Гијмәтли мирасымыз: бу сәнин үчүн нә мә’на дашыјыр?
“Еј сизләр, Атамын мүбарәкләри, ҝәлин, дүнја јарандыгдан бәри сизин үчүн һазырланмыш олан Падшаһлығы мирас алын” (МАТТА 25:34, ӘҸ—93).
1. Инсанлар мирас олараг нә алырлар?
БҮТҮН инсанларын мирас алдыглары бир шеј вардыр. Биринә еһтијаҹсыз, башга биринә исә јохсуллуг ичиндә бир һәјат мирас галыбдыр. Бә’зән елә олур ки, бир нәсил, үзәриндә һисс етдикләри вә ја ешитдикләри илә әлагәдар бу вә ја диҝәр етник група гаршы ҝүҹлү нифрәт һиссини мирас олараг нөвбәти нәслә өтүрүр. Анҹаг бизим һамымызы үмуми бир шеј бирләшдирир. Һамымыз, илк инсан олан Адәмдән ҝүнаһы мирас алмышыг. Бу мирас нәтиҹәдә өлүмә ҝәтириб чыхарыр (Ваиз 9:2, 10; Ромалылара 5:12).
2, 3. Адәм илә Һәвванын нәсилләри Јеговадан һансы мирасы ала биләрдиләр вә нә үчүн онлар бу мирасы алмадылар?
2 Јегова, севән сәмави Ата кими, лап башланғыҹдан инсанлара тамам фәргли бир мирасы — Ҹәннәтдә камил әбәди һәјаты тәклиф едирди. Улу валидејнләримиз Адәмлә Һәвваја камил, ҝүнаһсыз башланғыҹ верилмишди. Јегова Аллаһ, Јер планетини бәшәријјәтә һәдијјә олараг верди (Мәзмур 115:16). Јегова, Әдән бағыны, Јерин ҝәләҹәкдә неҹә олаҹағына бир нүмунә вермишди; һәмчинин Аллаһ, улу валидејнләримизә чох ҝөзәл, мараглы иш тапшырмышды. Онлар дүнјаја өвлад ҝәтирмәли, Јер күрәси вә онун дәјишкән флора вә фаунасынын гејдинә галмалы, еләҹә дә бүтүн Јер күрәсини әһатә етсин дејә, Ҹәннәтин саһәсини ҝенишләндирмәли идиләр (Тәквин 1:28; 2:8, 9, 15). Бүтүн бу ишләрдә онларын нәсилләри дә иштирак едәҹәкди. Онлара неҹә дә ҝөзәл мирас чата биләрди!
3 Амма бүтүн бу не’мәтләри әлдә етмәк үчүн, Адәмлә Һәвва вә онларын нәсилләри, Аллаһла јахшы мүнасибәтдә олмалы идиләр. Јеговадан алдыглары бәхшишләрә ҝөрә, онлар Ону севмәјә вә Она итаәт етмәјә борҹлу идиләр, лакин Адәмлә Һәвва Аллаһын онлара вердикләрини гијмәтләндирмирдиләр вә нәтиҹәдә, Онун әмринә итаәт етмәдиләр. Илк инсанлар евләрини — Ҹәннәти вә Аллаһын онлара тәклиф етдији ҝөзәл ҝәләҹәји итирдиләр. Демәли, онлар бу шејләри өз нәсилләринә верә билмәздиләр (Тәквин 2:16,17; 3:1—24).
4. Адәмин мәһрум олдуғу мирасы биз неҹә ала биләрик?
4 Мәрһәмәт һиссиндән ирәли ҝәләрәк, Јегова гајғы ҝөстәрди ки, Адәмин мәһрум олдуғу мирасы, Адәмлә Һәвванын нәсилләринин алмаг имканлары олсун. Неҹә? Аллаһын тә’јин етдији вахтда Онун Оғлу Иса Мәсиһ, Адәмин нәсилләри уғрунда өз камил инсан һәјатыны гурбан верди. Беләликлә дә Мәсиһ онларын һамысыны сатын алды. Лакин онлар бу мирасы автоматик олараг алмырлар. Бунун үчүн онлар, Исанын ҝүнаһлары јујан гурбанлығынын гијмәтинә иман ҝәтирәрәк вә бу иманы итаәткарлыгла ифадә едәрәк, Аллаһын јанында јахшы ад газанмалыдырлар. (Јәһја 3:16, 36; 1 Тимотејә 2:5, 6; Ибраниләрә 2:9; 5:9). Сән өз һәјат тәрзинлә, Аллаһын бу һәдијјәсини гијмәтләндирдијини ҝөстәрирсәнми?
Ибраһимин васитәсилә верилән мирас
5. Ибраһим, Јегова илә мүнасибәтин онун үчүн гијмәтли олдуғуну неҹә ҝөстәрди?
5 Јегова, Јер үчүн олан нијјәтини һәјата кечирәрәк, Ибраһимлә хүсуси мүнасибәт јаратды. Аллаһ бу садиг инсана, өз доғма мәмләкәтини тәрк етмәсини вә Онун ҝөстәрәҹәји дијара ҝетмәсини тапшырды. Ибраһим һазырлыгла итаәт етди. Ибраһим ораја ҝәлдикдә, Јегова деди ки, бу дијары Ибраһим јох, онун нәсилләри мирас алаҹаглар (Тәквин 12:1, 2, 7). Ибраһим бу хәбәрә неҹә мүнасибәт ҝөстәрди? Нәсилләри мирас алсынлар дејә, Ибраһим Јеговаја, онун тапшыраҹағы јердә вә онун ҝөстәрәҹәји тәрздә хидмәт етмәјә һазыр иди. О, 100 ил әрзиндә, өләнәҹән Јеговаја гүрбәт елдә хидмәт етди (Тәквин 12:4; 25:8—10). Бәс сән белә едә биләрдинми? Јегова Ибраһими өзүнүн “досту” адландырды (Јешаја 41:9).
6. а) Ибраһимин, оғлуну гурбан ҝәтирмәјә һазыр олмасы нәји ҝөстәрди? б) Ибраһим өз нәсилләринә һансы гијмәтли мирасы верә билди?
6 Ибраһим, нәвазишлә севдији оғлу Исһагы чох илләр ҝөзләмишди. Мә’лум олдуғу кими, оғлан артыг бөјүдүкдә, Јегова Ибраһимә бујурду ки, ону гурбан ҝәтирсин. Ибраһим,- Аллаһын өз Оғлуну фидијә олараг неҹә верәҹәјини пејғәмбәрлик васитәсилә ҝөстәрмәли олдуғуну билмәдән итаәт етди вә Исһагы гурбан ҝәтирмәк үзрә иди ки, Јегованын мәләји ону сахлады. (Тәквин 22:9—14). Бундан габаг, Јегова артыг сөјләмишди ки, Ибраһимә верилән вә’дләр Исһагын васитәсилә јеринә јетәҹәк. Демәли, әввәлләр буна бәнзәр һадисәләрин баш вермәдијинә бахмајараг, Ибраһим инанырды ки, лазым ҝәләрсә Јегова Исһагы һәјата гајтараҹаг (Тәквин 17:15—18; Ибраниләрә 11:17—19). Ибраһим, һәтта доғма оғлуну белә әсирҝәмәдији үчүн, Јегова деди: “Зүрријјәтиндә јерин бүтүн милләтләри хејир-дуа алаҹаглар” (Тәквин 22:15—18). Бу сөзләр ону ҝөстәрирди ки, Тәквин 3:15-дә хатырладылан Зүрријјәт, јә’ни хиласкар Мәсиһ, Ибраһимин нәслиндән ҝәләҹәкдир. Неҹә дә гијмәтли мирасдыр!
7. Ибраһим, Исһаг вә Јагуб алдыглары мираса ҝөрә миннәтдарлыгларыны неҹә билдирдиләр?
7 Јегованын о заман етдикләринин мә’насыны Ибраһим анламырды; буну, “ејни вә’дин һәмварисләри” олан онун оғлу Исһаг вә нәвәси Јагуб да анламырдылар. Лакин онларын һамысы Јеговаја е’тибар едирдиләр. Онлар һәмин мәмләкәтин шәһәрләриндән бириндә сакин олмадылар, чүнки онлар даһа јахшы шәһәри — “ме’мары вә баниси Аллаһ олан, мөһкәм тәмәлләрә малик шәһәри” ахтарырдылар (Ибраниләрә 11:8—10, 13—16). Анҹаг Ибраһимин бүтүн нәсли, онун васитәсилә алынмасы мүмкүн олан мирасын нә дәрәҹәдә гијмәтли олдуғуну дәрк етмирдиләр.
Онлар мирасларыны гијмәтләндирмирдиләр
8. Есав мирасынын нә дәрәҹәдә гијмәтли олдуғуну анламадығыны неҹә ҝөстәрди?
8 Исһагын бөјүк оғлу Есав илкинлик һүгугунун гәдрини билмирди. О, мүгәддәс оланы гијмәтләндирмирди. Бир дәфә Есав аҹ оларкән, өз илкинлик һаггыны гардашы Јагуба сатды. Нәјә? Чөрәјә вә мәрҹимәк шорбасына! (Тәквин 25:29—34; Ибраниләрә 12:14—17). Аллаһын Ибраһимә вердији вә’дләр, Јагубдан төрәнән халгын васитәсилә јеринә јетмәли иди; Аллаһ Јагубун адыны дәјишиб, Исраил адландырды. Бу мирас онларын гаршысында һансы имканлары јарадырды?
9. Јагубун вә ја Исраилин нәсли, руһани мираслары сајәсиндә нәдән вә неҹә азад олундулар?
9 Аҹлыг дөврү заманы, Јагуб вә онун аиләси Мисирә көчдү. Орада төрәјиб артдылар вә һәддиндән артыг чохалдылар, лакин ахырда онлары көлә етдиләр. Анҹаг Јегова Ибраһимлә бағладығы әһдини унутмады. Аллаһ мүәјјән етдији вахтда, Исраил оғулларыны көләликдән азад етди вә онлары, Ибраһимә вә’д етдији “сүд вә бал ахан дијара” апармаг нијјәтиндә олдуғуну билдирди (Чыхыш 3:7, 8; Тәквин 15:18—21).
10. Исраил оғулларынын мирасы илә әлагәдар, Сина дағынын әтәјиндә даһа һансы фөвгәл’адә һадисәләр баш верди?
10 Исраил оғуллары Вә’д едилән Дијара ҝедәркән, Јегова онлары Сина дағынын јахынлығында бир јерә топлады вә деди: “Әҝәр ҝерчәкдән сөзүмү динләјәҹәк вә әһдими тутаҹагсынызса, бүтүн халглар арасында мәнә мәхсус халг олаҹагсыныз, чүнки бүтүн дүнја мәнимдир; вә сиз мәнә каһинләр падшаһлығы вә мүгәддәс милләт олаҹагсыныз” (Чыхыш 19:5, 6). Халг көнүллү олараг вә јекдилликлә разылашдыгдан сонра, әввәлләр һеч бир халга вермәдији Ганунуну Јегова исраиллиләрә верди (Мәзмур 147:19, 20).
11. Исраил оғулларынын руһани мираслары өзүнә гијмәтли олан нәји дахил едирди?
11 Јени халг неҹә дә бөјүк руһани мираса малик иди! Онлар јеҝанә һәгиги Аллаһа ибадәт едирдиләр. Аллаһ онлары Мисирдән азад етди вә Сина дағында онлара Ганун вериләркән, һәјәҹан доғуран һадисәләрин шаһиди олдулар. “Аллаһын сөзләри”ни пејғәмбәрләрин васитәсилә динләмәјә давам едәндә, онларын мираслары даһа да артырды (Ромалылара 3:1, 2). Јегова онлары өзүнә шаһид сечди (Јешаја 43:10—12). Хиласкар Зүрријјәт бу халгдан чыхмалы иди. Һәмин Зүрријјәт һаггында, онун ким олаҹағыны мүәјјән етмәкдә вә она еһтијаҹлары олдугларыны анламагда исраиллиләрә көмәк едән Ганунда әввәлҹәдән дејилирди (Галатијалылара 3:19, 24). Бундан әлавә, онлар, Хиласкар Зүрријјәтлә бирликдә каһинләр падшаһлығы вә мүгәддәс халг кими хидмәт етмәк имканыны ала биләрдиләр (Ромалылара 9:4, 5).
12. Исраиллиләр Вә’д едилмиш Дијара дахил олсалар да, нәјә наил ола билмәдиләр? Нәјә ҝөрә?
12 Јегова, вә’д етдији кими, исраиллиләри һәгигәтән дә Вә’д едилән Дијара ҝәтирди. Амма, һәвари Павелин сонралар дедији кими, имансызлыгларына ҝөрә һәмин дијар онлар үчүн әсл “истираһәт” јери олмады. Онлар, бир халг кими, Аллаһын “истираһәтинә” наил ола билмәдиләр, чүнки Адәм вә Һәвванын јарадылмасындан сонра башланан Аллаһын истираһәт ҝүнүнүн мәгсәдини анламадылар вә бу мәгсәдә ујғун давранмырдылар (Ибраниләрә 4:3—10).
13. Өз руһани мирасыны гијмәтләндирмәдији үчүн, Исраил бир халг кими нәдән мәһрум олду?
13 Ҹисмани Исраилдән, Мәсиһин сәмави Падшаһлығында, каһинләр падшаһлығы вә мүгәддәс халг кими онунла бирликдә идарә едәҹәк шәхсләрин там сајы јығыла биләрди. Лакин исраиллиләр, дәјәрли мирасларыны гијмәтләндирмирдиләр. Мәсиһ ҝәлән заман, ҹисмани исраиллиләрин јалныз бир һиссәси ону гәбул етди. Нәтиҹәдә, габагҹадан хәбәр верилмиш каһинләр падшаһлығынын тәркибинә јалныз азсајлы шәхсләр дахил олдулар. Падшаһлыг ҹисмани Исраилдән алынмыш вә “онун [Падшаһлығын] мејвәләрини јетишдирәҹәк бир халга” верилмишдир (Матта 21:43). Бу һансы халгдыр?
Ҝөјләрдәки мирас
14, 15. а) Исанын өлүмүндән сонра, халглар Ибраһимин “зүрријјәти” васитәсилә неҹә хејир-дуа алмаға башладылар? б) “Аллаһын Исраили”нин үзвләри нәји мирас алырлар?
14 Падшаһлыг верилмиш халг “Аллаһын Исраили”дир, јә’ни Иса Мәсиһин руһдан доғулмуш 144 000 давамчысындан ибарәт олан руһани Исраилдир (Галатијалылара 6:16; Вәһј 5:9, 10; 14:1—3). Бу 144 000 арасында ҹисмани јәһудиләр дә варды, анҹаг чохлуғу башга халглардан олан инсанлар тәшкил едә биләрди. Бунунла да, Јегованын Ибраһимә вердији,- јер үзүнүн бүтүн халглары онун “зүрријјәти” васитәсилә хејир-дуа алаҹаглар — вә’ди, јеринә јетмәјә башлады (Һәвариләрин ишләри 3:25, 26; Галатијалылара 3:8, 9). Вә’дин илк дәфә јеринә јетирилмәсиндә, башга халглардан олан инсанлар мүгәддәс руһла мәсһ едилмиш вә Јегова Аллаһ тәрәфиндән руһани оғуллар, Иса Мәсиһин гардашлары тимсалында гәбул едилмишдиләр. Беләликлә, онлар да бу “зүрријјәтин” икинҹи дәрәҹәли үзвләри олдулар (Галатијалылара 3:28, 29).
15 Өлүмүндән бир аз габаг, Иса јени халгын јәһудиләрдән олан ҝәләҹәк үзвләри илә јени әһд бағлады; бу әһд Исанын өз ганы илә тәсдиг олунмалы иди. Әһди тәсдигләјән гурбана иман әсасында, бу әһдә гәбул олунанлар, “һәмишәлик камилләш”мәли идиләр (Ибраниләрә 10:14—18). Онлар “салеһ” е’лан олунар вә ҝүнаһларынын бағышланмасыны газана биләрдиләр (1 Коринфлиләрә 6:11,ӘҸ—93). Бу ҹәһәтдән, онлар, Адәм ҝүнаһ ишләтмәздән габаг олдуғу кими идиләр. Лакин онлар јерүзү ҹәннәтдә јашамајаҹаглар. Иса, онлара ҝөјләрдә јер һазырлајаҹағыны сөјләди (Јәһја 14:2, 3). Онлар јер үзүндәки ҝәләҹәкләриндән имтина едирләр ки, “ҝөјләрдә” өзләри “үчүн сахланылмыш... мираса чат”сынлар (1 Петер 1:4). Онлар ҝөјләрдә нә едирләр? Иса деди: “Мән... сизә бир сәлтәнәт тапшырырам” (Лука 22:29).
16. Мәсһ едилмиш мәсиһчиләри һансы ҝөзәл тапшырыг ҝөзләјир?
16 Мәсиһлә ҝөјләрдә идарә едәҹәк кәсләр, диҝәр шејләрлә јанашы, Јегованын һөкмранлығына гаршы галдырылан үсјанын бүтүн нәтиҹәләрини арадан галдырмаға көмәк едәҹәкләр (Вәһј 2:26, 27). Ибраһимин руһани зүрријјәтинин икинҹи дәрәҹәли үзвләри олараг, онлар бүтүн халглардан олан инсанлара камил һәјатын хејир-дуаларынын бәхш олунмасында иштирак едәҹәкләр (Ромалылара 8:17—21). Онлар неҹә дә гијмәтли мираса маликдирләр! (Ефеслиләрә 1:16—18).
17. Мәсһ едилмиш мәсиһчиләр, јердә оларкән, өз мирасларындан һансы мә’нада истифадә едирләр?
17 Анҹаг Исанын мәсһ едилмиш давамчылары мирасларыны јалныз ҝәләҹәкдә алмајаҹаглар. Иса, јеҝанә һәгиги Аллаһ олан Јегованы танымалары үчүн, онлара, башга бир кимсәнин едә билмәјәҹәји көмәклији ҝөстәрди (Матта 11:27; Јәһја 17:3, 26). Јеговаја “ҝүвәнмәјин” вә Она итаәт етмәјин нә демәк олдуғуну Иса онлара сөзү вә нүмунәси илә өјрәдирди (Ибраниләрә 2:13; 5:7—9). Иса, Аллаһын нијјәти һаггындакы һәгигәт билијини онлара һәвалә етди вә онлары әмин етди ки, Аллаһын ирадәсини даһа дәриндән анламагда мүгәддәс руһ онлара көмәк едәҹәк (Јәһја 14:24—26). Иса онлара көмәк етди ки, Аллаһын Падшаһлығынын ваҹиблијини, зеһинләри вә үрәкләри илә дәрк етсинләр (Матта 6:10, 33). Иса һәмчинин онлара шаһидлик етмәји вә Јерусәлимин, Јәһудејанын, Самаријанын вә дүнјанын ән узаг јерләринин сакинләриндән шаҝирдләр һазырламағы тапшырды (Матта 24:14; 28:19, 20; Һәвариләрин ишләри 1:8).
Бөјүк издиһам үчүн гијмәтли мирас
18. Ибраһимин “зүрријјәти” васитәсилә бүтүн халгларын хејир-дуа алаҹаглары барәдә Јегованын вә’ди бу ҝүн неҹә јеринә јетир?
18 Чох еһтимал ки, руһани Исраилин, јә’ни Падшаһлығын варисләри олан “кичик сүрү”нүн там сајы артыг топланыбдыр (Лука 12:32). Артыг нечә онилликләрдир ки, Јегова бүтүн халглардан олан башга инсанларын бөјүк издиһамынын јығылмасына диггәт јетирир. Бунунла да, Јегованын Ибраһимә вердији — бүтүн халгларын онун “зүрријјәти” васитәсилә хејир-дуа алаҹаглары — вә’ди, бөјүк мигјасда јеринә јетир. Хејир-дуаланмыш бу инсанлар, Јеговаја олан мүгәддәс хидмәти севинҹлә јеринә јетирир вә хиласларынын, Аллаһын Гузусу олан Иса Мәсиһә иман етмәкдән асылы олдуғуну е’тираф едирләр (Вәһј 7:9, 10). Сән, бу хошбәхт инсанларын дәстәсинә гошулмаға даир, Јегованын мәрһәмәтли дә’вәтини гәбул етмисәнми?
19. Бизим зәманәмиздә башга халглардан олан хејир-дуаланан инсанлар һансы мираса үмид едирләр?
19 Кичик сүрүјә мәнсуб олмајан кәсләрә Јегова һансы гијмәтли мирасы тәклиф едир? Јох, бу ҝөјләрдә олан мирас дејил. Бу,- вахты илә бүтүн Јер күрәсини әһатә едәҹәк ҹәннәтдә әбәди камил һәјат мирасыдыр, һансыны ки, Адәм өз нәсилләринә верә биләрди. Һәмин дүнјада “артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр” (Вәһј 21:4). Буна ҝөрә дә демәк олар ки, Аллаһын Кәламы бу јердә, мәһз сәнә мүраҹиәт едир: “РӘББӘ ҝүвән вә јахшылыг ет; мәмләкәтдә отур вә онун сәдагәти илә бәслән. РӘБДӘН дә ләззәт ал; О да сәнә үрәјинин диләкләрини верәҹәкдир. Бир аз ҝөзлә вә пис јох олаҹагдыр... Фәгәт һәлимләр дүнјаны мирас алаҹаглар вә әмин-аманлыг боллуғунда ләззәт тапаҹаглар. Салеһләр јери мирас алыр вә онда әбәдијјән јашајырлар” (Мәзмур 37:3, 4, 10, 11, 29).
20. Нәјә ҝөрә демәк олар ки, “башга гојунлар”, мәсһ едилмиш мәсиһчиләрин алдыглары мирасын хејли һиссәсинә маликдирләр?
20 Исанын “башга гојунларына” һазырладығы мирас, сәмави Падшаһлығын јер саһәсиндәдир (Јәһја 10:16 а). Онлар ҝөјә ҝетмәјәҹәкләринә бахмајараг, мәсһ едилмишләрин малик олдуглары руһани мирасын хејли һиссәси оналара чатыр. Аллаһын Кәламында олан гијмәтли вә’дләрин дәрк едилмәси, мәһз мәсһ едилмишләр групу, јә’ни “садиг вә ағыллы гул”ун васитәсилә башга гојунлара ачылыр (Матта 24:45—47; 25:34). Һәм мәсһ едилмишләр, һәм дә башга гојунлар јеҝанә һәгиги Аллаһ олан Јегованы таныјыр вә Она бирҝә ибадәт едирләр (Јәһја 17:20, 21). Онлар, Исанын ҝүнаһлары јујан гурбанлығы үчүн Аллаһа миннәтдарлыгларыны бирҝә билдирирләр. Онлар, бир Чобанын — Иса Мәсиһин рәһбәрлији алтында бир сүрү кими бәрабәр хидмәт едирләр (Јәһја 10:16б). Онларын һамысы мәһәббәтлә долу үмумдүнја гардашлығына мәнсубдурлар. Онлар Јегованын вә Онун Падшаһлығынын Шаһидләри олмаг шәрәфинә шәрикдирләр. Бәли, әҝәр сән Јегованын һәср вә вәфтиз олунмуш хидмәтчисисәнсә, онда бунларын һамысы сәнин руһани мирасына дахилдир.
21, 22. Бизләрдән һәр биримиз, руһани мирасымызы гијмәтләндирдијимизи неҹә ҝөстәрә биләрик?
21 Бу руһани мирас сәнин үчүн нә дәрәҹәдә гијмәтлидир? Сән бу мирасы, һәјатында Аллаһын ирадәсини јеринә јетирмәји ән ваҹиб иш сајаҹаг дәрәҹәдәми гијмәтләндирирсән? Әҝәр беләдирсә, онда сән Аллаһын Кәламынын вә Онун тәшкилатынын чағырышына ријаәт едәрәк мәсиһчи јығынҹагларынын бүтүн ҝөрүшләриндә мүнтәзәм олараг иштирак едирсәнми? (Ибраниләрә 10:24, 25). Сәнин үчүн бу мирас һеч бир чәтинлијә бахмадан, Аллаһа хидмәт етмәјә сәни тәшвиг едәҹәк дәрәҹәдәми гијмәтлидир? Бу мираса ҝөрә сәнин миннәтдарлығын о дәрәҹәдәми ҝүҹлүдүр ки, онун итирилмәсинә сәбәб олаҹаг јолла ҝетмәк сынағынын тә’сири алтына дүшмүрсән?
22 Ҝәлин Аллаһын бизә вердији руһани мирасы гијмәтләндирәк. Ҝәлин, даим диггәтимизи ҝәләҹәк Ҹәннәтә јөнәлдәрәк, Јегованын бизә бәхш етдији бүтүн руһани үстүнлүкләрдән там мә’нада истифадә едәк. Әҝәр һәгигәтән дә һәјатымыз Јегова илә мүнасибәтимизин әтрафында дөвр едирсә, бу, Аллаһын бизә вердији мирасы нә дәрәҹәдә гијмәтләндирмәјимизә инандырыҹы шәһадәтлик едир. Гој биз дә: “Еј Аллаһым, еј Падшаһ, сәни јүксәлдәрәм вә сәнин исмини әбәдијјән вә даима тәгдис едәрәм” дејәнләрин арасында олаг (Мәзмур 145:1).
Сиз неҹә изаһ едәрдиниз?
• Адәм Аллаһа садиг галсајды, бизә һансы мирасы верәрди?
• Ибраһимин нәсли онлара һәвалә олунмуш мирасла, неҹә давранды?
• Мәсиһин мәсһ едилмиш давамчыларынын мирасына нә дахилдир?
• Бөјүк издиһамын һансы мирасы вар вә онун үзвләри бу мирасы гијмәтләндирдикләрини неҹә ҝөстәрә биләрләр?
[28-ҹи сәһифәдәки шәкилләр]
Ибраһимин нәслинә гијмәтли мирас вә’д олунуб
[32-ҹи сәһифәдәки шәкилләр]
Сән өз руһани мирасыны гијмәтләндирирсәнми?