Суаллар гутусу
◼ Јеһоваја хидмәт үчүн истифадә едилән јерләрә ҝедәркән һансы ҝејим тәрзи мүнасибдир?
Бүтүн дүнјада Падшаһлыг Заллары, Конгрес Заллары, Бет-Елләр Јеһоваја хидмәт етмәк үчүн һәср олунмуш хүсуси јерләрдир. Бу биналар садә вә сәлигәли олдуғу, һәмчинин јахшы вәзијјәтдә сахланылдығы үчүн хариҹи ҝөрүнүшләри инсанда хош тәәссүрат ојадыр. Бу, Шејтан дүнјасында мөвҹуд олан шејләрдән чох фәргләнир. Јеһоваја хидмәт үчүн истифадә едилән јерләрә ҝәләнләр дә Јеһоваја мәхсус олдугларыны вә Онун ирадәсини јеринә јетирдикләрини ајдын ҝөстәрмәлидирләр.
Бир мәсиһчи кими, биз һәр саһәдә, о ҹүмләдән мүнасиб олан сәлигәли ҝејим вә хариҹи ҝөрүнүшүмүзлә «өзүмүзү Аллаһын хидмәткарлары кими тәгдим едирик» (2 Кор. 6:3, 4). Биздән әдәбли давраныш да ҝөзләнилир. Ҝејимимиз вә хариҹи ҝөрүнүшүмүз Јеһова Аллаһын хидмәтчиләринә хас олан әдәб вә ләјагәти һәмишә әкс етдирмәлидир. Бу, Нју-Јоркдакы мәркәзи идарәјә, ејни заманда, бүтүн дүнјада олан филиаллара ҝедәркән хүсусилә ваҹибдир.
Мүнасиб ҝејим вә хариҹи ҝөрүнүшүн ваҹиблијинә даир «Јеһованын ирадәсини јеринә јетирмәк үчүн тәшкил олунмушуг» (рус.) китабында тәблиғ хидмәтинә вә мәсиһчи ҝөрүшләринә ҝедәркән физики тәмизлијин, садә ҝејимин вә јахшы хариҹи ҝөрүнүшүн зәрури олмасы һаггында мәлумат верилир. 138-ҹи сәһифәнин 2-ҹи абзасында дејилир: «Јадда сахлајын ки, “Бет-Ел” “Аллаһын еви” демәкдир. Буна ҝөрә дә, Бет-Елә ҝедәркән биз Падшаһлыг Залындакы јығынҹаг ҝөрүшләриндә олдуғумуз кими ҝөрүнмәли вә давранмалыјыг». Бу јүксәк нормаја һәм Бет-Елә јахын јерләрдән, һәм дә узаг әразиләрдән ҝәлән тәблиғчиләр риајәт етмәлидирләр. Бунунла онлар миннәтдарлыг вә һөрмәт тәзаһүр етдирмиш олурлар (Мәз. 29:2).
Палтарымыз бизи «Аллаһа һөрмәт етдикләрини» сөјләјән инсанлар кими танытмалыдыр (1 Тим. 2:10). Мүнасиб ҝејим вә хариҹи ҝөрүнүш башгаларында Јеһоваја ибадәтә даир мүсбәт тәәссүрат ојадыр. Анҹаг гејд етмәк лазымдыр ки, Јеһоваја хидмәт үчүн истифадә едилән јерләрә ҝедәркән бәзи баҹы-гардашларымыз һәддиндән артыг сәлигәсиз, пинти вә ачыг-сачыг ҝејинирләр. Белә ҝејим тәрзи мәсиһчиләр үчүн һеч бир вахт мүнасиб дејил. Бу мәсәләдә, еләҹә дә мәсиһчи һәјатымызын бүтүн башга саһәләриндә һәр шеји Аллаһын иззәти үчүн едәрәк, Аллаһын халгыны дүнјадан фәргләндирән јүксәк нормалара риајәт етмәк истәјирик (Ром. 12:2; 1 Кор. 10:31).
Беләликлә, Нју-Јоркдакы мәркәзи идарәјә, Русијанын Санкт-Петербург шәһәринин Солнечноје гәсәбәсиндәки Бет-Елә, Ҝүрҹүстандакы офисә, јахуд диҝәр филиаллара планлашдырыб ҝетмәк вә ја мәзунијјәт заманы сәјаһәт едәркән јолүстү дәјмәк истәјәндә өзүндән соруш: «Мәним ҝејимим вә хариҹи ҝөрүнүшүм ҝедәҹәјим јерин садәлијини, тәмизлијини вә ләјагәтини әкс етдирирми? Хариҹи ҝөрүнүшүм ибадәт етдијим Аллаһа иззәт ҝәтирирми? Башгалары хариҹи ҝөрүнүшүмә ҝөрә утаныб вә ја пәрт олмајаҹаглар ки?» Ҝәлин һәмишә ҝејимимиз вә хариҹи ҝөрүнүшүмүзлә «һәр ҹәһәтҹә Хиласкарымыз Аллаһын тәлимини ҹазибәли» едәк! (Тит. 2:10).