддәтдә Аллаһын Падшаһлығы һаггындакы хош хәбәр бүтүн дүнјада тәблиғ олунаҹагдыр (Матта 24:14). Бу сөзләр јеринә јетирми?

Јеһованын Падшаһлығыны е’лан едән вә Мүгәддәс Китаба әсасланан “Ҝөзәтчи Гүлләси” журналы бүтүн дөври нәшрләрдән даһа чох дилләрдә дәрҹ олунур.

Јеһованын Шаһидләри башгаларына Аллаһын Падшаһлығы һаггында шәхсән шәһадәт етмәк үчүн һәр ил бир милјарддан чох саат сәрф едирләр.

Мүгәддәс Китабы изаһ едән әдәбијјат һал-һазырда Јеһованын Шаһидләри тәрәфиндән тәхминән 400 дилдә нәшр олунур. Бураја һәтта уҹгар јерләрдә јашајан вә сајҹа азлыг тәшкил едән халгларын вә групларын дилләри дә аиддир. Јеһованын Шаһидләри хош хәбәри бүтүн халглара чатдырырлар; онлар һәмчинин сијаси бахымдан кичик олан вә һеч бир әһәмијјәт дашымајан бир чох адаларда вә әразиләрдә дә тәблиғ едирләр. Өлкәләрин чохунда онлар Мүгәддәс Китабын тә’лим програмыны һәјата кечирирләр.

Доғрудан да, Аллаһын Падшаһлығы һаггындакы хош хәбәр бүтүн дүнјада бәјан едилир вә мәгсәд бу дүнјаны һәгиги имана ҝәтирмәк јох, шәһадәт етмәкдир. Дүнјанын һәр јериндә инсанлара јери вә ҝөјү Јараданын онлар үчүн нә дәрәҹәдә гијмәтли олдуғуну, һәмчинин Онун ганунларына һөрмәт вә өз јахынларына мәһәббәт тәзаһүр етдирмәк имканы верилир (Лука 10:25-27; Вәһј 4:11).

Тезликлә Аллаһын Падшаһлығы Јер үзүнү бүтүн пис адамлардан тәмизләјәҹәк вә Ҹәннәтә чевирәҹәкдир (Лука 23:43).

[6-ҹы сәһифәдә олан чәрчивә]

Нәјин ахыр ҝүнләри?

Бу, бәшәријјәтин ахыр ҝүнләри демәк дејил. Мүгәддәс Китаба ҝөрә, Аллаһын ирадәсини јеринә јетирәнләри әбәди һәјат ҝөзләјир (Јәһја 3:16, 36; 1 Јәһја 2:17).

Бу, Јер күрәсинин ахыр ҝүнләри демәк дејил. Аллаһын Кәламы вә’д едир ки, үзәриндә әһали мәскунлашмыш Јер күрәси әбәдијјән мөвҹуд олаҹаг (Мәзмур 37:29; 104:5; Ишаја 45:18).

Ахыр ҝүнләр — зоракылыгла долу олан, һәмчинин мәһәббәтин олмадығы буҝүнкү дүнјаја вә онун нормаларына ујғун јашајан адамлар үчүн ҝәлиб (Сүлејманын мәсәлләри 2:21, 22).

[7-ҹи сәһифәдә олан чәрчивә]

Мүгәддәс Китаб һәгигәтәнми Аллаһын Кәламыдыр?

Мүгәддәс Китабы јазан пејғәмбәрләр дәфәләрлә “Јеһова белә дејир” (ЈД) сөзләрини јазмышлар (Ишаја 43:14; Јеремја 2:2). Һәтта Аллаһын Оғлу Иса Мәсиһ вурғуламышдыр ки, ‘сөјләдији сөзләри Өзүндән сөјләмир’ (Јәһја 14:10). Мүгәддәс Китабда ајдын шәкилдә дејилир ки, “һәр Мүгәддәс Јазы Аллаһдан илһам алмыш”дыр (2 Тимотејә 3:16).

Башга һеч бир китаб бу гәдәр чох дилләрдә нәшр олунмајыб. Бирләшмиш Мүгәддәс Китаб Ҹәмијјәтләринин һесабламасына ҝөрә бу сај 2 200-дән артыгдыр. Һеч бир китаб бу гәдәр бөјүк тиражла нәшр олунмур. Һал-һазырда онун сајы дөрд милјард нүсхәдән артыгдыр. Аллаһын бу китабда бүтүн бәшәријјәт үчүн ҝөндәрдији хәбәрдән буну ҝөзләмәли дејиликми?

Мүгәддәс Китабын Аллаһдан илһам алдығына даир сүбутларын даһа әтрафлы мүзакирәсини Јеһованын Шаһидләринин дәрҹ етдији “Мүгәддәс Китаб — Аллаһын Кәламыдыр, јохса инсанын?” адлы китабда тапа биләрсиниз.

Әҝәр сән Мүгәддәс Китабын Аллаһын Кәламы олдуғуну там ајдын дәрк едирсәнсә, ону охумаг сәнә даһа чох фајда ҝәтирәҹәк.

[8-ҹи сәһифәдә олан чәрчивә вә шәкилләр]

Аллаһын Падшаһлығы нәдир?

О ҝөјдә јерләшән бир һөкумәтдир. Онун васитәсилә јери вә ҝөјү Јарадан һәгиги Аллаһ Јеһова Өз һакимијјәтини иҹра едир (Јеремја 10:10, 12).

Мүгәддәс Китабда ҝөстәрилир ки, Аллаһын һакимијјәт вердији шәхс Иса Мәсиһдир (Вәһј 11:15). Иса јер үзүндә оланда ҝөстәрмишдир ки, Аллаһын она вердији бөјүк һакимијјәтә маликдир. Бу һакимијјәт она тәбиәт һадисәләрини идарә етмәјә, бүтүн хәстәликләрә шәфа вермәјә вә һәтта өлүләри белә дирилтмәјә имкан верирди (Матта 9:2-8; Марк 4:37-41; Јәһја 11:11-44). Аллаһ тәрәфиндән илһам алмыш Мүгәддәс Китаб пејғәмбәрлијиндә һәм дә дејилир ки, Аллаһ ‘бүтүн халглар, милләтләр вә дилләр она гуллуг етсинләр дејә, она һөкмранлыг вә иззәт вә падшаһлыг верәҹәк’ (Даниел 7:13, 14). Бу һөкумәт, һәмчинин ҝөјләр Падшаһлығы адланыр; һал-һазырда Иса Мәсиһ ҝөјдән һөкмранлыг едир.

[7-ҹи сәһифәдә олан шәкилләр]

Хош хәбәрин үмумдүнја тәблиғи.