«Мәсиһи һәјаты вә ибадәти. Иш дәфтәри» үчүн мәнбәләр
© 2022 Watch Tower Bible and Tract Society of Pennsylvania
6—12 МАРТ
АЛЛАҺЫН КӘЛАМЫНДАКЫ ХӘЗИНӘ | 1 САЛНАМӘЛӘР 23—26
«Ибадәтдә низам-интизам»
it-2-E с. 241
Лавилиләр
Давуд лавилиләрин ишини низама салмышды. Онлары нәзарәтчи, мәмур, һаким, дарваза кешикчиси, хәзинәдар, мәбәддә, һәјәтләрдә, јемәк отагларында тәгдимә, гурбан ҝәтирмә, паклама, өлчмә, чәкмә вә диҝәр ҝөзәтчи ишләриндә каһинләрә көмәк етмәк үчүн тәјин етмишди. Лавили мусигичиләр, каһинләр кими, 24 дәстәјә бөлүнмүшдүләр вә нөвбә илә хидмәт едирдиләр. Ишләр пүшклә мүәјјән едилирди. Дарваза кешикчиләринә ҝәлдикдә һансы дарвазада олаҹаглары ејни ҹүр мүәјјән едилирди (1См 23; 25; 26; 2См 35:3—5, 10).
it-2-E с. 686
Каһин
Каһинләр мәбәддә мүхтәлиф ишләрә ҝөрә бөлүнмүшдүләр. Мүәјјән хидмәтләр үчүн пүшк атылырды. 24 бөлүјүн һәр бири илдә ики дәфә бир һәфтә хидмәт едирди. Ҝөрүнүр, бајрамларда халг минләрлә гурбан тәгдим едәндә каһинләрин һамысы хидмәт едирди. Мәсәлән, мәбәдин һәср олунмасы заманы олдуғу кими (1См 24:1—18, 31; 2См 5:11; әлагәләндир: 2См 29:31—35; 30:23—25; 35:10—19). Каһин нөвбәси олан каһинләрин хидмәтинә мане олмадығы тәгдирдә хидмәт едә биләрди. Раввин рәвајәтләринә ҝөрә Иса јердә јашајанда каһинләр чох иди, буна ҝөрә дә һәфтәлик хидмәт бөлүкдәки аиләләр арасында бөлүнмүшдү, һәр аилә сајына ҝөрә бир вә ја ики ҝүн хидмәт едирди.
it-2-E с. 451—452
Мусиги
Јеһованын мәбәди илә бағлы һазырлыглар ҝөрәркән Давуд 4000 лавилини мусигичи кими хидмәт етмәк үчүн ајырды (1См 23:4, 5). Онлардан 288 нәфәри «Јеһоваја мәзмур охумаг үчүн тәлим алмыш», «пешәкар» мусигичиләр иди (1См 25:7). Онларын һамысынын башында үч тәҹрүбәли мусигичи, Асәф, Һиман вә Јадитун (ҝөрүнүр, диҝәр ады Итан иди) дурурду. Онларын һәрәси Лавинин үч оғлундан биринин — Һирсәм, Кәһат вә Мерарын нәслиндән иди. Демәли, үч әсас лавили өвладлары мәбәддә ифа олунан мусигидә тәмсил олунурду (1См 6:16, 31—33, 39—44; 25:1—6). Бу үч нәфәрин оғуллары ҹәми 24 нәфәр иди. Онларын һамысы јухарыда гејд олунан 288 пешәкар мусигичинин арасында иди. Һәр оғул мусигичиләрин бир бөлүјүнә башчы тәјин олунмушду. Онун рәһбәрлији алтында өз оғулларындан вә башга лавилиләрдән сечилмиш 11 пешәкар мусигичи вар иди. Беләликлә, 288 ([1 + 11] × 24 = 288) пешәкар лавили мусигичи каһинләр кими 24 һиссәјә бөлүнмүшдү. Әҝәр јердә галан 3712 «шаҝирд» дә белә бөлүнмүшдүсә, демәли, 24 бөлүјүн һәр бириндә тәхминән даһа 155 нәфәр вар иди. Бу о демәкдир ки, һәр пешәкар тәхминән 13 лавилијә мусиги тәһсили верирди. Вә онларын һамысынын мусиги савады бир-бириндән фәргли иди (1См 25:1—31). Кәрәнајчылар каһин идиләр. Одур ки, онлар лавили мусигичиләрдән әлавә идиләр (2См 5:12; әлагәләндир: Сј 10:8).
it-1-E с. 898
Дарваза кешикчиси
Мәбәддә. Өлүмүндән бир аз әввәл Давуд падшаһ лавилиләри вә мәбәд ишчиләринин ишини низама салды. Онларын арасында дарваза кешикчиләри дә вар иди. Сајлары 4000 нәфәр иди. Онлар өз бөлүкләриндә једди ҝүнлүк нөвбә чәкирдиләр. Јеһованын евинин кешијини чәкир вә гапыларын вахтлы-вахтында ачылыб-бағланмасы ишинә бахырдылар (1См 9:23—27; 23:1—6). Кешикчиликдән башга бәзиләри халгын мәбәддә истифадә етмәк үчүн ҝәтирдији ианәләрә бахырды (2Пд 12:9; 22:4). Сонралар баш каһин Јәһјадај Јуәси мәсһ едәндә ону гәсбкар мәликә Әтәлјадан горумаг үчүн дарвазалара хүсуси кешикчиләр тәјин олунмушду (2Пд 11:4—8). Јушијјә падшаһ бүтпәрәстлијин көкүнү кәсәндә дарваза кешикчиләри Баала ибадәтдә истифадә олунан әшјалары мәбәддән чыхармаға көмәк етмишдиләр. Сонра онлары шәһәрдән кәнарда јандырмышдылар (2Пд 23:4).
Һикмәт хәзинәсиндән инҹиләр
Јеһоваја ибадәт бизи хошбәхт едир
10 Биз нәғмә охујаркән Јеһоваја ибадәт едирик (Зәб. 28:7). Исраиллиләр үчүн һәмд нәғмәси ифа етмәк ибадәтдә өнәмли јер тутурду. Давуд падшаһ мәбәддә мәзмур охумаг үчүн 288 лавили тәјин етмишди (1 Салн. 25:1, 6—8). Бу ҝүн дә биз һәмд нәғмәләри охујаркән Јеһоваја мәһәббәтимизи ифадә едирик. Сәсимизин ҝөзәл олуб-олмамасы ваҹиб дејил. Бир мәгам үзәриндә дүшүнүн: данышаркән һәр биримиз «дәфәләрлә сәһв едирик», амма бу бизим јығынҹагда вә хидмәтдә данышмағымыза манеә дејил (Јаг. 3:2). Ејнилә сәсимизин ҝөзәл олмадығыны дүшүндүјүмүзә ҝөрә Јеһованы нәғмәләрдә тәрәннүм етмәкдән чәкинмәмәлијик.
w11-Е 1/6 с. 14—15
Мәсиһи јығынҹағы ваҹиб бир иши ҝөрмәк үчүн тәшкил олунуб (Мәтта 24:24; 1 Тимутијә 2:3, 4). Иса давамчыларына Падшаһлыг һагда хош хәбәри бүтүн халглардан олан инсанлара тәблиғ етмәји әмр етмишди вә бејнәлхалг бир тәшкилат олмадан бу иши ҝөрмәк мүмкүнсүз оларды. Мисал үчүн, бир инсана јемәк вермәк асандыр, амма минләрлә, һәтта милјонларла инсана јемәк пајламаг үчүн бирлик ичиндә чалышан, јахшы тәшкил олунмуш бөјүк бир команда лазымдыр. Ејнилә, Исанын әмрини јеринә јетирмәк үчүн әсл мәсиһиләр Аллаһа хидмәтдә «чијин-чијинә» әмәкдашлыг едирләр (Сәфанја 3:9). Сизҹә, бирлик ичиндә чалышан низам-интизамлы тәшкилат олмадан мүхтәлиф халглардан, мәдәнијјәтдән олан вә фәргли дилләрдә данышан инсанларын әмәкдашлыг етмәји мүмкүн олардымы? Ҹаваб ајдындыр.
▪ Мәсиһи јығынҹағы мәсиһиләрин бир-бириләрини руһландырмасы вә дәстәк олмасы үчүн тәшкил олунуб. Алпинист дүшүнә биләр ки, о, тәк оларса, һара дырмашаҹағына өзү гәрар верә биләр вә тәҹрүбәсиз алпинистләрин көмәјинә еһтијаҹы јохдур. Амма һәр һансы бир һадисә баш верәрсә вә ја бир чәтинлик јаранарса, о, ҹидди тәһлүкә илә үзләшәҹәк вә һәмин ан она көмәк етмәк үчүн јанында һеч ким олмајаҹаг. Бу иши тәкбашына ҝөрмәк мүдрик аддым олмазды (Мәсәлләр 18:1). Мәсиһиләр дә Исанын әмрини јеринә јетирмәк үчүн бир-биринә көмәк етмәли вә дәстәк олмалыдырлар (Мәтта 28:19, 20). Мәсиһиләр тәслим олмајыб Јеһоваја хидмәтләрини давам едә билмәләри үчүн јығынҹагларда Мүгәддәс Китабдан лазыми өјүд-нәсиһәти, тәлими алыр вә руһланыр. Әҝәр ҝөстәриш алмаг вә ибадәт етмәк үчүн низам-интизамла кечирилән ҝөрүшләр олмасајды, инсан Јеһованын јолларыны неҹә өјрәнәрди? (Ибраниләрә 10:24, 25)
▪ Мәсиһи јығынҹағы мәсиһиләрин Аллаһа бирлик ичиндә хидмәт етмәси үчүн тәшкил олунуб. Исанын гузулары онун сәсинә гулаг асанда онун рәһбәрлији алтында бир сүрүдә бирләшир (Јәһја 10:16). Онлар мүстәгил груплара, килсәләрә бөлүнмәјибләр, һәмчинин алдыглары тәлимләр дә бир-бириндән фәргләнмир. Әксинә, онлар арасында фикир бирлији вар (1 Коринфлиләрә 1:10). Бирлик ичиндә јашамаг үчүм низам-интизам, низам-интизам үчүн исә тәшкилатчылыг ҝәрәкдир. Јалныз бирлик ичиндә ибадәт едән инсанлар Аллаһдан немәтләр ала биләр (Зәбур 133:1, 3).
Аллаһа вә Онун Кәламына олан әсл мәһәббәт милјонларла инсаны Мүгәддәс Китаб тәләбләринә ујғун гурулмуш бир тәшкилата ҹәлб едир. Јеһованын Шаһидләри бирлик ичиндә вә тәшкил олунмуш шәкилдә бүтүн јер үзүндә Аллаһын нијјәтини јеринә јетирмәјә чалышырлар. Онлар Аллаһын бу вәдинә етибар едирләр: «Мән онларын арасында јашајаҹағам вә онларла олаҹағам. Мән онларын Аллаһы олаҹағам, онлар да Мәним халгым олаҹаглар» (2 Коринфлиләрә 6:16). Сиз дә Јеһоваја Онун тәшкилаты илә бирҝә хидмәт етсәниз, бу мөһтәшәм немәт сизә дә нәсиб ола биләр.
13—19 МАРТ
АЛЛАҺЫН КӘЛАМЫНДАКЫ ХӘЗИНӘ | 1 САЛНАМӘЛӘР 27—29
«Атанын оғлуна өјүд-нәсиһәти»
Мәсиһчи олдуғуну һеч заман унутма
9 Мүгәддәс Китаб һәгигәтләрини тәдгиг ет. Өзүмүзү там әсасла Јеһованын хидмәтчиси һесаб етмәк үчүн, Аллаһын Кәламыны јахшы билмәлијик (Филипилиләрә 1:9, 10). Јашындан асылы олмајараг, һәр бир мәсиһчи инандығы шејләрин һәгигәтән дә Мүгәддәс Китаба әсасландығына даир өзү сүбутлар тапмалыдыр. Павел һәмиманлыларыны тәшвиг едирди: «Һәр шеји тәдгиг един; јахшылыға бағлы олун» (1 Салониклиләрә 5:21). Мәсиһчи аиләләриндә тәрбијә алан ушаглар дәрк етмәлидирләр ки, садәҹә валидејнләринин иманына бел бағлаја билмәзләр. Давуд оғлу Сүлејмана нәсиһәт верирди: «Атанын Аллаһыны таны, сәмими гәлбдән... Она гуллуг ет» (1 Салнамәләр 28:9). Ҝәнҹ Сүлејмана садәҹә атасынын Јеһоваја неҹә хидмәт етдијини мүшаһидә етмәк кифајәт дејилди. О, өзү шәхсән Јеһованы јахындан танымалы иди. Вә о, белә дә давранырды. Сүлејман Аллаһа јалварырды: «Мәнә һикмәт вә билик вер ки, бу халга нә едиб-етмәјәҹәјими билим» (2 Салнамәләр 1:10).
Јеһоваја бүтөв үрәклә хидмәт един
13 Бу нүмунәдән алаҹағымыз дәрс ајдындыр. Бизә севинҹ вә мәмнунлуг ҝәтирән јығынҹаг ҝөрүшләриндә вә хидмәтдә мүнтәзәм иштирак етмәјимиз тәрифәлајигдир. Лакин Јеһоваја бүтөв үрәклә хидмәт етмәк өзүнә даһа чох шеји дахил едир (2 Салн. 25:1, 2, 27). Әҝәр мәсиһчи үрәјинин дәринликләриндә архадакы шејләри, јәни бу дүнјада олан мүәјјән шејләри севмәјә давам едирсә, о, Аллаһ гаршысында малик олдуғу јахшы ады итирмәк тәһлүкәсиндәдир (Лука 17:32). Биз јалныз сөзүн әсил мәнасында писликдән икраһ етдијимиз вә јахшылыгдан бәрк јапышдығымыз тәгдирдә Аллаһын Падшаһлығы үчүн јарарлы ола биләрик (Ром. 12:9; Лука 9:62). Буна ҝөрә дә һәр биримиз әмин олмалыјыг ки, Шејтан дүнјасында олан һеч бир шеј, нә гәдәр фајдалы вә ҹәлбедиҹи олмасындан асылы олмајараг, бизә бүтүн үрәклә Падшаһлығын ишини ҝөрмәјә мане олмур (2 Кор. 11:14; Филипилиләрә 3:13, 14 ајәләрини оху).
«Ҹәсур ол,.. ишә башла!»
20 Падшаһ Давуд Сүлејманы әмин етди ки, мәбәдин иншасыны баша чатдырана гәдәр Јеһова она дајаг олаҹаг (1 Салн. 28:20). Атасынын бу сөзләри Сүлејманы үрәкләндирди. Беләҹә, о, ҝәнҹ вә сәриштәсиз олмасынын онун јолунда чәпәр олмағына јол вермәди. Сүлејман бөјүк шүҹаәт ҝөстәрәрәк ишә ҝиришди вә Јеһованын көмәји илә једди ил јарыма бу һәшәмәтли мәбәдин иншасыны тамамлады.
21 Јеһова Сүлејмана дајаг олдуғу кими, бизә дә ҹәсарәтли олуб аиләмиздә вә јығынҹагда өһдәмизә дүшән ишләри тамамламаға дәстәк олаҹаг (Әшј. 41:10, 13). Јеһоваја ибадәтимизин бүтүн саһәләриндә ҹәсарәтли олсаг, онда һәм бу ҝүн, һәм дә ҝәләҹәкдә Аллаһын лүтфләринә саһиб олаҹағыг. Одур ки, ҝәлин, ҹәсур олуб ишә башлајаг!
Һикмәт хәзинәсиндән инҹиләр
Дост доста тән ҝәрәк...
Давудун чәтин анларында она дајаг олан башга достлары да вар иди. Онлардан бири Хушај иди. Мүгәддәс Китабда о, «Давудун досту» адланыр (2 Ишм. 16:16; 1 Салн. 27:33). Ола билсин, Хушај падшаһын мәхфи тапшырыгларыны јеринә јетирән ән јахын әјанларындан, достларындан бири иди.
Давудун оғлу Абсалам атасынын тахтыны әлә кечирәндә исраиллиләрин чоху Абсаламын тәрәфинә кечмишди, Хушај исә падшаһына садиг галмышды. Давуд ҹаныны ҝөтүрүб шәһәрдән гачанда Хушај онун јанына ҝетди. Давуд чох пәришан иди, өз белиндән ҝәлән оғлу вә етибар етдији инсанлар она хәјанәт етмишди. Хушај исә Давуда гаршы гурулан суи-гәсд планыны позмаг үчүн һәјатыны тәһлүкәјә атмагла достуна садиг олдуғуну сүбут етди. О, падшаһын әјаны олдуғу үчүн јох, әсл дост олдуғу үчүн белә давранды (2 Ишм. 15:13—17, 32—37; 16:15—17:16).
20—26 МАРТ
АЛЛАҺЫН КӘЛАМЫНДАКЫ ХӘЗИНӘ | 2 САЛНАМӘЛӘР 1—4
«Сүлејман падшаһын ағылсыз гәрары»
it-1-E с. 174, абз. 5
Орду
Сүлејманын һакимијјәти дөврүндә Исраил ордусунун тарихиндә јени сәһифә ачылды. Онун һакимијјәти дөврүндә нисбәтән динҹлик һөкм сүрүрдү. Анҹаг Сүлејман атларын вә ҹәнҝ арабаларынын сајыны артырды. Атлары әсасән Мисирдән алыб ҝәтирди. Бу јени орду бөлүкләрини јерләшдирмәк үчүн өлкәнин һәр јериндә шәһәрләр салмаг лазым ҝәлмишди (1Пд 4:26; 9:19; 10:26, 29; 2См 1:14—17). Анҹаг Јеһова Сүлејманын бу јенилијини уғурлу етмәди. О, өләндән сонра өлкә ики јерә бөлүндү. Бунунла да Исраил ордусу тәнәззүлә уғрады. Сонралар Әшија пејғәмбәр јазмышды: «Көмәк үчүн Мисирә ҝедән, атлара ҝүвәнән, ҹәнҝ арабаларынын сајына архаланан, ҝүҹлү дөјүш атларына бел бағлајан кәсләрин вај һалына! Онлар Исраилин Мүгәддәсинә тәрәф бахмыр, Јеһованы ахтармырлар» (Әш 31:1).
it-1-E с. 427
Араба
Исраилдә Сүлејмана гәдәр ҹәнҝ арабаларындан ибарәт орду һиссәси јох иди. Бунун әсас сәбәби Аллаһын гојдуғу гадаға иди. Халг өлкәнин тәһлүкәсизлијинин атлардан асылы олдуғуну дүшүнүб атларын сајыны чохалтмамалы иди. Бу гадаға сәбәбиндән ҹәнҝ арабалары да мәһдуд сајда иди. Ахы арабаја ат гошмаг лазым иди (Гн 17:16). Ишмуил пејғәмбәр падшаһын халгын үзәринә гојаҹағы јүк барәдә хәбәрдарлыг едәндә демишди: «О, оғулларынызы апарыб ҹәнҝ арабаларына миндирәҹәк» (1Иш 8:11). Абсалам вә Әдунијјә һакимијјәти әлә кечирмәк истәјәндә өзләри үчүн ҹәнҝ арабасы дүзәлдиб габағында гачмаға 50 адам гојмушдулар (2Иш 15:1; 1Пд 1:5). Давуд Собаһ падшаһыны мәғлуб едәндә гошгу атларындан јүзүнү сахламышды (2Иш 8:3, 4; 10:18).
Сүлејман падшаһ Исраил ордусуну мөһкәмләндирәркән ҹәнҝ арабаларынын сајыны 1400-ә чатдырмышды (1Пд 10:26, 29; 2См 1:14, 17). Јерусәлимлә јанашы, арабалар үчүн ајрылан шәһәрләрдә бу дөјүш аваданлығына гуллуг етмәк үчүн хүсуси јерләр вар иди (1Пд 9:19, 22; 2См 8:6, 9; 9:25).
Һикмәт хәзинәсиндән инҹиләр
«Икинҹи Салнамәләр» китабындан диггәтәлајиг фикирләр
1:11, 12. Сүлејманын хаһишиндән Јеһова ҝөрдү ки, билик вә һикмәти газанмаг онун үрәјинин арзусу иди. Бизим дуаларымыз да үрәјимиздә нәјин олдуғуну ашкар едир. Нә һагда дуа етмәјимизә фикир веририксә, мүдрик давранырыг.
27 МАРТ — 2 АПРЕЛ
АЛЛАҺЫН КӘЛАМЫНДАКЫ ХӘЗИНӘ | 2 САЛНАМӘЛӘР 5—7
«Гәлбим... һәмишә орада олаҹаг»
w02-E 15/11 с. 5, абз. 1
Диндашларла бирҝә јығышмагдан ваз кечмәјин
Сонралар Давуд Јерусәлимдә падшаһ оланда Јеһованын адына ев тикмәк арзусуну дилә ҝәтирди. Анҹаг Давуд чохлу мүһарибәләр етдији үчүн Јеһова она деди: «Сән Мәним адыма ев тикмәјәҹәксән». О, мәбәди тикмәји Давудун оғлу Сүлејмана тапшырды (1 Салнамәләр 22:6—10). Сүлејман мәбәди једди ил јарыма тикди вә б. е. ә. 1026-ҹы илдә мәбәдин ачылышыны етди. Јеһова бу тикилидән разы галдығыны билдирәрәк деди: «Адымы һәмишәлик сәнин тикдијин бу евә вериб ону мүгәддәс етдим. Гәлбим, нәзәрим һәмишә орада олаҹаг» (1 Падшаһлар 9:3). Исраиллиләр садиг галдығы мүддәтдә Јеһованын нәзәри бу евин үстүндә олаҹагды. Анҹаг әјри јола гәдәм гојсајдылар, Јеһова бу јери лүтфүндән мәһрум едәҹәкди вә ев харабазара дөнәҹәкди (1 Падшаһлар 9:4—9; 2 Салнамәләр 7:16, 19, 20).
it-2-E с. 1077—1078
Мәбәд
Тарихи. Бу мәбәд б. е. ә. 607-ҹи илә гәдәр галды. Һәмин ил Навуходоносорун башчылығы алтында Бабил ордусу мәбәди дағытды (2Пд 25:9; 2См 36:19; Әр 52:13). Исраил јалан динләрә үз тутдуғу үчүн Аллаһ изин верирди ки, башга халглар Јәһуда вә Јерусәлими сыхышдырсынлар, бәзән исә мәбәдин хәзинәсини талан етсинләр. Бундан башга, бәзән мәбәд бахымсыз галырды. Мисир падшаһы Шишаг (б. е. ә. 993-ҹү ил) Сүлејманын оғлу Рәһабамын дөврүндә, мәбәдин ачылышындан тәхминән 33 ил сонра орадакы хәзинәни талан етди (1Пд 14:25, 26; 2См 12:9). Аса падшаһ (б. е. ә. 977—937) Јеһованын евинә еһтирам бәсләјирди. Амма Јерусәлими мүдафиә етмәк үчүн о, ахмаглыг едиб, Арам падшаһы I Бәнһәдада мәбәдин хәзинәсиндән ҝүмүш вә гызыл хәраҹ верди ки, Исраил падшаһы Баша илә сазиши позсун (1Пд 15:18, 19; 2См 15:17, 18; 16:2, 3).
Һикмәт хәзинәсиндән инҹиләр
w10-E 1/12 с. 11, абз. 7
О, инсанын үрәјиндәкиләрдән аҝаһдыр
Сүлејманын дуасы бизим дә гәлбимизә тәсәлли верир. Инсанлар һиссләримизи, дәрдимизи, гәмимизи там баша дүшә билмәз (Мәсәлләр 14:10). Амма Јеһова бизим үрәјимиздәкиләрдән аҝаһдыр. О, һәгигәтән дә, бизим гајғымыза галыр. Дуада үрәјимизи она ачыб-бошалтсаг, дәрд јүкүнү дашымаг бир аз асанлашаҹаг. Мүгәддәс Китабда дејилир: «Бүтүн гајғыларынызы Онун үзәринә гојун, чүнки О, гајғынызы чәкир» (1 Бутрус 5:7).
w93-E 1/2 с. 31
Охуҹуларын суаллары
Мәсиһи хәстәлик уҹбатындан вә ја сәјаһәтдә олдуғу үчүн анма мәрасиминдә иштирак едә билмирсә, мәрасими бир ај сонра гејд едә биләр?
Ола билсин, бәзи ҝөзләнилмәз вәзијјәтләрә, јәни хәстәлик уҹбатындан вә ја сәјаһәт заманы үзләшдији чәтинликләрә ҝөрә мәсиһи анма мәрасиминдә иштирак едә билмәсин. Бәс белә вәзијјәтдә нә етмәк олар?
Мәрасим заманы мәрасимдә иштирак едәнләр мајасыз чөрәк вә гырмызы шәрабы бир-бирләринә өтүрүрләр. Аллаһын мүгәддәс руһу илә мәсһ олунмуш вә ҝөјләр дәвәти алмыш шәхсләр исә бу символлардан гәбул едирләр (Мәтта 26:26—29; Лука 22:28—30). Символлардан һәр ил гәбул едән мәсиһи, һәмин ил хәстәлијинә ҝөрә хәстәханада вә ја евдә оларса, јерли јығынҹағын ағсаггаллары өз араларындан бир нәфәри тәјин едәҹәк ки, она шәраб вә чөрәк апарсын, Мүгәддәс Китабдан онунла мүвафиг ајәләри мүзакирә етсин вә онун символлардан гәбул етмәсини тәшкил етсин. Әҝәр мәсһ олунмуш мәсиһи өз јығынҹағындан узагдадырса, о, һәмин тарихдә олдуғу әразидәки јығынҹаға ҝетмәлидир.
Бүтүн бунлары нәзәрә алараг, мәсһ олунмуш мәсиһи јалныз истисна һалларда Ағанын шам јемәјини 30 ҝүн (1 гәмәри ај) сонра гејд едә биләр. Бу һал Сајлар 9:10, 11 ајәләринә вә 2 Салнамәләр 30:1—3, 15 ајәләриндәки нүмунәјә ујғундур.
Јер үзүндә әбәди јашамаг үмидинә малик «башга гојунлар»а чөрәк вә шәрабдан гәбул етмәк әмри верилмәјиб (Јәһја 10:16). Дүздүр, онлар символлардан гәбул етмирләр, лакин бу мәсиһиләрин дә мәрасимдә иштирак етмәкләри ваҹибдир. Әҝәр онлардан кимсә хәстәләнибсә, јахуд сәјаһәтдәдирсә вә һәмин ахшам һеч бир јығынҹагда иштирак едә билмәјәҹәксә, о, мүвафиг ајәләри (Исанын мәрасими тәсис етмәси илә бағлы ајәләр дә дахил олмагла) охуја вә бүтүн дүнјада бу мәрасимин манеәсиз кечмәси үчүн Јеһоваја дуа едә биләр. Белә олан һалда, бир ај сонра Мүгәддәс Китаб ајәләрини мүзакирә етмәк үчүн хүсуси ҝөрүш тәшкил етмәјә еһтијаҹ јохдур.
10—16 АПРЕЛ
АЛЛАҺЫН КӘЛАМЫНДАКЫ ХӘЗИНӘ | 2 САЛНАМӘЛӘР 8, 9
«О, һикмәтә дәјәр верирди»
w99-E 1/11 с. 20, абз. 4
Сәхавәтин боллуғу
Сөзсүз ки, Сәба мәликәси Сүлејманын јанына ҝәлмәк үчүн чохлу вахт вә ҝүҹ сәрф етмишди. Чох јәгин ки, Сәба мүасир Јәмән Республикасынын әразисиндә јерләширди. Демәли, Јерусәлимә ҝәлмәк үчүн мәликә вә онун карваны 1600 километрдән чох мәсафә гәт етмишди. Исанын дедији кими, мәликә «дүнјанын о башындан дуруб ҝәлмишди». Бәс нәјә ҝөрә о өзүнә бу гәдәр әзијјәт вермишди. Чүнки Сүлејманын һикмәтини динләмәк истәјирди (Лука 11:31).
w99-E 1/7 с. 30, абз. 4, 5
Мүкафаты бөјүк олан ҝөрүш
Мәликә Јерусәлимә бөјүк бир мәијјәтлә, балзам, чохлу гызыл, даш-гаш јүкләнмиш дәвәләрлә ҝәлди (1 Падшаһлар 10:2а). Бәзи алимләрин фикринҹә, бөјүк мәијјәтә силаһлы дәстә дә дахил иди. Бу ола биләр. Чүнки мәликә гүдрәтли шәхсијјәт иди, үстәлик, јанында он милјонларла доллар дәјәриндә гијмәтли әшјалар вар иди.
Анҹаг диггәт јетирин ки, мәликә Сүлејманын Јеһованын ады сајәсиндә газандығы шөһрәт барәдә ешитмишди. Бу, садәҹә ишҝүзар сәфәр дејилди. Ҝөрүнүр, мәликә, әсасән, Сүлејманын һикмәтини динләмәк, чох јәгин ки, Аллаһы Јеһова барәдә өјрәнмәк үчүн ҝәлмишди. Мәликә ја Самын, ја да Һамын нәслиндән төрәмишди. Буна ҝөрә дә әҹдадларынын дини она мараглы ҝәлирди.
w99-E 1/7 с. 30—31
Мүкафаты бөјүк олан ҝөрүш
Сәба мәликәси Сүлејманын һикмәтини, сәлтәнәтиндә һөкм сүрән фираванлығы ҝөрәндә мат галды (1 Падшаһлар 10:4, 5). Бәзи алимләр «мат галды» ифадәсини «нәфәси кәсилди» кими тәрҹүмә едир. Бир алим исә һәтта дејир ки, мәликә һушуну итирмишди. Һәр неҹә олса да, ҝөрдүкләри, ешитдикләри мәликәни һејран гојмушду. О, Сүлејманын хидмәтчиләринә падшаһын һикмәтини динләдикләри үчүн бәхтәвәрлик охуду вә Сүлејманы тахта чыхаран Јеһоваја алгыш етди. Сонра падшаһа баһалы һәдијјәләр верди. Елә тәкҹә гызылын дәјәри мүасир пулла тәхминән 40 000 000 доллар иди. Сүлејман да мәликәјә һәдијјәләр верди, онун арзуладығы, истәдији һәр шеји она верди (1 Падшаһлар 10:6—13).
it-2-E с. 990—991
Сүлејман
Мәликә мәбәдин, Сүлејманын евинин әзәмәтини, онун сүфрәсини, ичкиләрини, хөрәк пајлајанларын ҝејимини, мәбәддә һәмишә тәгдим олунан јандырма гурбанларыны ҝөрәндә мат галды. О деди: «Сән демә, мәнә ҝөрдүкләримин һеч јарысыны да данышмајыблар. Сән ешитдијимдән гат-гат һикмәтли, зәнҝин имишсән!» Сонра белә бир падшаһа хидмәт едән кәсләрә бәхтәвәрлик охуду. Бүтүн бунлары ҝөрәндә Јеһоваја һәмд етди, Исраилә олан севҝисиндән ирәли ҝәләрәк Сүлејманы әдаләти, салеһлији бәргәрар етмәк үчүн падшаһ гојан Јеһова Аллаһа мәдһләр уҹалтды (1Пд 10:4—9; 2См 9:3—8).
Һикмәт хәзинәсиндән инҹиләр
it-2-E с. 1097
Тахт
Исраил падшаһларындан јалныз Сүлејманын дүзәлтдији тахт барәдә тәфәррүатлар јазылыб (1Пд 10:18—20; 2См 9:17—19). Бу тахт ејван-диванханасында — Јерусәлимдә Муријјә дағында јерләшән биналарын бириндә јерләширди (1Пд 7:7). Тахт фил дишиндән дүзәлдилмишди. Тахт, архасындакы даирәви чыхынты вә һәр ики тәрәфиндәки голлары халис гызылла өртүлмүшдү. Һәрчәнд тахтын әсасән фил дишиндән дүзәлдилдији дејилир, амма мәбәдин тикинти техникасыны әсас ҝөтүрсәк, бөјүк еһтимал ки, тахт ағаҹдан дүзәлдилмишди, халис гызылла өртүлмүшдү вә фил диши илә ҝөзәл шәкилдә бәзәдилмишди. Кәнардан баханда елә ҝөрүнүрдү ки, о, бүтүнлүклә фил дишиндән дүзәлдилиб вә гызылла өртүлүдүр. Тахтын алты пилләсиндән данышыландан сонра һәмин ајәдә белә јазылыб: «Отураҹағын һәр ики тәрәфиндә голлары вар иди вә голларын јанында ики шир һејкәли дурурду. Алты пилләдә 12 шир дурурду» (2См 9:17—19). Бу, чох мүнасиб иди, чүнки шир гүдрәтли һакимијјәти тәмсил едир (Јр 49:9, 10; Вһ 5:5). 12 шир Исраилин 12 гәбиләсини тәмсил едирди, еһтимал ки, бу, тахта отуран һөкмдара табе олдугларыны вә ону дәстәкләмәјә һазыр олдугларыны ҝөстәрирди. Тахта гызыл кәтил бәркидилмишди. Архасында чыхынтылары, гаршысында әзәмәтли ширләр олан, фил дишиндән вә гызылдан һазырланмыш бу тахтын тәсвиринә нәзәр салсаг, ҝөрмәк олар ки, о, бүтүн сәлтәнәтләрин ән әзәмәтлиси иди. Буну археологларын арашдырмаларына, гәдим абидәләрин тәсвиринә вә китабәләрдә јазыланлара әсасән демәк олар. Салнамәчи нөвбәти сөзләриндә һаглы иди: «Һеч бир сәлтәнәтдә буна бәнзәр шеј јох иди» (2См 9:19).
17—23 АПРЕЛ
АЛЛАҺЫН КӘЛАМЫНДАКЫ ХӘЗИНӘ | 2 САЛНАМӘЛӘР 10—12
«Һикмәтли мәсләһәтә гулаг асын»
О, Аллаһын рәғбәтини газана биләрди
Рәһабам ики даш арасында галыр. Әҝәр халгын истәјини јеринә јетирсә, өзү дә, аиләси дә, әтрафындакы инсанлар да өјрәшдикләри дәмдәсҝаһлы јашајышларыны мүәјјән дәрәҹәдә итирәҹәк. Јох әҝәр халгын хаһишини рәдд етсә, халг она гаршы галха биләр. Бәс о, нә едир? Јени падшаһ илк нөвбәдә бир вахтлар атасы Сүлејмана хидмәт етмиш ағсаггалларла мәсләһәтләшир. Лакин сонра ҝедиб һәмјашыдларындан мәсләһәт алыр. Рәһабам һәмјашыдларынын дедикләринә гулаг асыб халгла сәрт рәфтар етмәк гәрарына ҝәлир. О, халга дејир: «Мән бојундуруғунузу даһа да ағырлашдыраҹағам. Атам сизи гамчы илә ҹәзаландырырды, мән исә сизи бизли гамчы илә ҹәзаландыраҹағам» (2 Салн. 10:6—14).
w01-E 1/9 с. 28—29
Дүзҝүн гәрарлар верин
Һәмчинин јығынҹагда јеткин мәсиһиләр вар. Онларла да гәрар вермәли олдуғумуз мәсәләләр барәдә даныша биләрик (Ефеслиләрә 4:11, 12). Анҹаг башгалары илә мәсләһәтләшмәк о демәк дејил ки, бир-бир һамы илә мәсләһәтләшәҹәјик, та о вахта гәдәр ки, истәдијимизи дејән адамы тапаг. Сонра онун мәсләһәтинә әмәл едәк. Рәһабам бизим үчүн ибрәтдир. Чәтин гәрар гаршысында галанда атасына гуллуг етмиш ағсаггаллар она ҝөзәл мәсләһәт вердиләр. Анҹаг ағсаггалларын мәсләһәтинә әмәл етмәк әвәзинә Рәһабам өзү илә бөјүмүш ҹаванларла мәсләһәтләшди. Онларын мәсләһәтинә гулаг асыб чох пис гәрар верди, нәтиҹәдә, сәлтәнәтинин бөјүк һиссәси әлиндән чыхды (1 Падшаһлар 12:1—17).
Мәсләһәт лазым оланда һәјат тәҹрүбәси олан, Мүгәддәс Јазылары јахшы билән вә дүзҝүн принсипләри рәһбәр тутан кәсләрлә мәсләһәтләшин (Мәсәлләр 1:5; 11:14; 13:20). Вахт ајырыб мәсәләјә аид олан принсипләри ҝөтүр-гој един, о ҹүмләдән топладығыныз бүтүн мәлумат барәдә дүшүнүн. Вәзијјәтә Јеһованын Кәламынын ишығында баханда һансы гәрарын дүзҝүн олдуғу ајдын ҝөрүнәҹәк (Филиппилиләрә 4:6, 7).
it-2-E с. 768, абз. 1
Рәһабам
Рәһабамын тәкәббүрү, дикбашлығы халгы ондан узаглашдырды. Тәкҹә Јәһуда вә Бинјамин гәбиләси Давуд евинин тәрәфиндә галды, еләҹә дә һәр ики падшаһлыгда јашајан каһин вә лавилиләр, о ҹүмләдән диҝәр он гәбиләдән олан ајры-ајры адамлар Давуд евини дәстәкләди (1Пд 12:16, 17; 2См 10:16, 17; 11:13, 14, 16).
Һикмәт хәзинәсиндән инҹиләр
it-1-E с. 966—967
Кечијәбәнзәр ҹинләр
Јушә 24:14 ајәсиндәки сөзләр ҝөстәрир ки, исраиллиләр Мисирдә јашадыглары вахт әрзиндә мүәјјән дәрәҹәдә орадакы бүтпәрәстлијин тәсири алтына дүшмүшдүләр. Һизгијалын сөзләриндән ҝөрүнүр ки, һәмин дөврдән узун илләр сонра да онлар бу тәсирдән чыха билмәмишдиләр (Һз 23:8, 21). Бу сәбәбдән, бәзи алимләрин фикринҹә, сәһрада исраиллиләрә кечијәбәнзәр ҹинләрә гурбан ҝәтирмәји гадаған едән ганун (Лв 17:1—7) вә Әрубамын сәҹдәҝаһларда кечијәбәнзәр ҹинләрә вә дүзәлтдији даналара хидмәт етмәк үчүн каһинләр тәјин етмәси (2См 11:15) ону ҝөстәрир ки, исраиллиләрин арасында кечијә ибадәтин һансыса формасы, мәсәлән, хүсусән дә Ашағы Мисирдә ҝениш јајылмыш формасы мөвҹуд иди. Һеродот иддиа едир ки, јунанларын Пан илаһына, һәмчинин шәһвәтли мешә танрылары олан сатирләрә етигады мәһз Мисирдәки бу ибадәт формасындан доғуб. Сонралар онлар бујнузлу, кечи гујруғу олан, ајаглары кечи ајагларына бәнзәјән варлыглар кими тәсвир олунурдулар. Бәзи алимләрин фикринҹә, бәдәнинин јарысы һејван бәдәни олан бу аллаһлара ҝөрә Еркән Орта әсрләрдә христианлыгда Шејтаны гујруглу, бујнузлу, һача дырнаглы тәсвир едирдиләр.
Анҹаг бу «түклүләрин» («сеирим») әслиндә нә олдуғу гејд олунмајыб. Бәзи алимләр онларын кечи вә ја кечи формасында бүт олдуғуну һесаб едир. Анҹаг нә бу ајә, нә дә башга ајә бунун белә олдуғуну ҝөстәрмир. Бу сөз, ола билсин, садәҹә ону ҝөстәрир ки, бүтпәрәстләрин тәсәввүрүндә бу ҹүр јалан аллаһлар кечијәбәнзәр вә ја түклү иди. Јахуд да бу ајәләрдә «кечи» сөзүнүн ишләнмәси бүтүн бүтләрә гаршы икраһ ифадә едир, неҹә ки диҝәр ајәләрдә бүт сөзүнү билдирән сөзүн илкин мәнасы «јумру нәҹис күтләләри» демәкдир. Анҹаг бу о демәк дејил ки, бүтләри һәрфән нәҹисдән дүзәлдирдиләр (Лв 26:30; Гн 29:17).
24—30 АПРЕЛ
АЛЛАҺЫН КӘЛАМЫНДАКЫ ХӘЗИНӘ | 2 САЛНАМӘЛӘР 13—16
«Јеһоваја һәмишә ҝүвәнин»
Ҝәнҹ гардашлар, сиз башгаларынын етибарыны газана биләрсиз
12 Ҝәнҹ падшаһ олан Аса тәвазөкар вә ҹәсарәтли иди. О, атасы Әбијјадан сонра тахта чыхды вә бүтпәрәстлијин көкүнү кәсмәк үчүн тәдбирләр ҝөрдү. Аса «јәһудалылара ата-бабаларынын Аллаһы Јеһоваја ибадәт етмәји, Онун Ганунуна, әмрләринә әмәл етмәји бујурду» (2 Салн. 14:1—7). Һәбәш Зараһ 1 000 000 нәфәрлик орду илә Јәһудаја јүрүш едәндә Аса һикмәтли давранараг Јеһоваја үз тутду. Она белә деди: «Јеһова, Сәнин үчүн фәрг етмәз, Сән ҝүҹлүнүн дә, ҝүҹсүзүн дә дадына чатырсан. Јетиш дадымыза, еј Аллаһымыз Јеһова! Биз Сәнә архаланырыг». Асанын дедији бу ҝөзәл сөзләр ҝөстәрир ки, Асада Јеһованын һәм ону, һәм дә халгы хилас едәҹәјинә неҹә бөјүк әминлик вар иди. Аса Јеһоваја ҝүвәнирди, Јеһова да һәбәшләри мәғлуб етди (2 Салн. 14:8—12).
Ҝәнҹ гардашлар, сиз башгаларынын етибарыны газана биләрсиз
13 Разы оларсыныз ки, бир милјонлуг ордуја гаршы чыхмаг һәләм-һәләм асан иш дејилди, амма Аса бунун өһдәсиндән мүвәффәгијјәтлә ҝәлди. Башга вахт исә о, бунун гәдәр горхулу олмајан һүҹума — Исраилин мәнфур падшаһы олан Башанын һүҹумуна мәруз галанда, әфсуслар олсун ки, Јеһоваја үз тутмады, Арам падшаһындан көмәк истәди. Бу јанлыш гәрарынын агибәти пис олду! Јеһова Һәнани пејғәмбәр васитәсилә Асаја деди: «Сән Аллаһын Јеһоваја јох, Арам падшаһына архаландығын үчүн Арам падшаһынын ордусу сәнин әлиндән гуртулду». О вахтдан сонра Асанын башы мүһарибәдән ачылмады (2 Салн. 16:7, 9; 1 Пад. 15:32). Бурадан һансы нәтиҹәни чыхарырыг?
Ҝәнҹ гардашлар, сиз башгаларынын етибарыны газана биләрсиз
14 Тәвазөкар галын вә Јеһоваја һәмишә етибар един. Вәфтиз олунмагла сиз Јеһоваја иман етдијинизи вә ҝүвәндијинизи ҝөстәрмишдиниз. Јеһова да бөјүк мәмнунијјәтлә сизә халгынын арасында олмаг шәрәфи нәсиб етди. Инди ҝәрәк бундан сонра да Јеһоваја бел бағлајасыныз. Ола билсин, һәјати ваҹиб гәрарлар верәндә Јеһоваја етибар етмәк сизин үчүн асан олсун. Бәс диҝәр гәрарлар һагда нә демәк олар? Чох ваҹибдир ки, әјләнҹә, иш вә ҝәләҹәк мәгсәдләр дә дахил олмагла, һәр бир гәрарынызда Јеһоваја етибар едәсиниз. Өз ағлыныза ҝүвәнмәјин. Мүгәддәс Китабдан сизин вәзијјәтинизә ујғун олан принсипләри тапын вә бу принсипләрә әмәл един (Мәс. 3:5, 6). Онда Јеһованын гәлбини севиндирәҹәксиниз вә јығынҹагдакы баҹы-гардашларын һөрмәтини газанаҹагсыныз. (1 Тимутијә 4:12 ајәсини охујун.)
Һикмәт хәзинәсиндән инҹиләр
Јеһоваја сидги-үрәкдән ибадәт един!
7 Һәр биримиз үрәјимизи тәһлил етмәлијик, ҝөрәк, биз дә Аллаһа там садигик? Өзүнүздән сорушун: «Мән Јеһованы разы салмаг, пак ибадәти дәстәкләмәк вә Аллаһын халгыны пис тәсирдән мүдафиә етмәк үчүн гәти аддымлар атмаға һазырам?» Тәсәввүр едирсиниз, нәнәси Мәкаһа, мәликә анаја гаршы чыхмаг үчүн Асаја нә гәдәр ҹәсарәт лазым иди?! Чәтин ки сиз һәјатда Мәкаһ кими бир инсанла растлашасыныз, амма Аса кими ҹәсарәтли олмағы тәләб едән вәзијјәтләрлә үзләшә биләрсиниз. Мәсәлән, аилә үзвләриниздән бири вә ја јахын достунуз ҝүнаһ едиб төвбә етмәдији үчүн јығынҹагдан кәнар олунарса, неҹә давранаҹагсыныз? Онунла үнсијјәти кәсәҹәксиниз? Үрәјиниз сизи нәјә тәшвиг едәҹәк?