Ибадәт Нәдир?

Ибадәт сөзүнү «аллаһа ҝөстәрилән еһтирам вә мәһәббәт кими изаһ етмәк олар». Мүгәддәс Китабда орижинал дилдән «ибадәт» кими тәрҹүмә олунан сөзләр хилгәтә дәрин еһтирам вә итаәткарлыг ҝөстәрмәк мәналарыны да верә биләр (Мәт. 28:9). Бу сөзләр һәмчинин Аллаһ үчүн, јахуд һансыса илаһ үчүн иҹра олунан дини ајини тәсвир едир (Јәһ. 4:23, 24). Бу сөзләрин мүәјјән ајәдә һансы мәна дашыдығыны контекстә әсасән мүәјјән етмәк олар.

Јалныз Јарадан вә Каинатын Һөкмдары Јеһова там сәдагәтә лајигдир (Вәһј 4:10, 11). Јеһоваја ибадәт етмәк Онун һакимијјәтинә һөрмәт етмәк вә адыны шәрәфләндирмәк демәкдир (Зәб. 86:9; Мәт. 6:9, 10). Бу ики мөвзу — Јеһованын һакимијјәти вә ады «Һизгијал» китабында хүсуси шәкилдә габарыр. Тәкҹә бу китабда «Күлли-Ихтијар Јеһова» ифадәсинә 217 дәфә, «биләҹәксиниз ки, Мән Јеһовајам», јахуд «биләҹәкләр ки, Мән Јеһовајам» ифадәләринә 55 дәфә раст ҝәлинир (Һизг. 2:4; 6:7).

Лакин ибадәт тәкҹә һиссләри әһатә етмир, әсл ибадәтә әмәлләр дә дахилдир (Јаг. 2:26). Инсан өзүнү Јеһоваја һәср едәндә сөз верир ки, һәјатын һәр саһәсиндә Она бир Һөкмдар кими табе олаҹаг вә адына дәрин еһтирам бәсләјәҹәк. Јадыныздадырса, Иса үчүнҹү сынаг вахты Шејтана вердији ҹавабда ибадәти Аллаһа гуллуг етмәклә әлагәләндирмишди (Мәт. 4:10). Јеһоваја ибадәт едән бизләр үчүн Она гуллуг вә ја хидмәт етмәк бөјүк шәрәфдирa (Ган. 10:12). Биз ибадәтимизлә билаваситә бағлы олан вә фәдакарлыг тәләб едән ишләрдә иштирак етмәклә Аллаһымыза хидмәт едирик. Ҝәлин ҝөрәк сөһбәт һансы ишләрдән ҝедир.

Хидмәтин мүхтәлиф нөвләри вар вә онларын һәр бири Јеһова үчүн дәјәрлидир. Биз инсанлара шәһадәт верәндә, ибадәт евиндә кечирилән ҝөрүшләрдә иштирак едәндә, ибадәт јерләринә гуллуг ҝөстәрәндә вә онларын тикинтисиндә иштирак едәндә Аллаһа хидмәт етмиш олуруг. Бундан әлавә аиләви ибадәтдә иштирак етмәк, еһтијаҹ ичиндә олан диндашларымыза јардым ҝөстәрмәк, топлантыларда көнүллү кими чалышмаг, Бејтелдә хидмәт етмәк дә бизим Аллаһа хидмәтимиздир (Ибр. 13:16; Јаг. 1:27). Пак ибадәт ағлымызда вә үрәјимиздә ән әсас јери тутса, ҝеҹә-ҝүндүз Аллаһа гуллуг едәҹәјик. Аллаһымыз Јеһоваја ибадәт етмәк бизи бәхтијар едир! (Вәһј 7:15).