“Јеһова һарададыр?” дејә сорушурсанмы?
“[Онлар] Мәндән узаглашдылар... вә демәдиләр... Рәбб [“Јеһова”, ЈД] һарададыр?” (ЈЕРЕМЈА 2:5, 6).
1. Инсанлары “Аллаһ һарададыр?” дејә сорушмаға вадар едән нәдир?
“АЛЛАҺ һарададыр?” Бу суалы чохлары верирләр. Бә’зиләри Јараданын һәгиги мә’нада һарада олдуғуну анламаға чалышыр. Диҝәрләри исә, бу суалы бөјүк фәлакәтләр баш вердикдән сонра, јахуд онлар өзләри ағыр чәтинликләрлә гаршылашдыгда вә Аллаһын бу ишләрә нә үчүн мүдахилә етмәдијини анламадыгда верирләр. Амма еләләри дә вар ки, бу суал онлары үмумијјәтлә марагландырмыр, чүнки Аллаһын мөвҹудлуғу барәдәки фикри тамамилә рәдд едирләр (Мәзмур 10:4).
2. Аллаһы ахтарыб тапанлар кимләрдир?
2 Бунунла белә, бир чох инсанлар Аллаһын мөвҹудлуғуна даир чохсајлы сүбутлара ҝөз јуммурлар (Мәзмур 19:1; 104:24). Дүздүр, онлардан бә’зиләри садәҹә Аллаһа инанмагла кифајәтләнирләр. Анҹаг бүтүн јер үзүндә милјонларла башга инсанлар һәгигәтә олан гызғын мәһәббәтдән ирәли ҝәләрәк һәгиги Аллаһы ахтарырлар. Онларын сә’јләри әбәс олмајаҹаг, чүнки Аллаһ “һеч биримиздән узаг дејил” (Һәвариләрин ишләри 17:26-28).
3. а) Аллаһын мәскәни һарадыр? б) Мүгәддәс Јазылара әсасән “Јеһова һарададыр?” суалы нә мә’на дашыјыр?
3 Јеһованы һәгигәтән тапан инсан дәрк едир ки, Аллаһ ҝөзлә ҝөрүнмәјән “руһдур” (Јәһја 4:24). Иса һәгиги Аллаһы “ҝөјләрдә олан Атам” (КМ) адландырмышдыр. Бу нә демәкдир? Бу о демәкдир ки, һәгиги мә’нада ҝөјләр јердән јүксәк олдуғу кими, сәмави Атамыз да бизим јашадығымыз дүнјадан јүксәк вә бизим үчүн әлчатмаз олан руһани тәбәгәдә јашајыр (Матта 12:50; Ишаја 63:15). Биз Аллаһы ади ҝөзләрлә ҝөрә билмәсәк дә, О өзүнү бизә таныдыр вә биз Онун нијјәтләри һаггында чох шеј өјрәнә билирик (Чыхыш 33:20; 34:6, 7). О, һәјатын мә’насыны анламаг истәјән сәмими инсанларын суалларына ҹаваб верир. Мәҹази мә’нада десәк, Аллаһ бизә Өзүнүн һарада олдуғуну, јә’ни мүхтәлиф һәјати мәсәләләрә даир нөгтеји-нәзәринин нәдән ибарәт олдуғуну мүәјјән етмәјә вә арзуларымызын Онун ирадәсинә мүвафиг олуб-олмадығыны јохламаға имкан верир. О истәјир ки, биз өз һәјатымыза даир суаллар верәк вә сә’јлә бу суаллара ҹаваб ахтармаға чалышаг. Гәдим исраиллиләр буну етмирдиләр вә Јеһова онлары Јеремја пејғәмбәрин васитәсилә мәзәммәт едирди. Онлар Аллаһын адыны билсәләр дә, “Јеһова һарададыр?” (ЈД) дејә сорушмурдулар (Јеремја 2:6). Јеһованын ирадәси онларын һәјатында ән ваҹиб јери тутмурду. Онлар Аллаһын рәһбәрлијини ахтармырдылар. Бәс сән — һәм ҹидди, һәм дә бир о гәдәр әһәмијјәтли олмајан гәрарлар гәбул едәркән, “Јеһова һарададыр?” дејә сорушурсанмы?
Аллаһы арајанлар
4. Давудун Јеһова илә мәсләһәтләшмәсиндән нә өјрәнирик?
4 Һәлә ҝәнҹ јашларында икән Јессе оғлу Давуд Јеһоваја ҝүҹлү иман инкишаф етдирмишди. Јеһова онун үчүн “јашајан Аллаһ” иди. Давуд Јеһованын неҹә мүдафиә етдијини шәхси тәҹрүбәсиндә өјрәнмишди. “Јеһованын исминә” (ЈД) иман вә мәһәббәтдән ирәли ҝәләрәк, Давуд тәпәдән дырнаға гәдәр силаһланмыш филистимли пәһләван Голјата гаршы чыхды вә ону өлдүрдү (1 Самуел 17:26, 34-51). Лакин галиб ҝәлдикдән сонра Давуд өзүнә архаланмады. О, бундан сонра етдији бүтүн ишләрдә Јеһованын она хејир-дуа верәҹәјини дүшүнмәди. Даһа сонра Давуд гәрарлар гәбул едәркән, һәмишә Јеһова илә мәсләһәтләширди (1 Самуел 23:2; 30:8; 2 Самуел 2:1; 5:19). О, дуа етмәјә давам едирди: “Ја Рәбб, јолларыны мәнә билдир; јолларыны мәнә өјрәт. Мәнә һәгигәтиндә јол ҝөстәр вә мәнә өјрәт; чүнки сән гуртулушумун Аллаһысан; бүтүн ҝүн сәни ҝөзләјирәм” (Мәзмур 25:4, 5). О, бизә неҹә дә ҝөзәл нүмунә вермишдир!
5, 6. Јеһошафат һәјатынын мүхтәлиф анларында Јеһованы неҹә арајырды?
5 Давудун нәслиндән олан бешинҹи падшаһ Јеһошафатын ҝүнләриндә, үч халг бирләшиб Јәһуда үзәринә мүһарибә етмәјә ҝәлдиләр. Өлкәнин тәһлүкә алтында олдуғуну ҝөрән Јеһошафат “Рәбби арамаға башлады” (2 Тарихләр 20:1-3). Јеһошафат Јеһованы бундан өнҹә дә ахтарырды. О, Исраилин дөнүк чыхмыш шимал падшаһлығынын гапылдығы Баала ибадәти рәдд етди вә Јеһованын јоллары илә јеримәји үстүн тутду (2 Тарихләр 17:3, 4). Вә будур, Јеһошафат чох чәтин вәзијјәтә дүшмүшдүр. Белә бир вәзијјәтдә о, Аллаһы неҹә арады?
6 Јеһошафат Јерусәлимдә топлашмыш јәһудиләрин гаршысында дуа едәрәк, Јеһованын јенилмәз гүдрәтини унутмадығыны ҝөстәрди. О, Јеһованын мүәјјән торпаглары исраиллиләрә вердијинә вә башга халглары орадан говдуғуна диггәт јетирәрәк, Аллаһын ирадәси илә дәриндән марагландығыны ҝөстәрди. Падшаһ, Јеһованын көмәјинә еһтијаҹ дујдуғуну е’тираф етди (2 Тарихләр 20:6-12). Бу заман Јеһова исраиллиләрин Ону тапмаларына јол вердими? Бәли, шүбһәсиз ки, верди. Јеһова левили Јаһазиел васитәсилә дәгиг ҝөстәришләр верди вә нөвбәти ҝүн Онун халгы гәләбә чалды (2 Тарихләр 20:14-28). Сән әмин ола биләрсәнми ки, рәһбәрлик алмаг үчүн Јеһоваја мүраҹиәт етсән, Јеһова, Ону тапмағына имкан верәҹәкдир?
7. Аллаһ кимләрин дуасыны ешидир?
7 Јеһова инсанларын кимлијинә бахмыр вә һәр милләтдән олан инсанлары дуада Ону ахтармаға дә’вәт едир (Мәзмур 65:2; Һәвариләрин ишләри 10:34, 35). Аллаһ, дуа едән кәсин үрәјиндә оланлары нәзәрә алыр. О, бизи әмин едир ки, салеһләрин дуасыны ешидир (Сүлејманын мәсәлләри 15:29). Јеһова әввәлләр Ону нәзәрә алмајан, инди исә һәлимликлә Онун рәһбәрлијини ахтаран инсанларын Ону тапмаларына имкан верир (Ишаја 65:1). Аллаһ, һәтта Онун ганунуну позуб, инди исә һәлимликлә төвбә едәнләрин дә дуаларыны ешидир (Мәзмур 32:5, 6; Һәвариләрин ишләри 3:19). Лакин әҝәр инсанын үрәји Аллаһа табе дејилсә, онун дуалары әбәс олаҹагдыр (Марк 7:6, 7). Бир нечә нүмунәни нәзәрдән кечирәк.
Дуа едиб, ҹаваб алмајанлар
8. Јеһова Саул падшаһын дуасына нә үчүн ҹаваб вермәди?
8 Самуел пејғәмбәр, Саул падшаһын итаәтсизлик етдијинә ҝөрә Аллаһ тәрәфиндән рәдд едилдијини она сөјләдикдә, Саул Јеһоваја сәҹдә етди (1 Самуел 15:30, 31). Лакин о, буну садәҹә олараг инсанларда тәәссүрат јаратмаг үчүн едирди. Саулун мәгсәди Јеһоваја итаәткар олмаг дејил, өз нүфузуну горумаг иди. Сонрадан, филистимлиләр Исраилә һүҹум едәндә, Саул Јеһова илә мәсләһәтләшмәк истәди. Лакин бу, садәҹә олараг рәсмијјәтчилик иди. Ҹаваб алмадыгда о, руһлары чағыран ҹадуҝәр гадына үз тутду, һәрчәнд ки, Јеһованын буну гадаған етдијини билирди (Тәснијә 18:10-12; 1 Самуел 28:6, 7). 1 Тарихләр 10:14 ајәсиндә Саул “Рәбб илә мәсләһәтләшмәди” дејә, нәтиҹә чыхарылыр. Нәјә ҝөрә? Она ҝөрә ки, онун дуалары имана әсасланмырды. Бу, үмумијјәтлә дуа етмәмәјә бәрабәр иди.
9. Тседекија Јеһовадан рәһбәрлик диләјәркән, һансы сәһвә јол верди?
9 Буна бәнзәр тәрздә, Јәһуди падшаһлығынын сону јахынлашан заман, инсанлар даһа чох дуа едир вә даһа тез-тез Јеһованын пејғәмбәрләринә мүраҹиәт едирдиләр. Ејни заманда онлар Јеһоваја ибадәти бүтпәрәстликлә гарышдырырдылар (Тсефанја 1:4-6). Онлар Јеһова илә рәсми олараг мәсләһәтләшсәләр дә, үрәкләри Онун ирадәсинә табе олмаға һазыр дејилди. Тседекија падшаһ Јеремјадан риҹа етди ки, онун адындан Аллаһла мәсләһәтләшсин. Јеһова артыг падшаһын неҹә давранмалы олдуғуна даир ҝөстәришләр вермишди. Лакин, имана малик олмадығындан вә инсанлардан горхдуғундан, падшаһ Јеһованын сәсинә гулаг асмады, Јеһова да онун хошуна ҝәләҹәк башга ҹаваб вермәди (Јеремја 21:1-12; 38:14-19).
10. Јоһанан Јеһованын рәһбәрлијини ахтараркән, һансы сәһвә јол верди вә биз бундан нә өјрәнирик?
10 Јерусәлим виран едилдикдән вә Бабил гошунлары әсир дүшмүш јәһудиләри ҝөтүрүб ҝетдикдән сонра, Јоһанан Јәһудејада галан азсајлы инсанлары Мисирә апармаг гәрарына ҝәлди. Онлар артыг ҝетмәјә һазырлашмышдылар, лакин ҝетмәздән әввәл Јеремја пејғәмбәрдән онлар үчүн Јеһоваја дуа етмәсини вә Ондан рәһбәрлик диләмәсини хаһиш етдиләр. Анҹаг истәдикләри ҹавабы алмадыгда, онлар Јеһованын сөзләрини рәдд едиб, һәр шеји өз билдикләри кими етдиләр (Јеремја 41:16-43:7). Сән бу һадисәләрдән, Јеһованы ахтараркән Ону тапмаг үчүн нә етмәк лазым ҝәлдијини ҝөрүрсәнми?
“Өјрәнмәјә чалышын”
11. Биз нә үчүн Ефеслиләрә 5:10 ајәсиндәки принсипи тәтбиг етмәлијик?
11 Исанын һәгиги давамчысы олмаг үчүн, садәҹә олараг һәср олунмамызы суда вәфтизлә символлашдырмаг, јығынҹаг ҝөрүшләринә ҝетмәк вә тәблиғ хидмәтиндә иштирак етмәк кифајәт дејил. Һәгиги ибадәт һәјатымызын бүтүн саһәләриндә әкс олунмалыдыр. Ҝүндәлик олараг бизи Аллаһа садиглик јолундан аздыра биләҹәк һәм нәзәрә чарпмајан, һәм дә ајдын ҝөрүнән негатив тә’сирләрә мә’руз галырыг. Биз онлара неҹә реаксија ҝөстәрәҹәјик? Һәвари Павел, Ефес шәһәриндәки садиг мәсиһчиләрә мүраҹиәт едәрәк, онлары тәшвиг едирди: “Рәббә нәјин мәгбул олдуғуну өјрәнмәјә чалышын” (Ефеслиләрә 5:10). Бу ҹүр давранышын мүдрик давраныш олдуғу, Мүгәддәс Китабда јазылмыш чохсајлы нүмунәләрдән ҝөрүнүр.
12. Јеһова Давудун әһд сандығыны Јерусәлимә көчүрмәк тәрзиндән нәјә ҝөрә разы галмады?
12 Әһд сандығы Исраилә гајтарылдыгдан вә узун илләр әрзиндә Кирјат-јеаримдә галдыгдан сонра, Давуд падшаһ ону Јерусәлимә ҝәтирмәк истәди. О, халгын рәисләри илә мәсләһәтләшди вә деди ки, “әҝәр сизә јахшы ҝөрүнүрсә вә бу иш Аллаһымыз Рәбдән исә”, сандыг ҝәтириләҹәкдир. Лакин о, бу мәсәләјә даир Јеһованын нөгтеји-нәзәрини өјрәнмәк үчүн, зәһмәт чәкиб лазыми ахтарышлар апармады. Әҝәр о, буну етсәјди, сандығы һеч вахт арабаја гојмаздылар. Аллаһын вердији ајдын ҝөстәришә әсасән, ону Коһат нәслиндән олан левилиләр чијинләриндә дашымалы идиләр. Давуд башга һалларда Јеһованы тез-тез ахтармыш олса да, бу дәфә буну лазыми гајдада етмәди. Бунун нәтиҹәси фаҹиәли олду. Даһа сонра Давуд е’тираф етди: “[Ону] лазыми гајдада арамадыг дејә, Аллаһымыз Рәбб бизи вурду” (1 Тарихләр 13:1-3; 15:11-13; Сајлар 4:4-6, 15; 7:1-9).
13. Сандығы мүвәффәгијјәтлә ҝәтирдикдән сонра, маһны васитәсилә һансы хатырлатма сәсләнди?
13 Нәһајәт левилиләр сандығы Обед-едомун евиндән Јерусәлимә ҝәтирдикдән сонра, Давудун бәстәләдији маһны ифа едилди. Маһныда белә сәмими сөзләр варды: “Рәбби вә онун гүдрәтини арајын; үзүнү даима арајын. Етдији бүтүн харигәләри, онун мө’ҹүзәләрини вә ағзынын һөкмләрини анын” (1 Тарихләр 16:11, 13).
14. Биз Сүлејманын јахшы нүмунәсиндән вә гоҹалыг дөврүндә јол вердији сәһвләрдән нә өјрәнирик?
14 Давуд өлүмүндән габаг оғлу Сүлејмана нәсиһәт верирди: “Әҝәр ону [Јеһованы] арасан, өзүнү сәнә тапдырар” (1 Тарихләр 28:9). Сүлејман тахта чыхдыгдан сонра, топланма чадырынын олдуғу Ҝибеона ҝетди вә Јеһоваја гурбанлар ҝәтирди. Орада Јеһова Сүлејмана тәклиф едиб деди: “Сәнә нә верим, истә”. Сүлејман һикмәт вә билик истәди. Исраили идарә етмәси үчүн, Јеһова она бу кејфијјәтләри бол-бол бәхш етди вә үстәлик вар-дөвләт вә иззәт дә верди (2 Тарихләр 1:3-12). Јеһованын Давуда вердији архитектура планы үзрә Сүлејман мөһтәшәм мә’бәд уҹалтды. Лакин Сүлејман шәхси һәјаты илә бағлы мәсәләләрдә Јеһованы лазыми гајдада ахтармады. О, Јеһоваја ибадәт етмәјән гадынларла евләнди. Гоҹа јашында арвадлары онун үрәјини Јеһовадан дөндәрдиләр (1 Краллар 11:1-10). Бәли, нә гәдәр танынмыш олсаг да, нә гәдәр мүдрик вә ағыллы ҝөрүнсәк дә, “Рәббә нәјин мәгбул олдуғуну өјрәнмәјә” чалышмаг ваҹибдир.
15. Нәјә ҝөрә һәбәшистанлы Зераһ Јәһуданын үзәринә ҝәлән заман, Аса јәһуди халгынын гуртулушу үчүн Јеһоваја әминликлә дуа едә билди?
15 Бунун нә дәрәҹәдә зәрури олдуғуну, Сүлејманын нәтиҹәси олан Асанын падшаһлығынын тарихини нәзәрдән кечирсәк, даһа ајдын ҝөрәрик. Һөкмранлығынын башланғыҹындан 11 ил сонра, һәбәшистанлы Зераһ милјон нәфәрлик гошунла Јәһуданын үзәринә ҝәлди. Јеһова Јәһуданы гуртараҹагмы? Асадан тәхминән 500 ил әввәл Јеһова исраиллиләрин Ону динләјиб, әмрләринә табе олдуглары вә әксинә, буну етмәдикләри тәгдирдә онлары нә ҝөзләдијини ајдын сурәтдә ҝөстәрмишди (Тәснијә 28:1, 7, 15, 25). Аса һөкмранлығынын башланғыҹында, јалан танрылара ибадәтдә истифадә олунан гурбанҝаһлары вә һејкәлләри тамамилә ләғв етди. О, јәһудиләри “Рәбби арамаға” тәшвиг едирди. Буну етмәк үчүн, фәлакәтин ҝәлмәсини ҝөзләмирди. Буна ҝөрә дә, чәтин вәзијјәтә дүшәндә, Аса халга көмәк етмәси үчүн Јеһоваја иманла дуа едә билди. Бунун нәтиҹәси неҹә олду? Јәһудаја парлаг бир гәләбә бәхш едилди (2 Тарихләр 14:2-12).
16, 17. а) Гәләбә чалмасына бахмајараг, Јеһова Асаја нә барәдә хатырлатды? б) Аса ағылсыз даврандығы заман, һансы көмәји алды вә буна неҹә јанашды? в) Асанын давранышынын үзәриндә дүшүнмәк нә үчүн фајдалыдыр?
16 Аса падшаһ гәләбә газанса да, Јеһова онун гаршысына Азарјаны ҝөндәрди ки, она белә сөзләр десин: “Еј Аса вә бүтүн Јәһуда вә Бенјамин, мәни динләјин; сиз Рәбб илә бәрабәр олдугҹа о сизинлә бәрабәрдир; вә сиз ону ахтарсаныз, өзүнү сизә тапдырар; фәгәт сиз ону тәрк етсәниз, сизи тәрк едәр” (2 Тарихләр 15:2). Аса өлкәдә һәгиги ибадәти даһа бөјүк сә’јлә бәрпа етмәјә башлады. Лакин 24 илдән сонра јенидән мүһарибә тәһлүкәси јарандыгда, Аса Јеһованы ахтармады. О, Аллаһын Кәламына мүраҹиәт етмәди вә һәбәш ордусунун Јәһудаја һүҹум етдији заман Јеһованын етдији ишләри јада салмады. Ағылсызлыг едиб, Сурија илә мүгавилә бағлады (2 Тарихләр 16:1-6).
17 Буна ҝөрә Јеһова ҝәләҹәји ҝөрән Һанани васитәсилә Асаны мәзәммәт етди. Һәтта Јеһованын нә дүшүндүјү ајдын олан заман белә Аса фајда әлдә едә биләрди. Лакин бунун әвәзинә Аса аҹыгланды вә Һананини зиндана атдырды (2 Тарихләр 16:7-10). Неҹә дә аҹынаҹаглы һалдыр! Бәс бизим һаггымызда нә демәк олар? Һәрдән елә олурму ки, биз әввәлҹә Аллаһы ахтарырыг, сонра исә верилән нәсиһәти гәбул етмәкдән имтина едирик? Бизимлә марагланан вә дүнјанын ишләринә баш гошдуғумузу ҝөрәрәк нараһат олан гајғыкеш ағсаггал бизә Мүгәддәс Китабдан мәсләһәт вердикдә, “Рәббә нәјин мәгбул олдуғуну” өјрәнмәмиз үчүн ҝөстәрилән бу көмәји гијмәтләндиририкми?
Сорушмағы унутма
18. Елиһунун Ејуба дедији сөзләр бизә неҹә фајда ҝәтирә биләр?
18 Сыхынтылар ичиндә оланда, һәтта узун илләр әрзиндә Јеһоваја сәдагәтлә хидмәт едән кәс дә сәһвә јол верә биләр. Ејуба фәлакәт үз верәндә — дәһшәтли хәстәлијә дүчар оланда, өвладларыны вә мүлкүнү итирәндә, достлары ону јалан јерә ҝүнаһландыранда — о, диггәтини тамамилә өз һиссләринә ҹәмләшдирмишди. Елиһу она хатырлатды: “Кимсә демир: Һарададыр Аллаһ, Јараданым?” (Ејуб 35:10). Ејуба өз диггәтини Јеһоваја јөнәлтмәк вә Онун бу вәзијјәтә олан нөгтеји-нәзәринин үзәриндә дүшүнмәк лазым иди. Ејуб нәсиһәти һәлимликлә гәбул етди вә онун нүмунәси бизим дә бу ҹүр давранмамыза көмәк едә биләр.
19. Исраиллиләр чох вахт нә етмәји јаддан чыхарырдылар?
19 Исраиллиләр јүзилликләр әрзиндә Аллаһын онларла неҹә даврандығыны билирдиләр. Лакин мүәјјән вәзијјәтләрдә неҹә давранмалы олдугларына даир гәрар гәбул етмәк лазым ҝәлдикдә, онлар бу барәдә унудурдулар (Јеремја 2:5, 6, 8). Гәрар гәбул едәркән, онлар: “Јеһова һарададыр?” дејә сорушмаг әвәзинә, үрәкләри истәдији кими давранырдылар (Ишаја 5:11, 12).
“Јеһова һарададыр?” дејә сорушмаға давам ет
20, 21. а) Бу ҝүн Јеһованын рәһбәрлијини Елишанын руһу илә ахтаранлар кимләрдир? б) Биз онларын нүмунәсини неҹә тәглид едә биләрик вә онларын нүмунәси нәдә фајдалыдыр?
20 Илјас пејғәмбәрин үмумхалг гаршысында хидмәти баша чатдыгда, онун гуллугчусу Елиша Илјасдан дүшән ҹүббәни ҝөтүрүб Иордан чајына јахынлашды вә суја вуруб сорушду: “Илјанын [Илјасын] Аллаһы Рәбб һарададыр?” (2 Краллар 2:14). Ҹаваб олараг Јеһова ҝөстәрди ки, инди Онун руһу Елишанын үзәриндәдир. Биз бундан нә өјрәнирик?
21 Буна бәнзәр шеј бизим ҝүнләрдә дә баш вермишди. Тәблиғ фәалијјәтиндә рәһбәрлији үзәринә ҝөтүрән бә’зи мәсһ едилмиш мәсиһчиләр, јер үзүндәки һәјатларыны баша вурдулар. Сонрадан нәзарәт етмәјә даир тапшырыг алан гардашлар, Мүгәддәс Јазылары арашдырараг, рәһбәрлик үчүн Јеһоваја дуа етдиләр. Онлар “Јеһова һарададыр?” дејә, сорушмағы унутмурдулар. Буна ҹаваб олараг, Јеһова өз халгына јол ҝөстәрмәјә вә онун фәалијјәтинә хејир-дуа вермәјә давам едирди. Биз онларын иманыны тәглид едирикми? (Ибраниләрә 13:7). Әҝәр беләдирсә, биз Јеһованын тәшкилатындан јапышаҹаг, вердији нәсиһәтләрә һај верәҹәк вә Онун Иса Мәсиһин рәһбәрлији алтында кечирдији тәблиғ ишиндә там шәкилдә иштирак едәҹәјик (Зәкарја 8:23).
Сиз неҹә ҹаваб верәрдиниз?
• Биз һансы мәгсәдлә “Јеһова һарададыр?” дејә, сорушмалыјыг?
• Бу ҝүн биз “Јеһова һарададыр?” суалына ҹавабы неҹә тапа биләрик?
• Аллаһдан рәһбәрлик алмаг үчүн едилән бә’зи дуалар нә үчүн ҹавабсыз галыр?
• “Рәббә нәјин мәгбул олдуғуну өјрәнмәјин” нә дәрәҹәдә ваҹиб олдуғу һансы нүмунәләрдән ҝөрүнүр?
[19-ҹу сәһифәдәки шәкил]
Јеһошафат падшаһ Јеһованы неҹә арајырды?
[20-ҹи сәһифәдәки шәкил]
Нәјә ҝөрә Саул ҹадуҝәрә мүраҹиәт етди?