Ондан там истифадә едирсәнми?
1 «Ондан хидмәтдә истифадә етмәји сәбирсизликлә ҝөзләјирәм!» Бу сөзләри «Ҝөзәтчи Гүлләси»нин 2008-ҹи ил 1 јанвар сајыны охујан бир баҹы јазмышдыр. Сән күтләви нәшрин мүнтәзәм олараг чыхан рубрикаларындан бәзиләрини нәзәрдән кечирәрәк, хидмәтдә онлардан истифадә етмәјин үсулларыны тапмысанмы?
2 «Исадан нә өјрәнирик?» Јәгин сән дә разылашаҹагсан ки, бу рубриканын көмәјилә асанлыгла Мүгәддәс Китаб өјрәнмәсинә башламаг мүмкүндүр. Әҝәр һәлә буну етмәмисәнсә, мәгаләнин башлығыны ев саһибинә оху вә сонра онун диггәтини, биринҹи абзасда ҝөстәрилдији кими, Исанын бу барәдә нә дедијинә јөнәлт. Һәмсөһбәтин мараг ҝөстәрәндә дүшүндүрүҹү суаллар шәклиндә тәртиб олунмуш јарымсәрлөвһәләрдән истифадә едәрәк мүзакирәни давам етдирмәјә чалыш. Ону суаллара даир өз фикрини билдирмәјә тәшвиг ет. Абзасла бағлы шәкилләри гыса олараг изаһ ет вә нөвбәти абзаса кеч. Илк ҝәлишиндә мәгаләни јарыја кими, тәкрар ҝәлдикдә исә ахыра гәдәр мүзакирә едә биләрсән. «Мүгәддәс Китаб өјрәдир» китабы васитәсилә өјрәнмәни давам етдирмәјә һазыр ол.
3 «Аилә хошбәхтлијинин ачарлары». Бу рубрика әрләрә, арвадлара вә валидејнләрә аиләдәки әмин-аманлығы позан проблемләрлә үзләшдикдә Мүгәддәс Китаб принсипләрини неҹә тәтбиг етмәли олдугларыны ҝөстәрмәк үчүн нәзәрдә тутулуб. Һәмчинин бу мәгаләләрин васитәсилә Јеһованын Шаһиди олмајанлара да Мүгәддәс Китабдакы мүдриклији ҝөрмәјә көмәк етмәк олар (2 Тим. 3:16, 17).
4 Ҝәнҹләр үчүн рубрикалар. Охуҹуну дүшүндүрән тәрздә тәртиб олунмуш «Ҝәнҹ охуҹуларымыз үчүн» адлы рубрикадан Мүгәддәс Китабын мүәјјән парчасыны тәдгиг етмәк үчүн истифадә етмәк олар. Бу мәгаләләрдән истифадә едәрәк хидмәтдә гаршылашдығын ҝәнҹләрә Аллаһын Кәламыны өјрәнмәјин практики дәјәрини ҝөрмәјә көмәк едә биләрсән (Мәз. 119:9, 105). Валидејнләрлә сөһбәт едәндә онларын диггәтини «Ушагларынызы өјрәдин» рубрикасына јөнәлтмәк олар. Бу мәгаләләр балаҹа ушаглара Мүгәддәс Китаб персонажларындан ваҹиб шејләр өјрәнмәјә көмәк едәҹәк. Һәр фүрсәтдән истифадә едәрәк бу мәгаләләри өз ушагларынла охујурсанмы?
5 Диҝәр рубрикалар. «Охуҹуларымыз сорушур» рубрикасында Јеһованын Шаһиди олмајан охуҹуларын галдырдыглары суаллар арашдырылыр. Евдән-евә тәблиғ заманы журнал тәклиф едәркән бу мәгаләни һәмсөһбәтинлә мүзакирә едә биләрсән. «Ҝәлән мәктуб» рубрикасы миссионерләрин вә башгаларынын хидмәтдә гаршылашдығы чәтинликләрдән бәһс едән, биринҹи шәхс тәрәфиндән нәгл едилән ҹанлы һекајәдир. Бу мәгаләләр мараглананлара Мәсиһин ‘иштиракынын’ (ЈД) әламәтинин һәјата кечмәсинә сүбут олараг хош хәбәрин бүтүн дүнјада тәблиғ олунмасыны ҝөрмәјә көмәк едә биләр (Мат. 24:3, 14).
6 Мүгәддәс Китабын «Теократик Хидмәт Мәктәби» үзрә охунмасына әсасланан «Аллаһа јахынлашын» адлы рубрика сәмими инсанларда Јеһова һаггында даһа чох өјрәнмәк истәји јарада биләр. «Онларын иманыны тәглид един» рубрикасында Мүгәддәс Китаб персонажлары — онларын сечимләри, чәтинликләри, иманлары мүасир охуҹулар үчүн ҹанландырылараг, инсанлара Мүгәддәс Китаб һадисәләрини ајдын тәсәввүр етмәјә көмәк едир.
7 «Ҝөзәтчи Гүлләси»нин хидмәтдә истифадә етмәк үчүн нәзәрдә тутулмуш үч ајдан бир чыхан сајыны алмаг неҹә дә севиндириҹидир! Ҝәлин онун мәзмуну илә јахындан таныш олмаг вә хидмәтдә ондан там истифадә етмәк үчүн әлимиздән ҝәләни едәк.