Аллаһдан горх вә хошбәхт јаша
«Еј Рәббин мүгәддәсләри, Рәбдән горхун, Ондан горхан һеч нәјә мөһтаҹ галмаз» (МӘЗМУР 34:9).
1, 2. а) Христиан дүнјасында Аллаһ горхусуна даир һансы ики мүхтәлиф фикир мөвҹуддур? б) Бу мәгаләдә һансы суаллары арашдыраҹағыг?
ХРИСТИАН дүнјасынын бә’зи руһаниләри Аллаһдан горхмағы тәблиғ едәркән ону әсас ҝәтирирләр ки, ҝуја Аллаһ ҝүнаһкарлары әбәдијјән ҹәһәннәм одунда јандырыр. Бу еһкам Аллаһын Кәламына зиддир, белә ки, Мүгәддәс Китаб Јеһованы севән, әдаләтли Аллаһ кими таныдыр (Јарадылыш 3:19; Ганунун тәкрары 32:4; Ромалылара 6:23; 1 Јәһја 4:8). Анҹаг христианлығын диҝәр хадимләри исә башга мөвгедән чыхыш едирләр. Онлар Аллаһ горхусунун һеч адыны белә чәкмирләр. Әксинә, онларын өјрәтдијинә ҝөрә Аллаһ һәддиндән артыг мүлајимдир вә демәк олар ки, һәјат тәрзиндән асылы олмајараг һамы она мәгбулдур. Бу фикир дә Мүгәддәс Китаба әсасланмајыб (Галатијалылара 5:19-21).
2 Әслиндә Мүгәддәс Китаб бизи Аллаһдан горхмаға чағырыр (Вәһј 14:7). Бу биздә бә’зи суаллары доғура биләр: севән Аллаһ нә үчүн ондан горхмағымызы истәјир? Биз Аллаһдан һансы мә’нада горхмалыјыг? Аллаһ горхусунун һансы фајдасы вар? 34-ҹү мәзмуру арашдырмаға давам едәрәк бу суаллара ҹаваб тапаҹағыг.
Аллаһдан нә үчүн горхмалыјыг?
3. а) Аллаһдан горхмаг сизин үчүн нә демәкдир? б) Јеһовадан горханлар нә үчүн хошбәхтдирләр?
3 Јарадан вә каинатын Али Һөкмдары олдуғу үчүн биз Јеһовадан горхмалыјыг (1 Петер 2:17). Анҹаг буну гәддар аллаһын гаршысында горхудан тир-тир әсмәк кими баша дүшмәк лазым дејил. Аллаһ горхусу о демәкдир ки, биз Јеһованын шәхсијјәти гаршысында дәрин һөрмәтдән ирәли ҝәләрәк горху дујур, Ону наразы салмаг истәмирик. Аллаһ горхусу инсаны кәдәрә гәрг етмир, ваһимәјә салмыр, әксинә, о, нәҹиб һиссдир вә инсанын әһвалыны ачыр. «Хошбәхт Аллаһ» Јеһова һәјат вердији инсанларын хошбәхтлијини истәјир (1 Тимотејә 1:11, ЈД). Анҹаг хошбәхтлијимиз Аллаһын тәләбләринә мүвафиг јашамағымыздан асылыдыр. Бунун үчүн чохлары ҝәрәк һәјатында көклү дәјишикликләр етсин. Онларын һамысы мәзмурчу Давудун сөзләринин һәгигилијинин шаһиди олурлар: «Дадын, ҝөрүн Рәбб нә гәдәр шириндир, нә бәхтијардыр Она пәнаһ ҝәтирәнләр! Еј Рәббин мүгәддәсләри, Рәбдән горхун, Ондан горхан һеч нәјә мөһтаҹ галмаз» (Мәзмур 34:8, 9). Јеһова илә мөһкәм мүнасибәтләри олдуғу үчүн Аллаһдан горханлар һеч бир дәјәрли шејә мөһтаҹ галмырлар.
4. Давуд вә Иса инсанлары нәјә әмин едирдиләр?
4 Диггәт јетирдинизсә, Давуд өз адамларыны ‘мүгәддәсләр’ адландырмышды. Онлар Аллаһын мүгәддәс халгынын үзвләри идиләр. Давуда гошулмагла һәм дә һәјатларыны тәһлүкәјә атмышдылар. Шаулун әлиндән гачмалы олсалар да, Давуд архајын иди ки, Јеһова онларын әсас еһтијаҹларыны өдәјәҹәк. Давуд јазырды: «Ҝәнҹ асланлар аҹ-јалаваҹ галдылар, лакин Рәбби ахтаранлар һеч бир јахшы шејдән корлуг чәкмәзләр» (Мәзмур 34:10). Иса да өз давамчыларыны буна әмин етмишди (Матта 6:33).
5. а) Исанын ардынҹа ҝедәнләрин чоху кимләр иди? б) Горхуја даир Иса һансы мәсләһәти вермишди?
5 Исаны динләјәнләрин чоху ашағы тәбәгәдән олан јохсул јәһудиләр иди. Буна ҝөрә дә Исанын «онлара јазығы ҝәлди; зира чобаны олмајан гојунлар кими тагәтсиз вә дағыныг идиләр» (Матта 9:36). Бәс белә садә инсанларын Исанын ардынҹа ҝетмәјә ҹәсарәти чатаҹагдымы? Бунун үчүн онлара инсанлардан дејил, Јеһовадан горхмаг лазым иди. Иса демишди: «Бәдәни өлдүрүб ондан сонра башга бир шеј етмәјә гадир олмајанлардан горхмајын; Анҹаг кимдән горхмалы олдуғунузу сизә изаһ едирәм: Мәһв етдикдән сонра ҹәһәннәмә атмаға гадир Оландан горхун; бәли, сизә дејирәм ки, Ондан горхун. Мәҝәр беш сәрчә ики ассаријә сатылмырмы? Вә Аллаһын јанында онлардан һеч бири унудулмамышдыр. Сизин башыныздакы сачларын һамысы да белә сајылмышдыр. Одур ки, горхмајын; сиз бир чох сәрчәдән даһа дәјәрлисиниз» (Лука 12:4-7).
6. а) Исанын һансы сөзләри мәсиһчиләри мөһкәмләндирир? б) Нә үчүн Иса Мәсиһ Аллаһдан горхан инсанлар ичиндә ән ҝөзәл нүмунәдир?
6 Јеһовадан горханлар дүшмәнләри тәрәфдән тәзјигә мә’руз галанда Исанын мәсләһәти үзәриндә дүшүнә биләрләр: «Ким Мәни инсанлар гаршысында играр едәрсә, Инсан Оғлу да ону Аллаһын мәләкләри гаршысында играр едәҹәкдир. Амма ким Мәни инсанлар гаршысында инкар едәрсә, Аллаһын мәләкләри гаршысында инкар олунаҹагдыр» (Лука 12:8, 9). Бу сөзләр бүтүн мәсиһчиләри, хүсусилә дә һәгиги ибадәтин гадаған едилдији өлкәләрдә хидмәт едәнләри мөһкәмләндирир. Онлар еһтијатла давранараг, мәсиһчи ҝөрүшләриндә вә хидмәтдә Јеһоваја дурмадан һәмд едирләр (Һәвариләрин ишләри 5:29). «Аллаһ горхусу» илә әлагәдар бизим үчүн ән ҝөзәл нүмунәни Иса гојуб (Ибраниләрә 5:7). Онун һаггында габагҹадан дејилмишди: «Рәббин Руһу... вә Рәбб горхусу руһу онун үзәриндә олаҹаг. О, Рәбб горхусунда севинҹ тапаҹаг» (Јешаја 11:2, 3). Аллаһ горхусунун ҝәтирдији фајданы Исадан јахшы бизә ким өјрәдә биләр?!
7. а) Мәсиһчиләр һансы дә’вәтә һај верирләр? б) Валидејнләр Давудун нүмунәсини неҹә изләјә биләрләр?
7 Исанын нүмунәсини изләјиб онун тә’лимләринә риајәт едәнләр Давудун «ҝәлин, еј өвладлар, мәни динләјин, Рәбдән горхмағы мәндән өјрәнин» дә’вәтинә һај вермиш олурлар (Мәзмур 34:11). Давуд өз адамларына, адәтән «өвладлар» дејә мүраҹиәт едәрди, чүнки онлар Давуда рәһбәр ҝөзү илә бахырдылар. Давуд исә өз тәрәфиндән давамчыларына руһани ҹәһәтдән көмәк едирди. О истәјирди ки, араларында вәһдәт олсун вә онлар Аллаһын лүтфүнү газансынлар. Мәсиһчи валидејнләр үчүн бу неҹә дә ҝөзәл нүмунәдир! Јеһова валидејнләрә ушагларыны ‘Рәббин тәрбијә вә нәсиһәти илә бөјүтмәк’ сәлаһијјәтини вериб (Ефеслиләрә 6:4). Валидејнләр ушаглары илә һәр ҝүн руһани мөвзулар әтрафында сөһбәт едәрәк вә Мүгәддәс Китабы онларла мүнтәзәм өјрәнәрәк онлара Јеһовадан горхмаға вә хошбәхт һәјат јашамаға көмәк едирләр (Ганунун тәкрары 6:6, 7).
Аллаһдан горхдуғумузу неҹә ҝөстәрә биләрик
8, 9. а) Аллаһдан горхан инсанын һәјаты нә үчүн ҝөзәлдир? б) Дили шәрдән горумаг нә демәкдир?
8 Јухарыда гејд едилдији кими Аллаһ горхусу бизи севинҹдән мәһрум етмир. Давуд сорушур: ‘Ким һәјатдан кам алмаг истәјир, узун өмүр сүрүб хош ҝүн ҝөрмәк истәјир?’ (Мәзмур 34:12). Сөзсүз, узун өмүр сүрүб, хош ҝүн ҝөрмәк үчүн Јеһовадан горхмаг ваҹибдир. Анҹаг садәҹә «мән Аллаһдан горхурам» демәк асандыр, ән әсасы одур ки, буну һәрәкәтләримизлә ҝөстәрәк. Буна ҝөрә дә Давуд Аллаһ горхусуну әмәлдә неҹә ҝөстәрмәји изаһ едир.
9 ‘Дилини шәрдән, ағзыны фырылдаг үчүн ишләтмәкдән гору’ (Мәзмур 34:13). Мәсиһчиләрә бир-бири илә гардаш мәһәббәтилә давранмағы төвсијә едәндән сонра Һәвари Петер Аллаһдан илһам алараг 34-ҹү мәзмурун бу ајәсини ситат ҝәтирир (1 Петер 3:8-12). Дили шәрдән горумаг о демәкдир ки, биз гејбәт едиб шајиә јајмајаҹағыг. Әксинә, башгалары илә сөһбәт едәркән һәмишә руһландырыҹы мөвзулар һаггында данышаҹағыг. Бундан әлавә биз ҹәсарәтли олмаға вә һәгигәти сөјләмәјә чалышмалыјыг (Ефеслиләрә 4:25, 29, 31; Јагуб 5:16).
10. а) Шәрдән чәкинмәк нә демәкдир? б) Јахшылыг етмәјә нә дахилдир?
10 ‘Шәрдән чәкиниб јахшылыг ет, сүлһү ахтарыб ардынҹа ҝет!’ (Мәзмур 34:14). Биз Аллаһын нифрәт етдији әмәлләрдән мәсәлән, ҹинси әхлагсызлыгдан, оғурлугдан, спиритизмдән, зоракылыгдан, сәрхошлугдан, наркотик маддәләрдән истифадәдән вә өзүнә белә мәнфур шејләри дахил едән әјләнҹәләрдән узаг дуруруг, порнографијаја бахмырыг (Ефеслиләрә 5:10-12). Бунун әвәзинә биз вахтымызы јахшылыг етмәјә сәрф едирик. Ән бөјүк јахшылыг исә инсанлары хилас етмәк үчүн мүнтәзәм олараг Падшаһлығын тәблиғи вә шаҝирд һазырламаг ишиндә иштирак етмәкдир (Матта 24:14; 28:19, 20). Биз һәм дә ҝөрүшләрә һазырлашмагла, онлары бурахмамагла, үмумдүнја тәблиғ иши үчүн ианә етмәклә, Падшаһлыг Залынын гејдинә галмагла вә имкансыз мәсиһчиләрә әл тутмагла јахшылыг едә биләрик.
11. а) Давуд сүлһ һаггында дедикләрини әмәлдә неҹә ҝөстәрмишди? б) Јығынҹагда сүлһү неҹә ахтара биләрик?
11 Давуд сүлһү ахтармагда бизә ҝөзәл нүмунә гојмушдур. Шаулу өлдүрмәк үчүн онун әлинә ики дәфә фүрсәт дүшмүшдү. Анҹаг о, һеч бириндә зоракылыға јол вермәди вә сүлһүн әлдә едиләҹәјинә үмид едәрәк падшаһла һөрмәтлә данышды (1 Шамуел 24:8-11; 26:17-20). Јығынҹагда сүлһ тәһлүкә алтында оланда биз нә едә биләрик? Бу һалда ‘сүлһү ахтарыб ардынҹа ҝетмәлијик’. Беләликлә һәмиманлымызла мүнасибәтимизин ҝәрҝинләшдијини дујанда Исанын «әввәлҹә гардашын илә барыш» мәсләһәтинә әмәл едирик. Јалныз бундан сонра биз ибадәтимизә давам едирик (Матта 5:23, 24; Ефеслиләрә 4:26).
Аллаһ горхусунун мүкафаты болдур
12, 13. а) Аллаһдан горханлар бу ҝүн һансы хејир-дуаны алырлар? б) Гыса мүддәтдән сонра, Аллаһын садиг хидмәтчиләри һансы ҝөзәл мүкафаты алаҹаглар?
12 «Рәббин ҝөзү салеһләрин үзәриндәдир, гулаглары онларын фәрјадларына ачыгдыр» (Мәзмур 34:15). Аллаһын Давудла рәфтарындан бу сөзләрин һәгигәт олдуғу ҝөрүнүр. Биз билирик ки, Јеһованын ҝөзү бизим үстүмүздәдир, она ҝөрә дә дәрин севинҹ һисси вә гәлб раһатлығы дујуруг. Һәтта бөјүк чәтинлијә дүшәндә белә, Онун еһтијаҹларымызы өдәјәҹәјинә әминик. Тезликлә Магог өлкәсиндән олан Гог Аллаһын һәгиги хидмәтчиләринә һүҹум едәҹәк вә Јеһованын «дәһшәтли ҝүнү» ҝәләҹәк (Јоел 2:11, 31; Језекел 38:14-18, 21-23). О заман дүшдүјүмүз вәзијјәтдән асылы олмајараг, Давудун сөзләринин һәгигилијинин шаһиди олаҹағыг: «Салеһләр фәрјад чәкәндә Рәбб ешидир, онлары бүтүн әзаблардан азад едир» (Мәзмур 34:17).
13 Һәмин вахт Јеһованын Өз бөјүк адыны иззәтләндирдијини ҝөрмәк неҹә дә севиндириҹи олаҹаг! Үрәкләримиз әввәлкиндән дә артыг дәрин һөрмәт вә горху һисси илә долаҹаг, дүшмәнләр исә рәзиллик ичиндә өләҹәкләр. «Рәббин үзү шәр иш ҝөрәнләрә гаршыдыр, јер үзүндә онлардан нишанә гојмајаҹаг» (Мәзмур 34:16). Аллаһын әдаләтли јени дүнјасында јашамаг үчүн хилас олмаг неҹә дә бөјүк мүкафатдыр!
Таб ҝәтирмәјә көмәк едән вә’дләр
14. Бәлалара бахмајараг, таб ҝәтирмәјимизә нә көмәк едәҹәк?
14 Аллаһа дүшмән кәсилмиш позғун дүнјада Јеһоваја даима итаәт етмәк үчүн дөзүмлү олмалыјыг. Итаәткар олмагда Аллаһ горхусунун көмәји чох бөјүкдүр. Јашадығымыз чәтин зәманәдә Јеһованын бә’зи хидмәтчиләринин пајына дүшән әзијјәтләр онларын гәлбини сындырыр вә онлары руһән әзир. Анҹаг онлар там әмин олмалыдырлар ки, әҝәр Јеһоваја бел бағласалар, О, дөзмәјә көмәк едәҹәк. Давудун сөзләри бизә тәсәлли верир: «Рәбб гәлбисыныглара јахындыр, О, руһән әзилмишләри гуртарыр» (Мәзмур 34:18). Давуд руһландырыҹы сөзләринә давам едәрәк дејир: «Салеһләр чох бәлаја дүчар олар, лакин Рәбб онлары һәр бириндән гуртарыр» (Мәзмур 34:19). Бәлаларын сајындан асылы олмајараг, Јеһова онларын һамысындан бизи гуртармаға гадирдир.
15, 16. а) Давуд 34-ҹү мәзмуру јазандан аз сонра һансы бәладан хәбәр тутду? б) Сынаглара таб ҝәтирмәјә бизә нә көмәк едәҹәкдир?
15 Давуд 34-ҹү мәзмуру јазандан аз сонра Нов шәһәринин башына ҝәлән бәладан хәбәр тутур: Шаул ҹамааты вә каһинләрин әксәријјәтини гылынҹдан кечирмишди. Јәгин бу, Давуд үчүн бөјүк зәрбә олду, чүнки о баша дүшдү ки, Шаулун гәзәбини мәһз онун Нов шәһәринә ҝетмәси аловландырмышды (1 Шамуел 22:13, 18-21). Шүбһәсиз Давуд көмәк үчүн Јеһоваја үз тутду вә салеһләрин ҝәләҹәкдә дириләҹәјиндән тәскинлик тапды (Һәвариләрин ишләри 24:15).
16 Дирилмә үмиди бизи дә мөһкәмләндирир. Биз билирик ки, дүшмәнләримиз бизә сағалмаз јара вура билмәзләр (Матта 10:28). Давуд буна архајын олдуғуну белә ифадә едирди: «Рәбб онларын [салеһләрин] һәр бир сүмүјүнү горујур, һеч бири зәдәләнмәз» (Мәзмур 34:20). Бу ајә, әсас е’тибарилә Исанын үзәриндә јеринә јетди. Иса гәддарҹасына гәтлә јетирилсә дә, һеч бир сүмүјү ‘сындырылмады’ (Јәһја 19:36). Мәзмур 34:20 ајәсини даһа ҝениш тәтбиг едәндә әмин олуруг ки, мәсһ олунмушларын вә ‘башга гојунларын’ үзләшдији сынаглар нә гәдәр шиддәтли олса да, онлара сағалмаз јара вура билмәјәҹәк. Мәҹази мә’нада десәк, онларын сүмүкләри һеч вахт сындырылмајаҹаг (Јәһја 10:16).
17. Аллаһын халгына нифрәт едәнләри нә ҝөзләјир?
17 Ҝүнаһкарларын агибәти исә тамамилә башга ҹүр олаҹаг. Тезликлә онлар нә әкибләрсә, ону да бичәҹәкләр. «Писләр өз шәри илә мәһв олаҹаг, салеһә нифрәт едән мәһкум олаҹаг» (Мәзмур 34:21). Аллаһын халгына усанмадан гаршы чыханлар ән пис бәлаја дүчар олаҹаглар: Иса зүһур едәндә онлар «әбәди һәлак ҹәзасы чәкәҹәкләр» (2 Салониклиләрә 1:9).
18. ‘Бөјүк издиһам’ һансы мә’нада артыг гуртулуб вә ҝәләҹәкдә онлары нә ҝөзләјир?
18 Давудун мәзмурунун сон сөзләри бизи бир даһа әмин едир: «Рәбб гулларынын ҹаныны азад едир, Рәббә пәнаһ ҝәтирән мәһкум олмур» (Мәзмур 34:22). 40 иллик һөкмранлығынын сонуна јахын Давуд демишди: ‘[Рәбб] ҹанымы бүтүн бәлалардан гуртарыб’ (1 Падшаһлар 1:29). Аллаһдан горханлар Давуд кими тезликлә ҝеријә бахыб бүтүн ҝүнаһларындан вә сынаглардан гуртулдугларына севинәҹәкләр. Артыг мәсһ олунмушларын чоху өз сәмави мүкафатларыны алмышлар. Бүтүн милләтләрдән олан ‘бөјүк издиһам’ инди Аллаһа хидмәт етмәк үчүн Исанын јердә галан гардашларына гошулур. Онлар Јеһованын гаршысында тәмиз ада саһибдирләр, чүнки Исанын ганынын ҝүнаһлары јумаға гадир олдуғуна иман ҝәтирирләр. Мәсиһин Миниллик Һөкмранлығы дөврүндә онлар фидијә гурбанлығындан там фајдаланараг камиллијә чатаҹаглар (Вәһј 7:9, 14, 17; 21:3-5).
19. ‘Бөјүк издиһамин’ үзвләри нә етмәк әзминдәдирләр?
19 Аллаһа ибадәт едән ‘бөјүк издиһам’ нә үчүн бу хејир-дуалары алаҹаг? Чүнки онлар бундан сонра да Јеһовадан горхмаг, Она еһтирамла хидмәт етмәк вә табе олмаг әзминдәдирләр. Доғрудан да Аллаһ горхусу сајәсиндә артыг индидән һәјатдан зөвг алырыг вә һәгиги һәјатдан — Аллаһын јени дүнјасында јашанаҹаг әбәди һәјатдан бәрк тутуруг (1 Тимотејә 6:12, 18, 19, һашијә; Вәһј 15:3, 4).
Хатырлајырсынызмы?
• Биз Аллаһдан нә үчүн горхмалыјыг вә бу горху нә демәкдир?
• Аллаһ горхусу бизим давранышымыза неҹә тә’сир ҝөстәрмәлидир?
• Аллаһ горхусунун һансы фајдасы вар?
• Һансы вә’дләр таб ҝәтирмәјимизә көмәк едир?