Јахын ҝәләҹәјимизә даир пејғәмбәрликләр

ИНСАНЛАРЫН вә јерин ҝәләҹәји һагда данышаркән һәвари Петер јазмышдыр: «Биз Онун [Аллаһын] вәдинә ҝөрә јени ҝөјләр вә јени јер ҝөзләјирик ки, онларда салеһлик өмүр сүрүр» (2 Петер 3:13). «Јени ҝөјләр вә јени јер» һагда вәд илк өнҹә Јешаја пејғәмбәр васитәсилә верилмишди (Јешаја 65:17; 66:22). Һәмин пејғәмбәрлијә истинад етмәклә Петер ҝөстәрди ки, онун ҝүнләриндә бу пејғәмбәрлик һәлә там јеринә јетмәјиб.

Сонралар, тәхминән ерамызын 96-ҹы илиндә һәвари Јәһјаја верилән вәһјдә һәмин ‘јени јер’ Аллаһын Падшаһлығынын ҝәтирәҹәји хејир-дуаларла әлагәләндирилир (Вәһј 21:1-4). Һәвари Павел кими, Исанын да Аллаһын Падшаһлығынын ҝәлиши әрәфәсиндә дүнјадакы вәзијјәт һагда дедији сөзләр ҝөзүмүзүн габағында јеринә јетир. Буна ҝөрә дә, биз бу Падшаһлығын тезликлә јени дүнјаны тәсис едәҹәјини ҝөзләјә биләрик. Һәмин дүнја неҹә олаҹаг? Бу һагда Мүгәддәс Јазыларын «Јешаја» китабындан өјрәнә биләрик.

Јени дүнјада алаҹағымыз хејир-дуалар

Бүтүн дүнјада сүлһ вә ибадәтдә бирлик. «Онлар гылынҹларындан котан, низәләриндән исә дәрјаз дүзәлдәҹәк. Милләт милләтә гаршы гылынҹ галдырмајаҹаг, артыг дава етмәји өјрәнмәјәҹәк» (Јешаја 2:2-4).

Инсанларла һејванлар арасында сүлһ. «О ҝүн гурдла гузу бир јердә јашајаҹаг, бәбирлә чәпиш бирҝә јатаҹаг, бузов, ҝәнҹ аслан вә бәсләнмиш мал-гара јан-јана дураҹаг, онлары балаҹа ушаг ҝәздирәҹәк. Инәклә ајы бир јердә отлајаҹаг, онларын балалары бир јердә јатаҹаг, шир дә буға тәк саман јејәҹәк... Мүгәддәс дағымын һеч бир јериндә һеч кимә зәрәр дәјмәјәҹәк, һеч бир кәс о бирисини мәһв етмәјәҹәк, һәгигәтән, сулар дәнизи неҹә долдурурса, дүнја да Рәббин билији илә елә долаҹаг» (Јешаја 11:6-9).

Һамы үчүн бол гида. «Бу дағда Ордулар Рәбби бүтүн халглар үчүн зәнҝин јемәкләрдән, ҝөзәл шәраблардан ибарәт зијафәт дүзәлдәҹәк, орада ән ләзиз јемәкләр, ән дадлы шәраблар олаҹаг» (Јешаја 25:6).

Өлүм олмајаҹаг. «[Аллаһ] өлүмү әбәди олараг јох едәҹәк, Худавәнд Рәбб бүтүн адамларын үзүндән ҝөз јашларыны силәҹәк, бүтүн јер үзүндән халгынын рүсвајчылығыны ҝөтүрәҹәк. Рәбб белә сөјләди» (Јешаја 25:8).

Өлүләр дириләҹәк. ‘Сәнин өлүләрин јашајаҹаг, бәдәнләри дириләҹәк. Еј торпаг алтында јатанлар, ојанын, севинҹ нәғмәсини охујун. Рәбб торпагдакы өлүләри дирчәлдәҹәк’ (Јешаја 26:19).

Мәсиһ әдаләтли Һакимдир. «Ҝөзләринин ҝөрдүјү илә һөкм етмәјәҹәк, гулағы илә ешитдијинә ҝөрә гәрар чыхармајаҹаг. Лакин о, јохсуллара һагг илә һөкм едәҹәк, јер үзүндәки фәгирләрин ишинә әдаләтлә гәрар чыхараҹаг» (Јешаја 11:3, 4).

Корлар вә карлар шәфа тапаҹаглар. «Корларын ҝөзләри, карларын гулаглары ачылаҹаг» (Јешаја 35:5).

Сәһра мәһсулдар олаҹаг. «Сәһра вә гуру торпаг севинәҹәк, ҝөл шадланаҹаг, нәрҝиз кими чичәкләнәҹәк. Һәр јан ҝүл ачаҹаг, шадланаҹаг, севинҹдән нәғмә охујаҹаг» (Јешаја 35:1, 2).

Јени јер. «Мән јени ҝөјләр [јени сәмави һөкумәт] вә јени јер [јени салеһ инсан ҹәмијјәти] јарадырам. Әввәлки ишләр бир даһа хатырланмајаҹаг, һеч јада дүшмәјәҹәк. Јаратдығыма әбәдилик севинин, шадланын... Онлар [Аллаһын вәд етдији јени дүнјанын сакинләри] евләр тикиб орада мәскунлашаҹаг, мејнәликләр әкәҹәк, бәһрәләриндән јејәҹәк. Тикдикләри евдә өзҝәләр јашамајаҹаг, әкдикләри бағын мејвәләрини башгалары јемәјәҹәк. Чүнки халгым ағаҹлар тәк узун өмүр сүрәҹәк, сечилмишләрим әлләринин ишләриндән зөвг алаҹаг. Онлар бош јерә әлләшмәјәҹәк, өвладлары бәлаларла үзләшмәјәҹәк. Чүнки өзләри дә, өвладлары да, Рәббин хејир-дуалы нәсли олаҹаг. Онлар Мәни чағырмамышдан Мән онлара ҹаваб верәҹәјәм, онлар һәлә данышаркән Мән ешидәҹәјәм». «“Јаратдығым јени ҝөјләр вә јени јер Өнүмдә неҹә дурурса, нәслиниз, адыныз белә дураҹаг” Рәбб бәјан едир» (Јешаја 65:17-25; 66:22).

Ҝөзәл ҝәләҹәјә даир пејғәмбәрлик

Јешајанын китабы Мүгәддәс Јазыларда ҝәләҹәк хејир-дуалар һагда хәбәр верән јеҝанә китаб дејил. Мүгәддәс Китабда Аллаһын Иса Мәсиһин рәһбәрлик етдији Падшаһлыг васитәсилә ҝөрәҹәји ҝөзәл ишләри тәсвир едән чохлу пејғәмбәрликләр варa. Сиз дә бу ҹүр ҹәннәт шәраитиндә јашамаг истәрдинизми? Бу мүмкүндүр! Аллаһын ҝәләҹәјә даир хош нијјәти һагда Мүгәддәс Китабын әслиндә нә өјрәтдијини вә онлардан неҹә фајдалана биләҹәјинизи өјрәнин. Јеһованын Шаһидләри бөјүк мәмнунијјәтлә сизә көмәк едәҹәкләр.

[Һашијә]

[8-ҹи сәһифәдәки шәкил]

Инсанлар бир-бириләри илә вә һејванларла сүлһдә олаҹаглар

[9-ҹу сәһифәдәки шәкил]

Өләнләр һәјата гајыдаҹаглар

[10-ҹу сәһифәдәки шәкил]

Бүтүн јер үзү ҹәннәт олаҹаг