‘Һәр шеји шикајәтсиз един’
«Һәр шеји шикајәтсиз... иҹра един» (ФИЛИПИЛИЛӘРӘ 2:14).
1, 2. Һәвари Павел Филипидәки вә Коринфдәки мәсиһчиләрә һансы мәсләһәти вермишди вә нә үчүн?
ФИЛИПИДӘКИ биринҹи әсрин мәсиһчи јығынҹағына јаздығы Аллаһдан илһам алмыш мәктубунда һәвари Павел бу шәһәрдәки һәмиманлылары һаггында хош сөзләр сөјләјирди. Һәвари Павел онлары сәхавәтли вә чалышган олдуглары үчүн тә’рифләјир вә јахшы ишләринә ҝөрә севиндијини билдирирди. Лакин бунунла јанашы, Павел ‘һәр шеји шикајәтсиз иҹра етмәји’ онлара хатырлатды (Филипилиләрә 2:14). О, нә үчүн белә бир хәбәрдарлыг вермишди?
2 Павел шикајәтләнмәјин нәјә ҝәтириб чыхара биләҹәјиндән хәбәрдар иди. Бир нечә ил әввәл о, Коринфдәки јығынҹаға дејинмәнин тәһлүкәли ола биләҹәјини хатырлатмышды. Павел гејд етмишди ки, исраиллиләр сәһрада оларкән Јеһованы дәфәләрлә гәзәбләндирдиләр. Неҹә? Пислијә мејл ҝөстәрмәклә, бүтпәрәстлик вә әхлагсызлыг етмәклә, Јеһованы имтаһана чәкмәклә вә дејинмәклә. Павел коринфлиләри бу нүмунәләрдән ибрәт дәрси алмаға чағырырды. О јазырды: «Дејинмәјин; онлардан бә’зиләри дејиндиләр вә өлдүрүҹү мәләк тәрәфиндән мәһв едилдиләр» (1 Коринфлиләрә 10:6-11).
3. Павелин нәсиһәти нә үчүн бу ҝүн дә өз әһәмијјәтини итирмәјиб?
3 Јеһованын мүасир хидмәтчиләри олан бизләр Филипи јығынҹағындакына бәнзәр руһ тәзаһүр етдиририк. Биз хејирли ишләр ҝөрмәјә сә’ј ҝөстәрир вә бир-биримизи севирик (Јәһја 13:34, 35). Анҹаг дејинмәнин кечмишдә Аллаһын халгына зәрәр ҝәтирдијини нәзәрә алараг, «һәр шеји шикајәтсиз... иҹра един» нәсиһәтинә диггәт јетирмәјә әсаслы сәбәбимиз вардыр. Ҝәлин әввәлҹә Мүгәддәс Јазылардакы дејинмә һалларыны нәзәрдән кечирәк. Сонра дејинмәнин бизә дә зәрәр вурмамасы үчүн едә биләҹәјимиз бә’зи шејләри нәзәрдән кечирәҹәјик.
Пис ҹамаат Јеһоваја гаршы дејинир
4. Исраиллиләр сәһрада наразылыгларыны неҹә билдирирдиләр?
4 Исраиллиләрин сәһрадакы 40 иллик сәјаһәти заманы баш верән һадисәләрлә бағлы Мүгәддәс Китабда «дејинмәк, шикајәтләнмәк, ҝилејләнмәк, наразылығыны билдирмәк» мә’насыны верән ибрани сөзү ишләдилир. Бә’зән исраиллиләр дејинәрәк һәјатларындан наразы олдугларыны билдирирдиләр. Мәсәлән, Мисир әсарәтиндән азад олдугдан ҹәми бир нечә һәфтә сонра «бүтүн Исраил иҹмасы Муса илә Һарунун әлиндән ҝилеј-ҝүзар етди». Исраиллиләр јемәкдән шикајәт едәрәк дејирдиләр: «Каш ки Мисир өлкәсиндә әт газанларынын јанында отуранда дојунҹа чөрәк једијимиз вахт Рәббин әлиндә өләјдик! Чүнки сиз бизи бу сәһраја буна ҝөрә ҝәтирдиниз ки, бүтүн иҹманы аҹлыгдан өлдүрәсиниз» (Чыхыш 16:1-3).
5. Исраиллиләрин шикајәти әслиндә кимә гаршы јөнәлмишди?
5 Әслиндә, Јеһова мәһәббәтлә исраиллиләрә гида вә су верәрәк, онлары сәһрада еһтијаҹлары олан һәр шејлә тә’мин етмишди. Онлар үчүн һеч вахт сәһрада аҹындан өлмәк тәһлүкәси јаранмамышды. Наразылыг әһвал-руһијјәси илә исраиллиләр өз вәзијјәтләрини шиширтдиләр вә дејинмәјә башладылар. Онларын шикајәтинин Муса вә Һаруна гаршы јөнәлмәсинә бахмајараг, Јеһованын ҝөзүндә бу наразылығын әсл һәдәфи Онун Өзү иди. Муса исраиллиләрә деди: «Сизин Она гаршы олан дејинмәјинизи ешидән Одур. Ахы биз кимик ки? Дејинмәјиниз бизә гаршы дејил, Рәббә гаршыдыр» (Чыхыш 16:4-8).
6, 7. Сајлар 14:1-3 ајәләриндән ајдын олдуғу кими, исраиллиләрин әһвал-руһијјәси неҹә дәјишди?
6 Бу һадисәдән чох кечмәмиш исраиллиләр јенидән дејиндиләр. Муса 12 нәфәр кишини Вә’д едилмиш дијары нәзәрдән кечирмәјә ҝөндәрди. Онлардан он нәфәри пис хәбәрлә гајытды. Нәтиҹәси нә олду? «Исраил өвладлары Мусаја вә Һаруна гаршы дејиндиләр; бүтүн иҹма онлара деди: “Каш Мисир торпағында вә јахуд да бу сәһрада өләјдик! Нә үчүн Рәбб бизи бу торпаға [Кән’ан] апарыр? Јә’ни биз гылынҹла гырылаг? Арвадларымыз вә ушагларымыз әсир олаҹаглар. Мисирә гајытмаг бизим үчүн даһа јахшы олмаздымы?”» (Сајлар 14:1-3).
7 Исраиллиләрин әһвал-руһијјәси неҹә дә дәјишилди! Әввәлҹә онлар Мисир әсарәтиндән гуртулдугларына, о ҹүмләдән, Гырмызы дәнизи кечәрәк азад олундугларына ҝөрә миннәтдарлыгдан ирәли ҝәләрәк Јеһоваја һәмд нәғмәси охудулар (Чыхыш 15:1-21). Сәһрада нараһатлыгларла үзләшәндә вә кән’анлылар гаршысында горхуја дүшәндә исә, Аллаһын халгынын миннәтдарлығы наразылыға чеврилди. Азадлыға чыхдыглары үчүн Аллаһа шүкүр етмәк әвәзинә, Ону, јанлыш олараг мәһрумијјәт кими гијмәтләндирдикләри шејдә ҝүнаһландырдылар. Дејинмәкләри, онларда Јеһованын гајғысына ҝөрә һәгиги миннәтдарлығын чатышмадығыны ҝөстәрирди. Она ҝөрә дә Аллаһын: «Нә вахта гәдәр бу пис ҹамаат Мәнә гаршы дејинәҹәк?» демәси тәәҹҹүблү дејил (Сајлар 14:27; 21:5).
Биринҹи әсрдә баш верән дејинҝәнлик
8, 9. Јунанҹа Мүгәддәс Јазыларда гәләмә алынан дејинҝәнлијә даир нүмунә ҝәтирин.
8 Әввәлки дејинҝәнлик һалларында инсанлар өз наразылыгларыны ачыг-ашкар ифадә едирдиләр. Лакин Иса Мәсиһ ерамызын 32-ҹи илиндә Чардаглар бајрамы заманы Јерусәлимдә оларкән «халг арасында онун һаггында чохлу деди-году вар иди» (Јәһја 7:12, 13, 32). Инсанлар онун һаггында пычылдашыр, бә’зиләри онун јахшы, диҝәрләри исә пис адам олдуғуну дејирдиләр.
9 Бир дәфә дә Иса шаҝирдләри илә бирликдә Леви, јә’ни Матта адланан верҝијығанын евиндә гонаг иди. «Дин алимләри вә фәрисејләр наразы галараг Онун шаҝирдләринә: “Нә үчүн верҝијығанлар вә ҝүнаһкарларла јејиб-ичирсиниз?” дедиләр» (Лука 5:27-30). Бир гәдәр сонра Галилејада «јәһудиләр [Исанын]: “Мән ҝөјдән енән чөрәјәм”, — дедији үчүн дејиндиләр». Һәтта Исанын бә’зи давамчылары белә онун сөјләдикләриндән икраһ һисси дујараг дејинмәјә башладылар (Јәһја 6:41, 60, 61).
10, 11. Јунанҹа данышан јәһудиләр нә үчүн шикајәтләндиләр вә мәсиһчи ағсаггаллары проблемин һәлл едилмәсиндән һансы нүмунәни ҝөтүрә биләрләр?
10 Ерамызын 33-ҹү илиндә Пентикост ҝүнүндән аз сонра баш вермиш дејинҝәнлик мүсбәт нәтиҹәләнди. Јәһудејадакы шаҝирдләр башга јерләрдән олан, јениҹә имана ҝәлмиш һәмиманлылара гонагпәрвәрлик ҝөстәрирдиләр, лакин бу заман әрзаг еһтијатларынын пајлашдырылмасы илә бағлы проблем јаранды. Бу барәдә белә мә’лумат верилир: «Јунанҹа данышан јәһудиләр ибраниҹә данышан јәһудиләрдән шикајәтләнмәјә башладылар. Чүнки онларын дул гадынлары ҝүндәлик јардым алмагдан мәһрум едилмишдиләр» (Һәвариләрин ишләри 6:1).
11 Онларын бу шикајәти сәһрадакы исраиллиләрин дејинҝәнлијиндән фәргләнирди. Јунанҹа данышан јәһудиләр худбинликлә өз һәјатларындан наразылыг етмирдиләр. Онлар бә’зи дул гадынларын гајғысына лазымынҹа галынмадығына диггәти јөнәлдирдиләр. Бундан башга, шикајәтчиләр гарышыглыг салмыр, Јеһоваја гаршы сәсләрини галдырмырдылар. Онлар һәвариләрә шикајәтләнирдиләр. Һаглы олараг шикајәт етдикләри үчүн һәвариләр тә’ҹили тәдбир ҝөрмәјә башладылар. Бу јеткин кишиләр мүасир мәсиһчи ағсаггалларына неҹә дә ҝөзәл нүмунә гојмушлар! Руһани чобанлар диггәтлә давранырлар ки, ‘гулагларыны тутуб касыбын фәрјадыны ешитмәјән’ олмасынлар (Сүлејманын мәсәлләри 21:13; Һәвариләрин ишләри 6:2-6).
Дејинҝәнлијин зәрәрли тә’сириндән өзүнүзү ҝөзләјин
12, 13. а) Дејинҝәнлијин нәтиҹәләрини тәсвир един. б) Инсаны дејинмәјә нә вадар едә биләр?
12 Нәзәрдән кечирдијимиз Мүгәддәс Китаб нүмунәләринин әксәријјәти дејинҝәнлијин кечмишдә Аллаһын халгына чохлу зәрәр вурдуғуну ҝөстәрир. Она ҝөрә дә, јахшы оларды ки, онун бу ҝүн ҝөстәрә биләҹәји зәрәрли тә’сири барәдә ҹидди дүшүнәк. Белә бир нүмунә бизә көмәк едә биләр. Бир чох металлар пасланмаја мејллидир. Әҝәр пасланманын илк әламәтләринә әһәмијјәт верилмәсә, метал о дәрәҹәдә пасланар ки, јарарсыз һала дүшәр. Сајсыз-һесабсыз автомобил механики насазлыг дејил, металын тәһлүкә јарадаҹаг дәрәҹәдә пасланмасы уҹбатындан тулланыр. Бу нүмунәни дејинҝәнлијә неҹә аид етмәк олар?
13 Бә’зи металлар пасланмаја мејлли олдуғу кими, гејри-камил инсанлар да шикајәтләнмәјә мејллидирләр. Белә бир мејли дујмаг үчүн ајыг олмаг лазымдыр. Рүтубәтли вә дузлу мүһит пасланманы сүр’әтләндирдији кими, чәтинликләр дә бизи дејинмәјә даһа чох мејлли едир. Ҝәрҝинлик кичик әсәбиләшмәни бөјүк наразылыға чевирә биләр. Бу системин сон ҝүнләриндә вәзијјәт писләшдикҹә, мүвафиг олараг, шикајәтләнмәјә дә сәбәбләр артаҹаг (2 Тимотејә 3:1-5). Беләликлә, Јеһованын бир хидмәтчиси диҝәринә гаршы дејинмәјә башлаја биләр. Бу, аз әһәмијјәтли мәсәләләр, мәсәлән, киминсә зәифликләриндән, габилијјәтиндән вә ја хидмәт етмәк үчүн хүсуси имканларынын олмасындан доған наразылыглар ола биләр.
14, 15. Шикајәтләнмәјә мејллилијин гаршысыны нә үчүн алмаг лазымдыр?
14 Наразылығын сәбәби нә олурса-олсун, шикајәтләнмәк мејлинин габағыны алмасаг, һәмишә һәр шејдән наразы вә дејинҝән ола биләрик. Бәли, дејинмәнин вурдуғу руһани зәрәр бизи тамамилә корлаја биләр. Исраиллиләр сәһрадакы һәјата ҝөрә дејинәндә, һәдләрини ашараг Јеһованы ҝүнаһландырмаға башладылар (Чыхыш 16:8). Гој бу һеч вахт бизимлә баш вермәсин!
15 Металын пасланмасынын гаршысыны, ону пасадавамлы боја илә рәнҝләјәрәк вә тәк-тәк дүшән пас ләкәләрини дәрһал е’мал едәрәк алмаг олар. Ејни тәрздә, әҝәр өзүмүзүн шикајәтләнмәјә мејлли олдуғумузу дујуругса, дәрһал бу һагда дуа етмәклә ону идарә едә биләрик. Неҹә?
Һәр шејә Јеһованын нөгтеји-нәзәри илә бахын
16. Шикајәтләнмәјә мејллилијә неҹә үстүн ҝәлә биләрик?
16 Дејинәндә биз фикримизи өзүмүзә вә проблемләримизә ҹәмләшдирир, Јеһованын Шаһиди кими малик олдуғумуз хејир-дуалары арха плана чәкирик. Шикајәтләнмәјә мејллилијә үстүн ҝәлмәк үчүн бу хејир-дуалары һәмишә јадда сахламалыјыг. Мәсәлән, һәр биримиз Јеһованын шәхси адыны дашымаг шәрәфинә маликик (Јешаја 43:10). Биз Онунла јахын мүнасибәт гура, һабелә «дуалары ешидән»лә һәр заман даныша биләрик (Мәзмур 65:2; Јагуб 4:8). Али һакимијјәтлә бағлы мәсәләни баша дүшдүјүмүзә вә Аллаһ гаршысында нөгсансызлығы горумағын бизим үчүн үстүнлүк олдуғуну билдијимизә ҝөрә һәјатымызын һәгиги мә’насы вардыр (Сүлејманын мәсәлләри 27:11). Биз Падшаһлыг һаггында хош хәбәри мүнтәзәм олараг тәблиғ едирик (Матта 24:14). Иса Мәсиһин фидијә гурбанлығына иман сајәсиндә тәмиз виҹдана маликик (Јәһја 3:16). Нәләрә таб ҝәтирмәли олдуғумуздан асылы олмајараг, биз садаладығымыз хејир-дуалара маликик.
17. Шикајәтләнмәјә әсаслы сәбәб олса белә, нәјә ҝөрә баш верәнләрә Јеһованын нөгтеји-нәзәри илә бахмаға чалышмалыјыг?
17 Ҝәлин баш верәнләрә өзүмүзүн дејил, Јеһованын нөгтеји-нәзәри илә бахаг. Мәзмурчу Давуд охујурду: «Ја Рәбб, јолларыны мәнә ҝөстәр, ардынҹа ҝетмәји мәнә өјрәт» (Мәзмур 25:4). Әҝәр шикајәтләнмәк үчүн әсаслы сәбәбимиз варса, бу, Јеһованын диггәтиндән јајынмамышдыр. О, мәсәләни дәрһал һәлл едә биләр. Белә исә, нә үчүн бә’зән чәтинлијин давам етмәсинә јол верир? Ола билсин, О буна биздә сәбир, дөзүмлүлүк вә иман кими ҝөзәл кејфијјәтләрин инкишаф етдирилмәси үчүн јол верир (Јагуб 1:2-4).
18, 19. Нараһатчылыглара шикајәтсиз таб ҝәтирдикдә һансы нәтиҹәләр әлдә олуна биләр?
18 Нараһатчылыглара шикајәтләнмәдән таб ҝәтирмәјимиз тәкҹә шәхсијјәтимизи јахшылашдырмагда көмәк етмир, бу, һәм дә бизи мүшаһидә едәнләрә јахшы тә’сир бағышлаја биләр. 2003-ҹү илдә бир груп Јеһованын Шаһиди автобусла Алманијадан Маҹарыстана конгресә ҝедирди. Сүрүҹү Јеһованын Шаһиди дејилди вә он ҝүн әрзиндә Шаһидләрлә олаҹағы ону һеч дә шевиндирмирди. Лакин јолун сонунда онун фикри тамамилә дәјишмишди. Нә үчүн?
19 Јолда бә’зи нараһатчылыглар олмушду. Лакин Шаһидләр бир дәфә дә олсун шикајәтләнмәдиләр. Сүрүҹү деди ки, Шаһидләр онун бу вахтаҹан олан ән јахшы сәрнишинләри идиләр. Шаһидләр ҝәлән дәфә онун гапысыны дөјәндә онлары ичәри дә’вәт едәҹәјини вә диггәтлә динләјәҹәјини вә’д етди. Баҹы-гардашлар ‘һәр шеји шикајәтсиз иҹра етмәклә’ неҹә дә ҝөзәл тәәссүрат ојатдылар!
Бағышламаг бирлијин ачарыдыр
20. Бир-биримизи нә үчүн бағышламалыјыг?
20 Әҝәр һәмиманлымыздан шикајәтимиз варса, онда неҹә? Мәсәлә ҹиддидирсә, о заман Матта 18:15-17 ајәләриндә јазылмыш Исанын сөјләдији принсипләри тәтбиг етмәк ҝәрәкдир. Лакин буна һәмишә еһтијаҹ олмур, чүнки наразылыгларын әксәријјәти бир о гәдәр дә әһәмијјәтли олмур. Нә үчүн јаранан вәзијјәтдән бағышламаг үчүн фүрсәт кими истифадә етмәјәк? Павел јазырды: «Бир-биринизә тәһәммүл един вә биринизин диҝәриндән шикајәти варса, бағышласын. Мәсиһ сизи бағышладығы кими, сиз дә бир-биринизи бағышлајын. Бүтүн бунларла јанашы, камил бирлијин бағы олан мәһәббәти ҝејин» (Колослулара 3:13, 14). Бағышламаг үчүн әсас тапа биләрикми? Мәҝәр Јеһованын биздән шикајәтләнмәјә сәбәби јохдур? Анҹаг, О, һәр дәфә мәрһәмәт ҝөстәрәрәк, бизи бағышлајыр.
21. Дејинән адама гулаг асанларда һансы һиссләр јарана биләр?
21 Наразылығын сәбәби нә олурса-олсун, дејинмәк проблемләри һәлл етмәјәҹәк. «Дејинмәк» кими тәрҹүмә олунан ибрани сөзү һәм дә «донгулданмаг» мә’насыны верир. Чох ҝүман ки, дејинҝән адамын јанында өзүмүзү нараһат һисс едир вә ондан узаг дурмаға чалышырыг. Әҝәр биз дејинириксә, бизи динләјәнләр дә ејни һиссләри кечирәҹәкләр. Онлар өзләрини о дәрәҹәдә нараһат һисс едә биләрләр ки, биздән кәнар дурмаға чалышарлар. Дејинмәклә киминсә диггәтини ҹәлб едә биләрик, анҹаг бунунла һеч кимин үрәјини фәтһ етмәк мүмкүн дејил.
22. Јеһованын Шаһидләри һагда бир гыз һансы үрәк сөзләрини сөјләмишдир?
22 Бағышламагла Јеһованын халгынын јүксәк гијмәтләндирдији бирлији горујуруг (Мәзмур 133:1-3). Бир Авропа өлкәсиндә 17 јашлы католик гыз Јеһованын Шаһидләринин филиалына мәктуб јазараг, онлара валеһ олдуғуну сөјләмишди. О јазмышдыр: «Бу тәшкилат таныдығым јеҝанә тәшкилатдыр ки, үзвләри нифрәт, тамаһкарлыг, дөзүлмәзлик, худбинлик вә һәрҹ-мәрҹликлә парчаланмајыб».
23. Нөвбәти мәгаләдә нәји мүзакирә едәҹәјик?
23 Һәгиги Аллаһ Јеһованын хидмәтчиләри олараг алдығымыз бүтүн руһани хејир-дуалара ҝөрә миннәтдарлыг бирлији горумаға вә шәхси мәсәләләрдә башгаларындан шикајәтләнмәкдән гачынмаға көмәк едәҹәк. Нөвбәти мәгаләдән Аллаһа мәгбул кејфијјәтләрин даһа тәһлүкәли бир шикајәтләнмәдән — Јеһованын тәшкилатынын јердәки һиссәсинә шикајәтләнмәкдән бизи неҹә горудуғуну өјрәнәҹәјик.
Хатырлајырсынызмы?
• Дејинмәк нә демәкдир?
• Дејинмәјин ҝөстәрдији тә’сири неҹә тәсвир етмәк олар?
• Дејинмәк мејлинин өһдәсиндән неҹә ҝәлә биләрик?
• Бағышламаға һазыр олмаг дејинмәкдән гачынмагда бизә неҹә көмәк едә биләр?
[6-ҹы сәһифәдәки шәкил]
Исраиллиләр әслиндә Јеһоваја гаршы дејинирдиләр!
[9-ҹу сәһифәдәки шәкил]
Сән баш верәнләрә Јеһованын нөгтеји-нәзәри илә бахмаға чалышырсанмы?