Аллаһын динҹлик ҝүнү нәдир?
«Аллаһын халгыны һәлә шәнбә истираһәти ҝөзләјир» (ИБР. 4:9).
1, 2. Јарадылыш 2:3 ајәсиндән биз һансы нәтиҹәјә ҝәлирик вә бунунла әлагәдар һансы суаллар мејдана чыхыр?
МУСАНЫН гәләмә алдығы «Јарадылыш» китабынын биринҹи фәслиндән биз өјрәнирик ки, Аллаһ алты символик ҝүн әрзиндә Јер күрәсини инсанларын јашамасы үчүн һазырлады. Һәр ҝүнүн сону һаггында Мүгәддәс Китабда дејилир: «Ахшам олду, сәһәр ачылды» (Јар. 1:5, 8, 13, 19, 23, 31). Једдинҹи ҝүн барәдә исә Мүгәддәс Китабда јазылыб: «Аллаһ једдинҹи ҝүнә бәрәкәт верди вә ону тәгдис етди, чүнки ҝөрдүјү бүтүн јаратма ишини гуртарыб һәмин ҝүн истираһәт етди» (Јар. 2:3).
2 Ҝөрдүјүмүз кими, једдинҹи ҝүн барәдә «ахшам олду, сәһәр ачылды» сөзләри дејилмәјиб. Бу ҝөстәрир ки, Муса бизим ерадан әввәл 1513-ҹү илдә «Јарадылыш» китабыны јазанда једдинҹи ҝүн һәлә битмәмишди. Бәс бу ҝүн Аллаһын динҹлик ҝүнү давам едирми? Әҝәр давам едирсә, биз она неҹә јетишә биләрик? Бу суалларын ҹавабыны билмәк олдугҹа ваҹибдир.
Јеһова һәлә дә истираһәт едир?
3. Јәһја 5:16, 17 ајәләриндә јазылан Исанын сөзләри једдинҹи ҝүнүн биринҹи әсрдә һәлә битмәдијини неҹә тәсдигләјир?
3 Једдинҹи ҝүнүн ерамызын биринҹи әсриндә битмәдијинә даир ики сүбут вар. Илк сүбуту Исанын дүшмәнләринә дедији сөзләрдән ҝөрмәк олар. Иса шәнбә ҝүнләри инсанлары сағалтдығы үчүн онлар ону тәнгид едирдиләр. Чүнки онларын фикринҹә, шәнбә ҝүнүндә кимәсә шәфа вермәк иш сајылырды вә Мусанын Ганунуна зидд иди. Исанын онлара вердији ҹаваба диггәт јетирәк: «Мәним Атам индијәдәк ишләјир, мән дә ишләјирәм» (Јәһ. 5:16, 17). Иса бунунла нә демәк истәјирди? Онун: «Атам индијәдәк ишләјир», — сөзләри дүшмәнләринин иттиһамларына ҹаваб иди. Бунунла Иса, санки, демишди: «Атамла мән ејни иши ҝөрүрүк. Атам минилликләр әрзиндә давам едән Шәнбә ҝүнү ишләјирсә, мәним үчүн дә шәнбә ҝүнү ишләмәк гәбаһәт дејил». Бу сөзләрлә Иса ҝөстәрди ки, Јеһованын бөјүк Шәнбә ҝүнү, јәни динҹлик ҝүнү олан једдинҹи ҝүн Исанын ҝүнләриндә һәлә битмәмишдиa.
4. Једдинҹи ҝүнүн Павелин ҝүнләриндә битмәдијинә даир һансы сүбут вар?
4 Икинҹи сүбуту исә һәвари Павелин сөзләриндән ҝөрмәк олар. Аллаһын истираһәти барәдә Јарадылыш 2:2 ајәсиндән ситат ҝәтирәрәк Павел јазмышды: «Иман едән бизләр динҹлик ҝүнүнә јетишәҹәјик» (Ибр. 4:3, 4, 6, 9). Ҝөрдүјүмүз кими, једдинҹи ҝүн Павелин ҝүнләриндә дә битмәмишди. Бәс о ҝүн нә заман битәҹәк?
5. Једдинҹи ҝүнүн мәгсәди нәдир вә Аллаһын нијјәти нә заман там јеринә јетәҹәк?
5 Бу суалын ҹавабыны тапмаг үчүн биз једдинҹи ҝүнүн мәгсәдини билмәлијик. Јарадылыш 2:3 ајәсиндә һәмин мәгсәд изаһ олунур: «Аллаһ једдинҹи ҝүнә бәрәкәт верди вә ону тәгдис етди». Аллаһ һәмин ҝүнү тәгдис етмишди, башга сөзлә, нијјәтинин там һәјата кечмәси үчүн ону хүсуси бир ҝүн кими ајырмышды. Онун нијјәти исә ондан ибарәтдир ки, јер үзүндә бүтүн ҹанлыларын гајғысына галан итаәткар инсанлар јашасынлар (Јар. 1:28). Јеһова Аллаһ вә шәнбә ҝүнүнүн Ағасы олан Иса Мәсиһ мәһз бу нијјәтин һәјата кечмәси үчүн бирҝә «индијәдәк ишләјир»ләр (Мат. 12:8). Аллаһын динҹлик ҝүнү Мәсиһин Миниллик Һөкмранлығынын сонунда, јәни Аллаһын бу нијјәти там һәјата кечәндә сона јетәҹәк.
«Итаәтсизлик јолуна» дүшмәјәк
6. Һансы нүмунәләр бизим үчүн хәбәрдарлыгдыр вә онлардан биз нә өјрәнә биләрик?
6 Аллаһ Адәмлә Һәвваја Өз нијјәтини ајдын изаһ етмишди, лакин онлар Аллаһын нијјәтинә ујғун давранмадылар. Улу валидејнләримиз итаәтсизлик јолуна гәдәм гојан илк инсанлар иди. Онлардан сонра дүнјаја ҝәлән милјонларла инсанлар да ејни јолу тутдулар. Һәтта Аллаһын сечилмиш халгы олан исраиллиләр белә итаәтсизлик јолу илә ҝетдиләр. Павел биринҹи әсрдә јашајан мәсиһчиләрә хәбәрдарлыг етмишди ки, онлардан бәзиләри, гәдим исраиллиләр кими, итаәтсизлик јолуна дүшә биләрләр. О јазмышды: «Буна ҝөрә дә ҝәлин бу динҹлик ҝүнүнә јетишмәк үчүн вар ҝүҹүмүзлә чалышаг вә диггәтли олаг ки, һеч кәс ҝүнаһ ишләјиб онлар кими, итаәтсизлик јолуна дүшмәсин» (Ибр. 4:11). Павелин сөзләриндән ајдын ҝөрүнүр ки, итаәтсиз инсанлар Аллаһын динҹлик ҝүнүнә јетишмәјәҹәкләр. Бәс бизим үчүн бу, һансы мәнаны кәсб едир? Әҝәр биз Аллаһын нијјәтинә зидд даврансаг, Онун динҹлик ҝүнүнә јетишмәк имканымызы итирәҹәјик? Бу суалын ҹавабы олдугҹа ваҹибдир вә биз ону сонра мүзакирә едәҹәјик. Ҝәлин әввәлҹә исраиллиләрин пис нүмунәсинә бахаг вә ҝөрәк Аллаһын динҹлик ҝүнүнә јетишмәк барәдә биз даһа нә өјрәнә биләрик.
«Онлар динҹлик ҝүнүмә јетишмәјәҹәкләр»
7. Јеһова һансы мәгсәдлә исраиллиләри Мисир көләлијиндән азад етмишди вә онлардан нә ҝөзләнилирди?
7 Ерамыздан әввәл 1513-ҹү илдә Јеһова салеһ бәндәси олан Мусаја исраиллиләрә даир Өз нијјәтини сөјләди. О демишди: «Мән она ҝөрә ҝәлдим ки, онлары Мисирлиләрин әлиндән гуртарыб бу өлкәдән чыхарым вә ҝениш, немәтли бир дијара, сүд вә бал ахан торпаға... апарым» (Чых. 3:8). Исраиллиләри «Мисирлиләрин әлиндән» гуртармагда Јеһованын мәгсәди о иди ки, онларын улу бабасы Ибраһимә вердији вәди јеринә јетирсин, јәни онлардан бир халг тәшкил етсин (Јар. 22:17). Аллаһ исраиллиләрә ганунлар верди вә бу ганунларын сајәсиндә халг Аллаһла сүлһ мүнасибәтиндә ола биләрди (Јешаја 48:17, 18). О, исраиллиләрә демишди: «Әҝәр сөзүмә [Ганунда дејилдији кими] диггәтлә гулаг асыб әһдимә риајәт етсәниз, сиз бүтүн халглар арасындан Мәнә мәхсус халг олаҹагсыныз. Бүтүн јер үзү Мәнимдир» (Чых. 19:5, 6). Демәли, исраиллиләр јалныз Аллаһа итаәткар олдуглары тәгдирдә Онунла јахшы мүнасибәтдә ола биләрдиләр.
8. Исраиллиләр Аллаһын сөзүнә гулаг ассајдылар, неҹә јашајаҹагдылар?
8 Тәсәввүр едирсиниз, исраиллиләр Аллаһа итаәт етсәјдиләр, неҹә јашајардылар? Јеһова онларын тарлаларына, үзүм бағларына вә сүрүләринә хејир-дуа верәҹәкди. Дүшмәнләри онларын үзәриндә ағалыг етмәјәҹәкди. (1 Падшаһлар 10:23—27 ајәләрини оху.) Мәсиһ ҝәләндә исә онлар ромалыларын әсарәти алтында јох, мүстәгил халг оларды. Јеһова истәјирди ки, Исраил халгы гоншу дөвләтләр үчүн нүмунә олсун вә һәр кәс баша дүшсүн ки, һәгиги Аллаһа итаәт етмәк һәм руһани, һәм дә мадди хејир-дуалар ҝәтирир.
9, 10. а) Нәјә ҝөрә исраиллиләрин Мисирә гајытмаг истәмәләри чох бөјүк сәһв иди? б) Әҝәр исраиллиләр Мисирә гајытсајдылар, бу, онларын ибадәтләринә неҹә тәсир едәҹәкди?
9 Исраил халгы Јеһоваја имкан верә биләрди ки, нијјәтини һәјата кечирмәк үчүн онлардан истифадә етсин. Бу, онлара, ҝәләҹәкдә исә јер үзүндә јашајаҹаг бүтүн аиләләрә хејир-дуа ҝәтирәҹәкди (Јар. 22:18). Лакин үсјанкар исраиллиләр, бир халг кими, Аллаһын теократик рәһбәрлији алтында нүмунәви халг олмаг фүрсәтинә гәтијјән мараг ҝөстәрмәдиләр. Онлар һәтта Мисирә гајытмаг фикринә дүшдүләр. (Сајлар 14:2—4 ајәләрини оху.) Амма әҝәр исраиллиләр Мисирә гајытсајдылар, бүтпәрәст вә зүлмкар ағалары онлара Мусанын Ганунуна риајәт етмәјә имкан вермәјәҹәкди вә онда онлар әтраф халглар үчүн нүмунә олмајаҹагдылар. Үстәлик, ҝүнаһларынын бағышланмасы үчүн Јеһованын тәсис етдији гурулушдан фајдалана билмәјәҹәкдиләр. Руһани шејләрә өнәм вермәјән исраиллиләр неҹә дә дүшүнҹәсиз идиләр! Јеһованын бу үсјанкар халг барәдә нөвбәти сөзләри демәси бизи тәәҹҹүбләндирмир: «Үрәјим о нәсилдән икраһ етди вә дедим: “Онларын үрәји һәмишә јолумдан дөнүр, онлар Мәним јолларымы танымырлар”. Мән гәзәбләниб анд ичдим: “Онлар динҹлик ҝүнүмә јетишмәјәҹәкләр”» (Ибр. 3:10, 11; Мәз. 95:10, 11).
10 Јолуну азмыш вә Мисирә гајытмаг фикринә дүшән исраиллиләр руһани хејир-дуалары гијмәтләндирмирдиләр. Мисирдә једикләри кәвәр, соған вә сарымсаг онлар үчүн даһа ваҹиб иди (Сај. 11:5). Нашүкүр Есав кими, бу үсјанкарлар гијмәтли руһани хејир-дуаларыны дадлы хөрәкләрә дәјишмәјә һазыр идиләр (Јар. 25:30—32; Ибр. 12:16).
11. Мусанын дөврүндәки исраиллиләрин дөнүк чыхмасы Аллаһын нијјәтинә неҹә тәсир етмишди?
11 Мисирдән чыхартдығы нәслин дөнүк чыхмасына бахмајараг, Јеһова сәбирлә нијјәтини һәјата кечирмәјә давам едирди. Лакин бу дәфә О, диггәтини исраиллиләрин нөвбәти нәслинә јөнәлтди. Јени нәсил, аталарындан фәргли олараг, даһа итаәткар иди. Јеһованын ҝөстәришилә онлар Вәд едилмиш дијара дахил олуб ону зәбт етдиләр. Јешуа 24:31 ајәсиндә дејилир: «Јешуанын бүтүн өмрү боју вә ондан сонра сағ галан, Рәббин Исраил үчүн етдији бүтүн ишләри билән ағсаггалларын өмрү боју Исраил халгы Рәббә гуллуг етди».
12. Бу ҝүн Аллаһын динҹлик ҝүнүнә јетишмәјин мүмкүн олдуғуну һарадан билирик?
12 Итаәткар нәсил өлүб аталарына говушду. «Бундан сонра Рәббин Исраил үчүн етдији ишләри билмәјән башга бир нәсил төрәди». «Исраил өвладлары Рәббин ҝөзүндә пис олан ишләр ҝөрәрәк» Баал бүтләринә гуллуг етмәјә башладылар (Һак. 2:10, 11). Вәд едилмиш дијар онлар үчүн әсил динҹлик јери олмады. Итаәтсизликләри уҹбатындан Аллаһла мүнасибәтләри корланмышды. Павел бу исраиллиләр барәдә јазмышды: «Јешуа онлары [исраиллиләри] динҹлик јеринә ҝәтирсәјди, Аллаһ артыг башга бир ҝүн һаггында данышмазды. Демәли, Аллаһын халгыны һәлә шәнбә истираһәти ҝөзләјир» (Ибр. 4:8, 9). Павел «Аллаһын халгы» дедикдә мәсиһчиләри нәзәрдә тутурду. Бу о демәкдирми ки, мәсиһчиләр үчүн Аллаһын динҹлик ҝүнүнә јетишмәк мүмкүн иди? Бәли, бу нәинки јәһудиләрдән олан мәсиһчиләрә, һәм дә диҝәр халглардан олан мәсиһчиләрә дә аид иди.
Бәзиләри Аллаһын динҹлик ҝүнүнә јетишмәдиләр
13, 14. Аллаһын динҹлик ҝүнүнә јетишмәк үчүн а) Мусанын ҝүнләриндә, б) биринҹи әсрдә исраиллиләрдән нә тәләб олунурду?
13 Павел ибраниләрдән олан мәсиһчиләрә мәктуб јазанда бәзиләринин Аллаһын нијјәтинә зидд даврандыглары илә әлагәдар өз нараһатчылыгларыны сөјләди. (Ибраниләрә 4:1 ајәсини оху.) Һәмин мәсиһчиләрин сәһви нәдә иди? Нә гәдәр гәрибә сәсләнсә дә, бу, онларын Мусанын Ганунуна риајәт етмәләри илә бағлы иди. 1500 ил бундан әввәл Аллаһын нијјәтинә ујғун јашамаг истәјән һәр бир исраиллидән Гануна риајәт етмәк тәләб олунурду. Исанын өлүмүндән сонра исә Гануна һеч бир еһтијаҹ галмады. Лакин бәзи мәсиһчиләр буну анлаја билмирдиләр вә буна ҝөрә дә онлар елә дүшүнүрдүләр ки, Мусанын мүәјјән ганунларына риајәт етмәк һәлә дә ваҹибдирb.
14 Гануна риајәт етмәјин ваҹиб олдуғуну дүшүнән мәсиһчиләрә Павел изаһ етмишди ки, ән јахшы Баш каһин Исадыр, јени әһд көһнә әһддән даһа јахшыдыр вә руһани мәбәд әллә тикилән мәбәддән даһа мөһтәшәмдир (Ибр. 7:26—28; 8:7—10; 9:11, 12). Павел Мусанын Ганунундакы шәнбә ҝүнүнү нүмунә кими истифадә едәрәк мәсиһчиләрин Јеһованын динҹлик ҝүнүнә неҹә јетишә биләҹәкләрини изаһ етди: «Аллаһын халгыны һәлә шәнбә истираһәти ҝөзләјир. Аллаһ бүтүн ишләриндән динҹәлдији кими, Аллаһын динҹлик ҝүнүнә јетишмиш адам да бүтүн ишләриндән динҹәлир» (Ибр. 4:8—10). Ибраниләрдән олан бу мәсиһчиләр дүшүнмәмәли идиләр ки, Аллаһын рәғбәтини газанмаг үчүн Мусанын Ганунуна риајәт етмәк лазымдыр. Ерамызын 33-ҹү илинин Әллинҹи ҝүн бајрамындан сонра Аллаһ Иса Мәсиһә иман ҝәтирәнләрә лүтф ҝөстәрмәјә башлады.
15. Әҝәр биз Аллаһын динҹлик ҝүнүнә јетишмәк истәјириксә, нәјә ҝөрә итаәткар олмағымыз ваҹибдир?
15 Мусанын ҝүнләриндәки исраиллиләрә Вәд едилмиш дијара дахил олмаға нә мане олду? Итаәтсизлик. Бәс Павелин ҝүнләриндәки бәзи мәсиһчиләр нәјә ҝөрә Аллаһын динҹлик ҝүнүнә јетишмәдиләр? Чүнки онлар да итаәтсизлик ҝөстәрдиләр. Онлар һеч ҹүр баша дүшә билмирдиләр ки, инди Јеһова Өз халгындан Она башга ҹүр ибадәт етмәји вә Мусанын Ганунуна риајәт етмәмәји тәләб едир.
Биз Аллаһын динҹлик ҝүнүнә неҹә јетишә биләрик?
16, 17. а) Бу ҝүн биз Аллаһын динҹлик ҝүнүнә неҹә јетишә биләрик? б) Нөвбәти мәгаләдә нәји мүзакирә едәҹәјик?
16 Јәгин ки, арамызда хиласа наил олмаг үчүн Мусанын Ганунуна риајәт етмәјин ваҹиб олдуғуну дүшүнән мәсиһчи тапылмаз. Павелин ефеслиләрә јаздығы сөзләр һеч бир шүбһә јери гојмур: «Сиз бу лүтф сајәсиндә иман васитәсилә хилас олдунуз, амма буна өзүнүз наил олмадыныз, бу, Аллаһын әнамыдыр. Бәли, һеч кәсин өјүнмәјә сәбәби олмасын дејә, хилас әмәлләрдән асылы дејил» (Ефес. 2:8, 9). Белә исә, бу ҝүн мәсиһчиләр Аллаһын динҹлик ҝүнүнә неҹә јетишә биләрләр? Билдијимиз кими, Јеһова једдинҹи ҝүнү истираһәт ҝүнү тәјин етди ки, Јер күрәси илә бағлы шанлы нијјәти јеринә јетсин. Демәли, Аллаһын динҹлик ҝүнүнә јетишмәк үчүн тәшкилаты васитәсилә ачыгланан нијјәти илә ајаглашмалыјыг.
17 Лакин әҝәр биз садиг вә ағыллы нөкәр васитәсилә алдығымыз Мүгәддәс Китаб мәсләһәтләринин бир о гәдәр дә ваҹиб олмадығыны дүшүнәрәк өз јолумузла ҝетсәк, Аллаһын нијјәтиндә бизим јеримиз олмајаҹаг. Биз Аллаһла јахшы мүнасибәтләримизи тәһлүкә алтына атмыш олаҹағыг. Нөвбәти мәгаләдә Аллаһа итаәткар олдуғумузу ҝөстәрмәк имканыны верән бәзи вәзијјәтләри нәзәрдән кечирәҹәјик. Бу вәзијјәтләрдә гәбул етдијимиз гәрарлар Аллаһын динҹлик ҝүнүнә јетишиб-јетишмәдијимизи ҝөстәрәҹәк.
[Һашијә]
a Каһинләр вә левилиләр шәнбә ҝүнләриндә мәбәддә иш ҝөрсәләр дә, «ҝүнаһкар» сајылмырдылар. Буна ҝөрә дә Аллаһын бөјүк руһани мәбәдинин баш каһини олан Иса үчүн Јеһованын она тапшырдығы иши шәнбә ҝүнүндә јеринә јетирмәк гәбаһәт дејилди (Мат. 12:5, 6).
b Ибраниләрдән олан мәсиһчиләрдән киминсә 33-ҹү илдә кечирилән Әллинҹи ҝүн бајрамындан сонра Кәффарә ҝүнүндә, јәни ҝүнаһларын бағышланмасы ҝүнүндә гурбанлар тәгдим едиб-етмәдијини дәгиг билмирик. Амма әҝәр белә едәнләр вар идисә, онларын бу һәрәкәти Мәсиһин фидјә гурбанлығына бөјүк һөрмәтсизлик иди. Лакин мәлумдур ки, ибраниләрдән олан бәзи мәсиһчиләр Мусанын Ганунунун бир һиссәси олан әнәнәләрә риајәт етмәјә давам едирдиләр (Галат. 4:9—11).
Дүшүнмәк үчүн суаллар
• Једдинҹи ҝүнүн мәгсәди нә иди?
• Једдинҹи ҝүнүн һәлә дә битмәдијинә даир һансы сүбутлар вар?
• Мусанын ҝүнләриндәки исраиллиләрә вә биринҹи әсрдәки бәзи мәсиһчиләрә Аллаһын динҹлик ҝүнүнә јетишмәјә нә мане олмушду?
• Бу ҝүн Аллаһын динҹлик ҝүнүнә јетишмәк неҹә мүмкүндүр?
[27 сәһифәдәки шәкил]
Аллаһын динҹлик ҝүнүнә јетишмәк үчүн тәшкилаты васитәсилә ачыгланан нијјәти илә ајаглашмалыјыг
[26 сәһифәдәки шәкил]
Аллаһын халгы Онун динҹлик ҝүнүнә неҹә јетишә биләр?