Чохлу мәһсул верин

“Чох мәһсул вермәнизлә... Мәним шаҝирдләрим олаҹагсыныз” (ЈӘҺЈА 15:8).

1. а) Һәвариләри илә сөһбәтиндә Иса шаҝирдләринә аид олан һансы тәләби хатырлатды? б) Өзүмүзә һансы суаллары вермәлијик?

ӨЛҮМҮНДӘН әввәлки ахшам Иса һәвариләри илә хејли сәмими сөһбәт едәрәк онлары руһландырды. Еһтимал ки, артыг ҝеҹә јарыдан кечмишди, лакин Иса әзиз достларына олан мәһәббәтиндән ирәли ҝәләрәк сөһбәтинә давам едир. Сөһбәт заманы о, даһа бир тәләби хатырладыр ки, онун шаҝирди олараг галмаг үчүн бу тәләбә риајәт етмәк лазымдыр. О дејир: “Атам чох мәһсул вермәнизлә иззәтләнир; беләликлә Мәним шаҝирдләрим олаҹагсыныз” (Јәһја 15:8). Онун шаҝирдләри үчүн олан бу тәләбә риајәт едирикми? ‘Чох мәһсул вермәк’ нә демәкдир? Буну билмәк үчүн ҝәлин һәмин ахшамкы сөһбәтә гајыдаг.

2. Иса өлүмүндән әввәлки ахшам мәһсул вермәк барәдә һансы мәсәли чәкди?

² Исанын мәһсул вермәк барәдә вердији мәсләһәт һәвариләринә чәкдији мәсәлин бир һиссәси иди. О деди: “Мән һәгиги Мејнәјәм, Атам да Бағбандыр. Мәндә олуб мејвә вермәјән һәр будағы О гопарыр; вә һәр мејвә верәни даһа чох версин дејә будајыб тәмизләјир. Сизә сөјләдијим сөз сајәсиндә, сиз артыг тәмизсиниз. Сиз Мәндә галын вә Мән сиздә. Будаг мејнәдә галмаса, өзлүјүндә мәһсул верә билмәдији кими, сиз дә беләҹә, Мәндә галмасаныз, мәһсул верә билмәзсиниз. Мән Мејнәјәм, сиз дә будагларсыныз. [...] Атам чох мәһсул вермәнизлә иззәтләнир; беләликлә Мәним шаҝирдләрим олаҹагсыныз. Атам Мәни севдији кими, Мән дә сизи севдим; Мәним мәһәббәтимдә галын. Мән Атамын әмрләрини јеринә јетириб Онун мәһәббәтиндә галырам. Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз” (Јәһја 15:1-10).

3. Мәһсул вермәк үчүн Мәсиһин давамчылары нә етмәлидирләр?

³ Бу мәсәлдә Јеһова — Бағбан, Иса — мејнә, Исанын мүраҹиәт етдији һәвариләр исә будаглардыр. Һәвариләр Исада ‘галмаға’ чалышсајдылар, мәһсул верәрдиләр. Иса бу ваҹиб бирлији горумағын үсулуну һәвариләринә изаһ етди: “Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз”. Һәвари Јәһја да сонрадан һәмиманлыларына буна бәнзәр сөзләр јазды: “[Мәсиһин] әмрләринә риајәт едәнләр Онда... јашајыр”a (1 Јәһја 2:24; 3:24). Беләликлә, Мәсиһин әмрләринә риајәт етмәклә онун давамчылары онда галырлар, бунун сајәсиндә исә мәһсул вермәк мүмкүндүр. Бәс биз һансы мәһсулу вермәлијик?

Бөјүмәк үчүн имканлар

4. Јеһованын мәһсул вермәјән һәр бир будағы ‘гопармасындан’ нә өјрәнирик?

⁴ Мејнә һаггындакы мәсәлдә Јеһова мәһсул вермәјән будаглары “гопарыр”. Бу нәји ҝөстәрир? Биринҹиси ону ҝөстәрир ки, шаҝирдләрин һамысы мәһсул вермәлидир. Икинҹиси исә, шәраитләри нә дәрәҹәдә мәһдуд олса да, буну етмәјә һәр бир шаҝирдин ҝүҹү чатар. Ахы севән Аллаһымыз Јеһова, ҝүҹү чатмадығына ҝөрә һансыса бир иши јеринә јетирмәјән шаҝирди “гопармаз”, јә’ни ондан үз дөндәрмәз (Мәзмур 103:14; Колослулара 3:23; 1 Јәһја 5:3).

5. а) Исанын чәкдији мәсәл даһа чох мәһсул верә биләҹәјимизи неҹә ҝөстәрир? б) Һансы ики ҹүр мәһсулу нәзәрдән кечирәҹәјик?

⁵ Исанын мејнә һаггында чәкдији мәсәл һәмчинин ҝөстәрир ки, бөјүмәјимиз үчүн, јә’ни мәсиһчи фәалијјәтини ҝенишләндирмәк үчүн шәраитимизин јол вердији гәдәр имканлар ахтармалыјыг. Исанын буна неҹә ишарә етдијинә диггәт јетирин: “Мәндә олуб мејвә вермәјән һәр будағы О гопарыр; вә һәр мејвә верәни даһа чох версин дејә будајыб тәмизләјир” (Јәһја 15:2). Мәсәлин сонунда Иса давамчыларыны “чох мәһсул” вермәјә тәшвиг едир (8-ҹи ајә). Бу өзүнә нәји дахил едир? Мәсиһин шаҝирдләри кими, биз һеч заман тәкәббүрлү олмалы дејилик (Вәһј 3:14, 15, 19). Бунун әвәзиндә даһа чох мәһсул вермәк үчүн имканлар ахтармалыјыг. Бәс һансы мәһсулу бол-бол вермәлијик? Бу, 1) “руһун сәмәрәси” вә 2) Падшаһлығын мәһсулудур (Галатијалылара 5:22, 23; Матта 24:14).

Мәсиһчи кејфијјәтләринин мәһсулу

6. Иса Мәсиһ руһун сәмәрәсинин биринҹи кејфијјәтинин ваҹиблијини неҹә вурғулады?

⁶ “Руһун сәмәрәси”ни тәшкил едән кејфијјәтләрин арасында биринҹи јердә мәһәббәт дурур. Аллаһын мүгәддәс руһу мәсиһчиләрдә мәһәббәт һасил едир, чүнки онлар Исанын мејнә һаггындакы мәсәли чәкмәздән бир аз әввәл вердији әмринә табе олурлар. О, һәвариләринә деди: “Сизә бир-биринизи севәсиниз дејә јени бир әмр верирәм” (Јәһја 13:34). Иса јердәки һәјатынын сон ҝеҹәсиндә һәвариләри илә сөһбәти заманы онлара бу кејфијјәти ҝөстәрмәјин ҝәрәклијини дәфәләрлә хатырлатды (Јәһја 14:15, 21, 23, 24; 15:12, 13, 17).

7. Һәвари Петер неҹә ҝөстәрди ки, мәһсул ҝәтирмәк Мәсиһә хас олан кејфијјәтләри тәзаһүр етдирмәклә бағлыдыр?

⁷ Һәмин ҝеҹә орада олан Петер анлады ки, Мәсиһин һәгиги шаҝирдләри мәһәббәтдә Исадан нүмунә ҝөтүрмәли, һәмчинин мәһәббәтлә әлагәли кејфијјәтләри тәзаһүр етдирмәлидирләр. Илләр кечдикдән сонра, Петер мәсиһчиләри нәфсә һаким олмаг, гардаш севҝиси вә мәһәббәт кими кејфијјәтләри инкишаф етдирмәјә тәшвиг едирди. Петер ону да вурғулады ки, белә давранмагла “фәалијјәтсиз вә сәмәрәсиз” галмајаҹағыг (2 Петер 1:5-8). Шәраитимиздән асылы олмајараг, руһун сәмәрәсини тәзаһүр етдирмәк игтидарындајыг. Ҝәлин, Мәсиһә хас олан мәһәббәт, јахшылыг, һәлимлик вә диҝәр кејфијјәтләри даһа чох тәзаһүр етдирмәјә чалышаг, чүнки “бу кими шејләрә гаршы ганун”, јахуд мәһдудијјәт јохдур (Галатијалылара 5:23). Беләликлә, ҝәлин “чох мәһсул” верәк.

Падшаһлығын мәһсулу

8. а) Руһун сәмәрәси илә Падшаһлығын мәһсулу арасында һансы әлагә мөвҹуддур? б) Һансы суал диггәтимизә лајигдир?

⁸ Рәнҝли вә ләззәтли мәһсул биткини бәзәјир. Лакин мәһсулун дәјәри илк нөвбәдә онун ҝөзәллији илә мүәјјән едилмир. Тәркибиндә тохумлар олан мәһсуллар биткинин артмасында ваҹиб рол ојнајыр. Ејни тәрздә, руһун сәмәрәсинин ојнадығы рол да јалныз мәсиһчи шәхсијјәтимизи бәзәмәклә мәһдудлашмыр. Онун тәркибини тәшкил едән мәһәббәт вә иман кими кејфијјәтләр бизи Аллаһын Кәламында јазылмыш Падшаһлыг һаггында хәбәрин тохумларыны јајмаға тәшвиг едир. Павелин бу ваҹиб әлагәјә неҹә ишарә етдијинә диггәт јетирәк. О деди: “Биз дә [руһун сәмәрәсинин һиссәси олан] иманы тәзаһүр етдирир вә она ҝөрә сөјләјирик” (2 Коринфлиләрә 4:13). Беләликлә, Павелин диҝәр мәктубунда изаһ етдији кими, биз “Аллаһа һәмд гурбаныны, јә’ни... додагларын бәһрәсини” тәгдим едирик, бу исә вермәли олдуғумуз мәһсулун икинҹисидир (Ибраниләрә 13:15). “Чох мәһсул” верәрәк Аллаһын Падшаһлығынын даһа сәмәрәли тәблиғчиләри олмаг имканымыз вармы?

9. Демәк олармы ки, мәһсул вермәк шаҝирдләр һазырламагдан ибарәтдир? Изаһ един.

⁹ Дүзҝүн ҹавабы тапмаг үчүн, әввәлҹә Падшаһлығын мәһсулуна нәјин дахил олдуғуну анламаг лазымдыр. Мәһсул вермәјин шаҝирдләр һазырламагдан ибарәт олдуғуну дүшүнмәк дүзҝүндүрмү? (Матта 28:19). Вермәли олдуғумуз мәһсул алтында, башлыҹа олараг, Јеһованын вәфтиз олунмуш хидмәтчиләри олмаг үчүн көмәк етдијимиз инсанлармы нәзәрдә тутулур? Хејр. Әкс тәгдирдә, илләрлә инсанларын Падшаһлыг һаггындакы хәбәрә е’тинасыз јанашдығы әразиләрдә тәблиғ едән әзиз баҹы-гардашларымыз үчүн вәзијјәт олдугҹа сарсыдыҹы оларды. Әҝәр вердијимиз Падшаһлығын мәһсулу анҹаг јени шаҝирдләри тәмсил етсәјди, онда һәмин чалышган Шаһидләр Исанын мәсәлиндәки мәһсул вермәјән будаглар оларды! Әлбәттә ки, бу белә дејил. Бәс онда хидмәтдә вердијимиз Падшаһлығын мәһсулу әслиндә нәдир?

Падшаһлыг тохуму сәпәрәк мәһсул веририк

10. Исанын әкинчи вә мүхтәлиф торпаг нөвләри һаггында чәкдији мәсәл, Падшаһлығын мәһсулунун нә олдуғуну, лакин һансы мә’наны дашымадығыны неҹә ҝөстәрир?

¹⁰ Исанын әкинчи вә мүхтәлиф торпаг нөвләри һаггында чәкдији мәсәлдә, даһа аз мәһсул верән әразиләрдә шаһидлик едән кәсләр үчүн тәсәлливериҹи ҹаваб вар. Иса, деди ки, тохум Аллаһын Кәламында олан Падшаһлыг һаггындакы хәбәри, торпаг исә инсанларын символик үрәкләрини тәмсил едир. Бә’зи тохумлар “јахшы торпаға дүшдү вә битиб... бәһрә верди” (Лука 8:8). Һансы бәһрәни? Буғданын саплағы бөјүјүб јетишдикдә, кичик саплаглар дејил, бәһрә шәклиндә јени тохумлар верир. Бунун кими дә, мәсиһчинин вердији мәһсул мүтләг јени шаҝирдләр дејил, Падшаһлығын јени тохумларыдыр.

11. Падшаһлығын мәһсулунун мә’насыны неҹә изаһ етмәк олар?

¹¹ Беләликлә, бу һалда мәһсул нә јени шаҝирдләри, нә дә ҝөзәл мәсиһчи кејфијјәтләрини нәзәрдә тутур. Сәпилән тохум Падшаһлыг һаггындакы кәлам олдуғу үчүн, мәһсул да онун кими чохлу тохумлар олмалыдыр. Бу һалда мәһсул вермәк Падшаһлыг һаггында данышмаг демәкдир (Матта 24:14). Шәраитимиздән асылы олмајараг, Падшаһлығын бу ҹүр мәһсулуну вермәк, јә’ни сәмави Падшаһлыг һаггында хош хәбәри бәјан етмәк игтидарындајыгмы? Шүбһәсиз ки, еләдир! Елә һәмин мәсәлдә Иса бунун сәбәбини изаһ едир.

Аллаһын иззәтләнмәси үчүн әлимиздән ҝәләни едирик

12. Мәсиһчиләрин һамысы Падшаһлығын мәһсулуну верә билирми? Изаһ един.

¹² Иса деди: “Бәрәкәтли торпаға сәпилмиш олан [тохумларын] бә’зиси јүз, бә’зиси алтмыш, бә’зиси отуз гат сәмәрә верәр” (Матта 13:23). Тарлаја сәпилән һәр тохумун нә гәдәр мәһсул верәҹәји шәраитдән асылыдыр. Буна бәнзәр шәкилдә, бизим дә хош хәбәрин тәблиғиндә нә гәдәр едә биләҹәјимиз шәраитимиздән асылыдыр вә Иса буну анладығыны ҝөстәрмишди. Киминсә даһа чох имканы вар, ким исә даһа сағлам вә даһа чох гүввәјә маликдир. Беләликлә, башгаларынын етдијиндән, ола билсин, даһа чох, јахуд даһа аз етсәк дә, әҝәр әлимиздән ҝәләни едириксә, Јеһова бундан мәмнун галыр (Галатијалылара 6:4). Һәтта гоҹалыг вә ја үзүҹү хәстәлик тәблиғ ишиндә иштиракымызы мәһдудлашдырса да, шәфгәтли Атамыз Јеһова, шүбһәсиз ки, бизи ‘чох мәһсул верәнләр’ сырасына дахил едир. Нә үчүн? Чүнки биз Она сидги-үрәкдән хидмәт едир вә ‘бүтүн варымызы’ веририкb (Марк 12:43, 44; Лука 10:27).

13. а) Падшаһлығын мәһсулуну вермәјә ‘ҝетмәјимизин’ башлыҹа сәбәби нәдәдир? б) Инсанларын е’тинасызлыг ҝөстәрдикләри јерләрдә мәһсул вермәкдә бизә нә көмәк едәр? (31-ҹи сәһифәдәки чәрчивәјә бахын.)

¹³ Падшаһлығын мәһсулуну вермәјимизин сәбәбләрини унутмуругса, баҹардығымыз гәдәр ‘ҝедиб мәһсул вермәк’ истәјинә саһиб олаҹағыг (Јәһја 15:16). Иса бу сәбәбләрдән ән башлыҹасыны хатырлатды: “Атам чох мәһсул вермәнизлә иззәтләнир” (Јәһја 15:8). Бәли, бизим тәблиғ фәалијјәтимиз Јеһованын адыны бүтүн инсанларын гаршысында иззәтләндирир (Мәзмур 109:30). Тәхминән 75 јашында олан Һонор адлы бир Шаһид гадын дејир: “Һәтта инсанлар е’тинасыз јанашсалар да, Уҹа Оланы тәмсил етмәк бөјүк шәрәфдир”. 1974-ҹү илдән бәри Аллаһа сә’јлә хидмәт едән Клаудиодан инсанларын е’тинасызлыг ҝөстәрмәсинә бахмајараг, тәблиғ етмәји нәјә ҝөрә давам етдирдијини сорушдугда, о ҹавабында, Исанын Јәһја 4:34 ајәсиндә јазылмыш сөзләрини ситат ҝәтирди: “Мәним јемәјим Мәни Ҝөндәрәнин ирадәсини јеритмәк вә Онун ишини тамамламагдыр”. Клаудио әлавә едир: “Иса кими мән дә, Падшаһлығын тәблиғчиси олмаг ишими јалныз башламаг дејил, һәмчинин тамамламаг истәјирәм” (Јәһја 17:4). Бүтүн дүнјада Јеһованын Шаһидләри бу сөзләрлә разыдырлар. (Сәһифә 31-дәки “Сәбрлә сәмәрә вермәк неҹә мүмкүндүр?” адлы чәрчивәјә бахын.)

Тәблиғ етмәк вә өјрәтмәк

14. а) Вәфтизчи Јәһјанын вә Иса Мәсиһин фәалијјәти һансы ики мәгсәдә хидмәт едирди? б) Бизим ҝүнләрдә мәсиһчи фәалијјәтини неҹә тәсвир едәрдиниз?

¹⁴ Мүждәләрә әсасән Падшаһлығын илк тәблиғчиси вәфтизчи Јәһја олмушдур (Матта 3:1, 2; Лука 3:18). Онун әсас мәгсәди ‘шәһадәт етмәк’ иди вә о, буну дәрин иман вә ‘бүтүн инсанларын иман едәҹәји’ үмиди илә едирди (Јәһја 1:6, 7). Доғрудан да, Јәһјанын тәблиғ етдији инсанларын бә’зиләри Мәсиһин шаҝирдләри олдулар (Јәһја 1:35-37). Беләликлә, Јәһја һәм тәблиғ едир, һәм дә шаҝирдләр һазырлајырды. Иса да һәм тәблиғчи, һәм дә мүәллим иди (Матта 4:23; 11:1). Буна ҝөрә дә, тәәҹҹүблү дејил ки, Иса давамчыларына јалныз Падшаһлыг һаггындакы хәбәри тәблиғ етмәји јох, һәм дә бу хәбәри гәбул едән инсанлара онун шаҝирди олмагда көмәк етмәји бујурмушду (Матта 28:19, 20). Бу ҝүн биз дә һәм тәблиғ едир, һәм дә өјрәдирик.

15. Ерамызын биринҹи әсриндә вә ҝүнүмүздә јашајан инсанларын тәблиғ фәалијјәтинә гаршы мүнасибәтләри арасында һансы охшарлыг вар?

¹⁵ Ерамызын биринҹи әсриндә Павелин тәблиғ вә тә’лимини ешидән инсанлардан “бә’зиләри инандылар, бә’зиләри дә инанмадылар” (Һәвариләрин ишләри 28:24). Бу ҝүн дә инсанлар һәмин мүнасибәти ҝөстәрирләр. Тәәссүфләр олсун ки, Падшаһлыг тохумунун чох һиссәси мәһсул вермәјән торпаға дүшүр. Лакин, јенә дә, Исанын дедији кими, бә’зи тохумлар јахшы торпаға дүшүр, көк атыр вә бөјүјүр. Мәсәлән, бүтүн дүнјада орта һесабла һәр ил һәфтәдә 5000-дән артыг инсан Мәсиһин һәгиги давамчысы олур! Бу јени шаҝирдләр, башгалары инанмадығы һалда дејиләнләрә “инандылар”. Онларын үрәкләри нәјин сајәсиндә Падшаһлыг һаггындакы хәбәрә һәссас олмушдур? Чох вахт Шаһидләрин ҝөстәрдикләри сәмими мараг ваҹиб рол ојнајыр, бу, әкилән тохуму сувармаға бәнзәјир (1 Коринфлиләрә 3:6). Бу саһәдә олан чох нүмунәләрдән ҹәми икисини нәзәрдән кечирәк.

Шәхси мараг ваҹиб рол ојнајыр

16, 17. Хидмәтдә раст ҝәлдијимиз инсанлара сәмими мараг ҝөстәрмәк нәјә ҝөрә ваҹибдир?

¹⁶ Белчикада јашајан Каролина адлы ҝәнҹ мәсиһчи баҹымыз бир дәфә јашлы гадына тәблиғ етди, лакин һәмин гадын Падшаһлыг һаггындакы хәбәрә мараг ҝөстәрмәди. Гадынын әлинин сарыглы олдуғуну ҝөрән Каролина вә онун јолдашы көмәкләрини тәклиф етдиләр, амма гадын е’тиразыны билдирди. Ики ҝүндән сонра һәмин Шаһидләр гадынын евинә ҝәлиб, онун өзүнү неҹә һисс етдијини хәбәр алдылар. Каролина дејир: “Бу өз тә’сирини ҝөстәрди. Гадын она шәхсән мараг ҝөстәрдијимизә ҝөрә һәддиндән артыг тәәҹҹүбләнди. О, бизи евинә дә’вәт етди вә биз Мүгәддәс Китабы өјрәнмәјә башладыг”.

¹⁷ Бирләшмиш Штатларда јашајан мәсиһчи Сенди дә тәблиғ етдији инсанлара сәмими мараг ҝөстәрир. О, јени доғулан ушаглар һаггында јерли гәзетләрдә е’ланлары тапыр, сонра һәмин валидејнләрин јанына “Мәним Мүгәддәс Китаб һекајәләри китабым”c нәшри илә ҝәлир. Адәтән ана көрпә илә евдә отурдуғу вә ону мәмнунијјәтлә гонаглара ҝөстәрдији үчүн, чох вахт јахшы сөһбәтләр башланыр. Сенди дејир: “Мән валидејнләрә көрпә илә оху васитәсилә әлагә јаратмағын нә гәдәр ваҹиб олдуғуну изаһ едирәм. Даһа сонра, мүасир ҹәмијјәтдә ушаглары тәрбијә етмәјин нә дәрәҹәдә чәтин олдуғу һагда данышырам”. Бу јахынларда белә бир ҝөрүшүн сајәсиндә бир гадын вә онун алты ушағы Јеһоваја хидмәт етмәјә башладылар. Тәшәббүс вә сәмими мараг ҝөстәрәрәк, биз дә хидмәт заманы белә бир севинҹи дада биләрик.

18. а) ‘Чох мәһсул вермәк’ тәләбини јеринә јетирмәјә нәјә ҝөрә һәр биримизин гүввәси чатар? б) Исанын шаҝирди олмаг үчүн Јәһјанын Мүждәсиндә хатырланан һансы үч тәләбә мүвафиг олмаға гәрарлысыныз?

¹⁸ ‘Чох мәһсул вермәк’ тәләбини јеринә јетирмәк гүввәсиндә олдуғумузу дәрк етмәк неҹә дә хошдур! Истәр ҝәнҹ, истәр јашлы, истәр сағлам, истәр зәиф олдуғумуздан вә инсанларын бизи јахшы динләмәләриндән, јахуд е’тинасыз јанашмаларындан асылы олмајараг, һәр биримиз чох мәһсул верә биләрик. Неҹә? Бу, руһун сәмәрәсини даһа чох тәзаһүр етдирмәклә вә Аллаһын Падшаһлығы һаггындакы хәбәри имканымыз дахилиндә даһа чох јајмагла мүмкүндүр. Ејни заманда биз Исанын ‘сөзүнә садиг галыр’ вә чалышырыг ки, ‘бир-биримизә гаршы мәһәббәтимиз’ олсун. Бәли, шаҝирдләр үчүн Јәһјанын Мүждәсиндә хатырланан бу үч тәләбә мүвафиг олмагла, һәгигәтән дә Мәсиһин шаҝирдләри олдуғумузу сүбут етмиш олуруг (Јәһја 8:31; 13:35).

[Һашијәләр]

Тәкрар үчүн суаллар

• Биз һансы мәһсулу бол-бол вермәлијик?

• Нәјә ҝөрә ‘чох мәһсул вермәк’ мәгсәди әлчатандыр?

• Исанын шаҝирди олмаг үчүн Јәһјанын Мүждәсиндән һансы үч ваҹиб тәләби нәзәрдән кечирдик?

[31-ҹи сәһифәдәки чәрчивә/шәкил]

Сәбрлә сәмәрә вермәк неҹә мүмкүндүр?

ИНСАНЛАРЫН әксәријјәтинин Падшаһлыг һаггындакы хәбәрә е’тинасыз јанашдығы јерләрдә сәдагәтлә тәблиғ етмәјә давам етмәкдә бизә нә көмәк едә биләр? Бә’зи практики мәсләһәтләрә бахаг.

“Исанын бизи тамамилә мүдафиә етдијини дәрк етмәк никбинлик руһу доғурур вә инсанларын ҝөстәрдикләри мүнасибәтдән асылы олмајараг, сәбрли олмаға көмәк едир” (Һарри, 72 јаш, вәфтиз олунма тарихи 1946-ҹы ил).

“Мәни һәмишә 2 Коринфлиләрә 2:17 ајәси руһландырыр. Орада дејилир ки, биз “Мәсиһә аид олан адамлар олараг, Аллаһын һүзурунда” олан хидмәтдә иштирак едирик. Мән хидмәтдә оларкән ики ән ҝөзәл достларым да мәнимләдир” (Клаудио, 43 јаш, вәфтиз олунма тарихи 1974-ҹү ил).

“Сөзүн ачығы, тәблиғ мәним үчүн асан дејил. Лакин мән Мәзмур 18:29 ајәсиндәки сөзләрин доғрулуғуна әмин олурам: “Аллаһымла дивар ашарам” (Ҹерард, 79 јаш, вәфтиз олунма тарихи 1955-ҹи ил).

“Хидмәт заманы Мүгәддәс Китабдан һеч олмаса бир ајә охујурамса, бу мәни севиндирир, чүнки бу о демәкдир ки, киминсә үрәји Мүгәддәс Китаб васитәсилә сынанды” (Елеанор, 26 јаш, вәфтиз олунма тарихи 1989-ҹу ил).

“Тәблиғ заманы һәмишә мүхтәлиф тәгдимәләрдән истифадә едирәм. Лакин бу тәгдимәләр о гәдәрдир ки, өмрүмүн галан илләриндә онларын һамысындан истифадә етмәјә вахт јетмәз” (Пол, 79 јаш, вәфтиз олунма тарихи 1940-ҹы ил).

“Мәнә гаршы ҝөстәрилән мәнфи мүнасибәти өзүмә аид етмирәм. Инсанларла данышараг вә онларын нөгтеји-нәзәрини динләјәрәк достлуг мүнасибәтини горумаға чалышырам” (Даниел, 75 јаш, вәфтиз олунма тарихи 1946-ҹы ил).

“Олур ки, јени вәфтиз олунанлар мәним тәблиғ фәалијјәтимин сајәсиндә Шаһид олдугларыны дејирләр. Сән демә, сонрадан ким исә онларла Мүгәддәс Китабы өјрәнмиш вә руһән бөјүмәкдә онлара көмәк ҝөстәрмишдир. Хидмәтимизин коллектив иш олдуғуну анламаг чох хошдур” (Ҹоан, 66 јаш, вәфтиз олунма тарихи 1954-ҹү ил).

Сәбрлә сәмәрә вермәкдә сәнә нә көмәк едир? (Лука 8:15).

[28-ҹи сәһифәдәки шәкилләр]

Руһун сәмәрәсини тәзаһүр етдирәрәк вә Падшаһлыг һаггындакы хәбәри тәблиғ едәрәк биз чох мәһсул веририк.

[32-ҹи сәһифәдәки шәкилләр]

Һәвариләринә: ‘Чох мәһсул верин’ дедикдә Иса нәји нәзәрдә тутурду?