Јашлылар мәсиһчи гардашлығымызын гијмәтли үзвләридир
“Рәббин евиндә әкилмишдирләр... чичәкләнәҹәкләр. Гоҹалыгда да мејвә верәҹәкләр” (МӘЗМУР 92:13, 14).
1. Бир чох инсанлар јашлылара неҹә мүнасибәт ҝөстәрирләр?
ЈЕҺОВА садиг хидмәтчиләринин һамысыны, о ҹүмләдән јашлы оланлары да севир. Лакин һесабламалара әсасән, Бирләшмиш Штатларда һәр ил јарым милјона јахын јашлы адам кобуд вә ја е’тинасыз мүнасибәтдән әзијјәт чәкир. Дүнјанын башга һиссәләриндән верилән охшар һесабатлар ҝөстәрир ки, јашлыларла бу ҹүр тәһгиредиҹи рәфтар глобал проблемдир. Бир тәшкилатын фикринә ҝөрә, проблемин көкү “јашлыларын артыг һеч бир шејә јарамадыгларына, сәмәрәли сурәтдә ишләјә билмәдикләринә вә башгаларындан чох асылы олдугларына даир ҝениш јајылмыш нөгтеји-нәзәрләрин олмасындадыр”.
2. а) Јеһова Өзүнүн јашлы олан садиг хидмәтчиләринә неҹә мүнасибәт ҝөстәрир? б) Мәзмур 92:12-15 ајәләриндә һансы тә’сирли сөзләри тапырыг?
2 Јеһова Аллаһ јашлы олан садиг хидмәтчиләрини јүксәк гијмәтләндирир. О, диггәтини бизим мәһдуд имканларымыза дејил, руһани вәзијјәтимизә — “дахили варлығымыза” јөнәлдир (2 Коринфлиләрә 4:16). Онун Кәламы олан Мүгәддәс Китабда бу ҹүр тә’сирли тәсвир тапырыг: “Салеһ адам хурма ағаҹы кими битәҹәкдир; Либнандакы [Ливандакы] сидр ағаҹы кими бөјүјәҹәкдир. Рәббин евиндә әкилмишдирләр; Аллаһымызын һәјәтләриндә чичәкләнәҹәкләр. Гоҹалыгда да мејвә верәҹәкләр; јаш вә тәзә олаҹаглар; та ки, Рәббин доғру олдуғуну е’лан етсинләр” (Мәзмур 92:12-15). Бу ајәләрин нәзәрдән кечирилмәси, сиз јашлы баҹы вә гардашларын мәсиһчи гардашлығы үчүн һансы дәјәрли јардымы едә биләҹәјинизи ҝөстәрәҹәк.
“Гоҹалыгда да мејвә верәҹәкләр”
3. а) Салеһләр нәјә ҝөрә хурма ағаҹлары илә мүгајисә олунурлар? б) Јашлы адамлар үчүн ‘гоҹалыгда да мејвә вермәк’ неҹә мүмкүндүр?
3 Мәзмурчу салеһләри “Рәббин евиндә әкилмиш” хурма ағаҹлары илә мүгајисә едир. Онлар “гоҹалыгда да мејвә верәҹәкләр”. Мәҝәр бунун руһландырыҹы фикир олдуғу илә разы дејилсинизми? Мүгәддәс Китабын јазылдығы дөврләрдә Шәргдә гәшәнҝ, гамәтли хурма ағаҹлары һәјәтләрин ади бәзәји иди. Бундан башга, онлар јалныз ҝөзәллијинә ҝөрә дејил, һәм дә чохлу мејвә вердикләринә ҝөрә гијмәтләндирилирди. Бә’зи ағаҹлар јүз илдән артыг мејвә верирдиa. Һәгиги ибадәтдә мөһкәм “әкилмиш” галараг, сиз дә “һәр ҹүр хејирли ишдә сәмәрә” верә биләрсиниз (Колослулара 1:10).
4, 5. а) Мәсиһчиләрин һансы ваҹиб бәһрәни тәгдим етмәләри зәруридир? б) “Додагларын бәһрәсини” тәгдим едән јашлы адамларын Мүгәддәс Китаб нүмунәсини ҝөстәрин.
4 Јеһова мәсиһчиләрдән “додагларын бәһрәсини” тәгдим етмәләрини, јә’ни Ону иззәтләндирмәләрини вә Онун нијјәтләри барәсиндә бәјан етмәләрини ҝөзләјир (Ибраниләрә 13:15). Бу сизә, јашлы инсанлара, аиддирми? Шүбһәсиз.
5 Мүгәддәс Китабда Јеһованын исми вә нијјәтләри барәдә ҹәсарәтлә шаһидлик едән јашлы инсанларын нүмунәләри вар. Јеһова Мусаны Өз пејғәмбәри вә нүмајәндәси тә’јин едәндә, онун ‘јетмиш илдән’ артыг јашы варды (Мәзмур 90:10; Чыхыш 4:10-17). Јашынын чох олмасы, Јеһованын һөкмранлығы барәсиндә ҹәсарәтлә шаһидлик вермәкдә пејғәмбәр Даниелә мане олмады. Белшатсар дивардакы мүәммалы јазыны охумаг үчүн Даниели дә’вәт едәндә, Даниелин, еһтимал ки, 90-дан артыг јашы варды (Даниел 5-ҹи фәсил). Бәс аһыл јашлы һәвари Јәһја һаггында нә демәк олар? Сәдагәтлә јеринә јетирдији хидмәтинин сонуна јахын о, “Аллаһын кәламы вә Иса Мәсиһин шәһадәти үчүн” Патмос адасында һәбсдә иди (Вәһј 1:9). Чох ҝүман ки, сиз, јашлы вахтында “додагларын бәһрәсини” тәгдим едән диҝәр Мүгәддәс Китаб персонажларыны да јада салаҹагсыныз (1 Самуел 8:1, 10; 12:2; 1 Краллар 14:4, 5; Лука 1:7, 67-79; 2:22-32).
6. Бу сон ҝүнләрдә Јеһова пејғәмбәрлик едән “гоҹалардан” неҹә истифадә едир?
6 Гәдим Ибрани пејғәмбәри Јоели ситат ҝәтирәрәк һәвари Петер бәјан етди: “Аллаһ дејир: Сон ҝүнләрдә [“гоҹаларыныз” да дахил олмагла] бүтүн бәшәр үзәринә Руһумдан төкәҹәјәм... вә пејғәмбәрлик едәҹәкләр” (Һәвариләрин ишләри 2:17, 18; Јоел 2:28). Буна мүвафиг олараг бу ҝүн, сон ҝүнләрдә, Јеһова Өз нијјәтләрини бәјан етмәк үчүн мәсһ едилмишләр синфинин вә “башга гојунларын” јашлы үзвләрини истифадә едир (Јәһја 10:16). Онлардан бә’зиләри онилликләрлә Падшаһлығын бәһрәсини сәдагәтлә тәгдим едирләр.
7. Чәтинликләринин олмасына бахмајараг, Падшаһлыг бәһрәсини тәгдим етмәјә давам едән јашлы адамларын нүмунәләрини сөјләјин.
7 1941-ҹи илдә Падшаһлығын таммүддәтли тәблиғчиси олан Сонјанын нүмунәсини нәзәрдән кечирәк. Узун мүддәт хроники хәстәликлә мүбаризә апармасына бахмајараг, о, мүнтәзәм сурәтдә өз евиндә Мүгәддәс Китаб өјрәнмәси кечирирди. Сонја бунлары дејирди: “Хош хәбәри тәблиғ етмәк мәним һәјатымын бир һиссәсидир. Даһа доғрусу, һәјатымын өзүдүр. Тәблиғ етмәји дајандырмагдан ваз кечирәм”. Бу јахынларда Сонја вә баҹысы Олив хәстәхананын ҝөзләмә отағында сағалмаз хәстәлији олан Ҹанет адлы бир гадынла гаршылашмыш вә Мүгәддәс Китабын хош хәбәрини бөлүшмүшләр. Ҹанетә ҝөстәрилән хејирхаһлыг онун мө’мин католик олан анасына о гәдәр ҝүҹлү тәәссүрат бағышламышдыр ки, о, Мүгәддәс Китабы өјрәнмәк тәклифинә разылыг вермишдир вә һал-һазырда ҝөзәл наилијјәтләр едир. Падшаһлыг бәһрәсини тәгдим етмәк үчүн, сиз дә буна бәнзәр һаллардан истифадә едә биләрдинизми?
8. Јашлы Калеб Јеһоваја бел бағладығыны неҹә ҝөстәрди вә јашлы мәсиһчиләр ону неҹә тәглид едә биләрләр?
8 Гоҹалыгла әлагәдар мәһдудијјәтләринин олмасына бахмајараг, Падшаһлыг һаггындакы тәблиғ ишиндә гәтијјәт вә ҹәсарәтлә иштирак етмәклә јашлы мәсиһчиләр, 40 ил мүддәтиндә сәһрада Мусаны мүшајиәт едән садиг Калебин изләри илә ҝедирләр. Иордан чајыны кечиб, Вә’д едилмиш дијара дахил оланда Калебин 79 јашы варды. Исраилин јенилмәз ордусунда алты ил вурушдугдан сонра, Калеб раһат јашаја биләрди. Лакин јох, о, Јәһудејанын дағлыг әразисиндә олан “бөјүк вә диварлы шәһәрләрин” алынмасы кими чәтин тапшырығы јеринә јетирмәји ҹәсарәтлә өз үзәринә ҝөтүрдү. Һәмин әрази, уҹабојлу Анакларын мәскәни иди. Јеһованын көмәји илә Калеб һәгигәтән дә ‘Рәббин сөјләдији кими онлары говду’ (Јешу 14:9-14; 15:13, 14). Әмин олун ки, сиз јашлы вахтынызда Падшаһлығын бәһрәсини тәгдим етмәјә давам едәндә, Калеблә олдуғу кими, Јеһова сизинләдир. Вә әҝәр сиз садиг галарсынызса, О, вә’д едилмиш јени дүнјада сизә јер верәҹәкдир (Ишаја 40:29-31; 2 Петер 3:13).
“Сапсағлам, тәравәтли олаҹаглар”
9, 10. Јашлы мәсиһчиләр иманда неҹә сағлам галырлар вә руһани фәаллыгларыны неҹә горујуб сахлајырлар? (11-ҹи сәһифәдә олан чәрчивәјә бахын.)
9 Јеһованын јашлы хидмәтчиләринин сәмәрәли олдугларына диггәт јетирәрәк, мәзмурчу охујурду: “Салеһләр хурма ағаҹытәк чичәкләнәҹәк, Ливандакы сидр ағаҹытәк уҹа олаҹаг... Сачлары ағаранда да бар верәҹәкләр, сапсағлам, тәравәтли олаҹаглар” (Мәзмур 92:12, 14).
10 Аһыл јашыныза бахмајараг, сиз руһани ҝүмраһлығынызы неҹә горујуб сахлаја биләрсиниз? Хурма ағаҹынын түкәнмәз ҝөзәллијинин сирри ондадыр ки, даима ширин сујун мәнбәјинә јахын битир. Ејни сурәтдә, сиз Аллаһын Кәламыны өјрәнәрәк вә Аллаһын тәшкилаты илә үнсијјәтдә олараг, руһани гүввәни Мүгәддәс Китабын һәгигәт суларындан әлдә едә биләрсиниз (Мәзмур 1:1-3; Јеремја 17:7, 8). Сизин руһани фәаллығыныз, сизи һәмиманлыларыныз үчүн чох гијмәтли едир. Бунун јаша долмуш баш каһин Јеһојада илә неҹә баш вердијини нәзәрдән кечирәк.
11, 12. а) Јәһуда падшаһлығынын тарихиндә Јеһојада һансы ваҹиб ролу ојнамышдыр? б) Һәгиги ибадәтин мараглары үчүн Јеһојада өз нүфузундан неҹә истифадә едирди?
11 Шөһрәтпәрәст шаһзадә Аталја өз нәвәләрини өлдүрүб, Јәһудејада һакимијјәти әлә кечирәндә, Јеһојаданын, еһтимал ки, јүздән артыг јашы варды. Јаша долмуш Јеһојада нә едә билди? О вә арвады тахтын јеҝанә сағ галмыш вариси Јеһоашы алты ил мә’бәддә ҝизләтдиләр. Бундан сонра Јеһојада гәти бир аддым атды — једди јашлы Јеһоашы падшаһ е’лан етди, Аталјаны исә өлдүрмәји әмр етди (2 Тарихләр 22:10-12; 23:1-3, 15, 21).
12 Падшаһын һимајәчиси кими, Јеһојада өз нүфузундан һәгиги ибадәтин мараглары үчүн истифадә едирди. “Јеһојада, өзү вә бүтүн халгла падшаһ арасында, Рәббин халгы олсунлар дејә, әһд кәсди”. Јеһојаданын әмринә ҝөрә халг јаланчы аллаһ олан Баалын евини учуртду вә онун гурбанҝаһларыны, бүтләрини вә каһинләрини мәһв етди. Һәм дә Јеһојаданын рәһбәрлији алтында Јеһоаш мә’бәд хидмәтләрини бәрпа етди вә мә’бәд үчүн олдугҹа зәрури олан тә’мири еләтдирди. “Јеһоаш, бүтүн ҝүнләриндә каһин Јеһојада она өјрәтдији мүддәтдә Рәббин ҝөзүндә доғру оланы етди” (2 Тарихләр 23:11, 16-19; 24:11-14; 2 Краллар 12:2). Јеһојада 130 јашында өләндә, “Исраилдә вә Аллаһла еви уғрунда јахшылыг” етдији үчүн, она хүсуси шәрәф верәрәк падшаһларын јанында басдырдылар (2 Тарихләр 24:15, 16).
13. Јашлы мәсиһчиләр ‘Аллаһла еви уғрунда јахшылығы’ неҹә едә биләрләр?
13 Ола биләр ки, пис сағламлыг вә ја диҝәр шәраитләр уҹбатындан сән һәгиги ибадәтин мараглары үчүн чох чалышмаг гүввәсиндә дејилсән. Буна бахмајараг, сән “Аллаһла еви уғрунда јахшылыг” едә биләрсән. Сән јығынҹаг ҝөрүшләринә ҝәлмәклә вә онларда иштирак етмәклә, һәмчинин ҝүҹүн чатдығы гәдәр тәблиғ хидмәти илә мәшғул олмагла Јеһованын руһани еви үчүн сә’ј ҝөстәрә биләрсән. Әҝәр сән Мүгәддәс Китабын нәсиһәтләрини һазырлыгла гәбул едирсәнсә, һәмчинин “садиг вә ағыллы гулу” вә јығынҹағы сәдагәтлә дәстәкләјирсәнсә, бу, мәсиһчи гардашлығыны мөһкәмләндирәҹәкдир (Матта 24:45-47). Сән һәм дә һәмиманлыларыны “мәһәббәтә вә хејирли ишләрә” тәшвиг едә биләрсән (Ибраниләрә 10:24, 25; Филимона 8, 9). Әҝәр һәвари Павелин нөвбәти мәсләһәтинә мүвафиг давранырсанса, башгалары үчүн хејир-дуа олаҹагсан: “Гоҹа кишиләр ајыг, вүгарлы, тәмкинли, иманда, мәһәббәтдә вә дөзүмдә сағлам олсунлар; гадынлар да ејни шәкилдә мүгәддәсләрә лајиг тәрздә даврансынлар, ифтирачы, шәраб дүшкүнү олмасынлар вә хејирхаһлыг тә’лим етсинләр” (Титуса 2:2-4).
14. Узун мүддәт ағсаггал кими хидмәт едән гардашлар һәгиги ибадәтин мараглары үчүн нә едә биләрләр?
14 Сән јығынҹагда узун илләр әрзиндә ағсаггал кими хидмәт едирсәнми? Јығынҹагда артыг узун мүддәт ағсаггал кими хидмәт едән гардаш мәсләһәт едир: “Илләрлә әлдә едилән мүдрикликдән башгаларынын рифаһы үчүн истифадә ет. Мәс’улијјәти башгаларына өтүр вә тәҹрүбәни һазырлыг руһу әкс етдирәнләрлә бөлүш... Башгаларында олан ҝизли габилијјәтләри ҝөрмәјә чалыш. Онлары инкишаф етдир вә јетишдир. Ҝәләҹәк үчүн тәмәл гој” (Тәснијә 3:27, 28). Падшаһлығын ҝенишләнмәкдә олан ишинә сәнин сәмими марағын, мәсиһчи гардашлығымызын диҝәр үзвләринә чохлу хејир-дуалар ҝәтирәҹәк.
“Рәббин доғру олдуғуну е’лан етсинләр”
15. Јашлы мәсиһчиләр “Рәббин доғру олдуғуну” неҹә е’лан едирләр?
15 Аллаһын јашлы хидмәтчиләри ‘Рәббин доғру олдуғуну е’лан етмәк’ вәзифәләрини севинҹлә јеринә јетирирләр. Әҝәр сән аһыл јашдасанса, сәнин сөзләрин вә әмәлләрин, Јеһованын сәнин ‘гајан’ олдуғуну вә Онда ‘һагсызлыг олмадығыны’ ҝөстәрә биләр (Мәзмур 92:15). Хурма ағаҹлары өз Јараданынын ҝөзәл хүсусијјәтләри барәдә сәссиз олараг шаһидлик едир. Сәнә исә Јеһова, һал-һазырда һәгиги ибадәти гәбул едән инсанлара тәблиғ етмәји е’тибар едиб (Тәснијә 32:7; Мәзмур 71:17, 18; Јоел 1:2, 3). Бу нәјә ҝөрә ваҹибдир?
16. Мүгәддәс Китабын һансы нүмунәси ‘Рәббин доғру олдуғуну е’лан етмәјин’ ваҹиблијини ҝөстәрир?
16 Исраилин рәһбәри Јешу ‘гоҹалдығы вә јашда ирәлиләдији заман’, “бүтүн Исраил ихтијарларыны вә башларыны вә һакимләрини вә рәисләрини чағырды” вә онлара Аллаһын салеһ ишләри барәсиндә хатырлатды. О деди: “Аллаһыныз Рәббин һаггынызда сөјләдији бүтүн јахшы шејләрдән һеч бир шеј боша чыхмады; сизин үчүн һамысы олду” (Јешу 23:1, 2, 14). Мүәјјән бир мүддәт әрзиндә бу сөзләр исраиллиләрин садиг галмаг әзмини мөһкәмләтди. Лакин Јешунун өлүмүндән сонра, “Рәбби вә Исраил үчүн етмиш олдуғу иши билмәјән башга бир нәсил төрәди. Вә Исраил оғуллары Рәббин ҝөзүндә пис оланы етдиләр вә Бааллара гуллуг етдиләр” (Һакимләр 2:8-11).
17. Јеһова Өз халгынын рифаһы үчүн кечмишдә вә бизим ҝүнләрдә һансы ишләри ҝөрмүшдүр?
17 Буҝүнкү мәсиһчи јығынҹағынын садиглији Аллаһын јашлы хидмәтчиләринин өјүдләриндән асылы дејил. Буна бахмајараг, Аллаһын Өз халгы үчүн кечмишдә вә бу сон ҝүнләрдә етдији ‘бүтүн бөјүк ишләри’ барәсиндә шаһидләрин дилиндән ешидәндә, Јеһоваја вә Онун вә’дләринә олан иманымыз мөһкәмләнир (Һакимләр 2:7; 2 Петер 1:16-19). Әҝәр сән артыг чохдан Јеһованын тәшкилатынын үзвүсәнсә, јашадығын әразидә вә ја өлкәдә Падшаһлығын тәблиғчиләринин аз олдуғу вә ја тәблиғ ишинә ҝүҹлү мүгавимәт ҝөстәрилдији вахтлары јадына сала биләрсән. Илләр өтдүкҹә Јеһованын бу вә ја диҝәр манеәләри арадан неҹә галдырдығыны вә Падшаһлыг ишинин артымыны ‘тезләндирдијини’ ҝөрүрсән (Ишаја 54:17; 60:22). Мүгәддәс Китаб һәгигәтләринә неҹә ајдынлыг ҝәтирилдијинә вә Аллаһын тәшкилатынын ҝөрүнән һиссәсинин тәдриҹән неҹә тәмизләндијинә диггәт јетирмисән (Сүлејманын мәсәлләри 4:18; Ишаја 60:17). Јеһованын салеһ ишләринә даир тәҹрүбәни башгалары илә бөлүшәрәк, онлары инкишаф етдирмәјә чалышырсанмы? Бу, мәсиһчи гардашлығыны нә гәдәр руһландыраҹаг вә мөһкәмләндирәҹәк!
18. а) ‘Рәббин доғру олдуғуну е’лан едән’ адамын сөзләринин узунсүрән тә’сирә малик олдуғуна даир нүмунә сөјләјин. б) Јеһованын салеһлијинә шәхси тәҹрүбәниздә неҹә әмин олмусунуз?
18 Бәс шәхсән сән өзүн Јеһованын севән гајғысыны вә рәһбәрлијини һисс етдијин анлар олубму? (Мәзмур 37:25; Матта 6:33; 1 Петер 5:7). Марта адында јашлы бир баҹы, башгаларыны бу сөзләрлә руһландырмағы хошлајырды: “Һәр нә олса да, Јеһованы һеч заман тәрк етмә. О сәнә дајаг олаҹаг”. Бу мәсләһәт, Мүгәддәс Китабы Марта илә өјрәнәрәк 1960-ҹы илләрин әввәлләриндә вәфтиз олунан Толминаја ҝүҹлү тәәссүрат бағышламышдыр. Толмина хатырлајыр: “Әрим вәфат едәндә, мән тамамилә руһдан дүшдүм. Лакин һәмин сөзләр мәнә, һеч бир мәсиһчи ҝөрүшүнү бурахмамаг гәтијјәтини верди. Хидмәти давам етдирмәк үчүн Јеһова һәгигәтән дә мәнә ҝүҹ верди”. Толмина һәмин мәсләһәти, нөвбәти илләр әрзиндә Мүгәддәс Китабы өјрәнмәкдә көмәк етдији бир чох адамлара тәкрар едирди. Шүбһәсиз ки, һәмиманлылары руһландырмагла вә Јеһованын доғру ишләри барәсиндә онлара данышмагла, сән онларын иманыны чох мөһкәмләндирә биләрсән.
Јеһова садиг олан јашлы хидмәтчиләрини јүксәк гијмәтләндирир
19, 20. а) Јеһова Өзүнүн јашлы хидмәтчиләринин фәалијјәтинә һансы нөгтеји-нәзәрлә јанашыр? б) Нөвбәти мәгаләдә нә мүзакирә олунаҹаг?
19 Миннәтдарлыг һисси чатышмајан буҝүнкү дүнјанын јашлы адамлар үчүн вахты тамам аздыр (2 Тимотејә 3:1, 2). Әҝәр онлары хатырлајырларса да, чох вахт онларын габагкы наилијјәтләринә — онларын инди јох, әввәлләр ким олдугларына ҝөрә хатырлајырлар. Бунун әксинә олараг, Мүгәддәс Китабда дејилир: “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (Ибраниләрә 6:10). Әлбәттә ки, Јеһова Аллаһ сизин кечмиш садиг ишләринизи хатырлајыр. Лакин О һәм дә, хидмәтдә инди етдикләриниз үчүн сизи гијмәтләндирир. Онун үчүн садиг јашлы мәсиһчиләр бәһрәли, иманда сағлам вә ҝүмраһдырлар; онлар Аллаһын гүввәсинә ҹанлы шәһадәтдирләр (Филипилиләрә 4:13).
20 Јеһованын бизим мәсиһчи гардашлығымызын јашлы үзвләринә олан нөгтеји-нәзәринә сән дә шәриксәнми? Әҝәр беләдирсә, сәндә онлара мәһәббәт тәзаһүр етдирмәк арзусу олаҹаг (1 Јәһја 3:18). Нөвбәти мәгаләдә, јашлы инсанларын тәләбатларына гајғы ҝөстәрәрәк онлара мәһәббәт тәзаһүр етдирмәјин бә’зи практики үсулларыны нәзәрдән кечирәҹәјик.
[Һашијә]
a Хурманын һәр будағында минә јахын ајрыҹа мејвә ола биләр вә чәкиси 8 килограм вә ја даһа артыг ҝәлә биләр. Бир јазычы һесабламышдыр ки, “мејвә верән һәр бир [хурма] ағаҹ өмрү әрзиндә саһибинә ики-үч тон хурма верир”.
Неҹә ҹаваб верәрдиниз?
• Јашлылар һансы тәрздә “мејвә верирләр”?
• Јашлы мәсиһчиләрин руһани фәаллығы нәјә ҝөрә чох гијмәтләндирилир?
• Јашлы адамлар “Рәббин доғру олдуғуну” неҹә е’лан едә биләрләр?
• Нәјә ҝөрә Јеһова, Она узун мүддәт хидмәт едәнләри јүксәк гијмәтләндирир?
[11-ҹи сәһифәдәки чәрчивә]
Онлар иманда неҹә сағлам галырлар?
Хидмәтдә чохиллик тәҹрүбәси олан мәсиһчиләрә иманда сағлам галмагда вә руһани ҝүмраһлыгларыны горујуб сахламагда нә көмәк едир? Ашағыда онларда бә’зиләринин сөзләри ҝәтирилир:
“Бизим Јеһова илә мүнасибәтләримиз һаггында бәһс едән Мүгәддәс Китаб ајәләрини охумаг чох ваҹибдир. Демәк олар ки, һәр ахшам мән Мәзмур 23 вә 91-ҹи фәсилләри әзбәр тәкрарлајырам” (Олив, 1930-ҹу илдә вәфтиз олунуб).
“Мән гаршыма мәгсәд гојмушам ки, вәфтиз олунанлар үчүн сөјләнилән һәр мә’рузәдә иштирак едим вә диггәтлә гулаг асым; санки мән дә вәфтиз олунаҹағам. Садиг галмаг үчүн Аллаһа һәср олунмамызы јаддашымызда тәзәләмәк чох ваҹибдир” (Һарри, 1946-ҹы илдә вәфтиз олунуб).
“Һәр ҝүн дуа етмәк, Јеһовадан һәмишә көмәк, мүдафиә, хејир-дуа диләмәк вә ‘бүтүн јолларында Ону танымаг’ олдугҹа ваҹибдир” (Сүлејманын мәсәлләри 3:5, 6) (Антонио, 1951-ҹи илдә вәфтиз олунуб).
“Јеһоваја узун илләр хидмәт етдикдән сонра да сәдагәтлә хидмәт едән адамларын сөһбәтләринә гулаг асараг, мән Она садиг галмаг әзминдә мөһкәмләнирәм” (Жоан, 1954-ҹү илдә вәфтиз олунуб).
“Ваҹибдир ки, биз өзүмүз һаггында чох дүшүнмәјәк. Малик олдуғумуз һәр шеји Аллаһын хејирхаһлығы сајәсиндә алмышыг. Бу ҹүр нөгтеји-нәзәрә малик олараг, биз руһани гиданы дүзҝүн мәнбәдән ахтараҹағыг, руһани гида исә, сона гәдәр таб ҝәтирмәк үчүн зәруридир” (Арлин, 1954-ҹү илдә вәфтиз олунуб).
[9-ҹу сәһифәдәки шәкил]
Јашлылар Падшаһлығын гијмәтли бәһрәсини тәгдим едирләр.
[10-ҹу сәһифәдәки шәкил]
Јашлыларын руһани фәаллығы чох гијмәтләндирилир.