Исаны тәглид ет. Аллаһа Онун истәдији кими ибадәт ет
Аллаһ «һәр милләтдән, бүтүн гәбиләләрдән, халглардан вә дилләрдән олан» инсанлары Она хидмәт етмәјә мәһәббәтлә дәвәт едир (Вәһј 7:9, 10; 15:3, 4). Бу дәвәти гәбул едәнләр ‘Рәббин ҹамалыны’ ҝөрә биләрләр (Мәз. 27:4; 90:17). Онлар мәзмурчу кими уҹа сәслә Аллаһа һәмд едәрәк дејирләр: «Ҝәлин Она сәҹдә едәк, әјиләк, бизи јарадан Рәббин һүзурунда диз чөкәк» (Мәз. 95:6).
Јеһованын јүксәк гијмәтләндирдији ибадәт
Аллаһын ваһид Оғлу Исанын өз Атасынын дүшүнҹәсини, принсипләрини вә нормаларыны өјрәнмәк үчүн ҝениш имканлары варды. Буна ҝөрә дә, Иса башгаларыны һәгиги ибадәтә әминликлә јөнәлдә биләрди. О демишди: «Јол, һәгигәт вә һәјат Мәнәм; Мәним васитәчилијим олмаса, Атанын јанына һеч ким ҝәлә билмәз» (Јәһ. 1:14; 14:6).
Иса Атасына һәлимликлә табе олмагда мүкәммәл нүмунә гојмушду. О демишди: «Өзүмдән бир шеј етмирәм, амма бунлары Атанын Мәнә өјрәтдији кими сөјләјирәм». Сонра әлавә етмишди: «Мән даим Онун хошуна ҝәлән ишләри ҝөрүрәм» (Јәһ. 8:28, 29). Исанын һансы әмәлләри Атасынын хошуна ҝәлирди?
Илк нөвбәдә Иса Атасына там садиг иди вә Аллаһа ибадәт етмәјин әсас мәғзи елә бундан ибарәтдир. Иса Атасына олан садиглијини, чох гурбанлар тәләб етсә белә, Она табе олмагла, ирадәсини јеринә јетирмәклә ҝөстәрмишди (Филип. 2:7, 8). Исанын ибадәтинин ваҹиб һиссәсиндән бири мүнтәзәм олараг шаҝирд һазырламаг ишиндә иштирак етмәк иди вә буна ҝөрә дә ону һәм өз давамчылары, һәм дә она иман ҝәтирмәјәнләр Мүәллим адландырырдылар (Мат. 22:23, 24; Јәһ. 3:2). Үстәлик, Иса башгаларына көмәк етмәк үчүн чох вахт вә ҝүҹ сәрф етмишди. Фәдакар олдуғуна ҝөрә онун өзүнә вахты галмырды, амма башгаларына хидмәт етмәк она севинҹ ҝәтирирди (Мат. 14:13, 14; 20:28). Чох мәшғул олмасына бахмајараг, Иса өз сәмави Атасы илә дуада сөһбәт етмәк үчүн һәмишә вахт ајырырды (Лука 6:12). Шүбһә јохдур ки, Аллаһ Исанын ибадәтини јүксәк гијмәтләндирирди.
Аллаһа мәгбул олмаг үчүн сәј ҝөстәрмәлијик
Јеһова Өз Оғлунун давранышына фикир вермиш вә ондан мәмнун олдуғуну сөјләмишди (Мат. 17:5). Исанын садиглији Шејтан Иблисин дә нәзәриндән јајынмады. Буна ҝөрә дә, о, Шејтанын әсас һәдәфинә чеврилди. Нә үчүн? Чүнки һәлә һеч бир инсан Аллаһа Онун истәдији вә лајиг олдуғу кими ибадәт едәрәк там итаәткарлыг ҝөстәрмәмишди. Иблис истәјирди ки, Исаны јалныз Јеһоваја мәхсус олан ибадәтдән узаглашдырсын (Вәһј 4:11).
Исаны јолдан чыхармаға ҹәһд ҝөстәрәрәк, Шејтан ширникдириҹи тәклифлә она јахынлашды. О, Исаны «чох јүксәк бир дағын зирвәсинә ҝәтирди вә Она дүнјанын бүтүн өлкәләрини вә онларын шан-шөһрәтини ҝөстәрди». Сонра деди: «Әҝәр јыхылыб мәнә сәҹдә етсән, бүтүн бу шејләри Сәнә верәрәм». Иса неҹә ҹаваб верди? О деди: «Рәдд ол, шејтан! Чүнки јазылмышдыр: “Аллаһын олан Рәббә сәҹдә гыл вә јалныз Она гуллуг ет”» (Мат. 4:8-10). Бәли, Иса дәрк едирди ки, Шејтанын тәклифләри нә гәдәр хејирли ҝөрүнсә дә, она баш әјмәк бүтпәрәстлик оларды. О, Јеһовадан башга бир кимсәјә бир дәфә олсун белә, сәҹдә етмәк фикриндә дејилди.
Бизә ҝәлдикдә исә, Шејтан она ибадәт едәк дејә дүнјанын бүтүн өлкәләрини вә онларын шан-шөһрәтини тәклиф етмәјә дә биләр. Амма һәлә дә сәмими мәсиһчиләрин Аллаһа ибадәтини позмаға чалышмагдадыр. Иблис истәјир ки, биз кимәсә, јахуд нәјәсә ибадәт едәк (2 Кор. 4:4).
Мәсиһ Иса һәјатынын сонунадәк Аллаһа садиг галды. Јеһованын гаршысында нөгсансызлығыны горујараг, Ону һеч бир инсанын етмәдији тәрздә иззәтләндирди. Һәгиги мәсиһчиләр олан бизләр Јараданымыза ибадәти һәр шејдән үстүн тутараг Исанын садиг һәјат јолуну изләмәјә чалышырыг. Һәгигәтән дә, Аллаһла јахшы мүнасибәтимиз малик олдуғумуз ән дәјәрли шејдир.
Аллаһа мәгбул ибадәтин ҝәтирдији хејир-дуалар
«Аллаһын јанында тәмиз вә ләкәсиз» ибадәт бир чох хејир-дуалар ҝәтирир (Јаг. 1:27). Биз ҝетдикҹә даһа чох инсанларын «худбин, пулпәрәст, ловға» вә «јахшылығын дүшмәни» олдуғу бир дөврдә јашајырыг (2 Тим. 3:1-5). Амма Аллаһын халгы арасында олан бизләр Аллаһа ибадәт етмәк үчүн Онун нормаларына риајәт етмәјә чалышан тәмиз вә әхлаглы инсанларла үнсијјәт етмәк шәрәфинә маликик. Мәҝәр бу, тәравәт мәнбәји дејилми?
Өзүмүзү бу дүнјадан ләкәсиз сахламагла даһа бир хејир-дуа алырыг — виҹданымыз тәмиз олур. Биз Аллаһын әдаләтли принсипләринә табе олараг вә Онун ганунларына зидд ҝетмәјән Гејсәрин ганунларына итаәт едәрәк виҹданымызы тәмиз сахламаг истәјирик (Марк 12:17; Һәв. иш. 5:27-29).
Аллаһа бүтүн үрәклә ибадәт етмәк башга хејир-дуалар да ҝәтирир. Фикримизи өзүмүзүн дејил, Аллаһын ирадәсини јеринә јетирмәјә јөнәлдәндә һәјатымыз мәналы вә мәмнунедиҹи олур. Биз «ҝәлин јејәк вә ичәк, чүнки сабаһ өләҹәјик» демирик, чүнки јерүзү Ҹәннәтдә әбәди јашамаға мөһкәм үмидимиз вар (1 Кор. 15:32).
«Вәһј» китабында јазылдығына ҝөрә, тезликлә елә бир вахт ҝәләҹәк ки, Јеһованын гаршысында тәмиз ады горујуб сахлајан инсанлар ‘бөјүк мәшәггәтдән чыхаҹаглар’. Орада дејилир ки, «тахтда Отуран... Өз чадырыны онларын үзәриндә гураҹагдыр» (Вәһј 7:13-15). Тахта отуран каинатда ән иззәтли Шәхс олан Јеһова Аллаһын Өзүдүр. Тәсәввүр ет: О, сәни Өз чадырына гонаг алыр вә гајғына галараг мүдафиә едир ки, сәнә һеч бир зәрәр дәјмәсин — бу неҹә дә севиндириҹи олаҹаг! Мүәјјән мәнада Аллаһ бу ҝүн дә бизи мүдафиә едир вә гајғымыза галыр.
Үстәлик, Аллаһа мәгбул шәкилдә ибадәт едәнләр барәдә онларын ‘һәјат суларынын гајнагларына апарылдығы’ дејилир. Бу тәравәтли гајнаглар әбәди һәјаты алмағымыз үчүн Јеһованын тәгдим етдији һәр бир шеји тәмсил едир. Бәли, Мәсиһин фидијә гурбанлығы сајәсиндә «Аллаһ онларын ҝөзләриндән һәр јашы силәҹәкдир» (Вәһј 7:17). Бәшәријјәт камиллијә апарылаҹаг, бу исә јер үзүндә әбәди јашамаг үмиди оланлара сөзлә тәсвир олунмаз севинҹ ҝәтирәҹәк. Һәтта бу ҝүн дә Аллаһын хошбәхт хидмәтчиләри севинҹдән нида едиб, ҝөјләрдә: «Еј Күлл-Ихтијар Рәбб Аллаһ! Сәнин әмәлләрин бөјүк вә харигуладәдир. Еј милләтләрин Һөкмдары! Сәнин јолларын доғру вә һәгигидир. Ја Рәбб! Ким Сәндән горхмајаҹаг вә Сәнин адыны иззәтләндирмәјәҹәкдир? Чүнки јалныз Сән мүгәддәссән. Бүтүн халглар ҝәләҹәк вә Сәнин өнүндә сәҹдә едәҹәкләр; чүнки Сәнин адил ишләрин изһар олунду», — дејә маһны охујан варлыгларла бирҝә Јеһоваја ибадәт едәрәк Она сәмими миннәтдарлыгларыны билдирирләр (Вәһј 15:3, 4).
[27-ҹи сәһифәдәки шәкил]
Шејтан она ибадәт етмәјимиз үчүн бизә нә тәклиф едир?