Мүгәддәс Китаб һәјатлары дәјишир

БИР растафариниa дредләрини (кәндирәбәнзәр сач дүзүмү) кәсдирмәјә вә ағдәрили инсанлара гаршы нифрәт һиссинә үстүн ҝәлмәјә нә тәшвиг етди? Наркотик сатыҹылары үчүн инсанлардан пул гәсб едән бир гәддар ҝәнҹ нәјин сајәсиндә өз һәјат тәрзини дәјишә билди? Ҝәлин ҝөрәк, бу инсанлар өзләри барәдә нә дејирләр.

«Ағдәрили инсанлара нифрәтимә белә үстүн ҝәлдим!» ҺАФЕНИ НГАМА

ЈАШЫ: 34

ӨЛКӘ: ЗАМБИЈА

ТАРИХЧӘСИ: РАСТАФАРИ

КЕЧМИШИМ. Мән дүнјаја Замбијанын гачгын шәһәрҹикләриндән бириндә ҝөз ачмышам. Мүһарибә дөврүндә анам Намибијаја гачыб, орада Ҹәнуб-Гәрби Африка Халг Тәшкилатына (СВАПО) гошулмушду. Бу тәшкилат Намибијанын Ҹәнуби Африка Республикасындан мүстәгил олмасы уғрунда мүбаризә апарырды.

Һәјатымын илк 15 илини мүхтәлиф гачгын шәһәрҹикләриндә кечирмишәм. СВАПО дүшәрҝәләриндә ҝәнҹләри азадлыг һәрәкатынын габагҹыллары кими һазырлајырдылар. Бурада бејнимизә мүәјјән сијаси фикирләр јеридир вә ағдәрили инсанлара гаршы нифрәт ашылајырдылар.

Он бир јашым оланда христиан олмаг гәрарына ҝәлдим. Јашадығымыз јердә бир килсә варды вә орада католикләр, лүтеранлар, англиканлар вә диҝәр мәзһәбләрә мәнсуб олан адамлар топлашырдылар. Һәмин килсәнин кешиши илә сөһбәт етдикдән сонра христиан олмаг фикримдән дөнүб атеист олдум. Мән регги мусигисини чох севирдим вә әдаләтсизликлә гаршылашан гарадәрили Африка ҹамаатыны әзаб-әзијјәтдән гуртармаг истәјирдим. Буна ҝөрә дә 15 јашым оланда растафариләрә гошулдум. Мән дредләр узадыр, марихуана чәкир, әт јемәкдән имтина едир вә гарадәрили инсанларын азадлығы уғрунда мүбаризә апарырдым. Бунунла белә, әхлагсыз һәјат тәрзиндән әл чәкмир, зоракы филмләрә бахмаға вә сөјүш сөјмәјә давам едирдим.

МҮГӘДДӘС КИТАБ ҺӘЈАТЫМЫ ДӘЈИШДИ. 1995-ҹи илдә, тәхминән 20 јашларымда ҝәләҹәјим барәдә ҹидди дүшүнмәјә башладым. Растафари нәшрләриндән әлимә нә кечирдисә, охујурдум. Онлардан бәзиләри Мүгәддәс Китаба истинад етсә дә, верилән изаһатлар мәним үчүн ағлабатан ҝөрүнмүрдү. Бу сәбәбдән Мүгәддәс Китабы өзүм охумаг гәрарына ҝәлдим.

Бир мүддәт сонра растафари достларымдан бири мәнә Мүгәддәс Јазылары арашдырмаг үчүн Јеһованын Шаһидләри тәрәфиндән дәрҹ едилән бир китаб верди. Мүгәддәс Јазыларын көмәјилә ону охујуб арашдырдым вә баша дүшдүм ки, даһа белә јашамаг олмаз.

Сигарети вә ичкини атана гәдәр, бир билсәјдиниз, нәләрдән кечмәли олдум! (2 Коринфлиләрә 7:1). Үст-башымы сәлигәјә салдым, дредләрими кәсдим, порнографијаја вә зоракы филмләрә бахмагдан, еләҹә дә сөјүш сөјмәкдән әл чәкдим (Ефеслиләрә 5:3, 4). Ағдәрили инсанлара нифрәтимә белә үстүн ҝәлдим! (Һәвариләрин ишләри 10:34, 35). Бу дәјишикликләри етмәк үчүн ирги ајры-сечкилијә тәшвиг едән мусигијә гулаг асмаға сон гојдум вә мәни әввәлки һәјат тәрзимә гајтармаға чалышан көһнә достларымла әлагәми кәсдим.

Бундан сонра мән Јеһованын Шаһиди олмаг гәрарына ҝәлдим. Ибадәт үчүн јығышдыглары јери тапыб мәнимлә Мүгәддәс Китабы өјрәнмәји хаһиш етдим. Мән вәфтиз олмаг истәјәндә аилә үзвләрим һеч дә буна севинмәди. Анам деди: «Һансы... дини сечирсән сеч, бирҹә Јеһованын Шаһиди олма». Нүфузлу дөвләт хадими олан бир гоһумумуз Јеһованын Шаһиди олмаг гәрарыма ҝөрә даима мәни тәнгид едирди.

Лакин Иса пејғәмбәрин инсанларла неҹә рәфтар етдијини билмәк, еләҹә дә онун мәсләһәтләринә риајәт етмәк мәнә мүгавимәт вә ришхәндләрә таб ҝәтирмәјә көмәк етди. Јеһованын Шаһидләринин тәлимләрини Мүгәддәс Китаб тәлимләри илә мүгајисә етдикдән сонра һәгиги дини тапдығыма әмин олдум. Мәсәлән, онлар Мүгәддәс Китабын хош хәбәри бәјан етмәк әмрини јеринә јетирирләр (Матта 28:19, 20; Һәвариләрин ишләри 15:14). Ејни заманда, сијасәтә гарышмырлар (Мәзмур 146:3, 4; Јәһја 15:17, 18).

МӘНӘ ФАЈДАСЫ. Мүгәддәс Китаб мәсләһәтләрини һәјатымда тәтбиг етдикҹә онларын нә гәдәр фајдалы олдуғуна әмин олдум. Ҝөтүрәк елә марихуананы. Ону тәрҝитдикдән сонра артыг белә шејләрә һәр ај јүзләрлә доллар сәрф етмирәм. Инди мәни гара басмыр, емосионал вә физики сағламлығым исә хејли јахшылашыб.

Нәһајәт ки, чохдандыр арзусунда олдуғум һәјатын мәнасыны тапдым. Ән әсасы исә, мән Аллаһа јахынлаша билдим (Јагуб 4:8).

«Гәзәбими ҹиловламағы өјрәндим» МАРТИНО ПЕДРЕТТИ

ЈАШЫ: 43

ӨЛКӘ: АВСТРАЛИЈА

ТАРИХЧӘСИ: НАРКОТИК АЛВЕРЧИСИ

КЕЧМИШИМ. Мән ушаг оланда аиләмиз тез-тез бир јердән башга јерә көчүрдү. Биз кичик шәһәрләрдә, бир мүддәт бөјүк шәһәрдә вә һәтта бир дәфә абориҝенләрин ичиндә јашамышыг. Дајыларым вә онларын ушаглары илә кечирдијим хош анлар һеч вахт јадымдан чыхмајаҹаг. Биз бирликдә балыг тутур, ов овлајыр, бумеранг вә башга шејләр дүзәлдирдик.

Атам боксчу иди вә лап ушаглыгдан мәнә далашмағы өјрәдирди. Чох давакар идим. Јенијетмә јашларымда ҝүнләрим барларда кечирди. Һәмишә достларымла дава-далаш ахтарырдыг. Бычаг вә дәјәнәкләрлә 20 вә ондан чох инсана бирдән һүҹум едирдик.

Мәним чөрәјим наркотик вә лиман ишчиләринин оғурладыглары әшјалары сатмагдан чыхырды. Наркотик алверчиләринә борҹу олан инсанлара силаһла һәдә-горху ҝәләрәк онларын борҹларыны јығырдым. Мәгсәдим муздлу гатил олмаг иди вә «өлдүр, јохса сәни өлдүрәҹәкләр» шүары илә јашајырдым.

МҮГӘДДӘС КИТАБ ҺӘЈАТЫМЫ ДӘЈИШДИ. Јеһованын Шаһидләри барәдә һәлә јенијетмәлик илләриндә ешитмишдим. Јадымдадыр, тәхминән 20 јашларым оланда анамдан Јеһованын Шаһидләрини һарада тапа биләҹәјими сорушмушдум. Ики ҝүн сонра Јеһованын Шаһиди олан Диксон адлы бир нәфәр гапымызы дөјдү. Онунла бир аз сөһбәт етдикдән сонра мәни јығынҹаг ҝөрүшүнә дәвәт етди. Мән һәмин ҝөрүшә ҝетдим вә 20 илдир ки, бу ҝөрүшләрдә иштирак едирәм. Онлар һәр бир суалыма Мүгәддәс Китабдан ҹаваб верирдиләр.

Јеһова Аллаһын һәр бир инсанла шәхсән марагландығыны биләндә чох севиндим (2 Петер 3:9). Мән баша дүшдүм ки, һамы мәндән үз дөндәрсә дә, О, севән бир ата кими һәмишә мәним гајғыма галаҹаг. Һәмчинин бир шеји дә өјрәндим ки, пис әмәлләримдән дөнсәм, ҝүнаһларымы бағышлајаҹаг. Ефеслиләрә 4:22—24 ајәләриндәки сөзләрин мәнә бөјүк тәсири олду. Мән ‘көһнә мәнлији кәнара атыб, Аллаһын бәнзәјишинә ҝөрә јарадылмыш јени мәнлији ҝејиндим’.

Лакин мән бирдән-бирә дәјишмәдим. Ара ҝүнләри наркотикә јахын ҝетмәсәм дә, һәфтәсонлары достларымла ҝөрүшәндә нәфсимә һаким ола билмирдим. Сонда анладым ки, пис вәрдишләримдән јаха гуртармаг истәјирәмсә, достларымдан узаг бир јерә көчмәлијәм. Елә бу сәбәбдән башга штата көчмәк гәрарына ҝәлдим. Бәзи достларым мәни јола салмаг истәди, мән дә етираз етмәдим. Јол боју онлар марихуана чәкирдиләр вә мәнә дә тәклиф етдиләр. Мән онлара бу вәрдишләрдән әл чәкдијими дедим. Штатын сәрһәдинә чатанда исә видалашдыг. Бир нечә вахтдан сонра хәбәр тутдум ки, достларым силаһлы басгын едәрәк банкы јарыблар.

МӘНӘ ФАЈДАСЫ. Әввәлки достларымла бүтүн әлагәләри кәсдикдән сонра пис вәрдишләрдән јаха гуртармаг даһа асан олду. 1989-ҹу илдә Јеһованын вәфтиз олунмуш Шаһиди олдум. Бундан сонра баҹым, анам вә атам да Јеһоваја хидмәт етмәјә башлады.

Артыг 17 илдир ки, евлијәм вә үч ширин-шәкәр баламыз вар. Һәтта мәни гыҹыгландыранда белә гәзәбими ҹиловламағы өјрәндим. «Бүтүн гәбиләләрдән, халглардан вә дилләрдән олан» инсанлары севмәји дә өјрәндим (Вәһј 7:9). Иса Мәсиһ демишди: «Әҝәр сиз Мәним сөзүмә садиг галсаныз, һәгигәтән Мәним шаҝирдләримсиниз. Сиз һәгигәти дәрк едәҹәксиниз; вә һәгигәт сизи азад едәҹәкдир» (Јәһја 8:31, 32). Бу сөзләрин һәгигилијинә шәхсән әмин олдум!

[Һашијә]

[30-ҹу сәһифәдәки јазы]

Дәјишикликләри етмәк үчүн ирги ајры-сечкилијә тәшвиг едән мусигијә гулаг асмаға сон гојдум

[31-ҹи сәһифәдәки јазы]

Һәмишә достларымла дава-далаш ахтарырдыг. Бычаг вә дәјәнәкләрлә 20 вә ондан чох инсана бирдән һүҹум едирдик