Һәлимләр јери мирас алаҹаглар”. Бу неҹә мүмкүндүр?
“ЈӘГИН КИ, сиз Иса Мәсиһин “һәлимләр јери мирас алаҹаглар” кими руһландырыҹы сөзләри илә танышсыныз. Лакин инсанларын бир-бирләринә вә Јерә олан мүнасибәтләрини ҝөрдүкдә суал јараныр: Һәлимләр неҹә мирас алаҹаглар?” (Мәзмур 37:11).
Јеһованын Шаһиди олан Мирјам адлы бир гадын Мүгәддәс Китаб һаггында сөһбәтә белә бир суал илә башламышдыр. Сөһбәтә башладығы киши ҹавабында демишдир ки, әҝәр бу вә’ди Иса өзү верибсә, онда Јер күрәси һәјат үчүн јарарсыз харабалыг дејил, шүбһәсиз ки, јахшы бир мирас олаҹагдыр.
Онун ҹавабы никбин сәсләнир. Бәс ҝәләҹәјә бу ҹүр никбинликлә бахмаг үчүн әсасымыз вармы? Сөзсүз ки, вар, чүнки Мүгәддәс Китаб бизи бу вә’дин јеринә јетәҹәјинә әмин едир. Онун јеринә јетмәси Аллаһын бәшәријјәтә вә Јер күрәсинә даир нијјәти илә сых бағлыдыр, биз исә билирик ки, Аллаһ нијјәт етдији һәр шеји јеринә јетирир (Ишаја 55:11). Беләликлә, Аллаһын бәшәријјәтә даир илк нијјәти нәдән ибарәт олмушдур вә О, бу нијјәти һәјата неҹә кечәҹәкдир?
Аллаһын Јер күрәсинә даир дәјишмәз нијјәти
Јеһова Аллаһ Јер күрәсини хүсуси нијјәтлә јаратмышды. “Ҝөјләри јарадан Рәбб, дүнјаја шәкил верән вә ону јарадан, ону мөһкәмләдән вә ону бошуна јаратмајан, үзәриндә јашанылсын дејә она шәкил верән Аллаһ белә дејир: Рәбб мәнәм; вә башгасы јохдур” (Ишаја 45:18). Ҝөрдүјүмүз кими, Јер үзү инсанларын јашамасы үчүн јарадылмышды. Бундан әлавә, Аллаһ истәјир ки, инсанлар јер үзүндә әбәди јашасынлар. Аллаһ “јери тәмәлләри үзәриндә гурду; әбәдијјән сарсылмајаҹагдыр” (Мәзмур 104:5; 119:90).
Аллаһын јер үзүнә даир нијјәти, Онун илк инсанлара вердији тапшырыгда да өз әксини тапыр. Јеһова Адәмлә Һәвваја деди: “Сәмәрәли олун вә чохалын вә јер үзүнү долдурун вә она саһиб олун; вә дәнизин балыгларына вә ҝөјләрин гушларына вә јер үзәриндә һәрәкәт едән һәр ҹанлы шејә һаким олун” (Тәквин 1:28). Аллаһын илк инсан ҹүтүнә е’тибар етдији јер үзү һәм онлар үчүн, һәм дә онларын нәсилләри үчүн әбәди јашајыш мәскәни олмалы иди. Чох әсрләр сонра мәзмурчу дејирди: “Ҝөјләр Рәббин ҝөјләридир; фәгәт јери адәм оғулларына верди” (Мәзмур 115:16).
Ҝәләҹәјә даир олан бу ҝөзәл үмидин һәјата кечмәси үчүн Адәм вә Һәвва, Јеһова Аллаһы, Јараданы вә Һәјатверәни, өзләринин Һөкмдары кими танымалы вә Она һазырлыгла табе олмалы идиләр. Бу, онларын нәсилләринә дә аид иди. Јеһова илк кишијә белә бир ҝөстәриш верди: “Бағчанын һәр ағаҹындан истәдијин кими је; фәгәт јахшылығы вә пислији билмә ағаҹындан јемәјәҹәксән; чүнки ондан једијин ҝүндә мүтләг өләҹәксән” (Тәквин 2:16, 17). Адәмлә Һәвванын Еден бағында јашаја билмәләри үчүн, онлара бу садә вә ајдын ҝөстәришә гулаг асмаг лазым иди. Белә етмәклә онлар сәмави Аталарынын онлар үчүн етдикләринә миннәтдарлыгларыны билдирмиш олардылар.
Адәмлә Һәвва онлара верилән ҝөстәриши позараг, шүурлу сурәтдә Аллаһа гаршы чыханда, әлдә етдикләри һәр шејә ҝөрә борҹлу олдуглары Кәси рәдд етмиш олдулар (Тәквин 3:6). Беләликлә, онларын ҝөзәл Ҹәннәт евләри һәм онлар үчүн, һәм дә онларын нәсилләри үчүн итирилди (Ромалылара 5:12). Илк инсанларын итаәтсизлији Аллаһын јер үзүнә даир нијјәтинин һәјата кечмәсинә мане олдуму?
Дәјишмәјән Аллаһ
Аллаһ Малаки пејғәмбәрин васитәсилә демишдир: “Мән, Рәбб, мән дәјишмәрәм” (Малаки 3:6). Мүгәддәс Китаб үзрә франсыз алими Л. Фијон гејд етмишдир ки, бу ифадә Аллаһын вә’дләринин һәјата кечмәси илә сых бағлыдыр. Фијон јазыр: “Јеһова итаәтсиз инсанлары мәһв едә биләрди, лакин О, дәјишмәз олараг, Өз сөзүнә садиг галдығы үчүн әввәл вердији сөзү истәнилән шәраитдә јеринә јетирир”. Аллаһ фәрди инсана, милләтә вә ја бүтүн бәшәријјәтә вердији вә’дини унутмур вә һәмин вә’ди Өзү мүәјјән етдији вахтда јеринә јетирир. “Әбәди олараг — мин нәслә гәдәр әһдини, әмр етдији сөзү... унутмаз” (Мәзмур 105:8, 9, МКШ).
Бәс биз нә үчүн әмин ола биләрик ки, Јеһова јер үзүнә даир илк нијјәтини дәјишмәјиб? Она ҝөрә ки, Аллаһ тәрәфиндән илһам алмыш Јазыларда, јә’ни Мүгәддәс Китабда Аллаһын итаәткар бәшәријјәтә јер үзүнү верәҹәји нијјәти барәдә дәфәләрлә дејилир (Мәзмур 25:13; 37:9, 22, 29, 34). Бундан әлавә, Мүгәддәс Китабда дејилир ки, Јеһованын хејир-дуасыны алан кәсләр тәһлүкәсизликдә јашајаҹаг, “һәр кәс өз асмасы алтында вә өз әнҹир ағаҹы алтында отураҹаг; вә онлары горхудан олмајаҹаг” (Мика 4:4; Һезекиел 34:28). Јеһованын сечдикләри “евләр тикәҹәкләр вә јашајаҹаглар; вә бағлар салаҹаглар вә мејвәсини јејәҹәкләр”. Онлар һәтта чөл һејванлары илә дә сүлһ ичиндә јашајаҹаглар (Ишаја 11:6-9; 65:21, 25).
Мүгәддәс Китабда Аллаһын нијјәтинин неҹә јеринә јетәҹәјини баша дүшмәјә көмәк едән нүмунә вар. Сүлејман падшаһын һакимијјәти дөврүндә Исраил халгы чичәкләнир вә сүлһ ичиндә јашајырды. О заман “Сүлејманын бүтүн ҝүнләриндә Дандан Беер-шебаја гәдәр Јәһуда вә Исраил, һәр кәс өз асмасы вә әнҹир ағаҹы алтында, сүлһ ичиндә јашадылар” (1 Краллар 4:25). Мүгәддәс Китабда дејилир ки, Иса ‘Сүлејмандан даһа бөјүкдүр’ вә мәзмурчу Мәсиһин һакимијјәти һаггында пејғәмбәрҹәсинә дејир: ‘Онун ҝүнләриндә салеһ чичәкләнәҹәк вә ај јох олунҹаја гәдәр, сүлһ боллуғу олаҹаг’. О заман ‘јердә, дағлар башында, буғда боллуғу олаҹаг’ (Лука 11:31; Мәзмур 72:7, 16).
Өз сөзүнә садиг олан Јеһова Аллаһ инсанлара вә’д едилмиш мирасы, јә’ни јер үзүнү нәинки верәҹәк, һабелә онун илк ҝөзәллијини дә бәрпа едәҹәкдир. Вәһј 21:4 ајәсиндә дејилир ки, вә’д едилмиш јени дүнјада “Аллаһ онларын [инсанларын] ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр”. Бах елә о заман јер үзү әсл Ҹәннәтә чевриләҹәкдир (Лука 23:43).
Вә’д едилмиш мирасы неҹә әлдә етмәк олар?
Јер үзү, Падшаһы Иса Мәсиһ олаҹаг һакимијјәтин, јә’ни Падшаһлығын дөврүндә Ҹәннәтә чевриләҹәкдир. Бу һакимијјәт ҝөјдән идарә едәҹәкдир (Матта 6:9, 10). Әввәлҹә бу Падшаһлыг “јери тәләф едәнләри тәләф” едәҹәкдир (Вәһј 11:18; Даниел 2:44). Сонра Иса Мәсиһә, јә’ни ‘Сүлһүн Рәисинә’ даир бу пејғәмбәрлик сөзләри јеринә јетәҹәкдир: “Рәислијинин вә сүлһүн артмасына сон олмајаҹаг” (Ишаја 9:6, 7). Бу Падшаһлығын һакимијјәти алтында, дирилмә васитәсилә һәјата гајтарыланлары да дахил етмәклә, милјонларла инсанлар јери мирас ала биләҹәкләр (Јәһја 5:28, 29; Һәвариләрин ишләри 24:15).
Бу ҝөзәл мирасы кимләр ала биләр? Исанын сөзләринә диггәт јетирин: “Һәлимләр нә бәхтијардырлар! Чүнки јери мирас алаҹаглар” (Матта 5:5). Һәлим олмаг нә демәкдир? “Һәлим” сөзү адәтән лүғәтләрдә јумшаг, мүлајим, итаәткар вә сакит кими мүәјјән едилир. Лакин Мүгәддәс Китабда истифадә олунан јунан сөзү даһа дәрин мә’на кәсб едир. Мүгәддәс Китаб алими Вилјам Барклинин гејд етдији кими, бу сөзә “мүлајимлик дахилдир... лакин мүлајимлијин архасында полад мөһкәмлији дурур” (“New Testament Wordbook”). Бу кејфијјәт, гәзәбләнмәдән вә гисас алмағы арзу етмәдән, инҹикликләрин өһдәсиндән ҝәлмәјә көмәк едән дүшүнҹә тәрзинә ишарә едир. Бу, гүввә мәнбәјинә чеврилән, Аллаһла јахшы мүнасибәтләрин сајәсиндә мүмкүндүр (Ишаја 12:2; Филипилиләрә 4:13).
Һәлим инсан һәр ишдә тәвазөкарлыгла Аллаһын нормаларыны гәбул едир; о, өзүнүн вә јахуд башга инсанларын нөгтеји-нәзәринә ујғун давранмаг үчүн инадкарлыг ҝөстәрмир. Белә инсан өјрәнмәјә габилијјәтлидир вә Јеһова тәрәфиндән өјрәдилмәји арзу едир. Мәзмурчу Давуд јазмышдыр ки, Јеһова “мәзлумлары [һәлимләри] һагг јолу илә апарыр, Өз јолуну онлара өјрәдир” (Мәзмур 25:9, МКШ; Сүлејманын мәсәлләри 3:5, 6).
Јери мирас алаҹаг “һәлимләрин” арасында сиз дә олаҹагсынызмы? Әҝәр сиз Јеһованы вә Онун ирадәсини дәрк едәрәк Аллаһын Кәламыны сә’јлә өјрәнир вә өјрәндикләринизи һәјатынызда тәтбиг едирсинизсә, онда јер үзүндә гурулаҹаг Ҹәннәти мирас алмағыныза вә орада әбәди олараг јашамағыныза үмид вар (Јәһја 17:3).
[5-ҹи сәһифәдәки шәкил]
Аллаһын Јер күрәсинә даир нијјәти Онун Адәмлә Һәвваја вердији тапшырығында әкс олунурду.
[6 вә 7-ҹи сәһифәләрдәки шәкил]
Сүлејманын һакимијјәти дөврүндә һөкм сүрән сүлһ вә тәһлүкәсизлик инсанларын алаҹаглары мирасын неҹә олаҹағына даир тәсәввүр верир.
[Иҹазә илә]
Sheep and background hill: Pictorial Archive (Near Eastern History) Est.; Arabian oryx: Hai-Bar, Yotvata, Israel; farmer plowing: Garo Nalbandian
[7-ҹи сәһифәдәки шәкил]
Гаршыда әдаләтли јени дүнја дурур. Сиз дә орада олаҹагсынызмы?