Мәсиһин ҝәлиши нәји һәјата кечирәҹәк?

«САН-ПАУЛУНУ ДӘҺШӘТ БҮРҮЈҮБ». «Вежа» журналы Бразилијанын ән бөјүк вә ән варлы шәһәриндә 2006-ҹы илин мај ајында дөрд ҝүн әрзиндә төрәдилән ҹинајәт һаггында белә хәбәр верирди. Јахшы дүзүлүб-гошулмуш бу ҹинајәт шәһәри «диз чөкдүрдү». «100 саатдан чох давам едән дәһшәт» тәхминән 150 нәфәрин — асајиш кешикчиләринин, ҹинајәткарларын, мүлки вәтәндашларын һә­јатына сон гојмушдур.

Јер күрәсинин, демәк олар ки, һәр буҹағында дәрҹ олунан гәзетләрин башлыгларында зоракылыгдан хәбәр верилир. Ҝөрүнүр, инсан һакимијјәтләри зоракылығын гаршысыны алмаға гадир дејил. Бизим дүнјада јашамаг ҝетдикҹә даһа тәһлүкәли олур. Бәлкә дә сиз о гәдәр пис хәбәр ешидирсиниз ки, мә’јуслуға гапылырсыныз. Анҹаг тезликлә вәзијјәт дәјишәҹәк.

Иса давамчыларына Аллаһын Падшаһлығынын ҝәлмәси вә «ҝөјдә олдуғу кими, јердә дә» Аллаһын ирадәсинин олмасы һаггында дуа етмәји өјрәдирди (Матта 6:9, 10). Бу Падшаһлыг Аллаһын Падшаһ тә’јин етдији Иса Мәсиһин идарә етдији һөкумәтдир. О, бүтүн бәшәријјәтин проблемләринә сон гојаҹаг. Анҹаг Аллаһын Падшаһлығынын Јер үзүндә дәјишикликләр етмәси үчүн инсан һакимијјәтләри Мәсиһин һакимијјәти илә әвәз олунмалыдыр. Елә Мәсиһин ҝәлиши дә мәһз буну һәјата кечирәҹәк.

Сүлһ јолу иләми?

Халглар сүлһ јолу илә Мәсиһин һакимијјәтинә табе олаҹаглармы? Һәвари Јәһјанын ­алдығы вәһј бу суала ҹаваб верир: «Мән ҹанавары [дүнјанын сијаси системини], јер үзү­нүн һөкмдарларыны вә ордуларыны атын белиндә Отуранла [Иса илә] вә Онун гошуну илә дөјүшмәк үчүн бир јерә топлашмыш ҝөрдүм» (Вәһј 19:19). Бу мүһарибәдә јер үзүнүн һөкмдарларынын агибәти неҹә олаҹаг? Мүгәддәс Китаб дејир ки, Јеһованын тә’јин етдији Падшаһ ‘дәмир әса илә онларын ҝүҹүнү гыраҹаг, сахсы габ кими онлары чилик-чилик едәҹәк’ (Мәзмур 2:9). Сијаси систем тамамилә дармадағын едиләҹәк. Аллаһын Падшаһлығы ‘бүтүн [инсан] падшаһлыгларыны әзиб-дағыдаҹаг, өзү исә әбәди галаҹаг’ (Даниел 2:44).

Бәс Аллаһын Падшаһлығына мүгавимәт ҝөстәрән инсанлары нә ҝөзләјир? Иса ‘гүдрәтли мәләкләри илә аловлу атәш ичәрисиндә ҝөјдән зүһур етдији заман Аллаһы танымајан вә Өзү барәсиндәки Мүждәјә итаәт етмәјәнләрә ҹәза верән’ шәхс кими тәсвир олунур (2 Салоникилиләрә 1:7, 8). Сүлејманын мәсәлләри 2:22 ајәсиндә дејилир: «Пис адамлар бу торпагдан атылаҹаг, хаинләрин көкү бурадан гопарылаҹаг».

Мүгәддәс Китабда Мәсиһин ҝәлиши илә әлагәдар јазылыб: «Будур О, булудларла ҝәлир! Вә һәр ҝөз... Ону ҝөрәҹәк» (Вәһј 1:7). О, һәрфи мә’нада инсанларын ҝөзүнә ҝөрүнмәјәҹәк. Ҝөјә галхандан бәри Иса «әлчатмаз нурда јашајан, инсанлардан кимсәнин ҝөрмәдији вә ҝөрмәјә гадир олмадығы» руһани шәхсијјәтдир (1 Тимотејә 6:16).

Мусанын ҝүнләриндә мисирлиләрин үзәринә Он бәла ҝәтирән заман Јеһоваја һәрфи мә’нада ҝөзә ҝөрүнмәк лазым ҝәлмәдији кими, Исаја да јер үзүнүн сакинләринин ҝөзүнә ҝөрүнмәк үчүн, инсан кими ҝәлмәк лазым дејил. Мусанын ҝүнләриндә инсанларын һеч бир шүбһәси јох иди ки, бәлалары ҝәтирән Јеһовадыр вә онлар Аллаһын гүдрәтини е’тираф етмәјә мәҹбур олдулар (Чыхыш 12:31). Ејнилә, Мәсиһ дә Аллаһын һөкмләрини иҹра етмәјә башлајанда пис адамлар ону ‘ҝөрмәјә’, јә’ни Аллаһын Иса васитәсилә онлары мүһакимә етдијини баша дүшмәјә мәҹбур олаҹаглар. Чүнки о заман бәшәријјәт артыг хәбәрдарлыг алмыш олаҹаг. Бәли, «һәр ҝөз... Ону [Исаны] ҝөрәҹәк; вә дүнјанын бүтүн гәбиләләри Онун үчүн синә дөјәҹәкләр» (Вәһј 1:7).

Јер үзүндә һәгиги сүлһүн вә фираванлығын бәргәрар олмасындан габаг пис адамларын вә һакимијјәтләрин арадан галдырылмасы ваҹибдир. Мәсиһ буну һәјата кечирәҹәк. Сонра о, јер үзүндә һәр шеји там нәзарәти алтына алаҹаг вә јердә мүһүм дәјишикликләр баш верәҹәк.

Фајда ҝәтирән јениликләр

Һәвари Петер ‘Аллаһын гәдимдән бәри Өз мүгәддәс пејғәмбәрләринин ағзы илә сөјләдији кими, һәр шејин јениләнәҹәјиндән’ ­данышырды (Һәвариләрин ишләри 3:21). Бу јениләнмә вә ја бәрпа Исанын һакимијјәти заманы јер үзүндә баш верәҹәк дәјишикликләри өзүнә дахил едир. «Һәр шејин јениләнәҹәји» һаггында данышан пејғәмбәрләрдән бири дә ерамыздан әввәл сәккизинҹи әсрдә јашамыш Јешајадыр. О, габагҹадан сөјләмишди ки, «Әмин-аманлыг Һөкмдары» Иса Мәсиһ јердә сүлһү бәргәрар едәҹәк. Мәсиһин һакимијјәти һаггында Јешаја пејғәмбәрлик едирди: «Һакимијјәтинин вә әмин-аманлығынын артмасынын сону олмајаҹаг» (Јешаја 9:6, 7). Иса халглара сүлһ ичиндә јашамағы өјрәдәҹәк. Јерин сакинләри «әмин-аманлығын боллуғундан зөвг тапаҹаг» (Мәзмур 37:11).

Мәсиһ һөкмранлыг едәндә јохсуллуг вә аҹлыг олаҹагмы? Јешаја дејирди: «Бу дағда Ордулар Рәбби бүтүн халглар үчүн зәнҝин јемәкләрдән, ҝөзәл шәраблардан ибарәт зијафәт дүзәлдәҹәк, орада ән ләзиз јемәкләр, ән дадлы шәраблар олаҹаг» (Јешаја 25:6). Мәзмурчунун сөзләринә ҝөрә ‘өлкәнин зәмиләри бол олаҹаг, дағларын башында далғаланаҹаг’ (Мәзмур 72:16). Бундан башга, јерин сакинләри һагда охујуруг: «Онлар евләр тикиб орада мәскунлашаҹаг, мејнәликләр әкәҹәк, бәһрәләриндән јејәҹәк. Тикдикләри евдә өзҝәләр јашамајаҹаг, әкдикләри бағын мејвәләрини башгалары јемәјәҹәк. Чүнки халгым ағаҹлар тәк узун өмүр сүрәҹәк, сечилмишләрим әлләринин ишләриндән зөвг алаҹаг» (Јешаја 65:21, 22).

Аллаһ Јешајанын васитәсилә хәстәликлә өлүмүн јох едиләҹәјини дә габагҹадан демишди: «О вахт корларын ҝөзләри, карларын гу­лаглары ачылаҹаг, ахсаглар ҹејран кими һоп­панаҹаг, лалларын дили севинҹлә нәғмә дејәҹәк» (Јешаја 35:5, 6). О заман һеч кәс «“хәстәјәм” демәјәҹәк» (Јешаја 33:24). Аллаһ «өлүмү әбәди олараг јох едәҹәк, Худавәнд Рәбб бүтүн адамларын үзүндән ҝөз јашларыны силәҹәк» (Јешаја 25:8).

Бәс ‘гәбирләрдә олан’ өлүләр һаггында нә демәк олар? (Јәһја 5:28, 29). Јешаја пејғәмбәрлик етмишди: «Сәнин өлүләрин јашајаҹаг... [онлар] дириләҹәк» (Јешаја 26:19). Бәли, өлүм јухусуна ҝедәнләр һәјата гајыдаҹаглар!

«Аллаһ әбәдијјән сәнин тахтындыр»

Мәсиһин ҝәлиши бүтүн Јер күрәсинин бәрпа олунмасына ҝәтириб чыхараҹаг. Јер ҝөзәл Ҹәннәтә чевриләҹәк вә бәшәријјәт јекдилликлә һәгиги Аллаһа ибадәт едәҹәк. Бәс әмин ола биләрикми ки, Иса Мәсиһ јер үзүндән пислији силиб, әдаләти бәргәрар етмәјә мүвәффәг олаҹаг?

Исаја гүдрәт вә һакимијјәти кимин вердији һагда дүшүнүн. Мүгәддәс Китаб Оғул барәдә дејир: «Еј Аллаһ, тахтын әбәди вә даимидир [«Аллаһ әбәдијјән сәнин тахтындыр», ЈД], вә Сәлтәнәтинин әсасы һагга истинад едән әсадыр. Сән салеһлији севиб, ганунсузлуға нифрәт етдин» (Ибраниләрә 1:8, 9). Исаја тахты, јә’ни һакимијјәти Јеһова вериб. Буна ҝөрә дә елә проблем олмајаҹаг ки, Иса онун өһдәсиндән ҝәлә билмәсин.

Дириләндән сонра Иса өз ­давамчыларына деди: «Ҝөјдә вә јер үзүндә бүтүн һакимијјәт Мәнә верилмишдир» (Матта 28:18). 1 Петер 3:22 ајәсиндә дејилир: «Мәләкләр, һакимијјәт вә гүдрәт саһибләри дә Она табе едилдиләр». Һеч бир һакимијјәт вә гүдрәт Иса­ја мүгавимәт ҝөстәрә билмәјәҹәк. Исанын инсанлара әбәди фајда ҝәтирмәсинә һеч нә мане ола билмәз.

Мәсиһин ҝәлиши бәшәријјәт үчүн нә демәкдир?

Һәвари Павел салониклиләрә мәктубунда ја­зырды: «Чүнки Атамыз Аллаһ һүзурунда имандан ирәли ҝәлән фәалијјәтинизи, мәһәббәтдән һасил олан әмәјинизи вә Рәббимиз Иса Мәсиһә бағладығыныз үмиддән доған мәтанәтинизи дурмадан јада салырыг» (1 Салониклиләрә 1:3). Павел сәмәрәли әмәји вә мәтанә­ти Иса Мәсиһә үмидлә әлагәләндирирди. Бу үмидә Мәсиһин ҝәлишинә вә онун сајәсиндә мүмкүн олаҹаг бәрпаја иман етмәк дахилдир. Белә үмид һәгиги мәсиһчиләрә ҝүҹ верир, јә’ни ән чәтин заманларда да мәтанәтли олмаға көмәк едир.

Мәсәлән, Бразилијанын Сан-Паулу шәһәриндә јашајан Карлосун нүмунәсинә бахаг. 2003-ҹү ил август ајында һәкимләр онда хәрчәнҝ хәстәлији ашкар етдиләр. Һәмин вахтдан бәри онун үзәриндә сәккиз дәфә ҹәрраһијјә әмәлијјаты апарылмышдыр ки, бунун да әлавә ағрылы, үзүҹү тә’сири олмушдур. Буна бахмајараг, о, һәлә дә башгаларыны руһландырырды. Мәсәлән, бир дәфә бөјүк бир хәстәхана илә үзбәүз күчәдә тәблиғ едәндә о, башга бир Јеһованын Шаһиди илә растлашды. Онун әри кимјатерапија кечирди. Өзү хәрчәнҝдән әзијјәт чәкән Карлос бу әр-арвады руһландырыб, онлара тәсәлли верә билди. Сонралар онлар демишдиләр ки, һәмин сөһбәт онлар үчүн мә’нәви дајаг олду. Беләликлә, Карлос һәвари Павелин сөзләринин һәгигилијини өз үзәриндә һисс етди: «О [Аллаһ], бизә һәр сыхынтымызда тәсәлли верир ки, биз дә һәр ҹүр сыхынты ичиндә оланлара, Аллаһын бизә вердији тәсәлли илә тәсәлли верә биләк» (2 Коринфлиләрә 1:4).

Карлос хәстәлијинә бахмајараг, башгаларыны руһландырмаға һарадан ҝүҹ тапыр? Исанын ҝәлишинә вә онун һәјата кечирәҹәкләринә бәсләдији үмид Карлосу усанмадан ‘јахшылыг етмәјә’ тәшвиг едир (Галатијалылара 6:9).

Ҝәлин һәм дә Самуелин нүмунәсинә нәзәр салаг. Онун гардашыны аталарынын евиндән ҹәми 50 метр аралыда өлдүрмүшдүләр. Онун бәдәниндә он ҝүллә јарасы тапмышдылар. Полисин ҹинајәт јериндә тәһгигат апардығы сәккиз саат әрзиндә ҹәсәд сәкидә галмышды. Самуел о ҝүн баш верәнләри унуда билмәсә дә, Мәсиһин јери бүтүн писликләрдән тәмизләјәҹәјинә вә бәшәријјәтә хејир-дуа ҝәтирәҹәк әдаләтли һакимијјәтин гурулаҹағына бәсләдији үмид она ҝүҹ верир. Самуел тез-тез јерүзү Ҹәннәтдә гардашыны гуҹагладығыны тәсәввүрүнә ҝәтирир (Һәвариләрин ишләри 24:15).

Сиз нә етмәлисиниз?

Мәсиһин ҝәлишинә вә онун һәјата кечирәҹәкләринә үмид сизә чох бөјүк тәсәлли верә биләр. Иса Мәсиһ инсан проблемләринин көкүнү вә бизи әһатә едән пислији мүтләг јох едәҹәкдир.

Мәсиһин һакимијјәтинин бәшәријјәтә ҝәтирәҹәји хејир-дуаны алмаг үчүн сиз нә етмәлисиниз? Аллаһын Кәламы олан Мүгәддәс Китабы диггәтлә арашдырын. Иса Атасына дуа едәркән демишди: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3). Мүгәддәс Китабы өјрәнмәји гаршыныза мәгсәд гојун. Јахынлығынызда јашајан Јеһованын Шаһидләри бу ишдә сизә көмәк етмәјә чох шад оларлар. Биз сизи онларла әлагә сахламаға вә ја бу журналы нәшр едәнләрә мүраҹиәт етмәјә сәмими гәлбдән дә’вәт едирик.

[7-ҹи сәһифәдәки шәкилләр]

Мәсиһин ҝәлиши јер үзүнүн там бәрпа олунмасына ҝәтириб чыхараҹаг.

[Иҹазә илә]

Кичик шәкил, јалныз арха фон: Rhino and Lion Park, Gauteng, South Africaа