8. Örnək

MƏNASI

Örnək qoyan valideynlər öyrətdiklərinə uyğun yaşayır. Məsələn, qapıya gələn insanla danışmaq istəməyəndə, uşağınız «de ki, evdə deyiləm»,— dediyinizi eşidibsə, ondan dürüst olmağı gözləməyin.

«Belə bir deyim var: “Etdiyim kimi yox, dediyim kimi et”. Amma bu deyim uşaqlar üçün keçərli deyil. Onlar süngər kimi dediyimiz və etdiyimiz hər şeyi özlərinə çəkirlər, öyrətdiklərimizə uyğun davranmasaq, bunu mütləq bizə deyəcəklər» (Deyvid).

MÜQƏDDƏS KİTAB PRİNSİPİ: «“Oğurlama” deyə təbliğ edib niyə özün oğurluq edirsən?» (Romalılara 2:21).

ZƏRURƏTİ

Valideynlər öz övladlarına başqalarından, hətta yaşıdlarından daha çox təsir edir. Buna görə də siz öyrətdiklərinizə uyğun davranmalısınız, çünki uşaqlarınıza düzgün yol göstərməkdə əsas yeri siz tutursunuz.

«Uşağa bir şeyi yüz dəfə deyirik eşitmir. Amma özümüz dediyimizi bir dəfə etməyən kimi, o dəqiqə üzümüzə vurur. Uşaqlar etdiyimiz hər şeyə, hətta ağlımıza gəlməyən şeylərə də diqqət yetirirlər» (Nikol).

MÜQƏDDƏS KİTAB PRİNSİPİ: «Yuxarıdan nazil olan hikmət... riyakarlıqdan uzaqdır» (Yaqub 3:17).

TƏTBİQİ

Meyarlarınızı gözdən keçirin. Siz hansı növ əyləncələrə meyillisiniz? Həyat yoldaşınız və uşaqlarınızla necə rəftar edirsiniz? Kimlərlə dostluq edirsiniz? Başqalarına qarşı diqqətcilsinizmi? Xülasə, uşağınızda görmək istədiyiniz keyfiyyətlər sizdə var?

«Ərimlə mən uşaqlarımızdan özümüzün riayət etmədiyimiz meyarlara riayət etmələrini gözləmirik» (Kristin).

Səhvlərinizə görə üzr istəyin. Onsuz da uşaqlarınız kamil olmadığınızı bilir. Səhviniz olanda həyat yoldaşınıza və uşaqlarınıza «üzr istəyirəm» deməklə, təvazökarlıq və dürüstlük sahəsində nümunə qoyacaqsınız.

«Gərək uşaqlarımız səhvlərimizi etiraf etdiyimizi və bu səhvlərə görə üzr istədiyimizi eşitsinlər. Əks halda, onlar səhvlərini ört-basdır etməyi öyrənəcəklər» (Robin).