Аллаһа јахынлашын
Гајғыкеш Чобан
«АЛЛАҺ гајғыма галырмы?» Нә вахтса өзүнүзә бу суалы вермисинизсә, билин ки, сиз тәк дејилсиниз. Чохларымыз әзаб-әзијјәтлә, чәтинликләрлә үзләшмишик вә белә анларда фикирләшмишик: ҝөрәсән, уҹсуз-буҹагсыз Каинатын Јараданы шәхсән бизә диггәт јетирирми? Јеһова Аллаһын һәр биримизин гајғысына галыб-галмадығыны билмәлијик. Јеһованы һамыдан јахшы таныјан Иса јер үзүндә оланда бир мәсәлин көмәјилә бу суала үрәкисиндирән ҹаваб вермишди.
Чобанын өз сүрүсүнә гајғы ҝөстәрдији барәдә нүмунә чәкәрәк Иса деди: «Бир адамын јүз гојуну варса вә онлардан бири јолуну азарса, дохсан доггузуну атыб дағлара, јолуну азан гојуну ахтармаға ҝетмәзми? Вә әҝәр ону тапа билсә, сизә доғрусуну дејирәм: јолуну азмајан дохсан доггузу үчүн севиндијиндән артыг онун үчүн севинәр. Беләҹә дә ҝөјләрдәки Атанызын елә бир мурады јохдур ки, бу кичикләрдән бири һәлак олсун» (Матта 18:12-14). Ҝәлин ҝөрәк Иса бурада Јеһованын Өз хидмәтчиләринә ајры-ајрылыгда шәфгәтлә гајғы ҝөстәрдијини неҹә тәсвир едир.
Чобан һәр гојунун гејдинә галмаға мәсулијјәтлә јанашырды. Әҝәр гојунлардан бири итәрдисә, чобан онун һансы олдуғуну билирди. О, гојунларыны өзүнүн гојдуғу адла таныјырды (Јәһја 10:3). Гајғыкеш чобан итмиш гојуну сүрүјә гајтармајынҹа раһатлашмырды. О, азмыш гојунун ахтарышына јолланмагла галан 99-ну тәһлүкәјә атмырды. Чобанлар чох вахт сүрүләрини бир јердә отарырдылар вә гојунлар бир-биринә гарышырдыa. Сүрүдән азмыш гојуну ахтармаға ҝедән чобан галан 99-ну мүвәггәти олараг диҝәр чобанлара тапшырырды. Чобан итмиш гојуну тапанда вә она һеч бир зәрәр дәјмәдијини ҝөрәндә севинирди. О, үркмүш һејваны чијинләринә гојуб тәһлүкәсиз јерә, сүрүјә ҝәтирирди (Лука 15:5, 6).
Иса бу мәсәли изаһ едәрәк деди ки, Аллаһ ‘бу кичикләрдән биринин һәлак олмасыны’ истәмир. Бир гәдәр әввәл Иса шаҝирдләрини она ‘иман едән бу кичикләрдән бирини’ бүдрәтмәкдән чәкиндирмишди (Матта 18:6). Бәс Исанын мәсәлиндән Јеһова һаггында нә өјрәнирик? О, һәр бир гојунун, һәтта дүнјанын ҝөзүндә әһәмијјәтсиз олан ‘кичикләрин’ там гајғысына галан бир Чобандыр. Бәли, Аллаһын ҝөзүндә Онун һәр бир хидмәтчиси гијмәтли вә тәкраролунмаздыр.
Әҝәр сиз Аллаһ үчүн дәјәрли олдуғунуза әмин олмаг истәјирсинизсә, нәјә ҝөрә Бөјүк Чобан Јеһова Аллаһ вә Она јахынлашмағын неҹә мүмкүн олдуғу һаггында даһа чох өјрәнмәјәсиниз? Белә етмәклә сиз итмиш гојун мәсәлини Исанын ағзындан ешидән һәвари Петердәки әминлијә малик олаҹагсыныз. Петер даһа сонра јазмышды: «Бүтүн гајғынызы Онун [Аллаһын] үзәринә гојун, чүнки сизин гајғыныза галан Одур» (1 Петер 5:7).
[Һашијә]
a Гојунлары ајырмаг һеч дә чәтин дејилди, чүнки һәр гојун өз чобанынын сәсләмә тәрзини таныјырды (Јәһја 10:4).