Ҝәләҹәкдә бизи нә ҝөзләјир?
БУ СУАЛЫН ҸАВАБЫНЫ ТАПМАГ НӘ ҮЧҮН ВАҸИБДИР? Инсанын сабаһа мүнасибәти буҝүнкү давранышына тәсир едир. Мәсәлән, ҝәләҹәјә үмиди олмајанлар «ҝәлин јејәк вә ичәк, чүнки сабаһ өләҹәјик» әһвал-руһијјәси илә јашајырлар (1 Коринфлиләрә 15:32). Һәјата белә мүнасибәт гәлб раһатлығына јох, гарынгулулуға, сәрхошлуға вә нараһатчылыға ҝәтириб чыхарыр.
Әҝәр ҝәләҹәјимиз тамамилә инсанларын әлиндә олсајды, сабаһа һеч бир үмидимиз галмазды. Һава, су вә торпаг ҝөрүнмәмиш дәрәҹәдә чиркләниб. Нүвә мүһарибәси тәһлүкәси вә террор актлары артмагдадыр. Бүтүн дүнјада милјардларла инсан хәстәлик вә јохсуллугдан әзијјәт чәкир. Буна бахмајараг, ишыглы ҝәләҹәјә үмид етмәјимизә тутарлы әсаслар вар.
Инсанлар ҝәләҹәји габагҹадан дәгиг дејә билмәдикләри һалда, Јеһова Аллаһ Өзүнү «ахыры әввәлдән, баш вермәмиш һадисәләри әзәлдән билдирән» кими тәсвир едир (Јешаја 46:10). Јеһова ҝәләҹәкдә олаҹаг һадисәләр барәдә нә дејир?
Мүгәддәс Китаб нә дејир?
Јеһова јерин вә орадакы һәјатын мәһв едилмәсинә јол вермәјәҹәк. Чүнки Мүгәддәс Китабда вәд едилир ки, Аллаһ ‘јери тәләф едәнләри тәләф едәҹәк’ (Вәһј 11:18). Өзүнүн Падшаһлығы, јәни сәмави һакимијјәти васитәсилә Јеһова јери писликләрдән тәмизләјәҹәк вә башланғыҹда нијјәт етдији вәзијјәтә ҝәтирәҹәк (Јарадылыш 1:26-31; 2:8, 9; Матта 6:9, 10). Мүгәддәс Китабын нөвбәти ајәләри јер үзүндә јашајан һәр бир инсана тезликлә тәсир едәҹәк һадисәләри тәсвир едир.
Мәзмур 46:8, 9. «Ҝәлин, ҝөрүн Рәббин ишләрини, дүнјада етдији виранәлији. О, јерин уҹгарларынадәк дөјүшләри дајандырар, каманлары гырар, низәләри сындырар, дөјүш арабаларыны ода атар».
Јешаја 35:5, 6. «О вахт корларын ҝөзләри, карларын гулаглары ачылаҹаг, ахсаглар ҹејран кими һоппанаҹаг, лалларын дили севинҹлә нәғмә дејәҹәк, чүнки сәһрада булаглар фышгыраҹаг, гуру торпагда чајлар ахаҹаг».
Јешаја 65:21, 22. «Онлар евләр тикиб орада мәскунлашаҹаг, мејнәликләр әкәҹәк, бәһрәләриндән јејәҹәк. Тикдикләри евдә өзҝәләр јашамајаҹаг, әкдикләри бағын мејвәләрини башгалары јемәјәҹәк».
Даниел 2:44. «Ҝөјләрин Аллаһы һеч вахт дағылмајан бир падшаһлыг гураҹаг вә бу падшаһлыг башга халгын әлинә кечмәјәҹәк. О бүтүн әввәлки падшаһлыглары әзиб-дағыдаҹаг, өзү исә әбәди галаҹаг».
Јәһја 5:28. «Елә бир саат ҝәлир ки, гәбирләрдә оланларын һамысы Онун [Исанын] сәсини ешидәҹәкләр вә гәбирләриндән чыхаҹаглар».
Вәһј 21:3, 4. «Аллаһын Өзү онларла олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди».
Мүгәддәс Китабын вердији ҹаваблар әсл гәлб раһатлығыны неҹә ҝәтирир?
Илк бахышдан јухарыда тәсвир едиләнләр мүмкүн олмајаҹаг бир шеј кими ҝөрүнә биләр. Амма бүтүн бунлары инсанлар јох, Јеһова Аллаһ вәд едир. О исә ‘јалан данышмыр’ (Титуса 1:2).
Әҝәр сиз Аллаһын вәдләринә етибар етмәји вә Онун ганунларына мүвафиг јашамағы өјрәнсәниз, ән чәтин шәраитләрдә белә, гәлб раһатлығынызы горујуб сахлајаҹагсыныз. Мүһарибәләр, јохсуллуг, хәстәлик вә һәтта гоҹалыгла бағлы проблемләр вә ја өлүмүн јахынлашмасы — бунлардан һеч бири сизи раһатлығыныздан мәһрум едә билмәјәҹәк. Нә үчүн? Чүнки сиз Аллаһын Падшаһлығынын бүтүн бу писликләри арадан галдыраҹағына әмин олаҹагсыныз.
Ҝәләҹәјә даир белә әминлијә неҹә малик ола биләрсиниз? Сиз ‘ағлынызы јениләшдирмәли’ вә ‘Аллаһын јахшы, мәгбул вә камил ирадәсинин нә олдуғуну дәрк етмәлисиниз’ (Ромалылара 12:2). Мүгәддәс Китаб вәдләринин етибарлы олдуғуна даир, чох еһтимал ки, сизә әлавә сүбутлар лазым олаҹаг. Бу ҹүр арашдырма апармаг сәј ҝөстәрмәјә дәјәр. Демәк олар ки, һәјатда һеч бир шеј инсана белә бөјүк гәлб раһатлығы ҝәтирмир.
[8 вә 9-ҹу сәһифәләрдәки шәкилләр]
Аллаһын Кәламында ҝәләҹәк һаггында нә дејилир?