Јеһованын габагҹадан дедикләри һәјата кечир

«АЛЛАҺ Мәнәм, башгасы јохдур, Мәнәм Аллаһ, Мәнә бәнзәри јохдур! Ахыры әввәлдән, баш вермәмиш һадисәләри әзәлдән билдирән... Мәнәм» (Јешаја 46:9, 10). Бу сөзләри ҝәләҹәји дәгигликлә хәбәр вермәјә гадир олан Јеһова Аллаһ дејир.

Инсанын ҝәләҹәји дәгигликлә сөјләјә билмәмәси һамыја бәллидир. Мүгәддәс Јазылар пејғәмбәрлик китабы олдуғу үчүн, һәгигәти ахтаран бүтүн инсанлар тәшвиг олунмалыдырлар ки, онун мүәллифинин Аллаһ олуб-олмадығыны арашдырсынлар. Ҝәлин Мүгәддәс Китабын артыг јеринә јетмиш бәзи пејғәмбәрликләрини арашдыраг.

Гәдим сивилизасијалар

Аллаһ габагҹадан демишди ки, Бабил әбәдилик мәһвә уғрајаҹаг, һәмчинин Едом, Моав, Аммон да һәмишәлик јох едиләҹәк (Јеремја 48:42; 49:17, 18; 51:24-26; Авдија 8, 18; Сефанја 2:8, 9). Бу милләтләрин бүтөв бир халг кими јох олмасы Аллаһын пејғәмбәрлик Кәламынын доғрулуғуну сүбут едир.

Әлбәттә, һансыса бир халгын, һәм дә гүдрәтли бир халгын ахырда јох олаҹағыны габагҹадан демәјин мүмкүн олмасына кимсә шүбһә едә биләр. Анҹаг буна шүбһә едәнләр нәзәрә алмырлар ки, Мүгәддәс Китаб бу барәдә гысаҹа данышмагла кифајәтләнмир. Мәсәлән, орада Бабилин неҹә сүгута уғрајаҹағы тәфәррүаты илә тәсвир олунур. Шәһәрин мидијалылар тәрәфиндән зәбт едиләҹәји, истилачылара Кирин башчылыг едәҹәји вә шәһәри мүдафиә едән чајларын гурудулаҹағы Мүгәддәс Китабда габагҹадан дејилмишди (Јешаја 13:17-19; 44:27–45:1).

Мүгәддәс Китаб һәр мәғлубијјәтә уғрајан халгын вә ја милләтин һәмишәлик јер үзүндән силинәҹәјини сөјләмәјиб. Әксинә, Аллаһ Јерусәлимин бабиллиләр тәрәфиндән јерлә-јексан едиләҹәјини дејәркән, шәһәрин јенидән бәрпа едиләҹәјини хәбәр вермишди, бахмајараг ки, бабиллиләр һеч вахт өз әсирләрини азад бурахмырдылар (Јеремја 24:4-7; 29:10; 30:18, 19). Аллаһын бу сөзү јеринә јетди. Јәһудиләрин нәсли бир халг кими индијәдәк мөвҹуддур.

Сонра Јеһова Мисирин дүнја империјасы кими сүгута уғрајаҹағыны, анҹаг ‘сонра әввәлләр олдуғу кими адамларын јенә Мисирдә јашајаҹағыны’ демишди. Вахт кечдикҹә, бу гәдим дүнја империјасы ‘зәиф бир падшаһлыға’ чевриләҹәкди (Јеремја 46:25, 26; Језекел 29:14, 15). Бу сөзләр дә доғру олду. Бундан әлавә, Јеһова Јунаныстанын бир дүнја империјасы кими сүгута уғрајаҹағыны хәбәр версә дә, һеч вахт бу халгын әбәдилик мәһв олаҹағыны демәмишди. Мәһв олаҹаглары хәбәр верилән халгларын јох олмасы, мәһви һаггында һеч бир сөз дејилмәјән халгларын исә индијәдәк мөвҹуд олмасындан нә өјрәнирик? Аллаһын Кәламындакы пејғәмбәрликләрин һәгиги вә етимада лајиг олдуғуну.

Һејрәтамиз тәфәррүатлар

Јухарыда гејд етдијимиз кими, Јеһова Бабилин дармадағын едиләҹәјини әтрафлы тәсвир етмишди. Ејнилә, «Језекел» китабында Сурун јерлә-јексан едиләҹәји пејғәмбәрлик едиләркән онун дашларынын, тахталарынын вә төкүнтүләринин ‘суја атылаҹағы’ дејилмишди (Језекел 26:4, 5, 12). Бу пејғәмбәрлик б. е. ә. 332-ҹи илдә јеринә јетди. Бөјүк Исҝәндәрин ордусу Сурун ишғал едилмиш гурудакы һиссәсинин дағынтылары илә онун ада һиссәсинә бәнд салды, сонра шәһәрин ада һиссәсини дә зәбт етди.

Даниел 8:5-8, 21, 22 вә 11:3, 4 ајәләриндәки пејғәмбәрликдә дә чох гүдрәтли ‘Јунан падшаһы’ һаггында мараглы тәфәррүатлар вар иди. Бу һөкмдар өз һакимијјәтинин чичәкләндији бир вахтда өләҹәк вә падшаһлығы онун нәслиндән олмајан дөрд нәфәрин арасында бөлүнәҹәкди. Бу пејғәмбәрлијин јазылмасындан 200 илдән чох вахт кечәндән сонра һәмин гүдрәтли падшаһ Бөјүк Исҝәндәр олду. Тарихдән өјрәндијимиз кими, Исҝәндәр вахтсыз өлүр, империјасы исә онун нәслиндән олмајан дөрд сәркәрдәси арасында бөлүшдүрүлүр.

Тәнгидчиләр иддиа едирләр ки, бу пејғәмбәрлик һадисәләрин баш вермәсиндән сонра јазылыб. Анҹаг ҝәлин јухарыда «Даниел» китабындан ҝәтирилән парчаја јенидән нәзәр салаг. Пејғәмбәрлик бахымындан орадакы тәфсилатлар гејри-ади ҝөрүнүр. Јох әҝәр бу, пејғәмбәрлик кими гәләмә верилән тарихдирсә, онда сизә елә ҝәлмирми ки, һәддән артыг чох тәфәррүат бурахылыб? Әҝәр Исҝәндәрдән сонра јашајан бир фырылдагчы охуҹуларыны ујдурма пејғәмбәрликлә валеһ етмәк истәјирдисә, бәс нә үчүн Исҝәндәрин өлүмүндән дәрһал сонра онун ики оғлунун өз һакимијјәтини бәргәрар етмәјә чалышдығыны, лакин суи-гәсд нәтиҹәсиндә өлдүрүлдүјүнү јазмајыб? Нәјә ҝөрә о, сәркәрдәләрин дөрдүнүн дә Исҝәндәрин империјасынын мүхтәлиф һиссәләриндә өзләринин һакимијјәтини бәргәрар едәнә кими онилликләр кечдијини гејд етмәјиб? Нә үчүн гүдрәтли падшаһын вә онун дөрд сәркәрдәсинин адыны чәкмәјиб?

Фактлары арашдырмадан ҝәләҹәк һадисәләри габагҹадан демәјин гејри-мүмкүн олдуғу гәнаәтинә ҝәлән шәхсләр Мүгәддәс Китаб пејғәмбәрликләринин һадисәләр баш вердикдән сонра јазылдығыны узун мүддәтдир ки, иддиа етсәләр дә, һеч ҹүр сүбута јетирә билмирләр. Онлар Мүгәддәс Китабы Аллаһын Кәламы кими гәбул етмәдикләриндән һәр шеји инсан нөгтеји-нәзәриндән изаһ етмәјә чалышырлар. Буна бахмајараг, Аллаһ Мүгәддәс Китабын мүәллифинин Өзү олдуғуну сүбут етмәк үчүн пејғәмбәрликләри кифајәт гәдәр тәфәррүаты илә верибa.

Мүгәддәс Китабын мүәјјән пејғәмбәрликләри вә онларын јеринә јетмәси үзәриндә дүшүнмәјә вахт ајырсаныз, иманыныз мөһкәмләнәҹәк. Нә үчүн Мүгәддәс Китабын һансыса пејғәмбәрлијини арашдырмајасыныз? Бу бахымдан «Мүгәддәс Китаб әслиндә нә өјрәдир?» китабынын 200-ҹү сәһифәсиндәки ҹәдвәл сизин үчүн фајдалы ола биләрb. Бу мәсләһәтә әмәл етмәк гәрарына ҝәлсәниз, гој мәгсәдиниз иманынызы мөһкәмләндирмәк олсун. Материалы тәләсик охујуб гуртармаға чалышмајын. Әксинә, Јеһованын габагҹадан дедикләринин дәгигликлә һәјата кечмәси үзәриндә миннәтдарлыгла дүшүнүн.

[Һашијәләр]

[24-ҹү сәһифәдәки чәрчивә/шәкил]

ВАҸИБ ПРИНСИПЛӘР

Үзәриндә дүшүнмәли олдуғумуз бир шеј дә вар. Дүнја империјаларынын јаранмасыны вә сүгута уғрамасыны белә дәгигликлә сөјләјән Аллаһ, һәм дә Мүгәддәс Китаб васитәсилә ваҹиб принсипләр тәгдим едир. Онлардан бәзиләри ашағыдакылардыр:

Инсан нәји әкәрсә, ону да бичәр (Галатијалылара 6:7).

Вермәк алмагдан даһа бөјүк бәхтијарлыг ҝәтирир (Һәвариләрин ишләри 20:35).

Хошбәхтлик руһани еһтијаҹларын өдәнилмәсиндән асылыдыр (Матта 5:3).

Бу принсипләри һәјатынызда тәтбиг етсәниз, онларын хошбәхтлик вә уғур ҝәтирдијинә әмин олаҹагсыныз.

[22, 23-ҹү сәһифәдәки шәкилләр]

Аллаһын Кәламында бу сивилизасијаларын һәмишәлик мәһв олунаҹағы дејилмишди...

ЕДОМ

БАБИЛ

...анҹаг бу сивилизасијаларын мәһв олунаҹағы дејилмәмишди

ЈУНАНЫСТАН

МИСИР

[Иҹазә илә]

Pictorial Archive (Near Eastern History) Est.

WHO photo by Edouard Boubat

[23-ҹү сәһифәдәки шәкилләр]

Бөјүк Исҝәндәр