Кишиләр Мәсиһин башчылығына нәјә ҝөрә табе олмалыдырлар?
‘Һәр әрин башы Мәсиһдир’ (1 КОР. 11:3).
1. Јеһованын низам-интизам Аллаһы олдуғу нәдән ҝөрүнүр?
«ЈА РӘББИМИЗ вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды»,— дејә Вәһј 4:11 ајәсиндә јазылмышдыр. Јеһова Аллаһ һәр шејин Јараданы олдуғу үчүн бүтүн Каинатын Али Һөкмдарыдыр вә О, бүтүн хилгәтдән үстүндүр. Јеһованын ‘гарышыглыг дејил, сүлһ Аллаһы’ олдуғу бүтүн шүурлу варлыглары низам-интизамла тәшкил етмәсиндән ҝөрүнүр (1 Кор. 14:33; Јешаја 6:1—3; Ибр. 12:22, 23).
2, 3. а) Јеһованын јаратдығы илк варлыг ким олуб? б) Илк Оғул Атасынын јанында һансы мөвгеји тутур?
2 Јаратмаға башламаздан өнҹә Аллаһ гәринәләр бојунҹа мөвҹуд олмушдур. Јеһованын јаратдығы илк варлыг «Кәлам» кими танынан руһани варлыг иди, чүнки о, Онун Нүмајәндәси иди. Јеһова галан һәр шеји мәһз бу «Кәлам» васитәси илә јарадыб. Сонра о, камил инсан кими јер үзүнә ҝәләрәк Иса Мәсиһ кими танынды. (Јәһја 1:1—3, 14 ајәләрини оху.)
3 Мүгәддәс Јазыларда Аллаһла илк Оғулун бир-биринә мүнасибәтдә тутдуғу мөвге барәдә нә дејилир? Һәвари Павел Аллаһдан илһам алараг јазмышдыр: «Буну да билмәнизи истәјирәм ки, һәр әрин башы Мәсиһ, арвадын башы әр, Мәсиһин башы исә Аллаһдыр» (1 Кор. 11:3). Мәсиһ Атасынын табечилијиндәдир. Башчылыг вә табечилик принсипи шүурлу варлыглар арасында сүлһ вә низам-интизамын һөкм сүрмәси үчүн чох зәруридир. Һәр шејин Исанын васитәсилә јарадылмасына бахмајараг, һәтта ондан да Аллаһын башчылығына табе олмаг тәләб олунур (Колос. 1:16).
4, 5. Иса Јеһованын јанында тутдуғу мөвгејинә неҹә јанашырды?
4 Иса Јеһованын башчылығына табе олмаға вә јер үзүнә ҝәлмәјә неҹә јанашырды? Мүгәддәс Јазыларда дејилир: «Аллаһ сурәтиндә олдуғу һалда О, Аллаһла бәрабәрлији, имтинасы мүмкүн олмајан бир һагг сајмады. Лакин Өзүнү һеч едәрәк Өзүнү гул сурәтинә салыб, инсанлара охшар олду. Ҝөркәм етибарилә дә инсан кими, О Өз тәвазөкарлығыны ҝөстәрди вә өлүмәдәк... итаәткарлыг етди» (Филип. 2:5—8).
5 Иса һәр заман Атасынын ирадәсинә тәвазөкарлыгла табе олурду. О демишди: «Мән Өз-Өзүмдән бир шеј едә билмәрәм... Мәним һөкмүм доғрудур, она ҝөрә ки, мәгсәдим өз ирадәми дејил, Мәни ҝөндәрәнин ирадәсини јеринә јетирмәкдир» (Јәһ. 5:30). Һәмчинин: «Мән даим Онун [Атамын] хошуна ҝәлән ишләри ҝөрүрәм»,— дејә бәјан етмишди (Јәһ. 8:29). Өлүмүнә бир аз галмыш Иса дуада Атасына демишди: «Мән Сәни јер үзүндә иззәтләндирдим; Сәнин Мәнә иҹра етмәк үчүн тапшырдығын иши јеринә јетирдим» (Јәһ. 17:4). Ҝөрүндүјү кими, Иса үчүн Атасынын башчылығыны гәбул етмәк вә она табе олмаг проблем дејилди.
Атаја табечилик Оғула хејир-дуалар ҝәтирир
6. Иса һансы ҝөзәл хүсусијјәтләри тәзаһүр етдирирди?
6 Иса јер үзүндә оларкән Атасына бөјүк мәһәббәт ҝөстәрмәклә јанашы, бир чох ҝөзәл хүсусијјәтләр дә тәзаһүр етдирмишди. О демишди: «Мән Атаны севирәм» (Јәһ. 14:31). О, инсанлары да чох севирди. (Матта 22:35—40 ајәләрини оху.) Иса кобуд вә һөкмлү јох, хејирхаһ вә гајғыкеш иди. О дејирди: «Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр» (Мат. 11:28—30). Јашларындан асылы олмајараг, һәлим инсанлар, хүсусилә дә әзаб-әзијјәт вә зүлм ичиндә оланлар Исанын ҝөзәл хүсусијјәтләриндән вә чатдырдығы руһландырыҹы хәбәрдән тәсәлли тапырдылар.
7, 8. Мусанын Ганунуна ҝөрә, ганахмадан әзијјәт чәкән гадын нәји етмәмәли иди, амма Иса онунла неҹә рәфтар етди?
7 Инди исә Исанын гадынларла неҹә рәфтар етдијинә нәзәр салаг. Тарих бојунҹа бир чох кишиләр, о ҹүмләдән гәдим Исраилин дин рәһбәрләри гадынларла чох пис рәфтар етмишләр. Лакин Иса гадынлара һөрмәтлә јанашырды. Бу, онун 12 ил ганахмадан әзијјәт чәкән гадынла неҹә рәфтар етмәсиндән ајдын ҝөрүнүр. ‘Һәкимләр әлиндән хејли әзијјәт чәкән’ бу гадын сағалмаг үчүн бүтүн варыны сәрф етмишди. Амма буна бахмајараг, «вәзијјәти даһа да писләшмишди». Мусанын Ганунуна ҝөрә о, натәмиз сајылырды. Она тохунан һәр бир инсан да натәмиз олурду (Лев. 15:19, 25).
8 Исанын хәстәләрә шәфа вердијини ешидән гадын: «Һеч олмаса, анҹаг палтарына тохунсам, сағалаҹағам»,— дејә фикирләшәрәк Исаны әһатә едән издиһамы јарыб она тохунду вә дәрһал сағалдығыны һисс етди. Иса билирди ки, гадын онун палтарларына тохунмамалы иди. Буна бахмајараг, Иса ону мәзәммәт етмәди. Әксинә, о, онунла хејирхаһлыгла давранды. Иса гадынын илләр әрзиндә хәстәлији уҹбатындан нәләр чәкдијини баша дүшүр вә онун сон дәрәҹә көмәјә мөһтаҹ олдуғуну ҝөрүрдү. Иса шәфгәтлә она деди: «Гызым! Иманын сәни хилас етди. Сүлһ илә ҝет вә дәрдиндән сағал» (Марк 5:25—34).
9. Шаҝирдләри ушаглары Исанын јанына бурахмајанда о, буна неҹә јанашды?
9 Һәтта ушаглар да өзләрини Исанын јанында раһат һисс едирдиләр. Бир дәфә валидејнләр ушагларыны Исанын јанына ҝәтирәндә шаҝирдләр онлары данладылар. Ҝөрүнүр, онлар дүшүнүрдүләр ки, Иса ушагларын ону бездирмәсини истәмир. Амма Иса һеч дә белә фикирләшмирди. Мүгәддәс Јазыларда охујуруг: «Иса буну ҝөрдүкдә, гәзәбләниб онлара деди: “Гојун ушаглар Мәним јаныма ҝәлсинләр! Онлара мане олмајын! Чүнки Аллаһын Сәлтәнәти беләләрининдир”». Сонра «онлары гуҹаглајыб, әлләрини үзәрләринә гојараг, хејир-дуа верди». Демәк олмаз ки, Иса ушаглара садәҹә сәбир етмәли олду, әксинә, онлары меһрибанҹасына гаршылады (Марк 10:13—16).
10. Иса тәзаһүр етдирдији хүсусијјәтләрә неҹә јијәләнмишди?
10 Иса јер үзүндә хидмәт едәркән тәзаһүр етдирдији хүсусијјәтләрә неҹә јијәләнмишди? Ҝөјдә јашадығы милјард илләр әрзиндә о, сәмави Атасыны мүшаһидә едир вә Онун јолларыны өјрәнирди. (Сүлејманын мәсәлләри 8:22, 23, 30 ајәләрини оху.) О, ҝөјдә Јеһованын јаратдығы варлыглар үзәриндә неҹә мәһәббәтлә башчылыг етдијинә фикир верир вә Онун јолларыны мәнимсәјирди. Әҝәр Иса итаәткар олмасајды, буну едә биләрдими? О, Атасына итаәт етмәкдән зөвг алырды, Јеһова да белә Оғулла фәхр едирди. Иса јер үзүндә оланда сәмави Атасынын һејрәтамиз хүсусијјәтләрини мүкәммәл сурәтдә әкс етдирирди. Аллаһын сәмави Падшаһлығынын Падшаһы олан Мәсиһә табе олмаг неҹә дә бөјүк шәрәфдир!
Мәсиһин хүсусијјәтләрини тәглид един
11. а) Биз вар ҝүҹүмүзлә кими тәглид етмәјә чалышмалыјыг? б) Нәјә ҝөрә хүсусилә дә кишиләр Исаны тәглид етмәјә чалышмалыдырлар?
11 Мәсиһчи јығынҹағында һәр кәс, хүсусилә дә кишиләр даима вә вар гүввәләри илә Мәсиһин хүсусијјәтләрини тәглид етмәјә чалышмалыдырлар. Артыг гејд олундуғу кими, Мүгәддәс Китабда дејилир: «Һәр әрин башы Мәсиһ[дир]». Мәсиһ өз Башы олан һәгиги Аллаһы тәглид етдији кими, мәсиһчи кишиләр дә чалышмалыдырлар ки, онларын башы олан Мәсиһи тәглид етсинләр. Һәвари Павел мәсиһчи оланда мәһз белә дә етди. О, һәмиманлыларыны сәсләјирди: «Мән Мәсиһи тәглид етдијим кими, сиз дә мәни тәглид един» (1 Кор. 11:1). Һәвари Петер исә демишди: «Сиз бунун үчүн чағырылдыныз. Чүнки Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк» (1 Пет. 2:21). Кишиләр ағсаггал вә хидмәти көмәкчи олдуглары үчүн Мәсиһи тәглид етмәк нәсиһәти онлар үчүн даһа бөјүк әһәмијјәт кәсб едир. Иса Јеһованы тәглид етмәкдән севинҹ дујдуғу кими, мәсиһчи кишиләр дә Мәсиһи вә онун хүсусијјәтләрини тәглид етмәкдән севинҹ дујмалыдырлар.
12, 13. Ағсаггаллар онлара һәвалә олунан сүрү илә неҹә рәфтар етмәлидирләр?
12 Мәсиһи тәглид етмәји өјрәнмәк мәсиһчи јығынҹағынын ағсаггалларынын борҹудур. Петер ағсаггаллара нәсиһәт едирди: «Аллаһын сизә һәвалә олунан сүрүсүнү отарын. Она мәҹбури дејил, көнүллү вә Аллаһа мәгбул олан шәкилдә, биабырчы газанҹ үчүн дејил, шөвглә нәзарәт един. Сизә тапшырыланлара гаршы зүлмкар јох, сүрүјә нүмунә олун» (1 Пет. 5:1—3). Мәсиһчи ағсаггаллар һөкмлү, залым вә кобуд олмамалыдырлар. Мәсиһин нүмунәсини тәглид едәрәк ағсаггаллар онлара һәвалә олунан сүрү илә мәһәббәтлә, нәзакәтлә, тәвазөкарлыгла вә хејирхаһлыгла давранмаға чалышмалыдырлар.
13 Јығынҹагда рәһбәрлији үзәринә ҝөтүрән гардашлар гејри-камилдирләр вә онлар имканларынын мәһдуд олдуғуну унутмамалыдырлар (Ром. 3:23). Буна ҝөрә дә онлар Исадан өјрәнмәјә вә онун мәһәббәтини әкс етдирмәјә ҹан атмалыдырлар. Нәзарәтчиләр Аллаһын вә Мәсиһин инсанларла неҹә рәфтар етмәсинин үзәриндә дүшүнмәли вә онлары тәглид етмәлидирләр. Петер бизи тәшвиг едир: «Һамыныз бир-биринизә табе олараг тәвазөкарлыг палтары ҝејинин. Чүнки Аллаһ мәғрурлара гаршы дурур, тәвазөкарлара исә лүтф верир» (1 Пет. 5:5).
14. Ағсаггаллар башгаларына нә дәрәҹәдә һөрмәт етмәлидирләр?
14 Јығынҹагда нәзарәтчи тәјин олунмуш гардашлар Аллаһын сүрүсү илә рәфтар едәркән ҝөзәл хүсусијјәтләр тәзаһүр етдирмәлидирләр. Ромалылара 12:10 ајәсиндә дејилир: «Гардашлыг севҝиси илә бир-биринизи шәфгәтлә севин; бир-биринизи һөрмәтдә габаглајын». Ағсаггаллар вә хидмәти көмәкчиләр башгаларына һөрмәтлә јанашырлар. Бүтүн мәсиһчиләр кими, бу гардашлар да ‘рәгабәт вә ја шөһрәтпәрәстликлә һеч бир шеј етмәмәли, амма тәвазөкарлыгла бир-бирләрини өзләриндән јухары сајмалыдырлар’ (Филип. 2:3). Рәһбәрлији өз үзәринә ҝөтүрәнләр башгаларыны өзләриндән үстүн һесаб етмәлидирләр. Белә етмәклә онлар Павелин мәсләһәтинә риајәт етмиш олаҹаглар: «Биз гүввәтлиләр гүввәтсизләрин зәифликләринә дөзмәли вә өз гајғымыза галмамалыјыг. Һәр биримиз јахшылыг наминә өз гоншумузун гајғысына галмалыјыг ки, о руһән инкишаф етсин. Она ҝөрә ки, Мәсиһ дә Өз гајғысына галмамышды» (Ром. 15:1—3).
‘Арвадларыныза һөрмәт ҝөстәрин’
15. Әрләр арвадлары илә неҹә давранмалыдырлар?
15 Инди исә Петерин евли кишиләрә вердији мәсләһәтә нәзәр салаг. О јазырды: «Еј әрләр, һәмчинин сиз дә арвадларынызла илтифатлы давранын. Онлар зәиф ҹинс... олдугларындан онлара һөрмәт ҝөстәрин» (1 Пет. 3:7). Кимәсә һөрмәт етмәк ону јүксәк гијмәтләндирмәк, јәни онун фикирләрини, истәк вә тәләбатларыны нәзәрә алмаг, еләҹә дә мүмкүн олан һалларда ҝүзәштә ҝетмәк демәкдир. Әр арвады илә мәһз белә давранмалыдыр.
16. Јолдашларына һөрмәт етмәклә әлагәдар Мүгәддәс Китабда әрләр үчүн һансы хәбәрдарлыг јазылыб?
16 Кишиләрин һәјат јолдашлары илә һөрмәтҹил тәрздә давранмалы олдугларыны јазараг Петер әлавә етди: «Дуаларыныза манечилик төрәдилмәсин» (1 Пет. 3:7). Бурадан кишиләрин өз һәјат јолдашлары илә неҹә рәфтар етмәләринә Јеһованын нә дәрәҹәдә ҹидди јанашдығыны ајдын ҝөрмәк олар. Кишинин арвады илә һөрмәтсиз рәфтары дуаларына манечилик төрәдә биләр. Мәҝәр әрләриндән һөрмәтҹил мүнасибәт ҝөрән гадынлар, адәтән, мүсбәт һај вермирләрми?
17. Әр өз арвадыны нә дәрәҹәдә севмәлидир?
17 Һәјат јолдашыны севмәјә даир Аллаһын Кәламы кишиләрә белә мәсләһәт верир: «Әрләр... өз арвадларыны өз бәдәнләри гәдәр севмәлидирләр... Чүнки һеч ким һеч заман өз бәдәнинә нифрәт етмәмишдир, лакин Рәбб ҹәмијјәти етдији кими, ону једирир вә бәсләјир... Гој һәр кәс өз арвадыны өзү кими севсин» (Ефес. 5:28, 29, 33). Кишиләр өз һәјат јолдашларыны нә дәрәҹәдә севмәлидирләр? Павел бу һагда јазыр: «Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди» (Ефес. 5:25). Мәсиһ јығынҹаг уғрунда өзүнү гурбан вердији кими, әр дә арвады уғрунда ҹанындан кечмәјә һазыр олмалыдыр. Мәсиһчи әр арвады илә нәвазишлә, анлајышла, диггәтлә даврананда вә шәхси мәнфәәтини ҝүдмәјәндә гадына әринин башчылығына табе олмаг даһа асан олур.
18. Никаһдакы мәсулијјәтләрилә әлагәдар кишиләрин һансы көмәји вар?
18 Јеһова әрләрдән өз һәјат јолдашларына бу ҹүр һөрмәт ҝөстәрмәји тәләб етмәклә онлардан чох шејми ҝөзләјир? Хејр, Јеһова һеч вахт онлардан ҝүҹләриндән артыг бир шеј тәләб етмәз. Бундан әлавә, каинатда ән гүдрәтли гүввә олан мүгәддәс руһ Јеһованын бүтүн хидмәтчиләри үчүн әлчатандыр. Иса демишдир: «Мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (Лука 11:13). Дуаларда әрләр Јеһовадан мүгәддәс руһ истәјә биләрләр ки, бу руһ онлара һамы илә, еләҹә дә арвадлары илә дүзҝүн давранмаға көмәк етсин. (Һәвариләрин ишләри 5:32 ајәсини оху.)
19. Нөвбәти мәгаләдә сөһбәт нәдән ҝедәҹәк?
19 Һәгигәтән дә, кишиләрин Мәсиһә табе олмағы өјрәнмәк вә онун башчылыг нүмунәсини тәглид етмәк кими ҹидди мәсулијјәтләри вар. Бәс гадынлар, хүсусилә дә аиләли гадынлар һаггында нә демәк олар? Нөвбәти мәгаләдә онларын Јеһованын гурулушундакы ролларына неҹә мүнасибәт ҝөстәрмәли олдуглары мүзакирә олунаҹаг.
Јадыныздадырмы?
• Биз Исанын һансы хүсусијјәтләрини тәглид етмәлијик?
• Ағсаггаллар сүрү илә неҹә рәфтар етмәлидирләр?
• Әр арвады илә неҹә рәфтар етмәлидир?
[10-ҹу сәһифәдәки шәкилләр]
Башгаларына һөрмәт етмәклә Исаны тәглид един