Диггәтинизи Јеһованын тәшкилатынын не’мәтләринә ҹәмләшдирин
«Биз Сәнин евинин, мүгәддәс мә’бәдинин не’мәтләри илә дојаҹағыг!» (МӘЗМУР 65:4).
1, 2. а) Мә’бәдин тикинтиси илә бағлы ишләр халга неҹә тә’сир ҝөстәрәҹәкди? б) Мә’бәдин тикинтиси үчүн Давуд һансы тәдарүкү ҝөрдү?
ГӘДИМ Исраилин падшаһы Давуд Ибраниҹә Мүгәддәс Јазыларда һаггында бәһс олунан ән мәшһур инсанлардан биридир. Чобан, мусигичи, пејғәмбәр вә падшаһ олан Давуд Јеһова Аллаһа там е’тибар едирди. Јеһоваја бәсләдији дәрин мәһәббәтдән ирәли ҝәләрәк онун үрәјиндә Аллаһ үчүн ев тикмәк арзусу ојанды. Бу ев вә ја мә’бәд Исраилдә һәгиги ибадәтин мәркәзи олаҹагды. Давуд билирди ки, мә’бәдин тикинтиси илә бағлы ишләр Аллаһын халгына севинҹ вә хејир-дуалар ҝәтирәҹәк. Буна ҝөрә дә, Давуд охујурду: «Нә бәхтијардыр евинин һәјәтләриндә јашајан, сечиб Өзүнә јахын етдијин инсан! Биз Сәнин евинин, мүгәддәс мә’бәдинин не’мәтләри илә дојаҹағыг!» (Мәзмур 65:4).
2 Давуда Јеһованын евини тикдирмәјә иҹазә верилмәди. Бу имтијаз онун оғлу Сүлејмана нәсиб олду. Давуд өзүнүн чох арзуладығы ишин башгасына һәвалә олунмасына ҝөрә шикајәтләнмәди. Онун үчүн ән әсасы мә’бәдин тикилмәси иди. О, Јеһовадан алдығы лајиһәни Сүлејмана верәрәк тикинтини сәмими гәлбдән дәстәкләди. Бундан башга, Давуд минләрлә левилини хидмәти бөлмәләрә ајырды вә мә’бәдин тикинтиси үчүн бөјүк мигдарда гызыл-ҝүмүш ианә етди (1 Салнамәләр 17:1, 4, 11, 12; 23:3-6; 28:11, 12; 29:1-5).
3. Аллаһын хидмәтчиләри һәгиги ибадәт үчүн ҝөрүлән ишләрә неҹә мүнасибәт ҝөстәрирләр?
3 Садиг исраиллиләр Аллаһын еви үчүн ҝөрүлән һазырлыг ишләрини дәстәкләјирдиләр. Јеһованын мүасир хидмәтчиләри олан бизләр дә Онун тәшкилатынын јерүзү һиссәсиндә һәгиги ибадәт үчүн ҝөрүлән ишләри дәстәкләјирик. Беләликлә, биз дә Давудун әһвал-руһијјәсинә малик олдуғумузу ҝөстәририк, наразылыг етмәјә мејлли дејилик. Әксинә, диггәтимизи Аллаһын тәшкилатынын ‘не’мәтләринә’ ҹәмләшдиририк. Сиз һеч һәгигәтән дә миннәтдарлыға лајиг олан бир чох јахшы шејләрин үзәриндә дүшүнмүсүнүзмү? Ҝәлин онлардан бә’зиләрини нәзәрдән кечирәк.
Рәһбәрлији үзәрләринә ҝөтүрән кәсләрә ҝөрә миннәтдарыг
4, 5. а) «Садиг вә ағыллы гул» она һәвалә едилән иши неҹә јеринә јетирир? б) Бә’зи шаһидләр алдыглары руһани гида һагда нә дејирләр?
4 Иса Мәсиһин өз маликанәси үзәринә тә’јин етдији ‘садиг вә ағыллы гула’ ҝөрә миннәтдар олмаға тутарлы сәбәбләр вар. Руһла мәсһ едилмишләрдән ибарәт гул синфи хош хәбәрин тәблиғиндә рәһбәрлији өз үзәринә ҝөтүрүр, ибадәт етмәк үчүн ҝөрүшләр тәшкил едир вә 400-дән артыг дилдә Мүгәддәс Китаба әсасланан әдәбијјат нәшр едир. Бүтүн јер үзүндә милјонларла инсан «вахтлы-вахтында» верилән бу руһани гиданы миннәтдарлыгла гәбул едир (Матта 24:45-47). Шүбһәсиз, бурада наразылыг етмәк үчүн һеч бир әсас јохдур.
5 Јаша долмуш Јеһованын Шаһиди Алфи гул синфинин нәшрләриндә тапдығы Мүгәддәс Китаба әсасланан мәсләһәтләри һәјатында тәтбиг едәрәк узун илләрдир ки, тәсәлли вә көмәк алыр. Алфи дәрин миннәтдарлыг һисси илә јазыр: «Јеһованын тәшкилаты олмасајды, мән нә едәрдим?» Петер вә Ермгарт да онилликләр бојунҹа Јеһоваја хидмәт едирләр. Ермгарт «Јеһованын мәһәббәтли вә гајғыкеш тәшкилатынын» тәгдим етдији әдәбијјата, о ҹүмләдән, ҝөрмә вә ешитмә габилијјәти зәиф олан хүсуси тәләбатлы инсанлар үчүн һазырланан әдәбијјата ҝөрә миннәтдарлығыны билдирир.
6, 7. а) Бүтүн дүнјада олан јығынҹагларын фәалијјәтинә нәзарәт неҹә һәјата кечирилир? б) Јеһованын тәшкилатынын јердәки һиссәси һаггында һансы үрәк сөзләри сөјләнилиб?
6 ‘Садиг гулу’ руһла мәсһ едилмишләрдән ибарәт кичик груп — Јеһованын Шаһидләринин Рәһбәрлик Шурасы тәмсил едир. Онлар Бруклиндә (Нју-Јорк) јерләшән Јеһованын Шаһидләринин үмумдүнја мәркәзи идарәсиндә хидмәт едирләр. Рәһбәрлик Шурасынын филиалларда хидмәт етмәјә тә’јин етдији тәҹрүбәли гардашлар бүтүн дүнјада мөвҹуд олан 98 000-дән артыг јығынҹағын фәалијјәтинә нәзарәт едирләр. Мүгәддәс Китаб тәләбләринә ҹаваб верән гардашлар јығынҹагларда ағсаггал вә хидмәти көмәкчи тә’јин олунурлар (1 Тимотејә 3:1-9, 12, 13). Ағсаггаллар рәһбәрлији үзәрләринә ҝөтүрәрәк, һимајәләриндә олан Аллаһын сүрүсүнү мәһәббәтлә отарырлар. Һәмин сүрүнүн үзвү олмаг вә үмумдүнја ‘гардашлыгда’ һөкм сүрән мәһәббәт вә бирлији өз үзәриндә һисс етмәк неҹә дә бөјүк хејир-дуадыр! (1 Петер 2:17; 5:2, 3).
7 Ајры-ајры баҹы-гардашлар ағсаггаллардан алдыглары мәһәббәт долу руһани рәһбәрлијә ҝөрә тез-тез миннәтдарлыгларыны билдирирләр. Мәсәлән, 30 јашларында олан мәсиһчи Берҝитин аиләси вардыр. Јенијетмә чағында о, пис достларын әһатәсинә дүшмүш вә аз гала ҝүнаһ ишләдәҹәкди. Лакин ағсаггалларын Мүгәддәс Китаба әсасланан ајдын мәсләһәти вә һәмиманлыларын көмәји сајәсиндә о, ҝизли тәһлүкәдән гуртула билди. Берҝит инди һансы һиссләри кечирир? О дејир: «Мән сон дәрәҹә миннәтдарам ки, һәлә дә Јеһованын бу ҝөзәл тәшкилатына мәхсусам». 17 јашлы Андреас белә дејир: «Бу, һәгигәтән дә Јеһованын тәшкилатыдыр, өзү дә дүнјанын ән јахшы тәшкилатыдыр». Јеһованын тәшкилатынын јердәки һиссәсинин ‘не’мәтләринә’ ҝөрә миннәтдар олмалы дејиликми?
Рәһбәрлик һәвалә олунанлар гејри-камилдирләр
8, 9. Давудун бә’зи мүасирләри неҹә даврандылар, бәс о, буна неҹә мүнасибәт ҝөстәрди?
8 Сөзсүз ки, һәгиги ибадәтдә рәһбәрлији һәјата кечирмәк үчүн тә’јин олунанлар гејри-камилдирләр. Онларын һамысы сәһвләрә јол верир, бә’зиләри дәрин көк салмыш зәифликликләри илә мүбаризә апарырлар. Буна ҝөрә мә’јус олмалыјыгмы? Хејр. Һәтта гәдим Исраилдә бир чох мәс’улијјәтләр е’тибар олунмуш шәхсләр дә ҹидди сәһвләрә јол верирдиләр. Мәсәлән, Давуд һәлә ҝәнҹ икән нараһат падшаһ Шаулу сакитләшдирмәк үчүн мусигичи кими хидмәт етмәјә чағырылды. Сонралар Шаул Давуду өлдүрмәјә чалышырды. Нәтиҹәдә Давуд ҹаныны хилас етмәк үчүн гачмалы олду (1 Шамуел 16:14-23; 18:10-12; 19:18; 20:32, 33; 22:1-5).
9 Башга исраиллиләр хаинлик етдиләр. Мәсәлән, Давудун орду башчысы Јоав Шаулун гоһуму Авнери өлдүрдү. Авшалом һакимијјәти әлә кечирмәк үчүн атасы Давуда суи-гәсд һазырлады. Давудун е’тибар етдији мәсләһәтчиси Ахитофел она хәјанәт етди (2 Шамуел 3:22-30; 15:1-17, 31; 16:15, 21). Бунунла белә, Давуд нә һиддәтләнәрәк шикајәтләнди, нә дә һәгиги ибадәтә арха чевирди. Әксинә, чәтинликләр Давуду Јеһовадан даһа мөһкәм јапышмаға вә Шаулдан гачдығы заман малик олдуғу дүзҝүн әһвал-руһијјәни сонралар да горумаға тәшвиг етди. Һәмин вахт Давуд охујурду: «Мәнә рәһм ет, еј Аллаһ, мәнә рәһм ет! Ҹанымы ҝөтүрүб Сәнин јанына пәнаһ ҝәтирмишәм. Бәлалар кечиб-ҝедәнәҹән ганадларынын алтына сығынаҹағам» (Мәзмур 57:1).
10, 11. Гертруд адлы мәсиһчи ҹаванлыгда нә илә үзләшмишдир вә һәмиманлыларын сәһвләри барәдә о, нә демишдир?
10 Бу ҝүн Аллаһын тәшкилатында хаинликдән шикајәтләнмәјә һеч бир әсасымыз јохдур. Нә Јеһова, нә Онун мәләкләри, нә дә руһани чобанлар хаин, пис адамларын мәсиһчи јығынҹағында галмасына јол вермәзләр. Буна бахмајараг, һамымыз өзүмүзүн вә ја Аллаһын диҝәр хидмәтчиләринин гејри-камиллији илә гаршылашырыг.
11 Узун мүддәт әрзиндә Јеһоваја хидмәт едән Гертруду ҹаванлығында фырылдагчылыгда иттиһам едәрәк, Падшаһлығын таммүддәтли хидмәтчиси олмадығыны демишдиләр. Бәс о буна неҹә мүнасибәт ҝөстәрмишди? Гертруд буна ҝөрә шикајәтләнирдими? Хејр. О, 2003-ҹү илдә 91 јашында вәфат етди. Бундан бир гәдәр әввәл ҝеријә һәјатына бојланараг демишди: «Һәјатым бојунҹа топладығым тәҹрүбәдән өјрәндим ки, ајры-ајры адамларын етдикләри сәһвләрә бахмајараг, Јеһова гејри-камил олан бизләрдән истифадә едәрәк Өз ваҹиб ишини истигамәтләндирир». Аллаһын диҝәр хидмәтчиләринин гејри-камиллији илә үзләшәркән Гертруд үрәкдән Јеһоваја дуа едирди.
12. а) Биринҹи әсрин мәсиһчиләриндән бә’зиләри һансы пис нүмунәни гојмушлар? б) Биз диггәтимизи нәјә ҹәмләшдирмәлијик?
12 Һәтта ән садиг мәсиһчиләрин белә гејри-камил олдугларыны нәзәрә алараг, ҝәлин тә’јин олунмуш гардашлар сәһвә јол верәндә ‘һәр шеји шикајәтсиз иҹра етмәјә’ давам едәк (Филипилиләрә 2:14). Биринҹи әсрин мәсиһчи јығынҹағынын бә’зи үзвләринин хошаҝәлмәз нүмунәсини изләмәјимиз неҹә дә кәдәрли оларды! Шаҝирд Јәһуданын сөзләринә ҝөрә о ҝүнләрдә мөвҹуд олан јаланчы мүәллимләр ‘һакимијјәти һеч сајыр, иззәтли варлыглары сөјүрдүләр’. Бүтүн бунлар аз имиш кими, бу ҝүнаһкарлар ‘дејинән вә өз талеләриндән шикајәт едәнләр’ идиләр (Јәһуда 8, 16). Ҝәлин дејинҝән шикајәтчиләрин јолларындан узаг дураг вә диггәтимизи садиг гул васитәсилә алдығымыз јахшы шејләрә ҹәмләшдирәк. Ҝәлин Јеһованын тәшкилатынын ‘не’мәтләрини’ гијмәтләндирәк вә ‘һәр шеји шикајәтсиз иҹра едәк’.
«Бу чәтин сөздүр»
13. Иса Мәсиһин мүәјјән тә’лимләринә бә’зиләри неҹә мүнасибәт ҝөстәрдиләр?
13 Биринҹи әсрдә бә’зиләри тә’јин олунмуш хидмәтчиләрә гаршы дејиндикләри һалда, башгалары Исанын тә’лимләриндән наразылыгларыны билдирирдиләр. Јәһја 6:48-69 ајәләриндә белә бир һадисә нәгл олунур. Иса: «Мәним әтими јејиб, ганымы ичәнин әбәди һәјаты вардыр» деди. Лакин шаҝирдләриндән бир чоху буну ешитдикдә: «Бу чәтин сөздүр. Ону ким динләјә биләр?» — дејә е’тираз етдиләр. Иса «шаҝирдләринин буна дејиндикләрини» дујмушду. «Бу замандан е’тибарән шаҝирдләрдән бир чоху Ондан ајрылыб, артыг Онунла ҝәзмирди». Лакин шаҝирдләрин һамысы дејинмирди. Иса 12 һәваридән: «Јохса сиз дә ҝетмәк истәјирсиниз?» — дејә сорушанда, һәвари Петер ҹаваб верди: «Ја Рәбб, биз кимин јанына ҝедә биләрик? Әбәди һәјатын сөзләри Сәндәдир. Биз дә иман етдик вә билирик ки, Јашајан Аллаһын Оғлу Мәсиһ Сәнсән».
14, 15. а) Нәјә ҝөрә бә’зиләри мәсиһчи тә’лимләринин мүәјјән ҹәһәтләри илә разылашмырлар? б) Емануелин нүмунәсиндән нә өјрәнирик?
14 Мүасир дөврдә Аллаһын халгынын арасында мәсиһчи тә’лиминин бә’зи ҹәһәтләри илә разылашмајан вә Јеһованын тәшкилатынын јердәки һиссәсинә гаршы дејинән чох аз адам олур. Бәс бу нә үчүн баш верир? Белә дејинмә чох вахт Аллаһын ишләри иҹра етмә үсулуну анламамаларындан ирәли ҝәлир. Јарадан һәгигәти Өз халгына тәдриҹән ачыглајыр. Буна ҝөрә бизим Мүгәддәс Китаб тә’лимләри һаггында олан анлајышымыз вахташыры дәгигләшдирилир. Јеһованын халгынын әксәријјәти белә дәгигләшдирилмәләрә севинир. Бә’зиләри «һәддән артыг салеһ» олараг, дәјишикликләрә һиддәтләнирләр (Ваиз 7:16). Бурада гүрур да рол ојнаја биләр, бә’зиләри исә мүстәгил дүшүнҹә тәрзинин торуна дүшә биләрләр. Нә сәбәбдән олурса-олсун, белә дејинмә бизи ҝеријә, дүнјаја вә онун јолларына чәкә биләҹәји үчүн тәһлүкәлидир.
15 Белә бир нүмунәни нәзәрдән кечирәк. Емануел «садиг вә ағыллы гул»ун нәшрләриндән охудуғу бә’зи фикирләрлә разылашмырды (Матта 24:45). О, мәсиһчи әдәбијјатыны охумағы дајандырды, сонра исә јерли јығынҹағын ағсаггалларына артыг Јеһованын Шаһиди олмаг истәмәдијини сөјләди. Лакин аз бир мүддәт әрзиндә о баша дүшдү ки, Јеһованын тәшкилатынын тә’лимләри һәгигәтән дә дүздүр. О, шаһидләрлә әлагә сахлады, сәһвини е’тираф етди вә јенидән Јеһованын Шаһиди олду. Инди о, јенә дә хошбәхтдир.
16. Мүәјјән мәсиһчи тә’лимләринә даир шүбһәләримизи арадан галдырмагда бизә нә көмәк едә биләр?
16 Бәс әҝәр Јеһованын тәшкилатынын мүәјјән тә’лимләринә даир шүбһәләримиз олдуғу үчүн наразылығымызы билдирмәк истәјәриксә, онда неҹә? Ҝәлин сәбирсиз олмајаг. ‘Садиг гул’ суалымыза ҹаваб верәҹәк вә шүбһәләримизи арадан галдыраҹаг мә’лумат нәшр едә биләр. Мәсиһчи ағсаггалларына көмәк үчүн мүраҹиәт етмәк дә мүдриклик оларды (Јәһуда 22, 23). Дуа, шәхси өјрәнмә вә јеткин мәсиһчиләрлә үнсијјәт шүбһәләри арадан галдырмагда вә Јеһованын үнсијјәт каналы васитәсилә өјрәндијимиз, иманы мөһкәмләндирән Мүгәддәс Китаб һәгигәтләринә гаршы миннәтдарлығымызы артырмагда көмәк едә биләр.
Мүсбәт әһвал-руһијјәни гору
17, 18. Наразылыг етмәк әвәзинә һансы әһвал-руһијјәни горумалыјыг вә нә үчүн?
17 Е’тираф етмәк лазымдыр ки, гејри-камил инсанлар ҝүнаһа мејли мирас алмышлар вә бә’зиләринин әсассыз јерә шикајәтләнмәјә чох ҝүҹлү мејли ола биләр (Јарадылыш 8:21; Ромалылара 5:12). Лакин дејинҝәнлик етсәк, Јеһова Аллаһла мүнасибәтләримизи тәһлүкә алтына алмыш оларыг. Буна ҝөрә дә, һәр һансы дејинмәк истәјимизи идарә етмәлијик.
18 Јығынҹагда нәјә ҝөрә исә наразылығымызы билдирмәкдәнсә, јахшы оларды ки, мүсбәт әһвал-руһијјәни горујаг вә даим мәшғул, севинҹли, һөрмәтҹил, таразлы вә иманда сағлам һәјат тәрзи сүрәк (1 Коринфлиләрә 15:58; Титуса 2:1-5). Јеһова Өз тәшкилатында баш верән һәр шеји нәзарәти алтында сахлајыр вә Иса биринҹи әсрдә олдуғу кими, инди дә һәр јығынҹагда ишләрин ҝедишатындан хәбәрдардыр (Вәһј 1:10, 11). Сәбирлә Аллаһы вә јығынҹағын Башчысы олан Мәсиһи ҝөзлә. Онлар мәсәләләри јолуна гојмаг үчүн мәс’улијјәтли чобанлардан истифадә едә биләрләр (Мәзмур 43:5; Колослулара 1:18; Титуса 1:5).
19. Нә гәдәр ки, Падшаһлыг бәшәријјәтин ишләрини там нәзарәти алтына алмајыб, диггәтимизи нәјә ҹәмләшдирмәлијик?
19 Тезликлә бу пис систем сона чатаҹаг вә Хиласкар Падшаһлыг бәшәријјәтин бүтүн ишләрини там нәзарәти алтына алаҹагдыр. О вахт ҝәләнәдәк һәр биримиз үчүн мүсбәт әһвал-руһијјәни горумаг нә гәдәр дә ваҹибдир! Бу, диггәти һәмиманлыларымызын сәһвләринә ҹәмләшдирмәкдәнсә, онларын мүсбәт кејфијјәтләрини ҝөрмәјә көмәк едәҹәк. Диггәти онларын јахшы кејфијјәтләринә ҹәмләшдирмәклә хошбәхтлик тапаҹаг, иманымызы мөһкәмләндирәҹәк вә руһланаҹағыг. Артыг дејиниб емосионал ҹәһәтдән ҝүҹдән дүшмәјәҹәјик.
20. Мүсбәт әһвал-руһијјә һансы хејир-дуалары нәзәрдән гачырмамаға көмәк едәҹәк?
20 Һәмчинин, мүсбәт әһвал-руһијјә сајәсиндә, Јеһованын тәшкилатынын јердәки һиссәсиндә хидмәт едәркән алдығымыз чохлу хејир-дуалары нәзәрдән гачырмајаҹағыг. Бу тәшкилат дүнјада каинатын Һөкмдарына садиг олан јеҝанә тәшкилатдыр. Ваһид һәгиги Аллаһ Јеһоваја ибадәт етмәк үстүнлүјүнә малик олдуғун үчүн һансы һиссләри кечирирсән? Гој сәндә дә: «Еј дуалары ешидән, бүтүн бәшәр һүзуруна ҝәләҹәк. Нә бәхтијардыр евинин һәјәтләриндә јашајан, сечиб Өзүнә јахын етдијин инсан! Биз Сәнин евинин, мүгәддәс мә’бәдинин не’мәтләри илә дојаҹағыг!» дејә охујан Давудун әһвал-руһијјәси олсун (Мәзмур 65:2, 4).
Хатырлајырсынызмы?
• Биз нә үчүн јығынҹагда рәһбәрлији үзәрләринә ҝөтүрән гардашлара ҝөрә миннәтдар олмалыјыг?
• Мәс’улијјәтли гардашлар сәһвә јол верәндә неҹә мүнасибәт ҝөстәрмәлијик?
• Мүгәддәс Китаб тә’лимләринин анлајышынын дәгигләшдирилмәсинә неҹә јанашмалыјыг?
• Шүбһәләрә үстүн ҝәлмәкдә мәсиһчијә нә көмәк ола биләр?
[12-ҹи сәһифәдәки шәкил]
Давуд Сүлејмана мә’бәдин лајиһәсини верди вә һәгиги ибадәти сәмими гәлбдән дәстәкләди.