Тәгибләр вә шәрәфли хидмәт
1 Тәгибләр бизә ҝүҹлү тәсир ҝөстәрир, бу, ја јахшы, ја да пис олур. Баҹы-гардашларымыз бизә мүсбәт тәсир ҝөстәрәрәк јахшы ишләрә тәшвиг едирләр (Ибр. 10:24). Анҹаг иманымыза шәрик олмајан аилә үзвләримиз, мәктәб вә иш јолдашларымыз, гонум-гоншуларымыз вә диҝәр танышларымыз бизә Мүгәддәс Китаба зидд олан шејләри етмәк үчүн тәзјиг ҝөстәрә биләрләр. Ола билсин, онлар Мәсиһин давамчысы кими нүмунәви давранышынызы писләјирләр (1 Бут. 3:16). Тәгибләрлә үзләшдијимиз бир вахтда хидмәтдә шөвгүмүзү неҹә горуја биләрик?
2 Аилә үзвләри. Бәзән Јеһованын Шаһиди олмајан аилә башчысы һәјат јолдашынын вә ушагларынын тәблиғ етмәсини истәмәјә биләр. Белә бир вәзијјәт Мексикада бир аиләдә олмушду. Бир кишинин һәјат јолдашы вә једди ушағы һәгигәти гәбул етмишдиләр. Илк вахтлар ата аилә үзвләринин ев-ев тәблиғ етмәсинин вә Мүгәддәс Китаба әсасланан нәшрләр пајламасынын әлејһинә иди. О, буна аиләсини алчалдан бир иш кими бахырды. Анҹаг арвады илә ушаглары гәтијјәт ҝөстәриб тәблиғ ишиндә мүнтәзәм иштирак едирдиләр. Сонрадан бу киши тәблиғ ишинин нә гәдәр ваҹиб иш олдуғуну анлады вә һәјатыны Јеһоваја һәср етди. О, һәгигәти гәбул едәнә кими 15 ил кечмишди. Бәс әҝәр онун аилә үзвләри тәблиғ ишинә бу ҹүр ҹидди јанашмасајдылар, һеч о, һәгигәтә ҝәләрди? (Лука 1:74; 1 Кор. 7:16).
3 Иш јолдашлары. Ола билсин, иш јолдашларыныза тәблиғ етмәјинизи онлардан бәзиләри һеч дә јахшы гаршыламыр. Бир баҹы дејир ки, иш јериндә дүнјанын сону барәдә сөһбәт ҝедәндә о, Мәттанын 24-ҹү фәслини охумағы тәклиф едир вә буна ҝөрә ону әла салыб ҝүлүрләр. Анҹаг бу сөһбәтин үстүндән бир нечә ҝүн кечәндән сонра иш јолдашларындан бири она јахынлашыб һәмин фәсли охудуғуну вә тәсирләндијини дејир. Баҹы она әдәбијјат верди вә гадынла әри Мүгәддәс Китабы арашдырмаға разылыг верди. Илк дәрс ҝеҹә саат икијә кими чәкди. Үчүнҹү дәрсдән сонра онлар јығынҹаглара ҝәлмәјә башладылар вә чох тезликлә сигарети тәрҝидиб тәблиғчи олдулар. Әҝәр баҹы өз үмиди барәдә бөлүшмәсәјди, мәҝәр белә бир шеј олардымы?
4 Мәктәб јолдашлары. Мәктәблиләрин Јеһованын Шаһиди олмајан синиф јолдашларындан өзләринә гаршы тәзјиг һисс етмәләри вә тәблиғ етдикләринә ҝөрә лаға гојулмагдан горхмалары нормалдыр. Бирләшмиш Штатлардан олан бир мәсиһи јенијетмә дејир: «Мән өз јашыдларыма тәблиғ етмәкдән чәкинирдим. Чүнки мәни әлә салаҹагларындан горхурдум». Она ҝөрә дә о, мәктәбдә вә саһәдә тәблиғ етмәкдән гачырды. Бәс сән һәмјашыдларын тәгибләринә гаршы неҹә дура биләрсән? Јеһоваја ҝүвән вә Ону разы салмаға чалыш (Мәс. 29:25). Хидмәтдә Аллаһын Кәламындан истифадә едә билдијин үчүн гүрур дуј (2 Тим. 2:15). Јухарыда һаггында данышылан ҝәнҹ Јеһова Аллаһа үз тутараг Ондан синиф јолдашларына тәблиғ етмәк истәји ојатмасы барәдә дуа етмәјә башлады. О, мәктәбдә тәблиғ етмәјә башлады. Тезликлә о, таныдыгларынын һамысына тәблиғ етди вә јахшы нәтиҹәләр әлдә етди. О дејир: «Азјашлыларын да ҝәләҹәјә үмиди олмалыдыр вә Јеһова онлара көмәк етмәк үчүн биздән истифадә едир».
5 Гоншулар. Ола билсин, етигадымыз гоншуларымызы вә ја танышларымызы гыҹыгландырсын. Әҝәр онларын сизин һаггынызда нә дүшүнмәси сизи нараһат едирсә, онда өзүнүздән соруша биләрсиниз: «Онлар әбәди һәјата апаран һәгигәт барәдә билирләр? Мән онларын үрәјинә неҹә тәсир едә биләрәм?» Бир рајон нәзарәтчиси фикир вермишди ки, гоншулара гәдәриндә тәблиғ едәндә, онда јахшы нәтиҹәләр әлдә олунур. Јеһова Аллаһа јалвар ки, сәмими-гәлбли инсанлары тапмаг үчүн сәнә ҝүҹ вә мүдриклик версин (Филип. 4:13).
6 Тәгибләрә бојун әјсәк, ола билсин, һәмин инсанлары разы салаҹағыг. Бәс бунун онлара вә бизә бир хејри олаҹагмы? Иса Мәсиһ дә өз јашадығы јердә тәгибләрлә үзләшмишди. Һәтта өҝеј гардашлары да ону әлә салырдылар. Анҹаг о билирди ки, јалныз Аллаһын јолунда садиг галдығы мүддәтдә онлара көмәк едә биләр. Мәһз буна ҝөрә Иса «өз зәрәринә данышан ҝүнаһлыларын о ҹүр әдавәтли сөзләринә» дөздү (Ибр. 12:2, 3). Биз дә онун кими давранмалыјыг. Ән шәрәфли иши — Падшаһлыг хәбәрини тәблиғ етмәк үчүн там гәтијјәт ҝөстәр. Белә етсән, «һәм өзүнү, һәм дә сәнә гулаг асанлары хилас едәҹәксән» (1 Тим. 4:16).