Ҝәнҹ гардашлар, сиз башгаларынын етибарыны газана биләрсиз

1. Ҝәнҹ гардашлар һагда нә демәк олар?

ӘЗИЗ ҝәнҹ гардашлар, сиз баҹы-гардашлар үчүн чох шеј едә биләрсиниз. Чүнки сиз ҝүҹлүсүнүз, енержи долусунуз (Мәс. 20:29). Јығынҹагда сизин кими гардашларын олмасы бөјүк үстүнлүкдүр. Ола билсин, јығынҹаг хидмәтчиси олмаг истәјирсиниз, амма сизә елә ҝәлир ки, башгалары сизин мәсулијјәтли ишләр үчүн һәлә чох ҝәнҹ, тәҹрүбәсиз олдуғунузу дүшүнүр. Ҝәнҹ олсаныз да, унутмајын ки, баҹы-гардашларын етибарыны вә һөрмәтини газанмаг үчүн елә индинин өзүндә нәләрсә едә биләрсиниз.

2. Бу мәгаләдә нә һагда данышаҹағыг?

² Бу мәгаләдә ҝәнҹ гардашларын нүмунә ҝөтүрә биләҹәји үч шәхсдән данышаҹағыг. Әсас етибарилә, Давуд падшаһын, һәмчинин ики Јәһуда падшаһы, Асанын вә Јәһушафатын һәјатына нәзәр салаҹағыг. Ҝәлин ҝөрәк онлар һансы чәтинликләрлә үзләшмишди вә бунун өһдәсиндән неҹә ҝәлмишди.

ДАВУД ПАДШАҺЫН НҮМУНӘСИ

3. Ҝәнҹләр јығынҹагдакы баҹы-гардашлара неҹә көмәк едә биләр?

³ Та кичик јашларындан Давудун Јеһова илә сых мүнасибәти вар иди. Амма бунунла јанашы, о, вахт ајырыб инсанларын дәјәр вердији баҹарыглара да јијәләнмишди. Мәсәлән, јахшы мусигичи олмаг үчүн чох чалышмышды. Онун бу баҹарығынын Аллаһын падшаһ кими тәјин етдији Талута бөјүк көмәји дәјмишди (1 Ишм. 16:16, 23). Әзиз ҝәнҹ гардашлар, бәс сизин јығынҹагдакылара фајда ҝәтирәҹәк һансыса баҹарығыныз вар? Әксәријјәтиниздә вар. Сизин електрон ҹиһазлардан јахшы башы чыхыр. Јәгин фикир вермисиниз ки, бәзи баҹы-гардашлар електрон ҹиһазларындан фәрди мүталиә вә јығынҹаг програмы үчүн истифадә етмәји елә дә јахшы баҹармыр. Сизин бу баҹарығынызын онлара чох хејри дәјә биләр, онлар буну чох гијмәтләндирир.

4. Давуд кими, ҝәнҹ гардашлар да өзләриндә һансы хүсусијјәтләри јетишдирмәлидирләр? (Үз габығындакы шәклә бахын.)

⁴ Давуд ҝүндәлик һәјатында мәсулијјәтли, етибарлы инсан олдуғуну сүбут етмишди. Мәсәлән, о, ҝәнҹ јашларында ҹанла-башла атасынын сүрүсүнү отарырды. Әслиндә, бу, тәһлүкәли тапшырыг иди. Сонралар Давуд Талут падшаһа демишди: «Бу гулун атасынын сүрүсүнә чобанлыг едир. Вахт олуб ки, шир, јахуд ајы ҝәлиб сүрүдән гојун апарыб. Онда мән онун далынҹа дүшүб ону вурмушам, гојуну ағзындан алмышам» (1 Ишм. 17:34, 35). Сүрү Давуда тапшырылдығы үчүн о буна ҝөрә мәсулијјәт һисс едирди вә сүрүнү горумаг үчүн ҹәсарәтлә вурушурду. Ҝәнҹ гардашлар, Давуддан өрнәк алараг сизә тапшырылан истәнилән иши ҹанла-башла јеринә јетирин.

5. Зәбур 25:14 ајәсинә әсасән, ҝәнҹ гардашлар ән әсасы нә етмәјә чалышмалыдырлар?

⁵ Давуд ҝәнҹ јашларындан Јеһова илә мөһкәм мүнасибәт гурмушду. Бу онун ҹәсарәтли олмасындан, симли аләтдә чалмағы баҹармасындан даһа өнәмли иди. Јеһова Давудун тәкҹә Аллаһы дејилди, һәм дә Досту иди, өзү дә, јахын Досту. (Зәбур 25:14 ајәсини охујун.) Ҝәнҹ гардашлар, ән әсасы Јеһова илә мүнасибәтинизи мөһкәмләндирмәјә чалышын. Онда әлавә мәсулијјәтләр дә ала биләҹәксиниз.

6. Бәзиләри Давуд һагда һансы фикирдә иди?

⁶ Давудун үзләшдији чәтинликләрдән бири о иди ки, бәзиләри онун һаггында сәһв фикирдә иди. Мәсәлән, о, Ҹалутла дөјүшмәк истәјәндә падшаһ Талут ону фикриндән дашындырмаг үчүн демишди: «Сән һәлә ушагсан» (1 Ишм. 17:31—33). Бундан өнҹә исә Давудун доғма гардашы ону мәсулијјәтсизликдә иттиһам етмишди (1 Ишм. 17:26—30). Лакин Јеһова Давудун һеч дә ушаг вә ја мәсулијјәтсиз олдуғуну дүшүнмүрдү. О, Давуду јахшы таныјырды. Давуд да Досту Јеһоваја бел бағладығы үчүн Ҹалуту мәғлуб едә билмишди (1 Ишм. 17:45, 48—51).

7. Давудун һадисәсиндән нә өјрәнә биләрсиниз?

⁷ Давуддан нә өјрәнә биләрсиниз? Сәбирли олмағын ваҹиблијини. Сизи ушаглыгдан таныјанлара бөјүдүјүнүзү гәбул етмәләри үчүн вахт лазым ола биләр. Амма әмин ола биләрсиниз ки, Јеһова тәкҹә сизин заһиринизи јох, дахилинизи дә ҝөрүр. О сизин неҹә инсан олдуғунузу, нәји баҹардығынызы јахшы билир (1 Ишм. 16:7). Бундан әлавә, Давуд кими, Јеһова илә мүнасибәтинизи мөһкәмләндирин. Давуд Јеһованын јаратдыгларыны мүшаһидә едәрәк буна наил олмушду. О, бүтүн бунлара бахыб Јараданын кејфијјәтләри һагда дүшүнүрдү (Зәб. 8:3, 4; 139:14; Ром. 1:20). Бундан әлавә, дуада Јеһовадан ҝүҹ диләјин. Мәсәлән, әҝәр синиф јолдашларыныз Јеһованын Шаһиди олдуғунуз үчүн сизи лаға гојурса, бунун өһдәсиндән ҝәлмәк үчүн дуада Јеһовадан көмәк истәјин. Һәмчинин Мүгәддәс Китабдан, нәшрләримиздән, видеолардан тапдығыныз мәсләһәтләри тәтбиг един. Һәр дәфә Јеһованын сизә неҹә көмәк етдијини ҝөрдүкҹә Она даһа чох бел бағлајаҹагсыныз. Башгалары да Јеһоваја ҝүвәндијинизи ҝөрәндә сизә даһа чох етибар едәҹәк.

8, 9. Давуда падшаһ олана гәдәр сәбирлә ҝөзләмәјә нә көмәк етди вә ҝәнҹ гардашлар ондан нә өјрәнә биләр?

⁸ Ҝәлин ҝөрәк Давудун башга һансы чәтинлији олмушду. О, падшаһ кими мәсһ олунандан сонра Јәһудада тахта чыхана гәдәр узун илләр ҝөзләмәли олмушду (1 Ишм. 16:13; 2 Ишм. 2:3, 4). Бу вахт әрзиндә Давуда сәбирлә ҝөзләмәјә нә көмәк етди? Давуд әл-голуну јанына салмады, диггәтини едә биләҹәји ишләрә ҹәмләди. Мәсәлән, филиштлиләрин әразисиндә гачаг кими јашадығы вахт јаранан фүрсәти фөвтә вермирди, Исраилин дүшмәнләринә гаршы вурушурду. Бунунла о, Јәһуда әразисинин сәрһәдләрини горујурду (1 Ишм. 27:1—12).

⁹ Давуддан нә өјрәнә биләрсиниз? Јеһоваја вә баҹы-гардашлара хидмәт етмәк үчүн јаранан имканлардан истифадә един. Ҝөрүн Рикардоb адлы гардаш неҹә давранмышды. Һарадаса он јашы оланда онун ән бөјүк арзусу өнҹүл олмаг иди. Амма ағсаггаллар демишди ки, һәлә һазыр дејил. Рикардо бундан инҹимәди, нә дә һәвәсдән дүшмәди. Әксинә, о, хидмәтдә даһа чох иштирак етмәјә башлады. О дејир: «Ҝеријә бојлананда баша дүшүрәм ки, о вахт мәнә руһән инкишаф етмәк лазым иди. Гаршыма мәгсәд гојдум ки, һәгигәтә мараг ҝөстәрән һәр кәси зијарәт едим вә тәкрар сөһбәтләрә јахшы һазырлашым. Һәтта бир нәфәрә Мүгәддәс Китаб дәрси кечмәјә башладым. Тәблиғдә даһа чох иштирак етдикҹә әминлијим дә артды». Һал-һазырда Рикардо сәриштәли өнҹүл вә јығынҹаг хидмәтчиси кими хидмәт едир.

10. Бир дәфә Давуд ваҹиб гәрар вермәздән өнҹә нә етмишди?

¹⁰ Ҝәлин Давудун һәјатында баш верән башга бир һадисәјә бахаг. Давуд вә адамлары гачаг јашадығы дөврдә аиләләрини гојуб дөјүшә ҝетмишдиләр. Дүшмәнләр бу фүрсәтдән истифадә едиб онларын евләринә басгын етдиләр вә аиләләрини әсир ҝөтүрдүләр. Давуд елә дүшүнә биләрди ки, дөјүшчү кими о, бөјүк тәҹрүбә саһибидир вә о өзү тәдбир төкүб әсирләри ҝери гајтара биләр. Амма Давуд көмәк үчүн Јеһоваја үз тутду. О, Әбјатарын көмәјилә Јеһовадан сорушду: «Басгынчылары тәгиб едим?» Јеһова билдирди ки, тәгиб етсин. Һәмчинин ону архајын етди ки, әсирләри азад едәҹәк (1 Ишм. 30:7—10). Бәс бу һадисәдән нә өјрәнә биләрсиниз?

11. Гәрар вермәздән өнҹә нә едә биләрсиниз?

¹¹ Гәрар вермәздән өнҹә мәсләһәтләшин. Валидејнләринизин фикрини өјрәнин. Тәҹрүбә саһиби олан ағсаггаллар да сизә ҝөзәл мәсләһәт верә биләр. Јеһова тәјин етдији бу шәхсләрә етибар едир, сиз дә етибар едә биләрсиниз. Јеһова онлары јығынҹаға «һәдијјә» олараг вериб (Ефес. 4:8). Онларын иманындан өрнәк алмағын, һикмәтли мәсләһәтләринә гулаг асмағын бөјүк хејрини ҝөрәҹәксиниз. Инди исә ҝәлин ҝөрәк Аса падшаһдан нә өјрәнә биләрик.

АСА ПАДШАҺЫН НҮМУНӘСИ

12. Һакимијјәтә ҝәләндә Асада һансы хүсусијјәтләр вар иди?

¹² Ҝәнҹ падшаһ олан Аса тәвазөкар вә ҹәсарәтли иди. О, атасы Әбијјадан сонра тахта чыхды вә бүтпәрәстлијин көкүнү кәсмәк үчүн тәдбирләр ҝөрдү. Аса «јәһудалылара ата-бабаларынын Аллаһы Јеһоваја ибадәт етмәји, Онун Ганунуна, әмрләринә әмәл етмәји бујурду» (2 Салн. 14:1—7). Һәбәш Зараһ 1 000 000 нәфәрлик орду илә Јәһудаја јүрүш едәндә Аса һикмәтли давранараг Јеһоваја үз тутду. Она белә деди: «Јеһова, Сәнин үчүн фәрг етмәз, Сән ҝүҹлүнүн дә, ҝүҹсүзүн дә дадына чатырсан. Јетиш дадымыза, еј Аллаһымыз Јеһова! Биз Сәнә архаланырыг». Асанын дедији бу ҝөзәл сөзләр ҝөстәрир ки, Асада Јеһованын һәм ону, һәм дә халгы хилас едәҹәјинә неҹә бөјүк әминлик вар иди. Аса Јеһоваја ҝүвәнирди, Јеһова да һәбәшләри мәғлуб етди (2 Салн. 14:8—12).

13. Аса илә нә баш верди вә нәјә ҝөрә?

¹³ Разы оларсыныз ки, бир милјонлуг ордуја гаршы чыхмаг һәләм-һәләм асан иш дејилди, амма Аса бунун өһдәсиндән мүвәффәгијјәтлә ҝәлди. Башга вахт исә о, бунун гәдәр горхулу олмајан һүҹума — Исраилин мәнфур падшаһы олан Башанын һүҹумуна мәруз галанда, әфсуслар олсун ки, Јеһоваја үз тутмады, Арам падшаһындан көмәк истәди. Бу јанлыш гәрарынын агибәти пис олду! Јеһова Һәнани пејғәмбәр васитәсилә Асаја деди: «Сән Аллаһын Јеһоваја јох, Арам падшаһына архаландығын үчүн Арам падшаһынын ордусу сәнин әлиндән гуртулду». О вахтдан сонра Асанын башы мүһарибәдән ачылмады (2 Салн. 16:7, 9; 1 Пад. 15:32). Бурадан һансы нәтиҹәни чыхарырыг?

14. Јеһоваја архаландығынызы неҹә ҝөстәрә биләрсиниз вә 1 Тимутијә 4:12 ајәсинә әсасән, белә даврансаныз, нәјә наил олаҹагсыныз?

¹⁴ Тәвазөкар галын вә Јеһоваја һәмишә етибар един. Вәфтиз олунмагла сиз Јеһоваја иман етдијинизи вә ҝүвәндијинизи ҝөстәрмишдиниз. Јеһова да бөјүк мәмнунијјәтлә сизә халгынын арасында олмаг шәрәфи нәсиб етди. Инди ҝәрәк бундан сонра да Јеһоваја бел бағлајасыныз. Ола билсин, һәјати ваҹиб гәрарлар верәндә Јеһоваја етибар етмәк сизин үчүн асан олсун. Бәс диҝәр гәрарлар һагда нә демәк олар? Чох ваҹибдир ки, әјләнҹә, иш вә ҝәләҹәк мәгсәдләр дә дахил олмагла, һәр бир гәрарынызда Јеһоваја етибар едәсиниз. Өз ағлыныза ҝүвәнмәјин. Мүгәддәс Китабдан сизин вәзијјәтинизә ујғун олан принсипләри тапын вә бу принсипләрә әмәл един (Мәс. 3:5, 6). Онда Јеһованын гәлбини севиндирәҹәксиниз вә јығынҹагдакы баҹы-гардашларын һөрмәтини газанаҹагсыныз. (1 Тимутијә 4:12 ајәсини охујун.)

ЈӘҺУШАФАТ ПАДШАҺЫН НҮМУНӘСИ

15. 2 Салнамәләр 18:1—3 вә 19:2 ајәләринә әсасән, Јәһушафат падшаһ һансы сәһвләри етмишди?

¹⁵ Әлбәттә ки, һәр биримиз кими, сиз дә гејри-камилсиниз вә бәзән сәһвләр едәҹәксиниз. Амма бу, Јеһоваја хидмәтдә әлиниздән ҝәләни етмәјә мане олмамалыдыр. Јәһушафат падшаһын нүмунәсинә нәзәр салаг. Онун чох ҝөзәл хүсусијјәтләри вар иди. Ҝәнҹ јашларында о, «атасынын Аллаһына ибадәт едир, Онун әмрләринә табе олурду». Бундан әлавә, о, ағсаггаллара бүтүн Јәһуданы ҝәзиб, халга Јеһова һагда өјрәтмәји бујурмушду (2 Салн. 17:4, 7). Буна бахмајараг, Јәһушафат бәзи сәһв гәрарлар да вермишди. Вердији бир сәһв гәрарындан сонра Јеһованын елчиси ону мәзәммәт етмишди. (2 Салнамәләр 18:1—3; 19:2 ајәләрини охујун.) Мүгәддәс Китабын бу парчасындан өзүнүз үчүн һансы дәрси ҝөтүрә биләрсиниз?

16. Раҹивин нүмунәсиндән нә өјрәнә биләрсиниз?

¹⁶ Мәсләһәт алын вә мәсләһәтә ујғун давранын. Ола билсин, бир чох ҝәнҹ кими, сизин үчүн дә Јеһоваја хидмәти һәјатда һәр шејдән үстүн тутмаг чәтиндир. Руһдан дүшмәјин. Раҹив адлы бир ҝәнҹ гардашын нүмунәсинә нәзәр салаг. Јенијетмәлик јашлары барәсиндә о дејир: «О јашларымда бәзән билмирдим һәјатдан нә истәјирәм. Бир чох ҝәнҹ кими, мәним үчүн дә јығынҹагдан вә хидмәтдән чох идман вә әјләнҹә мараглы иди». Бәс Раҹивә нә көмәк етди? Бир гајғыкеш ағсаггал она бәзи мәсләһәтләр верди. Раҹив дејир: «Гардаш мәни 1 Тимутијә 4:8 ајәсиндә јазылан принсип үзәриндә дүшүнмәјә тәшвиг етди». Раҹив онун мәсләһәтини тәвазөкарлыгла гәбул етди вә һәјатында нәјә үстүнлүк вердијинә бир даһа нәзәр салды. О дејир: «Һәјатымда Јеһоваја хидмәти һәр шејдән үстүн тутмаг гәрарына ҝәлдим». Бунун нәтиҹәси нә олду? «Бу мәсләһәти аландан бир нечә ил сонра мән јығынҹаг хидмәтчиси кими тәјин олундум», — дејә Раҹив билдирир.

СӘМАВИ АТАНЫЗЫН ФӘХРИ ОЛУН

17. Баҹы-гардашлар Јеһоваја хидмәт едән ҝәнҹ гардашлара неҹә јанашыр?

¹⁷ Баҹы-гардашлар сизин кими ҝәнҹ гардашларла бирҝә Јеһоваја «чијин-чијинә» гуллуг етмәји чох гијмәтләндирир! (Сәф. 3:9). Онлар сизин нә гәдәр шөвглү, тапшырылан иши неҹә ҹанла-башла, һәвәслә етдијинизи ҝөрәндә үрәкләри фәрәһлә долур. Сиз онларын рәғбәтини газанмысыныз (1 Јәһ. 2:14).

18. Мәсәлләр 27:11 ајәсинә әсасән, Јеһова ҝәнҹ гардашлара неҹә јанашыр?

¹⁸ Ҝәнҹ гардашлар, һеч вахт унутмајын ки, Јеһова сизи севир вә етибар едир. Јеһова демишди ки, ахырзаманда бир јығын ҝәнҹ Она хидмәт етмәк үчүн һазыр дураҹаг (Зәб. 110:1—3). О билир ки, сиз Ону севирсиниз вә Она хидмәтдә баҹардығыныз гәдәр чох шеј етмәк истәјирсиниз. Одур ки, һәм өзүнүзә гаршы, һәм башгаларына гаршы сәбирли олун. Сәһв едәндә тәрбијәни вә тәнбеһи гәбул един. Буна Јеһованын өјүд-нәсиһәти кими бахын (Ибр. 12:6). Сизә тапшырылан истәнилән иши ҹанла-башла един. Ән әсасы, һәр шеји елә един ки, сәмави Атаныз сизинлә фәхр етсин. (Мәсәлләр 27:11 ајәсини охујун.)