Спиртли ичкијә Аллаһын мүнасибәти неҹәдир?

БИЗИМ јахшылығымызы истәјән Јараданымыз спиртли ичкиләрдән гәдәриндә ичмәји гадаған етмирa. Әксинә, О, инсанлара «үрәкләри хошһал едән шәрабы, үзләри ҝүлдүрән зејтун јағыны, тагәт верән чөрәји» вериб (Мәзмур 104:15). Бир дәфә Иса Мәсиһ тој мәҹлисинин шән кечмәси үчүн сују ‘јахшы шәраба’ чевирмишди (Јәһја 2:3—10).

Мәнтигәујғундур ки, Јарадан спиртли ичкиләрин инсан организминә, әләлхүсус, бејинә неҹә тәсир ҝөстәрдијини јахшы билир. Сәмави Атамыз Мүгәддәс Китабын ајәләри илә ‘бизим хејримизә бизи өјрәдир’ вә О, бизи спиртли ичкиләрдән суи-истифадә етмәкдән гәти сурәтдә чәкиндирир (Јешаја 48:17). Ајдын шәкилдә ифадә олунан бу хәбәрдарлыглара диггәт јетирин:

«Шәрабла сәрхош олмајын, сәфаһәтә сәбәб одур» (Ефеслиләрә 5:18). «Сәрхошлар... Аллаһын Сәлтәнәтини мирас алмајаҹаглар» (1 Коринфлиләрә 6:9—11). Аллаһын Кәламы ‘сәрхошлуғу, ејш-ишрәтләри вә буна бәнзәр шејләри’ мүһакимә едир (Галатијалылара 5:19—21).

Ҝәлин инди һәддән артыг спиртли ички ичмәјин бәзи тәһлүкәләрини нәзәрдән кечирәк.

Чох ичмәјин вурдуғу зәрәрләр

Спиртли ичкиләрин бир аз фајдасы олса да, онун тәркибиндә бәдәнин, еләҹә дә, бејнин функсијасыны дәјишән зәрәрли вә ҝүҹлү маддәләр вар. Ичмәк мәсәләсиндә гәдәри ашмаг ашағыдакы проблемләрә сәбәб ола биләр:

Чох ичмәк ичәнин дүшүнмә габилијјәтини зәифләдир, нәтиҹәдә онун ‘ҝөзләринә гәрибә шејләр ҝөрүнүр’ (Сүлејманын мәсәлләри 23:33). Өтән мәгаләдә ады чәкилән ички дүшкүнү олмуш Алан изаһ едир: «Алкоголизм тәкҹә организмин јох, һәм дә дүшүнҹәнин, давранышын хәстәлијидир. Инсан башгаларына вурдуғу зәрәр һаггында гәтијјән дүшүнмүр».

Һәддән артыг чох ичәндә һәм дә инсан өзүнү идарә едә билмир. Мүгәддәс Јазылар хәбәрдарлыг едир: «Көһнә шәрабла јени шәраб ағылы алыр» (Һушә 4:11, КМ). Һансы мәнада? Адәтән боғдуғумуз фикирләр вә арзулар алкоголун тәсири алтында ади, һәтта ҹәлбедиҹи ҝөрүнә биләр. Дүзҝүн оланы етмәк гәтијјәтимиз зәифләјәр. Алкогол бизим әхлаги мүвазинәтимизи сарсыдараг, руһани фәлакәтә ҝәтириб чыхара биләр.

Мәсәлән, Ҹон арвады илә мүбаһисә едиб, һирсли-һирсли бара ҝетди. Бир гадын она јахынлашанда о, артыг ичкили вәзијјәтдә иди. Бир аз да ичәндән сонра Ҹон онунла ҝетди вә зина етди. Сонра Ҹон ајыг башла һеч вахт етмәјәҹәји бу һәрәкәтинә ҝөрә чох пешман олду.

Инсан һәддиндән артыг чох ичәндә дилинә вә һәрәкәтләринә нәзарәт едә билмир. «Кимин мүнагишәси вар?.. Ким бош јерә јараланды?» — дејә Мүгәддәс Китаб сорушур. «Шәраб ичмәјә отуруб галхмајан» (Сүлејманын мәсәлләри 23:29, 30). Чох ичәндән сонра адам ‘өзүнү дәнизин ортасында саныр, санки ҝәми дирәјинин башында јатыб’ (Сүлејманын мәсәлләри 23:34). Ифрат дәрәҹәдә чох ичән адамы ‘дөјсәләр дә, һеч билмәз’ (Сүлејманын мәсәлләри 23:35).

Һәддән артыг ичмәк сағламлыға зәрәр јетирә биләр. «[Спиртли ички] ахырда илан кими санҹар, әфи илан кими зәһәрләр» (Сүлејманын мәсәлләри 23:32). Тибб елми бу гәдим мәсәлин мүдрик олдуғуну тәсдиг едир. Бөјүк мигдарда алкогол мүхтәлиф хәрчәнҝ хәстәликләринә, һепатит, гараҹијәр серозуна, мәдәалты вәзин функсијасынын позулмасына, шәкәр хәстәләриндә ганда шәкәрин мигдарынын азалмасына, сәрхош мајаланма синдромуна, үрәк чатышмазлығына вә ја инфаркта вә бир чох башга хәстәликләрә ҝәтириб чыхара билән өлдүрүҹү зәһәрдир. Һәтта бир дәфәјә һәддиндән артыг чох ичмәк инсаны комаја сала вә ја өлүмлә нәтиҹәләнә биләр. Лакин тибб китабларында чох ичмәјин ән бөјүк зәрәри барәдә јазылмыр.

Ән бөјүк тәһлүкә. Һәтта инсан ичкидән сәрхош олмаса белә, бу мәсәләдә таразлығы горумамаг руһани ҹәһәтдән тәһлүкәлидир. Мүгәддәс Китабда ачыг-ајдын дејилир: «Вај һалына сәһәр еркән галхыб ички ардынҹа дүшәнләрин, ҝеҹә јарысынадәк шәраб ичиб кефләнәнләрин!» Нә үчүн? Јешаја бу мәсәләдә таразлы олмамағын руһани ҹәһәтдән нә илә нәтиҹәләндијини белә изаһ едир: «Онлар Рәббин ҝөрдүјү ишләрә диггәт етмәзләр, әмәлләринә бахмазлар!» (Јешаја 5:11, 12).

Аллаһын Кәламы бизә ‘шәраба дүшкүн әјјашлара гошулмамағы’ мәсләһәт ҝөрүр (Сүлејманын мәсәлләри 23:20). Јашлы гадынлара ‘шәраб дүшкүнү олмамаг’ һаггында хәбәрдарлыг едилир (Титуса 2:3). Нәјә ҝөрә? Чүнки инсанлар тәдриҹән, чох вахт өзләри дә һисс етмәдән, спиртли ичкинин мигдарыны артырмаға башлајырлар. Нәтиҹәдә, ичән: «Јенә ичмәк үчүн нә заман ајылаҹағам?» — дејә биләр (Сүлејманын мәсәлләри 23:35). Ичән адамлар өтән ҝеҹәки ичкидән өзләринә ҝәлмәк үчүн јенә ичмәк истәјәндә тәһлүкәли һәдди кечмиш олурлар.

Мүгәддәс Китаб хәбәрдарлыг едир ки, «сәрхошлугла, ишрәт аләмләри илә, ички мәҹлисләри илә» ҝүнүнү кечирәнләр «дириләри вә өлүләри мүһакимә етмәјә һазыр Олана ҹаваб верәҹәкләр» (1 Петер 4:3, 5). Һәмчинин јашадығымыз чәтин заманә илә бағлы Иса Мәсиһ хәбәрдарлыг етмишди: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн [Јеһованын ҝүнү] сизи гәфләтән јахаламасын» (Лука 21:34, 35).

Ички дүшкүнү оланлар ‘үрәкләринин сәрхошлугла ағырлашмамасы’ үчүн нә едә биләрләр?

[Һашијә]

[4 вә 5-ҹи сәһифәләрдәки шәкилләр]

Спиртли ичкиләрдән суи-истифадә бир чох проблемләрә ҝәтириб чыхара биләр