Һәр шеји ‘Мүждә үчүн ет’
1. Падшаһлығын тәблиғчиләри башгалары үчүн нә етмәјә һазырдырлар вә нә үчүн?
1 Һәвари Павел хош хәбәри башгаларына чатдырмағы өзүнә борҹ билирди (1 Кор. 9:16, 19, 23). Инсанларын әбәди рифаһы үчүн нараһат олмағымыз бизи дә хош хәбәри онларла бөлүшмәк үчүн әлимиздән ҝәләни етмәјә тәшвиг едир.
2. Тәблиғ едәркән һансы дәјишикликләри етмәјә һазырыг вә нә үчүн?
2 Инсанлары тапа биләҹәјин јердә вә вахтда тәблиғ ет. Тәҹрүбәли балыгчы тиловуну вә ја торуну өзүнә раһат олан јердә вә вахтда јох, балыгларын чох олдуғу јердә вә вахтда атыр. «Инсан тутан балыгчылар» олан бизләрә дә әразимиздәки инсанлары тапмаг, бунунла да «һәр чешид балыг» тутмаг ишиндә даһа чох севинҹ дујмаг үчүн ҹәдвәлимиздә дәјишиклик етмәк лазым ҝәлә биләр (Мат. 4:19; 13:47). Инсанлары евдә тапмаг үчүн ахшам саатларында вә ја онлара күчәдә тәблиғ етмәк үчүн сәһәр тездән вахт ајыра биләрикми? Павел «Мүждәјә шәһадәт етмәји» гаршысына мәгсәд гојмушду вә буна наил олмаг үчүн һәр фүрсәтдән истифадә едирди (Һәв. иш. 17:17; 20:20, 24).
3, 4. Хидмәт едәркән тәгдимәмизи инсанларын тәләбатына неҹә ујғунлашдыра биләрик вә бу һансы сәмәрәни ҝәтирәҹәк?
3 Тәгдимәни инсанларын тәләбатына ујғунлашдыр. Балыгчылар тутмаг истәдикләри балығын нөвүндән асылы олараг үсулларыны дәјиширләр. Бәс биз Падшаһлығын хош хәбәрини әразимиздәки инсанларда мараг ојадаҹаг тәрздә неҹә чатдыра биләрик? Әразимиздәки әксәр инсанлары нараһат едән мөвзуја тохунаркән нәзакәтли олмалы вә онларын һәмин мәсәләјә даир фикирләрини диггәтлә динләмәлијик (Јаг. 1:19). Онлары сөһбәтә ҹәлб етмәк үчүн һансыса мәсәләјә даир фикирләрини соруша биләрик (Сүл. мәс. 20:5). Белә етмәклә хош хәбәри онларын һәјатына тәсир едәҹәк шәкилдә тәгдим едә биләҹәјик. Павел ‘һәр кәс үчүн һәр шеј олмушду’ (1 Кор. 9:22). Инсанларын үрәјинә јол тапмаг үчүн тәгдимәни инсанларын тәләбатына ујғунлашдырмағы баҹармаг әсас амилдир.
4 ‘Хош мүждәни’ инсанлара чатдырмаг адама неҹә дә севинҹ ҝәтирир! (Јешаја 52:7). Ҝәлин һәр шеји ‘Мүждә үчүн едәк’ ки, мүмкүн олдуғу гәдәр даһа чох инсана шаһидлик едә биләк (1 Кор. 9:23).